繼續亞四

最近少寫BLOG, 因為實在好忙... 兼且妹仔放假, 霸住電腦, 冇機會坐埋位...

其實, 都係繼續亞四生涯, 剛剛妹仔出左街, 得閒自己染下髮, 點知妹仔一個CALL, 叫我攞野落街俾佢... 仲話叫我包住個頭落去... 我睬佢都傻... 不過, 大好的染髮休閒時間, 又要匆匆完結, 跟住, 換衫, 行出街...

一年容易, 又到聖誕... 妹仔的中四(G10)生涯, 又過了一半... 過了這半年, 妹仔似乎好肯定, 自己不是文人, 她對數學和理科都比較得心應手... 棄文從理, 似乎已成定局...  佢仲話, 必要之時,
12班之時加修一科PHYSICS, 湊夠學分...

佢又幾乎已經確認, 自己會去加拿大...

 明年11班的科目基本已經敲定... AP CHEMISTRY, AP ECONOMICS (MICRO + MACRO), AP STATISTICS + PRE-CALCULUS..

12班一年, 就會加 AP BIOLOGY, AP CALCULUS.. 捱得住, 就再加.. AP PHYSICS..

至於, 語文一科, 則隨隨便便, 意思意思算了...

捨得, 吾捨得

家長一直覺得囡囡反叛, 經常一言九頂... 囡囡話要出國讀書, 家長便樂於成就..  終於, 英國的中學收了囡囡, 真的要準備離去.. 這時, 家長覺得不捨了..

家長說: 我以為自己已有充足心理準備, 原來, 依然極為不捨...

我說 : 這是正常不過的...

中國人都說, 兒女要"承歡膝下"...  膝下... 就是要在自己的身邊...  老實說, 做亞媽, 又怎會捨得...

不過,  總會有這麼的一天...  我都在做心理準備...

升學的準備

我們一些家長感覺,  國際學校的學生對入大學的準備, 比本地學校的學生為早...

妹仔今年G10 (即中四), 大部份同學已經很慎重地選科 (因為與本地學校的制度不同, 他們每年都要選科.. 數學都可以選擇不同的科目, 如: CALCULUS, STATS, SCIENCE亦有很多不同的選擇.. ) 他們會考慮自己的興趣和能力, 亦慎重地思考大學學科的取向 (文或理, 專業或藝術..)... 總之, 同學這一類的討論很多.. 又因為每一個國家的要求不同, 他們亦要考慮某一公開試的不同影響... (SAT或ACT或AP... 等.. )

 比較起一些本地學生, 似乎到中五都依然沒有太慎重地考慮入大學的條件或要求.. (我最近剛提醒一位家長 (也是本地非直資名校), 如果要考外國大學, 今年暑假前, 就應該考iELTS), 不過, 他對這考試都不清不楚... 好像聽都未聽過...  我提佢, 如果報外國大學, 中六的9-11月就要報名, 不要拖到暑假..

我個人覺得, 國際學校在這方面, 做得比較好...因為從G9 (中三)開始, 就已經向學生灌輸, 要為升學做準備... 亦安排很多講座, 包括叫一些在大學的師兄師姐, 回校向各同學教路..

所以, 妹仔的一班同學基本上, 已經有報讀大學的準備... 當然, 當中有一些有大志的同學,
已經開TURBO, 努力讀書, 準備考入心儀的大學或學科..


PS: 我亦知道有個別本地學校, 對學生的準備, 也是做得比較好...當然, 這些學校也就是名校...

一年兩度首爾行

又去了首爾... 上星期趁妹仔學校有假期, 兼閒日, 機票平, 又去了首爾一轉... 當然又是SHOPPING團... 別無其他..

不過, SHOPPING真勞累... 早上9點出門, 食早餐, 直落去SHOPPING, 直到晚上8-9點返回酒店, 放下戰利品, 妹仔仲話要行, 再夜遊明洞, 返去休息都10點多... 我本來已經痊癒的足底筋膜炎, 又隱隱作痛... (馬上又拉筋, 又搽油)..  連妹仔自己都話, 行到大腿內側抽筋, 兼腰痛, 都仲要行... 真係SHOPPING狂...

 今次去首爾,  遇上BLACK FRIDAY WEEK, 即是美國感恩節後的購物期, 四圍都大減假... 我都變成大媽, 拉個喼去行, 冇辦法, 拉喼真係好行好多... 尤其在商場內, 簡直毫不費力... 如果不是這樣, 恐怕, 我連肩周炎都翻發...

今次, 除左一大堆護膚品, 仲有一大堆冬天衫, 三對鞋...

總之, 又大出血...

通識科

妹仔就讀的國際學校沒有一科叫做通識科, 不過, 依我看來, 他們對時事的興趣,
遠比本地學校高...

就像今天美國大選, 妹仔一放學, 就大叫TRUMP來了... 選前, 她對候選人已經有認識.. 而學校今天, 全程直播選舉情況... 故此, 學生在課堂之間, 或課堂之中, 都討論選舉..

 當TRUMP選出來, 有老師說: What a shame!! 但是, 亦有老師支持..

有同學看見OHIO變成紅色, 亦馬上不太高興...


妹仔回來, 問我, 點解TRUMP會嬴?? 他歧視這麼多人..

 我答 : 有可能, 那些被歧視的人沒有出來投票, 他們多數是比較窮, 不明白選票的重要..

我覺得, 作為中學生, 會問這些問題, 是很學校教育的成功表現..

減肥

老實說, 沒有見過天天叫減肥的人能減肥... 通常減肥成功的人, 是有一天, 忽然, 你發覺他瘦了很多...

在跑步班, 看見很多減肥成功的人... 20磅, 30磅...甚至60磅...  然後, 在其他地方, 又看見很多天天叫要減肥, 要用不同方法減肥的人... 一年兩年之後, 依然叫著...

做人就是這樣...
減肥成功的人不是因為特別有毅力... 只是身體出了警號... 逼住要減..

沒有減成功的... 因為還未水浸眼眉, 所以, 只是嘴巴說了, 努力講了, 就當做了..

五十歲後, 減肥通常容易成功, 無他, 身體毛病多, 非減不可..  年輕一點的, 身體還好, 所以, 講講就好了..

PS: 今日見一位朋友, 跟我一樣年紀, 早餐還吃公仔麵... 唉... 別再苛待自己的身體了.. 

又功虧一簣

話說一個月前, 幾個傻C9去行山, 由鯽魚湖去榕樹澳, 想行榕北古道, 豈料問路被點, 在山中迷路, 幾經轉折爆林, 才可安全下山..

今日, C9隊又出發, 心有不甘, 再從鯽魚湖出發, 諗住邊度跌低, 邊度起番身... 於是,
大家做足功課...

一路上, 都揾到條路, 唔會再錯.. 點知行到一半, 見有路牌, 指上嶂上, 而時間尚早, 便隨路牌走嶂上, 行天梯, 坡度都幾斜... 天梯又長... 路中見一位師兄, 話嶂上有豆腐花吃, 馬上提起精神, 諗住上到去, 吃豆花...

豈料又到一分岔道, 一條直上, 一條平路.. 直上果條亂石一堆...  平路似乎幾好行.. 於是, 大家商量一會, 決定行平路.. (由於上斜一大段, 都唔想再上... 加上冇路標... )... 便隨山邊平路而行, 諗住應該都係去同一目標...

怎料, 行行重行行, 不見嶂上平原, 亦不見豆花... 我地又功虧一簣, 行到死死下, 都係錯過嶂上.. 唯一幸事, 係沒有行錯, 終於到終點.. 榕樹澳..

C9團唯一寄望下次, 再遊走嶂上... 又從錯處中學習, 錯路中揾番條好路啦..


PS: 今日陽光充沛, 比想像中炎熱... 下星期, 氣温降, 天氣更爽, 正呀..

見家長...

上星期五學校家長日, 我返去見幾位學科老師... (妹仔的學校, 可以約見所有學科老師, 不過,
因時間關係, 我只約了四位...)

 基本都沒有大問題... 我見了CHEM, MATHS, HISTORY和中文..  除了中文之外, 其他都只了三幾分鐘, 打個招呼就走..

今年, 妹仔的中文老師要求比較高, 她說, 中文作文不妥當, 寫得無頭無尾... 不清不楚...

我看了她的作文, 也知道妹仔的中文是有限公司... 所以, 好與不好, 只取決於老師的要求.. 故此, 也不稀奇..

回來跟妹仔講, 她當然不滿... 通常, 青少年都不會接受別人的批評... 不過, 我估計, 佢都心知肚明..

妹仔讀書還算主動勤力, 所以, 我不太擔心..  只是, 她的目標低, 不會向難度挑戰...  (其他朋友仔, 志向高, 目標都是世界級名校.. )... 不過, 也罷, 佢高興就算了..


妹仔都話: 一班女同學目標比較清晰, 亦比較上進... 所以, 今年普遍成績都提高了..

神奇女俠

昨晚陪妹仔去上體能班, 悶蛋之際, 聽到一名女士與兩位男士的對話...

女士自稱有一位讀中五的女兒, 所以, 年紀都跟我差不多, 五十歲左右.. 但身形勁FIT..

女士說, 她參加了一個超級三鐡比賽... 游泳3公里, 單車180公里, 最後跑一個馬拉松...  共用了14小時左右...

兩位男士都嘩然!! 佩服不已!! 男士話 :踩完單車, PET PET都痛, 雙腳都只識得轉.. 點可以再跑馬拉松!!

女士繼續講, 佢話, 自己只係由2010年開始跑步... 以前是個只會打麻雀同飲酒的女人.. 肥到有個男人一樣的啤酒肚, 終於, 忍無可忍, 下定決心減肥..

嗯... 真係勁... 女人真係恐怖... 隨時變神奇女俠... 

素菜湯

妹仔嚴格實行多菜少肉的飲食, 晚飯都基本上是只吃素菜湯一鍋, 所以, 我都要努力找素菜湯食譜, 務求令佢飲食均衡, 又要多D花款... 真係非常難度高...


(1) 蕃茄洋葱甘荀豆腐湯 - 豆腐含蛋白質, 可作補充.
(2) 海帶甘荀菜粒豆腐湯 - 海帶營養高
(3) 合掌瓜雪耳栗子湯 - 栗子補充澱粉質, 雪耳護膚
(4) 節瓜淮山蓮子茨實湯 (或用紅棗圓肉) - 菜湯太寒涼, 有時要補下
(5) 紅菜頭洋葱蕃茄湯

另外, 菜湯多數加薑, 怕太寒涼...

 總之, 日日都要煲, 真係買到唔知買乜, 依家知道點解老媽子日日呻, 買餸都買到唔識買...

仲有, 日日都要做午餐, 連早餐都係多菜無肉 (只有烚蛋).. 一日三餐都係菜... 都要唱番首... 日日都食菜.. 餐餐都食菜...日日都係菜... 餐餐都係菜... 

 現在, 繼續試不同菜湯食譜....餐餐都係菜...

多風雨的十月

天氣都幾反常... 去年秋季極炎熱, 記得到12月都穿短袖衫..  今年秋季就極多風雨, 剛剛一場黑雨, 真係驚天動地, 過兩日又話打風..真係幾時先可以回復秋高氣爽的日子..

這兩天都幾好彩, 早上出門, 下午最大雨之時, 已經安坐家中... 否則, 真係論盡..

現在預算星期五坐定定...妹仔就期望可以放多一日假...不過, 佢放假, 等於我冇假放...

雖然, 打工仔同學生哥都望打8號, 我就希望大家最緊要安全至上... 平安大吉..

煮食

有人話, 如果出國讀書, 一定要學識煮食, 起碼當外國食物極難食之時, 都可以做點東西醫肚.

妹仔最近都經常自己煮食, 因為佢想做D健康素食, 所以都要親自下廚... 我亦由得佢, 總之, 佢搞到廚房大混亂都由得佢..

 最近, 佢煮素菜湯, 醎麥皮...好似都煮得OK, 冇食壞...

唯一最辛苦, 就是餐餐都要我大清洗, 做死亞四..

暑假前, 朋友送的FOOD PROCESSOR, 妹仔都幾乎用到盡... 真係冇浪費, 當然, 又係果句, 做死亞四... 日日不停咁洗...

十公里賽

今日, 我參加了人生第一個十公里長跑賽事... 幸不辱命... 跑畢全程... 真係跑畢全程, 中途冇吞泡行路, 除左在水站飲水補充, 基本都是跑.. 跑..跑...最後以1小時11分完成... 每公里約為7分8秒, 比我預計的8分鐘快了52秒, 是個人最佳速度...

如果在一年前, 我根本不會想像自己能跑一小時.. 最初, 我寫俾教練的跑步目標, 只係能持續跑15分鐘... 當時, 教練話, 咁可能一堂已經OK... 不過, 我第一堂, 未跑完就中暑, 發燒發左3日.. 唉... 死下死下... 逼自己繼續... 跑下跑下, 學左一年多... 終於跑第一個10K... 都真係一個里程...

 50歲先開始學人跑步... 報名賽跑都幾乎入元老隊...


所以,
如果我能跑, 人人都可以...

 亞女成績更好...只係跑左1小時零分20秒.. 都係個人最佳時間..佢目標更高,
下年要跑半馬..

SERVICE PROJECT

妹仔的學校有一個PROJECT, 要求同學組隊, 搞一個義工PROJECT...
同學要自己度計仔, 寫PROPOSAL, 並且付諸實行... 妹仔來問我, 點算??

我話, 大小姐, 做義工唔係話做就做... 你仲要自己計劃, 你想去探訪, 義務教學, 都要有機構睬你先得... 你地仲只係一個中學生... 仲要只做幾個月... 人家真係冇咁得閒應酬你!!

於是, 我話, 最容易, 就係去拾垃圾... 你地可以計劃, 每星期去一個地方拾垃圾,咁最容易... 當然, 妹仔非常不滿意我這個答案... 佢唯有睇下其他組員, 其他家長, 有D好少少的關係, 可以揾個機構俾佢地做下義工...

老實講, 學校這一份功課, 對他們來說, 是非常不容易... 不過亦係非常好的一份功課,
實在都真係要好用心, 先可以做得到...


我問佢,
以前D師兄做乜, 佢話有一個做得比較好, 就係安排紅十字會來學校捐血... (IDEA都吾錯, 可行性又高... )

準備不足

今日行山, 揀了一段路(鯽魚湖-榕樹渙), 有BLOGGER話HEA行.... 點知行錯路.. 往山上走, 愈上愈高, 山路亦愈行愈難... 同隊有體力較差的... 決定回頭下山之時, 竟又行錯路... (山路真很難認... )....

我諗過要報警求助... 不過大伙不太願意... 還幸下山之後, 發現行錯, 又再上山.... 終於揾對路, 可以原路落山... 返回起點... 離開...

都幾驚險, 因為行錯路, 我跳左落大石下面... 簡直係亂草叢, 完全認不得路... 不過,
當時不算太擔心... 覺得大不了, 就是CALL直升機來救... 見下報紙,
話幾個傻婆被困山上....


不過,  經此一役, 以後真要準備更足
.....

孤獨老人

老媽子忽然話 :自己變左孤獨老人...

慘... 因為麻雀腳不合群, 幾十年來, 每週的耍樂活動散了 (另外, 死的死了, 病的病了.. )...  其實, 每個週末, 有一項喜愛的活動, 儘管只是一週一次, 都是有個期待, 有個盼望... 故此,  都明白佢心情...

佢話 : 其實都想揾D年紀差不多的老朋友傾下計.... (雖然佢都有一班茶友,但茶友年紀較輕, 只得60幾, 人家玩SMARTPHONE, 老媽子唔係好識... )... 但係, 又唔想去老人中心, 做義工又太老喇...

我都冇野可講... 因為只能用一個同理心, 明白一下佢心情... 事實上, 佢都知自己不算孤獨, 因為與家人同住, 天天有人在家出入, 亦有陪佢去飲茶... 不過, 佢因為腳痛, 唔行得耐, 所以, 出去行街, 都不能行太多... 故此, 常常在家... 

其實, 真係要好好準備老年的日子...  有很多事情, 都要盡早開始, 做運動, 做義工, 建立新朋友圈, 保持心境年輕, 保持與年輕一輩的話題...  沒有一件事情, 可以想做就做...  (千萬不要以為做義工, 可以話做就做... 很多團體都有要求... 故此, 50幾歲就要開始... 還要趁自己未算太頑固, 太不合群時, 就要開始... 否則, 真係愈老愈萌塞... 自己都係咁話自己... ) 

PS:  五十歲前, 身體只是十年一大變... 六十歲, 可能係年年不一樣... 年過七十,身體是日日都不一樣..... 有時候, 都要樂觀地接受自己的改變... 才可以開開心心活到BYE BYE的一天..

網購

我其實好少做網購, 因為都想睇下, 先決定買... 不過, 因為妹仔想買健康食品, 所以, 上左網, 發現網購平好多...

妹仔買左一堆... 吾駛幾日, 已經送到上門... (順豐), 真係超方便...亦係原廠正貨..

今日, 某師奶話, 上淘寶買名牌山鞋, 平好多... 我話, 會吾會係假貨? 佢話, 吾會, 係名牌在淘寶開的店.... 叫我先去實體店試左, 再淘番來.... 咦... 都幾好喎...  

筋疲力盡

妹仔上體能班, 做足一小時鍛鍊, 我見到都嫌辛苦... 妹仔做完, 當晚話 : "雙手雙腳攰到貼住張床!!"

我話 : 你就係鐘意呢種筋疲力盡的感覺丫嘛!!

妹仔答 : 係呀!!

真係冇佢符... 完全體育狂熱... 佢話喎 : 跑步可以燒脂, 但係做體能, BUILD肌肉, 肌肉可以有更佳的燒脂功能... 所以, 兩樣都要做!!

第二晚, 同妹仔一齊上跑班, 見到個跑班同學, 佢都話 : 其實一定要練CORE, 因為要進步, CORE肌肉好重要... 佢仲猛游說我, 叫我同妹仔一齊去上體能... 

考慮下.. 考慮下...

第三晚 (即係今日), 妹仔去操水... 返來, 妹仔話 : 完全冇力游... 好攰!!

我話 : 咁樣, 唔好上體能啦...

妹仔話 : 亞SIR話左, 第三日係最痛最攰, 遲下會適應.... (佢堅持要上體能!!)

我都服左佢!!  以前我就逼佢操水, 依家, 勸佢做少D, 佢都唔肯, 依家D運動量仲大過以前... 仲要連續3晚...

PS: 其實, 唔止3晚, 之前一晚, 我地自已落街跑, 佢都跑左8公里, 足足一個鐘頭.. 明日又話落GYM健身... 係一連5日, 都做高強度運動...  (第一日, 跑步一小時; 第二日, 體能一小時; 第三日, 上跑班, 2小時; 第四日, 操水, 1.5小時; 第五日, 做GYM, 未知幾耐... )

服左!!

功課

始終要幫妹仔做中文功課... 妹仔最近的兩個中文PROJECT, 都要我跟手... 無辦法... 不過, 都算好喇... 佢自己揾左料, 我幫佢濃縮啫...

進入十年級, 對入大學要做更多準備... 因為並非考DSE, 全球咁多大學, 每一所都有少少不同, 每一學科都有可能有不同的要求... 所以, 就要上網, 睇定心儀大學, 心儀學科的入學條件...

當然, 亦要準備公開試, 和校內成績... 外國大學 (尤其美加的大學), 必睇校內成績, 還有課外活動, 跟香港的要求很不同... 故此, 每一樣東西都要做好D... 要諗下, 自己張APPICATION可以寫D乜...

我叫妹仔下學年, 要參加泳隊... 雖然, 游得吾好, 但總算是可以寫下... 明年是決定性的一年喇... 

PS: 等緊睇立法會選舉結果, 今年真係大混戰, 兼大混亂...

工作

大侄畢業一年後, 終於揾到工, 因為佢想留在上海, 而攞香港身份證在上海揾工, 實在不容易... (因為很多公司不想麻煩, 搞不同的社保...我都不太明白, 類似強積金的東西.. ).. 不過, 幾經辛苦, 終於可以在本星期上班...

他所找到的工作, 可能並不是太理想, 但總要先做一下... 否則, 再坐一段時間, 就更難揾工... 今次在上海, 他找到一份CALL CENTER的工作... 因為公司需要兩文三語 (英文, 普通話, 廣東話), 所以, 就聘請了他.. 薪酬於內地來說, 已屬不錯... 

希望, 他吸收一下經驗, 努力工作... 再轉往更佳的工作崗位...

唉... 這個年頭, 聽到後生仔揾到工, 開始踏出社會, 真是超高興.... 今時不同往日, 大學生成行成市, 能開步走出來, 大家都拍爛手掌了... (我老媽子(嫲嫲開心到不得了)... 大家都好高興... )

忙...

妹仔開學後, 都幾忙... 忙功課... 日日都見佢做數學... 做到唔識, 就嘈嘈閉... 又話要問我... 我望兩眼, 好似唔識呢D野喎... 好彩依家有INTERNET, 就叫佢上網查下... 靠我就死得啦...

妹仔仲話, 今年不再游學校泳隊.... 因為太忙, 冇時間... 我都勸佢游, 因為報外國大學, 課外活動都有一定比重... 不過, 佢都係話太忙喎...

今年, 妹仔的課外活動, 操水一晚, 長跑課一晚, 體能課一晚(新加).. 所以, 佢話冇時間游校隊... 我叫佢去體能課可以HEA, 唔得閒就唔上... 不過, 佢話好想上體能課... 好鐘意上體能課... (我都唔知有乜好玩... ) ... 依家, 佢覺得操水冇挑戰 (尤其是校隊, 完全係玩水... )... 唉... 變左 "體育狂熱"... 

去年考完琴, 得閒左一排.... 今年又忙翻D... 由音樂人變運動人...

長跑亞SIR問, 點解唔同妹仔一齊上體能班...  咪搞!! 長跑已經死死下, 上體能直情只得 "吞泡"兩字... 吞足1小時, 無謂啦...  妹仔唔同, 佢真係做足...

PS: 妹仔知道 AUNTIE 外出, 身體欠佳, 提議話, 去捉POKEMON, 有趣味之餘, 又可以當運動...  強身健體!!  

郎平

郎平是我年青時的偶像... 當年非常喜歡睇中國女排, 郎平一輩人之後, 中國女排沒了靈魂... 到今天, 終於再由郎平帶領, 重現雄風..

 因為實在都很喜歡郎平, 所以, 她的很多訪問, 我都有看... (總之, 看見了, 就看... )

她真是超級努力... 已經打到一身傷患, 依然不斷努力... 甚至到做教練, 都做到五勞七傷... 實在, 我都覺得她身體實在是很難撐下去...

不過, 她還是硬幹下來了... 她的成績實在是不同凡響的... 由球員到教練... 由中國隊到美國隊, 再回來中國隊...

厲害!! 真要向她敬禮!!

暑假完結

妹仔上星期已經上學, 不過, 在我家來說, 今天, 所有遠來的小侄, 才全部離去... 所以, 才真正算是暑假完結...  輕鬆了...

妹仔上學, 第一星期已經有功課...

她忽然對我講, 媽咪, 我考ACT.. 不考SAT了...  (兩個都是美國的公開試, 究竟有什麼分別, 我就不太清楚.. 可是, SAT是比較出名..  )

學校昨晚有個講座, 介紹這兩個公開試, 不過, 我沒有去... 其他家長很多都出席...  (只是, 我覺得, 還是由妹仔自己決定... 好好醜醜, 都要自己處理... 老師亦會輔導... )

忽然間, 妹仔又話,  決定三年都讀中文... (本來只需要讀兩年"外文", 而且已經考了AP CHINESE, 其實, 可以不再讀下去... 不過, 佢話老師話, 有一些有大學, 會要求學生讀4年外文, 否則不符合大學要求.... 佢只讀3年, 因為學校已經沒有再高級的課堂, 所以, 大學會接受這個解釋.)

總之, 妹仔話乜就乜... 我也樂得不清不楚.... 

菲比斯也拔罐

今日睇菲比斯游水, 見佢一身紅印... 原來係拔罐... D鬼佬唔知, 可能以為菲比斯被人打到一身瘀傷...

今次, 中華醫術真係揚威國際囉... 連飛魚都拔罐... 拔罐好過吃禁藥, 驗尿驗血都驗唔出... 不過, 明眼人, 一睇就知...

拔罐最好係可以去濕... 菲比斯年紀大, 新陳代謝冇班後生咁好, 所以, 拔罐去濕, 咁就幫佢攞多兩面金牌, 勁!!  中國國粹勁呀!!

我自己好似冇做過拔罐, 刮沙就間中會做... 有時候, 感冒唔清, 刮沙出一身汗, 反而會好翻..

最近去上中醫復康課, 亞SIR係推拿師... 都幾有用... 按下D簡單穴位, 都有幾好效果.. 上一課, 剛巧講拔罐... 佢話, 自己都可以做拔罐... 大陸有一種用手PUMP的拔罐, 安全易用, 適合自己在家中做...

另外, 佢又講, 好多病, 都係因為 "不通則痛", 中醫都注重 "通", 所以, 平日多做按壓, 保健效果甚佳..

最近, 因為跑步, 腳跟痛 (足底按摩師話係足底筋膜炎)...依家, 我每次跑完步, 或行得多, 返家一定自己用按摩球(小型)來做足底按摩... 然後用冰袋敷, 做得幾日, 就輕鬆好多... 又會用小搥, 搥打 "承山", "三陰交", 和"足三里"...  鬆腳兼保健...  (然後, 又再行過跑過... 週而復始... 不過, 痛感其實輕左... 比初期好得多.. )

PS: 想知道穴位位置, 可上網查... 資料都幾齊全... 

Piano Guy

妹仔今日返學, 收到學校一年一度的YEAR BOOK... 今年刊登了各位畢業生的去向... 作為學生家長, 當然最想知學校升大學的情況...

我對當中幾位畢業生, 特別留意... 其中一位, 是校內出名的鋼琴手... 從小就彈得一手好琴, 獲獎無數... (還精通 大提琴, 雙簧管... 最後一年玩埋敲擊... ).. 不過, 在他的畢業短文中, 他說: 雖然, 人人都知佢是PIANO GUY, 但音樂只是他的SIDE INTEREST, 不是CAREER...  他最終選擇了去美國讀 Electrical and Computer Engineering..

另一位有型的泳隊靚仔師兄, 則去了加拿大讀BUSINESS...

不過, 其他同學, 興趣廣泛...Design... Music... Movie.. 都有..

綜觀來說, 同學都入到不錯的大學... 像 : UCLA, HKU LAW, HKU Engineering, UT, UBC...

卡比...

夜晚黑, 妹仔話要出去捉POKEMON, 我又不想佢一個人單獨外出, 惟有陪佢行出去..

去一個附近好多櫻花的地方, 一個屋苑中的露天休憩處... 一去到, 真熱鬧...

隔離有對父子, 話 : 金魚出來了...

十秒鐘後, 妹仔手機果然出條金魚...妹仔嘆說 :我部手機都係慢, 人家出左十秒, 我部機先出.. (妹仔部機係新機, 雖然係大陸牌子, 都唔應該會太慢... 我估可能因為佢係蝸牛PLAN, 所以慢.)

忽然間, 有人大叫 "卡比獸"呀!!!  個場班人一齊大聲叫, 好鬼緊張... 妹仔話 : 你話係咪似暴動!!

都真係幾似暴動...

不過, 呢個遊戲有個好處... 大家都要出來週圍行, 有D人一家大細, 有D一PAIR... 行下運動下, 仲有番D天倫樂... 都係遊戲中的上品...

PS : 卡比獸係POKEMON入邊藍色, 肥肥地果隻... 係主角之一, 在卡通裡經常出現... 仲會成日用低音, 叫 : 卡比... 卡比.... 

PS:  我行左足90分鐘, 好慘呀...

音樂小天才

琴老師有一位學生, 被選入郎朗的Young Scholars Program. 小朋友現年十歲, 鋼琴造詣非凡... 不過, 正如每一位出色學生的背後... 都有三個主要成功的秘訣...

學生的天份, 和不斷的努力... 這努力是超乎想像的... 

一位好老師..

還有一位極度勤力的媽媽... 

都是缺一不可的...

銀髮債券

可惜我未夠年齡, 否則, 我一定去抽... 但是, 我身邊的老人家, 個個都睇不上眼, 有資格抽, 都唔抽... 包括我老媽子...

港元定期, 現在只得1厘...  銀債最低都2厘... 港元定期, 提早贖回, 要罰息... 銀債無這問題.. 單是這兩點, 已經值回票價.. (投資組合, 必有現金, 買銀債, 最抵... 政府係明益老人家... )

當然, 市場上有其他高回報產品, 包括股票... 但是, 現在風險不低... 公用股價高企, 除時輸股價... 未賺息, 先蝕本.... 其他外幣, 亦有風險... 美元強勢, 不知到幾時...

總之, 我苦口婆心, 講到口水乾, 都勸吾掂... 冇符... 

老人家

這個暑假, 老媽子特別忙, 亦特別開心....  因為, 兩大孫和兩小孫都返港, 連同妹仔, 一共五個孫... 於是, 日日忙到一頭煙...

妹仔話 : 亞婆都算係享緊福!!  (事因, 佢都見不少老人親戚, 日子過得不太開心.. )

無他, 老媽子擁有幸福老人的幾個重要特質.... 身體仍做得, 又肯做!! (肯郁肯做先得!)... 身邊有D錢, 又肯駛!! (有都要願駛先得!!)... 仲有明明眼寃, 都要忍得!! (囉囉唆唆就實唔得!!)

因為一堆人返港, 所以, 老媽子個麻雀窩冇左... 週末冇牌打, 又要出錢出力, 煮十人飯菜, 仲要見兩個大孫, 晚晚去到凌晨一兩點...  完全打亂佢生活節奏, 不過, 佢都唔敢出聲.... (只係日日在我面前哦... 一見班子孫, 只有四萬咁口, 做個YES婆... 冇符... 幸福晚年都要付出架!!)

抬頭一看, 自己都快將步入晚年.. (雖然話依家60歲都係中年..).  但事實是, 抬頭一看, 不過幾年後的事.... 所以, 見賢思齊, 都要向老媽子好好學習...  幸福老年, 都要自己爭取架!!

PS : 因為今年暑假特別熱鬧,  專登晨咁早, 去買兩盒月餅, 依家都就快焚化完畢!!

Pokemon GO (2)

冇符!!

今日妹仔應該11點返屋企, 點知12點都未見人....  返來之時, 一問之下, 原來去左捉Pokemon...

我問佢 : 你捉左幾多隻??

佢話 : 40幾隻...   (原來咁容易捉?!)

好彩, 下午同表弟妹去游水, 一定要放低手機.... 唔....有冇人落水捉呢??

Pokemon GO

今日真是適逢盛會... 剛巧兩位侄仔在港, 兩位都是遊戲達人...

今日乃潮玩POKEMON GO的香港發佈日... 大侄已率先追玩... 今日, 我CALL了他一日, 他都沒有回覆... 原來, 一整天在追精靈, 沒空聽我電話, 或回WA..

晚飯後, 一家人相約去海濱長廊跑步... 嘩, 幾乎有中秋節咁熱鬧, 一大班青少年, 三五成群, 在追精靈...

妹仔話:  公園內更熱鬧, 平日只得小朋友在玩耍, 今日就多了很多年輕人...

嘩哈... 真厲害... 第一次體驗虛擬世界的威力...

大侄追了一輪, 我問 : 有冇捉到?

佢話 : 有呀! 不過冇數幾多隻... (即係, 佢捉左多過一隻啦... )

睇睇下電視, 忽然間, 佢話 : 對面街有一隻喎...   (於是, 佢就走左落街... )

跑步都係貴價運動

以為跑步只需一雙波鞋...  真係錯...記得我去年初初開始學跑, 真係只得一雙舊波鞋... 連跑褲都只係攞屋企條舊波褲, 另加一件普通T...

跑下跑下... 要買一條跑褲, 有內膽的... 做熱身踢腿動作, 好樣D... 然後, 買一件快乾T, 第一件跑步快乾T幫襯國內名牌 ANTA (安踏), 貪佢夠平... 後來, 換一雙NIKE...又要買隻計時跳字錶... 冬天有一條貼身褲... 這一套裝都陪左我大半年... 

慢慢... 當然愈買愈多... 鞋要用ASICS, 因為NIKE跑鞋實在唔多好著...

快乾T買多3-4件... 因為, 跑得多, 汗多, D衫洗極都有汗味, 加上行山時穿快乾T都係舒服好多.

然後, 要買小腰包, 方便帶手機門匙出街跑.... 仲有號碼帶準備出賽時掛號碼布同帶水樽...

不過, 其實, 我仲有好多野冇買... (同班同學有更多其他裝備... 仲係貴野...專業運動錶, 跑步風褸, 冷涷毛巾, 頭帶... etc.. ) , 但係, 亦已經加加埋埋有一堆...

跑步之後, 另一得著, 係學識好多運動名牌.... Under亞嫲... 鎖龍門..  交叉跑褲... 米津龍.. 總之, 一雙鞋1000+, 一條褲900+, 一件衫300+...  認真要命...

我同妹仔就繼續等減價, 或遊埠時去OUTLET,  又或者, 繼續幫襯強國名牌... 李寧, 安踏... 其實, 佢地D款都唔錯.

AP CHinese 放榜

妹仔5月考左Advanced Placement Chinese (類似IB的美制公開考試), 今日在網上收成績..

其實, 我都唔知佢幾時出成績, 不過, 今日, 有一位家長WA問我, 我才知道.. 我知道放榜, 就問妹仔, 妹仔才上網CHECK... 如果那位家長沒有問, 恐怕我都仲懵懵下...

不過, 妹仔CHECK完後, 我再問佢... 佢話 : 你三年後就知喇...

唉!! 即係咩?!

我諗, 佢唔會話我知... 不過, 睇佢輕輕鬆鬆, 應該冇問題卦...

AP的分級... 5為最高, 1為最低...

PS: 部份外國大學會要求讀美制的學生, 除了考SAT或ACT這一類一般科目考試, 還會要求考AP或SAT Subject Test.. 即分科考試... Phy, Chem, Bio, History... etc.. 跟IB或DSE都差不多.. 妹仔應該要再考3至4個AP科目... 以符合某些大學的學科要求...

非常有機

天氣悶熱, 原來是測試家中有機食物的最佳時機...

自家製全麥麵包... 三日內發霉....已放存氣膠盒內... 聞說,老M記的麵包放一世都不發霉...

三個月前在藥材鋪買的菊花 (用來洗眼用)... 放在密封膠袋內, 發現袋內有一堆飛蟲.. (真係有翼在飛... )

另外, 玫瑰花茶... (亦放在存氣膠盒..)... 有細小黑蟲在爬...

還有,  一包夏桑菊, 亦發現小蟲...

總之, 入夏之後, 真是蟲蟲盡出... 亦證明, 我買的東西非常ORGANIC... (但都是便宜貨, 沒有標明ORGANIC的.. )

還是早點把東西吃完, 或者放入雪櫃... (但雪櫃都爆滿... )

恐怕夏天過後, 家中所有東西都會出蟲... 這個夏天真太熱...

PS : 不過, 那些預製食品, 如: 餅乾, 糖果, 就真係放左幾個月都冇事...  真係好多化學野...

行盡18區

今年暑假, 妹仔不用練琴, 時間多得滯.... 她的目標, 竟然是"行盡香港18區"...

唉... 我就慘喇... 空閒日子, 就要出發, 一行就是起碼4個小時, 仲要去到大老遠...

往時, 我地都會常去新界的東面... (因為家住這方... )... 今年亦出出入入了...

今個暑假, 去過的地方, 已包括...  荃灣, 東涌, 將軍澳, 西營盤/堅尼地城, 中環... 旅行回港後, 每星期都去一處...  妹仔還仍不時問 : 仲有什麼地方未去過...  (幸好, 今年復活節已去過離島... )

我諗, 暑假餘下的日子, 還要去... 元朗, 屯門, 港島南...

真係好唔得閒...

一屋老友記??

老媽子睇左大台"一屋老友記", 有陰影...

一大早, 飲早茶, 老媽子話... 昨晚, 瞓瞓下, 忽然間, 幅牆發光... 好驚...  唔理佢啦... 已經辛苦到死... 晨早五點幾起身去平台晨運, 忽然間行個大雷, 一轉身, 見個披頭的女人, 坐在地上... 嚇鬼死...

我話 : 亞女昨晚冇熄好部電腦, 可能你推一推, 部電腦打著左, 咪發光囉...你吾再郁佢, 就會熄番...  我今朝關左機喇..

老媽子鬧 : 好心你地熄左佢啦... 

另一位師奶話 : 哦! 昨日個回教齋戒月結束丫嘛... 有D印傭會落街祈禱, 可能D主人唔準佢地在屋企搞呀...

老媽子媽媽聲 : 咁都唔駛著成咁!! 靜雞雞坐係個地度, 嚇死人咩...

然後, 當晚... 老媽子瞓瞓下, 無端端吾見左佢攬住果個枕頭... 第二朝, 又無曬心機...

我話.. 哦... 昨晚, 亞女三更半夜出廳瞓, 攞左你個枕頭... 我今朝晨早, 你未瞓醒, 就攞番入去俾你囉... 

老媽子又媽左我一輪... 

由刑到型...

最近POST過D跑步衫照片上FB, 都呃左好多個LIKE... 有人仲話要專登見下我, 睇下我有幾成功.. 不過, 老實講, 跑步這東西, 幾辛苦, 又幾苦悶... 跑來跑去, 都係圍住個球場, 會有幾過癮丫... 如果唔係為左身體健康, 我都寧願睡下覺, 嘆下冷氣... 天時暑熱, 一身大汗, 上車仲臭死個司機, 幾尷尬... 訓練完, 有時仲會腳痛, 行路都拐拐下...

跑下跑下, 好快就一年... 去年8月第一次上課, 下星期日, 跑班慶祝一週年, 有比賽, 仲有飯吃.. (原來我係第一批同學仔... ).. 跑左咁耐, 都識左一班跑友... 一齊上堂, 吹下水, 挨下挨下, 又落堂.. 有時候, 又齊齊吞下泡, 都幾好玩...

近來, 發覺我拉筋都好左... 有D動作初期做唔到, 依家都做到喇... (課堂前後都會做伸展... ).. 總之, 都叫做有D成績...

當然, 最成功就係減磅... 輕左有型左... 哈...

事實係... 有型係受完刑後的安慰獎...  

PS : 跑班比賽係"跑斜路"... 我嗰組路程最短, 上斜落斜共8KM, 依家希望90分鐘完成... 仲有, 唔好中暑... 平平安安慶功吃晚飯... ^^!

可以選擇... 不可以選擇其結果

最近英國脫歐公投, 正好體現了一個事實... 就是大家可以選擇, 可以投票, 卻不可以選擇其結果...  we are free to choose, but not free from its consequences.

我都年輕過, 或者都曾經講過 : 對於自己的選擇, 會一力承擔.... 不過, 年紀愈大, 就愈知道, 這是一句自不量力的廢話... 因為, 很多時候, 對於自己的錯誤選擇, 都要別人為自己去承擔, 此所謂 "累街坊"... 而且, 很多時候, 自己連承擔的資格都沒有...  連累父母, 兄弟, 朋友, 甚至一些不相識的人 (就像今次四級大火, 不負責的經營者, 存倉者, 連累的是消防員及其家人... )

最初以為, 投票脫歐的人, 已經有心理預備, 在眾多的勸告下, 明白脫歐之後, 要勒緊褲頭, 與大英帝國, 共生死, 共榮辱... 豈料, 後悔之人, 原來有不少... 唉... 只為一時之氣, 做成社會震盪, 真令人難於理解.... 至於, 今天大唱港獨之人, 如果已經明白此事之嚴重性, 而不是只為"自決"這兩個看似天經地義之詞, 那麼, 亦無話可說...

200年前, 當英國的新教徒, 遠赴美國, 開僻這片新大陸, 就是抱著一份死而後矣的決心, 才可以成功... 所以, 亦不能說他們一定不會成功...  

現今社會, 玩文字語言花樣的人很多... 尤其是政客... 很多看似 "偉大" 的言論, 及所謂的 "真理"... 都要仔細咀嚼... 因為, 背後實有有很多我們不願意看見的事實和結果, 千祈不要 "累街坊"...

師奶聯盟

師奶聯盟都幾恐怖... 嚇親人..

幾位師奶跟團隊參觀某紀律部隊,  見靚仔師兄, 個個排隊集郵, 好彩師兄超友善, 企定定做人辦, 參觀過後, 仲要不停WHATSAPP問問題, 老實講, 邊有咁好學吖... 妹仔看見情況, 大嘆 : "制服誘惑"乎?!

返去跑步團隊, 教練派新隊衣, 大家好高興, 尤其一班師奶隊員, 開心過做香港小姐試旗袍...  靚仔助教跑完步, 剥衫涼下, 師奶們竟不放過,  叫助教一齊映相, 此也小事.... 但卻不准人家著翻件衫... 當中有人大叫: "唔好著衫喇!" 搞到助教面紅紅.... 唉! 助教20歲出頭, 仲係怕醜果隻... 慘情... 映幅相, 見佢個樣幾尷尬..

唉... 師奶恐怖大聯盟... 靚仔見到真頭痕...

大時代

這邊廂, 火光熊熊...  大火燒了三晝夜...

那邊廂, 英國脫歐....  金融市場大動盪... 外滙, 股市如過山車...

如此一個大時代...

對於火災... 我絕對相信並尊重現場人員的專業判斷, 事實上, 以當時的情況, 任何最專家都只能作出目下最合宜的決定, 但並不代表那決定完全沒有風險... 當然, 人命是最寶貴的.. 我相信, 最難過的, 除了殉職消防員的家人朋友, 就是那一位下達指令, 要求隊員入火場的指揮... 最近, 看過港台 "烈火雄心"的其中一集, 蒙嘉慧飾演的上司指揮官說 : "最慘並不是要寫REPORT, 而是不能把全隊人帶出來.. "

至於投資市場... 同樣地, 每個人都只能就自己的狀況, 在當前的情況下, 做最合宜的決定, 而每一個決定都有其風險...  故此, 小心為上... 英國的情況仍相當複雜, 貨幣股票是否已經見底跌定, 仍言之尚早... (還是像人民幣一樣, 走進了漫長的黑暗之路, 仍未可知... 今天看來, 似乎, 真的是CASH IS KING...還要是USD... 總之, 活著就是勝利! )

大時代, 黑天鵝... 真讓人情緒激動...

在此, 對殉職的兩位消防員致敬及最深切的哀悼... 

做家長

看大台的起跑線...  幾位老友評論... 第一集的出位家長, 大概沒有在社會上工作過, 接觸的人都是身邊的一群同聲同氣師奶... 否則, 怎會如此沒有SENSE?

老實說, 就算出生前做足所有準備, 那又如何... 對住肚皮, 教埋完中英數理化, BB出生, 就是天才乎...  小學前考到演奏級,  如非莫扎特, 就是自閉症兒童... 否則, 難矣... (BTW, 莫扎特都要個老爸係樂師, 才能成器... 莫扎特若生於農民之家, 都一樣不成... )

學十樣, 十樣都只得半桶水, 有鬼用! 若能有一項特長, 夠殺... 但是, 最考家長的, 並不是俾十樣野佢學, 而係怎樣了解自己小朋友的強項...  很多時候, 都係撞彩... 都係祝福...  認識小朋友的強項, 然後因材施教... 還需要無限的毅力, 才可以培養出一點點成績... 那些名校或許只會睇你一眼... 何苦哩!!

過去幾年, 見過以特異功能入名校的學生, 結果都不一定是很好的...  最淒慘的, 是到了青春期, 小朋友跟父母反目成仇... 就因為父母一直以來, 只為要逼佢入名校, 終於, 以音樂成績, 成功入讀... 但入學之後, 小朋友極之憎惡父母, 音樂無趣, 讀書免問... 終日以打機為樂...

如此功利, 未嬴就已經輸清... 輸掉與小朋友的關係.. 更何況, 小朋友出生, 並不是為了滿足我們虛榮的慾望的.. 他有自己的人生... 我們只是暫管者...

再現實一點...  成功人士只取決於出生的月份..(她的邏輯推論, 是要成功, 就要入大學; 要入大學, 就要入名中學; 要入名中學, 就要入名小學; 要入名小學, 就要入好幼稚園; 要入好幼稚園, 就要先行胎教, 兼且要生大仔 (月份)).. . 真是可怒也... 都要CHECK下李嘉誠, BILL GATES 各位成功人士係咪全部一月出世... 這個推論, 仲衰過睇星座, 搵算命佬同問米...

大台這個節目, 真係得啖笑... 不過, 跟住兩集... 陸永同長腳蟹, 又真係幾如實反映社會現狀... 

究竟是個社會出左事, 定係我地出左事?? 我都一頭霧水...

旅行完畢

旅行真係好玩.... 不過就好疲倦... 尤其要跟住妹仔去SHOPPING, 簡直日行千里...辛苦過練長跑...

今次都好順利...住兩間酒店都幾滿意... (釜山近西面市中心,  首爾明洞)... 亦跑了幾間美味的餐廳...

釜山... 機張吃長腳蟹... 只得清蒸一種煮法,  真係好鮮味... 價錢一般... (66000WON, 約440港元, 兩隻長腳蟹..吃下去, 都幾飽... )

釜山... 元祖冷涷豬腳..  味道不錯, 晚飯時座無虛席, 我們閒日中午去, 人流不多.. 

首爾... 我希望選一些較地道的食店...  有一間一定要推薦 : 滿足豬腳店... (五香豬腳非常軟滑可口..) 到步時, 約6點30分, 已經要排隊入座, 大多數是本地人, 因為地點不是遊客區....  (70000 WON 四個人, 吃到飽... )

首爾... 一家我回頭多次的烤肉店... 辛氏火爐... 以前在明洞, 現在搬到近鍾路站... 牛肉很美味, 不過, 3-4人餐71000WON, 份量不足夠, 最好加飯或其他, 才夠飽的...

首爾... 新沙洞元祖馬山醬蟹... 價錢較實惠... 60000WON 兩隻醬蟹..

另外, 我們去了東釜山OUTLET... 我地專門去睇波鞋, 運動衫...  在ASICS大出血, 一對波鞋在香港要1000元+, 那邊扣稅後, 大概650元左右... 跑步快乾衫亦是約120港元一件...

總之, 今次妹仔大吃特吃, 見野就買, 我就大出血... 回程兩個人48KG, 好彩坐C航, 否則, 買行李費又再嘔一灘血... 

飯TASTIC

一個人吃快餐有什麼值得高興?!

最近看見老麥有飯FASTC的廣告, 開心到不得了... 連妹仔都話, 你終於有野可吃了...

因為有飯TASTIC, 我特意幫襯老麥.... 真係好耐冇去了... 原來有得揀是如此開心... 飯TASTIC又有新款, 遲下又可以再吃了... 

明早上機去韓國, 今次做足功課...  SHOPPING, 餐廳... 全部查過... 仲上網印COUPON... 依家希望美金唔好跌住, 等我玩埋先...

妹仔張SHOPPING LIST亦應準備妥當... 今次又大出血了...  不過, 妹仔已經事先投訴,話我冇得同佢SHARE甜品... 冇法啦... 我眼甘甘睇住D靚PANCAKE, 蛋糕都冇得吃, 真係慘無人道囉...

最正的宣傳片段

最近睇大台, 發現佢有一段最正的宣傳片... 乃是新的週末飲食節目...

此宣傳片的正, 是它非常搞笑...  找來了婦女節目中的冤家... 李X聯和大王來做主持... 那段宣傳片中, 兩位中佬有點似新馬仔與鄧寄塵, 又似KEN哥拍謝四... 搞笑得來, 又有火花...

 老實說, 近年大台的劇集真是乏善足陳, 反而資訊娛樂節目, 就較有睇頭... 星期六, 我都會坐定定睇下..

近來, 大台的瑯玡榜收視極慘淡... 我自己冇追看這劇集... (雖然, 有幾多人話好睇, 話劇中細節好睇... 可惜, 我坐唔定.... )

照我來看, 瑯玡榜在港收視欠佳, 主因是佢對白太長... 香港人沒有耐性, 兼且好似我一樣坐唔定... 不過, 有師奶話, 週未連續播兩集, 比較好... 真係見仁見智... 

黑色笑話一則

某日, 同老媽上茶樓.... 老媽子見隔籬枱有一位年齡相若的老太太飲茶..

老媽子向老太太打招呼, 說 : 一個人飲茶呀...唔見你老公?!

老太太答說 : 佢兩個月前, 上左天堂囉!

立時, 老媽子和老太太同聲, 哈哈大笑!!!

飲完茶... 我忍唔住, 話老媽子: 有冇搞錯! 人家死老公, 你都咁開心?! 

PS: 我細佬曾經講過 : 唉... 點解要娶老婆啫?! 你睇下! D女人死左老公會咁開心既...

韓文... 學習中..

妹仔一共學了三堂韓文... 昨日, 佢話我知 : 我識得讀D字喇...

其實, 佢學了韓文的拼音 (圓圈, 交叉, 十字)... 睇D韓國化粧品網頁時, 就自己去拼音... 因為那一類網頁, 有很多都是外語轉韓語拼音, 所以, 讀起上來, 就容易明白.. (如: FACE MASK, LIP STICK.. 之類)... 咁都好, 佢覺得學以致用, 好有趣...

我幫佢報埋 "韓語進階班", 都係又平又正...

我吩咐妹仔, 佢考完大考, 有一個任務, 就係上網頁, 睇左D韓文餐牌, 認住D字, 下星期去韓國旅行, 就可以自己睇餐牌, 尤其去到D非旅遊區, 我真係一粒字都唔識, 就要靠妹仔, 起碼, 叫牛唔會變豬, 叫蟹唔會變雞...

我已經搵定左 "韓巢" 裡面D餐牌, 等佢去溫書...   

學生健康檢查

一年一度, 學童保健檢查... 最高興是度高度重...

妹仔今年的高度竟然是矮了1.5CM, 體重約輕了2.5KG (5磅)... 身高方面, 其實, 量度時的手勢和姿勢都很大影響, 另外, 上午和下午量度都有分別... 護士姑娘問 : 想不想再度一次? 我話 : 唔駛! 明年再度過囉... 冇所謂!

至於體重, 足足減了5磅, 見醫生時, 醫生問 : 是否身體有什麼問題?

我答 : 冇! 不過減肥中...

醫生說 : 現在的體重對身高的比例, 屬於偏瘦, 不要再減下去.

我加把口 : 係囉! 係囉!

其實, 我覺得, KEEP住現在的食量和運動量, 就想肥都難了... (不過, 妹仔最近多吃了一點, 早餐依然是瘦身餐, 中午正常, 晚餐吃半碗飯, 都算正常.. )

每年一度體檢, 都幾好... 好似派成績表咁....  (我最滿意是妹仔的視力檢查, 暫時視力都正常, 不用戴眼鏡.. )

大考中

妹仔這星期大考, 前晚話有一條GEOMETRY唔識, 叫我教佢做... 我見到條題目, 就投降... 於是, 佢話 : 我都係返學校問同學!

係囉! 咁就啱喇! 事關我D數理化知識, 頂唔得好耐, 三十年前都俾翻老師囉..

妹仔考期, 返上午, 考兩小時就放學, 以為佢會返屋企吃LUNCH... 誰知10點15分, 佢打電話返來, 話 : 我同班同學去吃LUNCH!

係囉! 咁就啱喇! 得閒就梗係黐同學仔, 好過日日在屋企打機做宅女..

明天還要繼續考, 我都冇眼睇, 希望佢考得好好睇睇... 不過, 睇完佢做GEOMETRY, 都幾乎肯定佢唔係讀數學物理的材料... 無謂浪費時間, 所以, 我唔會再叫佢讀CALCULUS... 老實講, 佢真係一D三角幾何, 代數微積分都唔識, 那又如何... 讀完書, 最多都係用個大大部的座枱計數機..做極都係加減乘除! (依家仲好, 用部電話就夠!)

不過, 我心裡諗就好了, 千祈唔好批得咁死...  佢完全唔讀數又未得... (考公開試都仲要做!)

PS : 昨晚, 妹仔攞住個泡菜碟, 由房間去廚房... 有本事, 行行下, 全個碟飛出來, 搞到地板, 床單都污糟曬... 當時, 我正忙到一頭烟, 就忍吾住口, 話佢 : 食野唔做野, 做野打爛野...  反省一下, 都係唔應該咁講, 實在太傷自尊心... 所以, 都係要再忍下...  

終於挨唔住

暑假臨近,  亦到考試期, 我終於不用再為妹仔準備午餐飯盒, 因為佢中午就會放學...

不過, 我都依然要問佢, 中午想吃乜, 因為屋企的急涷雞胸已食完, 要補倉.. 我問 : 仲食吾食烚雞柳??

妹仔答話 : 咪搞我了,  依家見到烚雞胸都怕怕!! 見到都覺得腥!!

我話 : 你知就好啦!!  之前仲話乜都吾落, 真係烚完D水都覺得腥... 後來加左D香草同紹酒, 先好D..

都好... 妹仔終於都挨吾住D減肥餐... 真係難吃到人都傻..  

八級長笛成績

今日終於去琴行攞八級長笛成績..

妹仔去到, 只叫一聲 : 應該合格囉!!

職員馬上說 : 何止合格!! 你攞DISTINCTION哩!!

我回了一句 :冇天理!! 練得咁少...

成績表上130分, 剛好是DISTINCTION... 最好成績是SIGHT-READ, ORAL和SCALE.. 歌仔就24/24/26..

妹仔笑說: 最高效益的考試, 剛好, 一分不多...

不一會, 妹仔皺下眉頭, 說 : 點解我考八級琴時, 練得咁辛苦?!  ORAL成績都冇今次咁好!!

這一次妹仔考ORAL的部份, 只搵老師練了兩課... 成績是17/18, 差一分滿分... 考八級琴的時候, 練了很多, 都只是15/18...  不過, 那是兩年多前的事, 妹仔的音樂造詣可能又成熟了..

返到屋企, 話俾婆婆知...亞婆話, 都唔見佢練, 只在星期六練10分鐘!! (因為星期日上課. )

其實, 妹仔真係練得好少... 考試前兩星期都只係每天練15分鐘咁大把...

音樂課程到此,  終於, 完全告終.... 之後, 就是應該學校功課和考試... 

兩科樂器的成績, 我實在都非常滿意了... 不過, 妹仔的音樂造詣已經倒退... 封琴封笛... 可見將來, 除了幾張CERT, 都所餘無幾... 差得只剩下CERT了...

琴行CALL

下午接到琴行CALL, 話長笛成績已收到, 叫我去拿取...

晚上, 向妹仔匯報.. 我話 :我明天幫你去攞..

妹仔說 : 唔好, 我地一齊去攞..

我話 : OK, 等你放學一齊去...  琴行仲話你考得唔錯...

妹仔馬上開心到飛起, 拍曬手掌, 話 : 即係合格啦!! 好野!!

其實, 佢一向都只係想合格, 宜家應該冇問題喇... 至於真係考幾多分, 就要明天先可以揭曉..  

(佢一向對自己的要求都甚低... 冇法... 容易滿足的妹仔... )

人在看...

某日, 照常返教會... 通常我坐最後第二或三排, 兼大單邊... 壞榜樣... 以為冇人會留意我...

豈料, 忽然背後有聲音問: 你囡囡兩星期冇返喇?!

原來, 坐我後面一位UNCLE, 跟我打招呼... 我當然笑笑口, 答 : 係呀, 亞女去左學校交流團呀.

然後, UNCLE又話 : 你同囡囡都好親密喎, 我常常見到你地一齊跑步...

啊! 係呀! 我地會跑海邊...  (通常, 我同妹仔傍晚或晚飯後去跑, 我都以為冇人會注意... )

UNCLE話 : 我都跑呀... 我差一年就70歲!

於是, 大家寒喧了幾句...

我回心一想, 還好! 我從來冇當街當巷鬧妹仔, 否則, 真係最差最壞的榜樣...

人在做... 不只天在看, 人也在看...  真係"君子慎其獨"... 

真係有進步架...

我足左50歲, 才開始跑步...  50歲之前, 最長跑過800米, 因為中文大學當年要跑完800米 (在一定時間內), 才可以畢業, 所以, 那一年, 我跑左800米, 記憶中是5分多鐘完成...

然後...上個暑假開始學跑...  開始時, 一個400米都跑不完...

有一次, 亞SIR叫我地跑球場外圍, 有上下坡,長度約800米一圈... 他的吩咐是, 跑3圈, 不要停... 我記得, 我跑到死下死下... 以為自己不能完成... 助教跟住我跑 (因為我跑第尾), 佢猛叫我加油... 幾慘...

這星期, 去到球場, 幾個同學仔話, 喂, 時間咁早, 不如跑外圈, 熱下身... 

好啦... 見仲20+分鐘先上堂... 幾個人跑出外圈, 跑下傾下, 不經不覺, 就一圈... 同學仔又話, 咁早, 跑多一個圈啦...

好啦... 又跑... 跑下傾下, 真係又一圈囉...

當中一位比我年長少少的同學話: 我初初來, 400米都跑唔完架...

我話 : 唔係啩, 你跑得咁快... 又跑半馬, 又跑全馬!! (同學係A組快組... 我係C組慢組..)


佢話 : 車!! 我仲乜要呃你!!

其實...真係會進步架.... 我都係其中一個... 雖然我冇上進心... 次次都係海鮮 (DON'T升班)... 不過, 死下死下, 挨下挨下... 真係會進步到連自己都見到...

PS: 現在跑800米, 大概於5分30秒內完成... 大概係平左自己大學時代的紀錄... 

戒GLUTIN的意外收穫

戒GLUTIN差不多半年, (除了偶然犯禁), 基本都真係戒掉... 有時會忘記, 有時食左都唔知... 譬如:  飲茶叫炸兩, 忘記了油條有GLUTIN, 食了一口才記起... 又或者, 烏下烏下, 叫左吉列魚柳, 食左一半, 就要切左D吉列, 先繼續吃... 通常這種情況, 個肚遲幾小時會咕咕聲, 開始投訴.

所以, 都冇辦法, 真係要戒... (有一次, 自己衰, 套餐送甜品, 忍唔住, 吃左半個甜包... 晚上就腹脹作痛... )

不過, 戒GLUTIN, 真係有意外收穫... 就係減磅... 因為戒麵粉, 很多相關食物都要戒... 牛油, 糖... 這些做餅和麵包的基本材料, 都基本是一併減了... 試想下, 基本上, 餅店和甜品鋪都免問, 還有什麼致肥食物可吃... (我本身亦不太飲汽水和加糖飲品..)

於是, 這個夏天, 發覺去年買的褲太鬆... 趁減價去UNI買番幾條, S-M碼已經OK(款式不同)... (唉.. 都好耐冇著過L以下... )... 去馬沙, 買T, 穿8碼都有點大... (我一開始, 攞左10碼去試... 結果要再攞一堆8碼去試...)

好彩今年周圍都大減價, 否則, 都真係要大出血... 都好... 有新衫新褲著..



 

妹仔出門了

昨天, 出機場, 送妹仔去泰國做一星期義工 (學校的SERVICE TRIP)...

於是, 這星期變自由身... 不過,正因如此, 日程亦早已安排得滿滿....  最大好處, 是不用再六時起床, 準備早餐和午餐... 終於可以睡多一點...

不過, 今早, 仍然是六時起床... 百無聊賴, 便落街跑步...

老實講, 其實, D亞媽話亞女外出最好, 自己可以放假...不過, 太空閒, 都幾無聊... 所以, 又要再規劃下, 妹仔入大學之後,  (如果佢出國), 我又要從新適應空閒的日子...

飲食

妹仔上網, 睇一大堆減肥, 健康飲食的資訊... 有時候, 照版煮碗... 當然, 搞到身體差, 要睇中醫調養...

中醫話 :不可以戒飯...如果缺乏脂肪, 身體難以製造適當的賀爾蒙, 尤其仍在發育時期, 身體未完全成熟...

總之, 激死... 又煩死..

我對佢講 : 你睇到佢地減到靚靚, 扮到靚靚, 但係,佢地可能病到七彩, 體質奇差... 佢地冇講, 只係話自己個方法有多好...

這個世界, 有些人可以吃長齋.. 有些人不可以... 並不是一種方法適合所有人, 所有體質... 我相信, 均衡飲食, 就是最好...

選科

對於妹仔就讀的這一類國際學校, 基本上第12班 (即中六) 的9月就要開始報大學 (11月左右應該要全部報完, 12月至1月開始會有結果.. 好彩的話.. 連本地大學都一樣..  )... 所以, 11班時, 基本上, 都係集中精神, 應付公開試... 11班尾就應該要知道自己讀邊科...

當然, 妹仔現在仍舊拾下拾下... 實際上, 就剩下兩年去決定...

 因為妹仔會報香港以外的大學, 所以, 選擇闊很多...

根據觀察, 妹仔對幫人扮靚的科目, 比較有興趣... 食物科學 (FOOD SCIENCE), 營養學 (DIETETICS),  化粧品科學 (COSMETIC SCIENCE), 還有醫學 (皮膚科或整形外科)..

這是暫時的興趣...  除了醫學, 其他科目基本都要出國, 或出國比較好...

但是, 我希望她知道這些科目是什麼, 因為這些科目比較冷門...  六月HKU SPACE有OPEN DAY... 裡面有一些相關的講座... 可以帶佢去聽下... 多一些知識... (我又有朋友在化粧品化學的行業工作, 所以, 又會請教下... )

其實, 我對妹仔講, 如果你唔知讀乜, 就讀BUSINESS, 事關樣樣都得, 亦HEA得.. 

又到母親節

一年容易, 又到母親節...

今日下午同妹仔行過某護膚品鋪頭, 見一位學生妹買一盒護膚品, 仲叫售貨員包得靚靚, 本師奶超八卦, 行埋去, 問 : 你係唔係送俾媽咪架?

學生妹笑一笑, 說 : 係呀..

我就話 : 你媽咪一定好開心!!

跟住, 途經某外賣壽司店, 又見一位中學男生, 手持一枝康乃馨... 不過, 今次我冇去搭訕... 不過,  唔問都知, 梗係送俾亞媽... (冇理由送一枝康乃馨俾女朋友... )

我問妹仔 : 你送咩俾我呀??

妹仔爽快回答 : 整隻蛋你食囉..  一向都係咁啦...

呀.. 又係得隻蛋...  

一位母親的心聲

今日, 跟一位較年長的母親閒聊... (她有一位成年的女兒... )

她說 : 很後悔當年沒有放下工作, 自己親手去帶孩子... 如果不是, 今天, 大家的感情會好一些..

我是有點奇怪...  她是一位很友善的女性...

不過, 她又說 : 囡囡現在埋怨, 當年我管得太嚴, 現在她覺得自己性格太古怪..

其實, 我覺得她不用難過, 我知道幾年後, 她囡囡會明白, 她母親是如何用心的教養她..

日元傻左...

這一排, 日YEN好似傻左... 忽然狂升... 早幾日, 跌翻去6.9, 一個下午升翻去7.1, 今日仲要7.3... 波動大到好似炒股票咁... 嚇親人...

其實, 我冇炒外幣,  更加唔會炒日元... (冇利息架... )... 不過, 注意日元, 係因為想找錢去旅行..

日元升值, 打亂左我今年下半年的計劃... 不過, 我都冇所謂, YEN貴就去少D... 但係, 對日本人來說, 長年通縮, 經濟不景, 就真係好傷...  日本已經出埋負利率, 再加量化寬鬆, 都無力救經濟, 都唔知佢要挨到幾時...  不過, 佢地嚴重人口老化, 加上禁止移民的鎖國做法, 再加上保守的思想,  再加上宅男風...  (唔似韓國, 男人要當兵, 起碼有幾年一定要外出... )... 佢地的經濟問題, 其實係人的問題...  還不是錢的問題...

話說回來, 如果YEN真係去8算, 就真係冇咁抵玩喇...

PS : 我上年6月去東京, 匯率是6.2-6.3, 今年這時間是7.2-7.3... 足足升左16%... (仲好賺過股票, 真離譜... )

Chasing Longevity

明珠台有一個新加坡製作的節目, 叫做 Chasing Longevity (延年益壽), 都幾好睇..

這星期講到, 要老年活得好, 必須有良好的社交生活和人際關係, 這不但是生活上的事情, 亦關係到個人健康...  這一類人罹患慢性病的機率較低...

其中一個重點, 是離開工作崗位之後, 仍然有活動, 讓自己走出去, 與其他人接觸..

其實, 這一點對女性(尤其是主婦)來說, 似乎比較容易... 起碼, 每天都換件衫去街市買餸...

自己反省下, 其實, 大部日子 (除非病倒), 否則, 基本上, 每天早上都會換衫出街...  我並不太習慣一整天都只穿睡衣... 我會覺得自己霉霉地...

老媽子亦一樣, 每天一定飲早茶, 然後去買餸, 天天如是, 除非9號風球或以上, 連8號都照出去... 佢話 : 飲餐茶, 睇下報紙, 一個早上好容易就過...

我相信都係咁... 老媽子到70幾歲, 都在茶樓街市, 識到新朋友...  

到了某些年歲, 好似難交朋友... 不過, 這也是心態... 只要豁得出去, 多參加不同團體, 玩下玩下..  半年下來, 都會有幾個傾得兩句...

最近有班鄰居師奶, 經常約出去... 打羽毛球, 行山...  都幾好喎... 住得近, 都有話題, 講下附近街市同超市, 八卦下屋村新聞... 咁又一日...

第一堂韓文

妹仔週末上了第一堂韓文, 我問佢 :學左乜?

佢話 : 學左六個聲母 (consonant), 五個韻母 (vowel) , 一共三十個字母..

我問佢 : 咁悶唔悶? 有冇學琴咁悶?

佢話 : 當然開心過學琴...

我知... 一來唔駛練... 二來出埠又可以實戰... 一定係好玩D..

佢話: 今日學左一個字... MORE!!  買護膚品叫人俾SAMPLE時,  一定要記得!!

八級樂理

最近清理妹仔的音樂東西, 包括一大堆影印樂譜, (長笛和鋼琴), 一大堆NOTES... 還有一大堆書...

長笛的初級書大部份已送出, 除了八級書外... (怕佢唔合格, 要考過... )

鋼琴書未送出...

一大堆影印譜已送回收箱...  我問妹仔 : 你有一堆FTCL琴譜, 你仲彈唔彈?? 妹仔話 : 武功已廢, 亦不會彈...    (當然, 影印琴譜馬上去回收箱... )

不過, 我睇幾疊八級樂理的影印NOTES, 未捨得掉...  我問妹仔 : 不如學八級樂理!!  (妹仔當然唔肯... )

其實, 我想佢完成八級樂理...  (讀書啫, 又唔駛彈... ).. 不過, 佢唔肯, 都冇符...

PS:  我見到工聯會有八級樂理班,學一年,  好平... 超抵...

千祈咪話係兩姐妹

同妹仔一齊去跑步班, D口痕友話 : 嘩! 你地好似兩姐妹喎!!

我心諗,  大家冇野講! 俾面講一句啫!!

不過, 妹仔嬲到爆... 佢話: 你幾多歲!?? 點可能似兩姐妹!! 太離譜! 我邊有咁老!! 唔通我似30歲!!

所以, 大家千祈唔好玩... 亦唔駛俾面... 否則害左我..

悶到嘔

週末同老友們聚餐, 一整個下午都不在家... 到四點左右, 妹仔終於打電話來鬧我, 叫我快D返屋企, 因為佢好悶...

第二朝六點幾, 妹仔起身, 跑去廁所, 嘔一大輪...

我話 : 你做咩? 真係悶到嘔??

之後, 妹仔發燒, 食左D維他命C,瞓足一天, 傍晚好左好多...

其實, 我覺得佢食得太多生冷食物... (乜都生食, 兼主食蔬果, 蛋白質同澱粉都食得太少, 所以, 個身體同個胃有D挺唔住... )

我話 : 你唔好搞到情緒病, 因為有D人減肥減得太嚴重, 食多少少都嘔...

始終, 中國人都係中國人, 體質同外國人不太一樣, 未必可以承受太多生冷食物... 總之, LISTEN TO YOUR BODY...

豬肉佬

附近街市, 有一個豬肉檔攤, 日日都有人排隊買豬肉, 仲要拉繩維持秩序, 以免條龍阻住隔離.

我問師奶朋友 : 點解個檔日日都排隊? 好平咩?

師奶朋友笑答 : 唔係噃! 價錢都差不多..

咁點解呀?

師奶朋友話 : 個豬肉佬幾靚仔丫嘛!!

老媽子唔信, 話 : 唔會啩! 係咪D豬肉靚D咋!?

師奶笑說 : 梗係吾係, 同一檔, 旁邊果個冇人排, 呢邊呢個就排住隊, 同一隻豬咋噃!!

師奶又話 : 哩哩! 入門口個檔菜檔, 都有人排架, 個菜佬細細粒, 都幾好樣架!

我真係抓爆頭, 呼道 : 唔係卦!!! 咁都得!!!

 (我記憶中, 街市冇靚仔噃!!)

下午,  真係忍唔住, 走去豬肉檔望下... 哎呀! 唔係呀! (真係有條長龍, 不過, 冇靚仔噃!!) 於是, 又走去菜檔...  啋! 邊處有呀?? 阿叔阿伯就有幾個!!

真係諗下都好笑!!  最好笑係自己會特登走去瞄... 真係師奶一族... (唔通有個金秀賢賣豬肉咩!)

PS: 昨日睇新聞, 豬肉佬都要PRO, 斯斯文文去吸引新人入行, 遲下, 或者真有靚仔靚女做刀神... 到時就檔檔都排長龍喇...

暑期活動

今個暑假, 妹仔冇學琴, 所以, 要找其他活動... 搵左一個禮拜, 終於決定這個暑假的活動..

首先, 報名學韓文... 去左韓國多次, 都應該係時候, 正正經經學韓文, 起碼識兩個字母, 搵地方都容易D... 4月就開始囉..  (報工聯會COURSE, 超平!!)

另外, 妹仔想學溜冰... 哈哈... 因為多年來都專注學琴和游泳, 反而冇學過溜冰... 難得佢鍾意, 就幫佢報左暑期班...

報溜冰班之時, 接待的人問我 :小朋友幾多歲??  我答: 15歳...  那人馬上給我一個鄙視的目光!!

那人又說 : 15歲都未學過溜冰?

我答 : 係呀...

於是, 佢話: 只有這三個時段會有這個年齡組別...  (其他都冇!!)

哈哈... 我返來同妹仔講... 妹仔話 : 好奇咩! 15歲唔識踩單車, 仲樣衰啦...

學完音樂...好似萬事重新開始... 妹仔樣樣野都係初哥!!

向長笛老師道別

計下計下... 學長笛又足足五年... 當初學長笛, 是因為學校的要求... 明天, 就要考八級了..

本來應該學到四月底, 因為琴行要付月費, 豈料有小朋友排隊學長笛, 故此, 上週末是學笛的最後一天, 最後兩課要SPARE給排隊的小朋友...   (老師不教ATCL, 所以, 就算再學上去, 都要換老師... )

最後一課, 買了一件BB衫給老師... 這一位長笛老師, 由未婚, 到結婚, 到生BB... 這五年, 妹仔就這樣跟她學笛, 我們也看著她成長...  老師接過BB衫, 也非常高興... 我亦對她說, 感謝她多年的教導...

長笛老師跟琴老師是兩類人...  跟這一位長笛老師是超輕鬆, 高高興興, 開開心心又一課... 所以, 妹仔真是甚少練笛... 不過, 懶下懶下,又考八級.... 所以, 或者都不用太緊張...  慢慢學, 總會到步...

希望妹仔順利合格... 那麼, 整個音樂里程就差不多告一段落了..

暑假做乜好?

妹仔忽然話 : 這個暑假唔知做乜好? 咁得閒, 好容易會亂食野!!

我心諗, 我點知你做乜... 我叫你做, 你都唔會睬我... (往年都在練琴中渡過暑假, 今年封琴後, 我都唔知做乜好喇... )

於是, 妹仔吩咐我 : 你去搵D野俾我做.. 等我唔駛咁得閒!!

哎呀... 我點搵野俾你做!!

我四至五月的工作, 就是搵D野俾妹仔在暑假做...  頭都痕..

1. 暑假應該會繼續操水, 每星期兩課... 

2. 我叫過妹仔學彈JAZZ琴 (爵士樂), 朋友可以介紹老師, 不過, 妹仔SAY左 NO.

3. 大學D暑期班, 妹仔年紀太細;  學校D暑假班, 妹仔年紀又太大... 

4. 應該會抽下政府的暑期活動, 學下獨木舟之類, 不過, 真係幾難有位..

5. 繼續努力搵下... 下一年, 早D PLAN, 不如送去外國上SUMMER COURSE.

Glutin Free 飲食

12月中開始了無麩飲食 (Glutin Free Diet), 除了在旅遊以色列期間, 因忍不住被蛋糕甜品誘惑, 而食了較大量的蛋糕外 (其實加埋都冇一件, 亦幾乎出事, 腹部隱痛投訴, 便馬上完全不再吃)... 其他日子都基本是99%遵守的..

99%遵守的意思是, 明知是麥製食品, 就完全不吃... 但含小量麥粉的, 則無法避免要吃, 如: 一般的醬油, 忌廉湯或有忌廉汁的食品....

這樣下來, 腹痛的問題是基本解決了.. (腹痛的問題是 : celiac disease, 乳糜瀉.. 不過, 我不明白為什麼是這個譯法.. )

不過, 老實說, 坊間的Glutin Free食物, 真是幾搵笨, 大部份又貴又難食.. (不過, 對於Glutin過敏的人, 可能真要這樣嚴格, 因為誤食會沒命.. 因為有部份人會過敏致呼吸困難.. 甚至窒息. )

一般Glutin Free 食品如下:

意大利粉類 : 其實是用糙米粉或粟米粉做的, 我覺得糙米粉比較好味, 當然價錢比一般意大利貴一倍... (如果想平D, 其實可以食中國的米粉.. 不過要睇清楚LABEL, 並不是每一款都不含麥粉..  最平的東莞米粉就最OK.. ) ... 千萬不要食米線, 烏冬, 這些比較彈牙的, 都含麥.

GF餅乾... 首先是貴, 其次是超難食!! 基本都是焗米餅, (味道同旺旺鮮貝米餅差不多.. 不過就貴一倍. ).. 總之, 又乾又咸又難食.. (甜餅乾就未試過... 搵日要試下, 不過就要去D鬼佬超市先有.)

GF米通...  如果是中式餅鋪的甜米通, 比較好味, 但西式的GF米通, 又淡又乾又不脆, 食佢的唯一原因是用佢搽花生醬同果醬, 好過用茶匙齋吃醬... 無奈之時, 我都試過用青瓜搽果醬吃.

GF蛋糕...  在THREE SIXTY買過一次, 當然要50元一條普通蛋糕.. 幾好味, 但係勁肥, 不能多吃.. 無得吃都會吃一次..

唯一比較好味的, 是一款GF兒童粟米片.. 盒面有隻藍色鸚鵡個款... 依家要吃一個簡單快捷的早餐, 都要靠佢...

不過, 話說回來, 雖然GF餐又悶又難吃, 但是, 一般中國式的飲食, 都冇難度.. 依家大條道理去飲早茶,  連茶餐廳都懶得去..  (去快餐店就要將多士換蘿蔔糕.. 茶餐廳一定只能吃米粉.. ) 

食乜鬼....

早前, 妹仔自製的花生醬快將食完... (大概吃了一個月左右.. 雪櫃保質期約為一個月, 所以, 都必須食完... )... 明天又話要做...

妹仔說 : 自製的花生醬會有一層油... (上次可能攪打的時間不夠, 所以未出油.. )

我說 : 係呀! 花生醬本應有層油, 但是, 後來的產品加了反式脂肪, 就把本來分開的油凝聚了... 我細時, 吃的花生醬都有一層油, 開蓋時, 要用湯匙攪拌, 將油攪均才吃.. 後來, 新的花生醬出品, 廣告標榜 "油質不會分離", 還比舊貨賣得更貴..

某日, 在超市, 看見一種油質分離的生花醬, 竟然比SKIP牌子, 賣貴差不多一倍... 真係攪乜鬼... 做翻舊貨, 仲要貴一截.. 

我又對妹仔講 : 以前有個公仔麵廣告, 話 : "一日五餐公仔麵, 餐餐唔同, 款式最多.. " 依家, 一星期食一個都嫌多!

其實, 睇翻轉頭, D預製食物(process food)歷史都幾有趣... 當年講一套, 後來發現是另一套.. 不過, 人類都冇學聰明過, 現在, 一樣是千百萬樣預製食物, 營養補充劑... 標榜什麼好, 什麼有益, 恐怕十年八載之後, 又是被評為垃圾食物.. 唉!

不過, 人生在世, 都好難避得過... 我都一直在吃預製食物... 始終會貪方便, 又或者相信那些泛濫的資訊..

PS: 我在吃藍莓丸, 妹仔問我: 你仲咩唔直接食藍莓? (懶囉... 而且, 日日吃藍莓, 都幾貴架! 食丸平D, 方便D. )

PS: 我最近開始吃 葡萄糖胺. (Glucosamine), 因為膝頭開始隱隱作痛..  (唔知有冇用.. 不過, 大部份人都話OK喎, 但係, 我上網睇D醫學報告, 又話並非所有實驗統計都SUPPORT這結論. )  老人家梗係教食花膠啦... 不過, 又貴又多功夫...

嗱嗱, 人就係咁啦... 暫時未有第三樣...

代餐

屋苑師奶介紹,住處附近有標榜 "營養早餐" 的食店... 於是, 一行人去試吃... 也一窩蜂之下, 買10次券.... 結果是後悔...

餐單其實是代餐...  一杯約10ml的蘆薈汁 (某品牌), 一杯什麼健康茶, 再一杯正餐是 : 兩件水果, 加燕麥, 加紅米, 再加某牌子的蛋白粉, 用水打成一杯 "奶昔" 狀的飲品...  老闆說這一餐只有150CAL, (而且營養豐富), 可幫助身體, 兼且減肥...

因為我有GLUTIN不耐症, 所以, 減去燕麥, 只加紅米... 但是, 我吃了兩餐, 覺得肚有點奇怪, 懷疑食物中有GLUTIN... 第三次,  細閱那蛋白粉的營養標簽, 果然有GLUTIN..

於是, 第四餐, 連蛋白粉也減... 於是, 營養餐只剩下: 水果加紅米的奶昔... (整份餐最貴是那蛋白粉, 故此, 再吃也毫無意義.. )... 為要盡快消滅那餘下六餐... 就帶妹仔一起吃..

於是妹仔吃了三餐, 我也再吃了三餐 "無料到" 的..

老闆當然繼續力SELL這營養餐... 妹仔聽聞可以減肥, 當然亦興致勃勃...

不過, 老實說, 我並非代餐推崇者, 我對坊間的營養補充劑都一向沒興趣...  經過再三考慮,  我決定不再幫襯... 這種飲食方法完全違反我一向的飲食原則...

我們進食, 應盡量食用現有的天然食物, 當然, 我們無法每一樣食物都自已動手做.. (正如朋友問ALMOND MILK, 恐怕真不能日日做... 正如牛奶, 芝士, 總不能在家養隻牛吧.. ).. 但是, 總不能用化學合成物, 完全替代天然食品... 我們每天吃的化學品已經夠多, 不應該把一份正餐完全用代餐來取代...

另外, 不要將自己的身體變得白老鼠, 替大公司做實驗品... 這種事情出現得太多...  80年代的代糖, 吃了十幾年, 發現是致癌物...  70年代的反式脂肪/植物牛油, 以為好有益, 點知仲衰過豬油...  GMO黃豆, 另一種致敏原... 總之, 科學產品, 真要經過十年二十年的人類實驗, 才知結果... 所以, 還是不要以自己和小朋友做實驗..

現在愈來愈不相信科技, 尤其是食物...

PS: 這一牌子的蛋白粉, 其實是層壓式推銷的一個品牌... 老闆PRESENT得好似一位營養專家..  提供量體重的服務, 計埋卡路里, 教人吃減肥餐... (當然會包括這品牌的食品.. ).. 我計下佢點樣賺錢... 其實, 做早餐是其次, (賺得幾多!).. 代購產品才是真正入息..

PS: 還有, 早餐只吃150CAL, 都好難唔瘦咯..   

長洲

妹仔要同幾個同學仔宿營, 部份家長想有成人陪同, 計來計去, 我比較空閒, 於是, 就做跟班亞四入長洲...  佢地一行七人, 早上九點船入去, 我就下午五點到達... 因為佢地自由行, 我只係入去過一晚... 今早, 我晨早八點四十分就出來, 佢地下午五點離開...

做亞四, 只能跟命令出現... 所以, 晚飯都係自己吃... 入屋就入房... 冇份玩架!!

不過, 我都多年冇入長洲, 其實作為香港人, 都值得入去行下...

長洲好有渡假FEEL.. 日間在碼頭廣場, 有很多小食店, 賣芒果糯米糍, 炸大魚旦, 甜品... 總之, 一大堆... 每樣試下, 都好飽... 又有很多精品小店, 手工甚精美, 亦有特色...走入一點, 會發現一些特色老店,  雜貨店, 尤其是傳統麵包店... 並非大集團同一味道...

所以, 妹仔破戒, 吃掉4000卡... 慘..

晚上,  廣場店場七時左右就收, 一下子變得冷清清... 反而, 海邊的海鮮檔就熱鬧起來... 想清靜一下, 又可以行去東灣海灘吹風...

老實講, 如果間渡假屋裝修得靚D, 我會以為自己去左墾丁或釜山 (迷你版)..

這兩天是學校假期, 旅客未算太多... 聽聞公眾假期的幾天, 長洲塞爆...  (不過, 天氣太冷就不宜遊長洲, 我記得有一年, 天寒地涷, 帶外國人遊行, 大家涷到飛起, 兼且大風.. 興緻大減.. )

由得佢

今日, 妹仔去划艇會學划艇, 約了同學仔和家長, 早上8:30在某地鐵站等.. 出門時, 妹仔發覺冇帶電話..

我問佢 : 駛唔駛翻屋企攞?

佢答 : 唔駛! 冇電話唔駛死喎!

送完佢去車站, 我如常去茶樓, 同一班老師奶嘆茶... 我特地將手機放在桌面, 驚佢會打電話求救...

真係 MURPHY'S LAW... 一定會出錯... 到9:10, 家長WA我, 話在艇會未見妹仔, 問我妹仔去左邊? 我話, 佢在某車站等...  家長話: 改左去另一個站等, 等唔到, 佢地於是去左艇會... 佢問我要不要返轉頭找佢.

我話 : 佢冇帶電話... 我唔知佢去左邊... Just leave her alone... I don't know where she is.

我都冇符...   想多兩分鐘, 惟有去佢原本個車站找佢.

我動身之時..一個老師奶異口同聲, 話 : 你找到佢, 千祈唔好鬧佢... 事關, 你發脾氣, 佢就順帶將脾氣發洩在你身上..  佢都唔會知道自已有錯.

老媽子亦話 : 係時候受下教訓..  平時甩頭甩髻..  又唔聽人講..

當然, 我去到車站, 不見人... 打個電話俾家長.. 家長話, 見到妹仔了... 家長往回路走去找佢, 在半路中, 見到妹仔行緊去艇會, 就接到佢.

我當時鬆一口氣,  叫妹仔同我講, 我問 : 你有冇事? OK嗎?

妹仔答 : 會有什麼事?

PS: 妹仔最終遲到半小時...   (幸好早一日, 我曾經教過佢條路... 可能佢記得少少... 我其實提過佢好多次, 見佢上網, 睇下點去... 當然, 佢睬我都傻... 出門又冇電話... 都係時候受下教訓. )

點解唔阻止我...

妹仔翻看她以前的身體檢查紀錄, 發覺幾年前, 佢比現在矮三吋, 但體重多三公斤...

妹仔驚叫 : 哇!! 好肥呀!! 咪好似你咁!!

我話 : 都唔係好肥, 大隻D啫!!

佢嬲爆爆, 問: 當時, 點解你唔阻止我食野?? 我冇咁肥, 就少D肥細胞, 依家容易減D!

我話 : 點阻止呀!? 我以前阻唔到你食野, 正如, 我依家想逼你食多D, 都冇辦法啦... 以前, 叫兩份下午茶,  一人一份,你都唔准我食, 我淨係可以飲杯熱飲咋... 一人一份早餐, 你一定食埋我份通粉...  唔俾你, 你就發脾氣...

妹仔諗下諗下, 都無話可說...

PS: 妹仔以前去泳會操水,  覺得佢大大隻... 依家去泳會, 覺得佢瘦蜢蜢... 事關同隊的女仔, 以前差不多身形, 依家就大隻左好多...  我對妹仔講, 佢依家一D都唔似操水... 

用好D...

老媽子最近用左一款牙膏,  (朋友送), 用完之後, 話好正... 因為佢有牙痛問題... (其實, 佢已經用假牙, 只剩下幾顆真牙.. ).. 不過, 佢依然常常話牙痛, 牙肉痛... 我估佢有牙週病...

佢用完支牙膏, 就吩咐我去買... (係吩咐... 因為超市沒有, 藥房都沒有... 係紐西蘭著名蜜糖牌子, COMVITA... )... 故此, 只有專門店有... 好貴 (HKD79)...另外有一些樓上鋪, 都可以平D.

不過, 老媽子吩咐... 當然要做妥... 要再平D, 就上網購...  

如果常常口腔問題, 都可以試下...

總之,  妹仔食好D... 老媽子用好D..  我就要想辦法... 學肥媽, 平DD..

暴龍變雷龍

妹仔細時 (十二歲之前), 係食肉獸, 可以一次食十幾隻雞翼, 或者食一大片牛排... 放學下午茶, 通常都整一大盤, 或者去PIZZA HUT, 板長, 味千... 吃一大餐...  真係一餐下午茶都吃一百幾十元... 

時移勢易....  青春期之後, 尤其開始有暗瘡問題後,又覺得自己肥.... 就一百八十度大轉變... 由食肉獸變草食動物...  現在, 我全個雪櫃, 都係蔬菜...  佢極少要求外出飲食... 佢食D野, 我都忍受不住... 仲要不斷發掘所謂營養食物...

羽衣甘籃...生食... 又苦又澀...  (其實, 即係鬼佬芥蘭.. )

紫椰菜.. 又話生食..

紅菜頭... 又要生食...

飲茶要綠茶...  我話太寒涼, 佢就唔高興... 唔准佢飲咁多, 佢就轉飲果醋... 燒脂喎!

食雞要雞胸... 買錯雞柳, 佢就發脾氣..

依家下午茶, 在家煮...  沙律, 烚菜 + 水果 + 果仁 (果仁要RAW, 不要焗... )

雖然好似吃得簡單左... 不過, 計下價錢, 其實同以前差不多... 事關, 依家菜貴 (節瓜都40元一斤), 仲要食好菜有機, 真係一D都唔平...

總之, 以前係暴龍, 依家係雷龍.... 一樣咁大食!

仲有... 買Glutin Free粟米片俾自己,  到時到候都係俾條雷龍食埋...

長笛考試

終於出長笛考試日期, 現定於4月中... 太好... 考完長笛, 可以安心操中文, 跟手就考AP CHINESE.

長笛考試準備中, 其實, 妹仔都冇乜點練... 唉... 當然, 叫佢盞嘥氣...  不過, 就約左老師夾伴奏, 一共七課, 上左四課, 仲有三堂...  惟有伴奏當練習..

妹仔音樂節後, 基本上係 "封琴"...  個琴被打入冷宮... 其實, 都預左... 大部份人, 除非繼續往音樂發展, 否則, 隨後日子, 幾年, 甚至幾十年都唔會再碰佢... 希望妹仔往後, 可以在某些地方場合, 再與鋼琴結緣啦..

至於長笛, 考試後, 都未駛入冷宮... 至少, 明年, 妹仔仲要在學校樂隊吹奏... 起碼多兩年...

就係咁啦...  年紀細時, 唔學好似好嘥... (嘥左D時間去打機上網, 所以, 要逼佢學東學西... )... 年紀大左,  覺得學左好似好嘥.. (嘥左D錢同時間, 到頭來都係會用唔著..)..  就係咁矛盾... 不過, 書到用時方恨少...  希望佢第日真係用得著啦... 

比賽成績

收到家長whatsapp, 妹仔二人組竟然有Merit, 開心到飛起。

第一次, 也是最後一次

今日, 妹仔去校際音樂節, 本來今日約左人, 不去睇.. (因為妹仔當初話唔准我去..).. 但因為今日約會取消, 我就去左睇佢..

今次係小提琴與鋼琴合奏SONATA比賽...老友誠邀, 難得妹仔又OK..

老實講, 兩位參賽者都練得麻麻... 兩大懶人合奏, 所以大家都冇要求, 亦冇期望... PHEWW..

佢地去小提琴老師那邊, 受教了兩課. 上星期六第一課, 昨晚第二課..

第一課, 老師知道妹仔已經冇再學琴, 就話首歌鋼琴部份甚難, 唔可以冇人教... (不過, 妹仔始終都冇搵人教... 由始至終都自學... 唉.. )... 於是, 小提琴老師指點了幾下...

第二課, PHEWW... 老師話妹仔進步左好多... PHEWW.. 真係唔好累街坊..

今日, 比賽時, 我都真係一路要祈禱... 只望佢地順利完成, 唔好中途死火, 就於願足矣.. 幸好, 總算完成... 我覺得尚可... 算了... 懶人二重奏, 彈得完真不錯...

寫BLOG之時, 未出結果... 人家在會場等結果, 妹仔就要返校有另一個CONCERT...

對方家長話 : 下次醒D, 早D搵老師幫手!! 唔好等到比賽前一星期!!

妹仔話 : 今次係第一次比賽, 亦係最後一次了, 因為明年, 肯定已經武功盡廢.  

PS: 這一次的比賽曲目是 Brahms Violin Sonata No. 2 in A major Op 100

被逼升級

下午,  妹仔話: 電腦升緊級, 冇得用...

升咩級?? 我跑去一睇, 弊!! 升緊去WINDOW 10... 哎呀... 我已經推遲左好耐, 點解會無端端自動upgrade? 可能妹仔手快按錯制...  沒辦法... 中途停佢, 可能死得更慘烈... 惟有頂硬上..

做左差不多一個鐘, 終於做完... 還好... 架機未死得...  依家要開D program, 試下, 又要再重新適應... 哎.. 三年前, 適應個WINDOW 8, 已經死左好多細胞, 依家又要搞WINDOW 10..

真係想殺左MICROSOFT...  仲乜要日日問, 逼人升級... 

家長節目

今日同兩位家長(妹仔學校的)飲茶, 一名節目搞手被問及 : 點解最近唔搞D節目?

搞手家長答 : 太忙, 冇假期呀...

我地卻回一句 : 其實, 係咪亞女禁止再搞節目??

家長無奈一笑....  不過, 大家心照啦... 高中生, 根本唔會再睬你... 以前, 有幾位家長會一齊出埠旅行, (雖然我未參與過), 不過, 佢地幾家人都幾開心架... 不過, 這一兩年應該冇呢支歌仔...

依家, 連搞大食會都被禁止啦... 

搞手家長笑說 : 亞女D節目都滿曬.. 復活日日出街.. 暑假亦訂左去兩星期遊學團, 四個同學仔(有男有女)一齊去..

我地話 : 唔好理佢地, 我地自己約出來飲茶好過!!!  (哈... 大家都係被拋棄的一群喎... )

妹仔返來, 我問佢 : 你點解唔去遊學團呀??

妹仔不屑地答 : 寧願去多兩次日台韓SHOPPING!!

Food Processor

從朋友家中拿了一台萬用攪拌機,  妹仔就開始她的健康食譜...

已製作了三種..

(1) 紅棗雜果仁條... (用以色列棗打成醬, 再加雜果仁... 當中沒有調味, 只加少許蜜糖..)

(2) 蘋果醬 (用蘋果加檸檬汁打成稀醬, 可以伴沙律... )

(3)自家製花生醬  (街市買生花生 (已去殼), 用180度焗13分鐘左右, 去衣... 打成醬... (要打至出油)..  可放雪櫃存一個月...

老實說, 係幾健康, 不過就次次洗一輪, 又要開機, 又要收機, 阿四做餐飽...

學英文

妹仔幫小學生補習英文... 返來, 話 : 媽咪, 我都唔明, 佢學的東西其實都幾容易, 但就用左好多時間來溫習, 最慘係, 都係學得唔好, 考得唔好..

妹仔又話: 我地以前, 放好多時間去睇書, 佢地反而就冇時間睇書.. 其實, 要學英文, 最重要係睇多D書... 點解要咁學?!

我都唔知點答....

PS: 其實, 妹仔唔識教香港課程的英文...  我都唔知點解家長會請佢...  

亂龍

今年的天氣亂龍....

今年, 我的衣櫃亦很亂龍...  這星期, 趁連續幾日黃色紅色火災警告, 馬上洗厚毛衣... 難得可以風乾, 兼曬下太陽...

打開衣櫃, 覺得今年衣櫃真亂龍... 冬天厚衫一堆不在話下, 秋裝沒有收好, 連夏天短袖都有幾件..  去年年尾一直到12月都非常熱, 秋天衫不能收... 1月天氣開始急劇轉冷, 本應可以收薄長袖 (按照一貫做法), 但2月又要出門 (去以色列, 那邊天氣一日幾季), 就要留一堆衫去當地 (長短袖, 厚薄, 羽絨都有... )... 所以, 一年到晚, 衣櫃都塞滿衫...

今日天氣, 都係早晚清涼, 下午卻20幾度... 惟有先收那些樽領冷衫和羽絨, 然後, 又攞多幾件秋天長袖線衫... 希望個衣櫃正常一D... 天氣都希望可以正常番D... (其實, 春天好少咁乾燥, 往年應該好潮濕... )

PS: 逛商場, 時裝店和鞋鋪真係平到嚇人... 賤物鬥窮人, 問你怕未!!

話咁快...

開始計劃暑假的外遊... 話咁快... 通常每年過左聖誕, 日子就會飛快咁過... 因為下半學年假期多...

朋友仔有D今年要考DSE, 應該好忙了... 

妹仔今年依然輕鬆, 仍未需要準備考大學...  所以, 妹仔心情好靚... (去年休琴後, 簡直有點游手好閒... )

數落去... 妹仔3月中要去音樂節伴奏.. 不過, 聽落都未係好掂, 佢個小提琴PARTNER真係所托非人... 惟有再催逼妹仔練下...

4月底 (或5月初), 妹仔長笛8級考試, 依家開始同伴奏老師夾... (長笛老師話, 合格應該冇大問題, 希望可以考好D... )... 總之, 合格就OK..

5月初, 美制AP (Advanced Placement) 中文考試,  妹仔的第一科公開試, 我去圖書館抄左一本練習, 俾佢操, 不過, 當然, 仲未開始... 等佢音樂節比賽完左, 都要再提下佢..

5月中,  妹仔學校出Service Trip, 出埠去也..

6月中, 一年幾度, 又係暑假外遊SHOPPING時間... 真係話咁快!!

健康食物...

過去一年, 因為妹仔的暗瘡問題, 她變得非常注重健康, 尤其在食物方面, 簡直令人十分煩惱, 因為, 健康食物都要在家準備, 當然係我做餐飽...

妹仔的食譜如下...
早餐...  半碗燕麥+杏仁奶, 奇異果一個, 烚蛋白一隻, 沙律菜, 蕃茄, 另加烚蔬菜一至兩種 (如: 秋葵, 蘆筍, 小椰菜, 西蘭花, 胡蘿蔔... )

午餐.... 沙律菜, 蕃茄, 烚蔬菜一至兩種, 烚白肉 (雞胸肉) 約4安士

下午茶...  藍莓, 西柚等水果3至4種... 果仁約20顆..

晚餐...  燕麥飯半碗, 炒菜和少量肉類..

另外, 每天約4公升水 (加檸檬.. )

亦有, 自製小吃 (妹仔自製)..

- 香蕉曲奇... (打爛香蕉 + 燕麥, 焗20分鐘..)

- Granola Bar...  (打爛以色列棗 (比較甜和大粒), 加少許蜜煻, 成棗蓉... 加入燕麥, 果仁, 紅莓, 再雪硬.. )

總之, 我就不停煮, 不停洗...

其實, 暗瘡問題在考完琴之後, 已經好了很多.... 不過, 妹仔當然另有目標, 就是減肥... (不過, 我會時常引佢食野, 等佢唔成功... )

長假期後

農曆年假, 我自己參加了旅行團, 與朋友們離港十一天...  期間, 妹仔要帶領婆婆去上海, 然後回港...

我一直有打電話, WA和WECHAT妹仔和家人, (真感謝現代科技... ).. 妹仔一路上, 都沒有問題, 甚為順暢..

我星期日返港... 妹仔馬上回報狀況... 佢話: 亞婆冇洗衫, 我自己開機洗... 亞婆出左去, 我自己做沙律晚餐...

亞婆都話, 你唔响度, 佢就自己做...

真係聽見到都甚感安慰...  不過, 當然仍有錯漏...  佢洗衫, 一隻襪就乾左, 一隻襪就仲係污糟放在地上... 佢煮晚餐, 不過, 就留左D碗, 俾婆婆洗...  (哈... 睇見都好笑.. 不過, 千祈唔好彈佢, 要讚佢...  佢以後就會繼續做... )

 雖然如此, 長假期後, 仍然係一大堆家務... 年初時, 香港極潮濕, 間屋發左霉, 客廳黑曬... 又一大堆衫要洗, 要熨... 地板黐淋淋, 廚房又污糟...

終於, 星期日晚到港, 星期一早上六時起床, 送妹仔返學之後, 就不停執屋... 做左一整日.... 散曬...

妹仔見我, 不屑地說: 放左十一日假, 做番一日, 都應該囉!!

15歲

電兔都要义電... 妹仔終於謝謝地.. 本來每晚要睇肥媽... 終於挨不下去, 昨晚倒頭就瞓著..

可能因為天氣太差, 我都謝謝地... 不過情況輕微..

妹仔15歲生日, 佢話唔要生日禮物或獎金..  只要一個BIRTHDAY WEEK...

星期六開始... 去旺角行街, 兼週街食... 這樣掃街法, 都唔平... 妹仔一個人就食左192大元.. 最貴係恭X堂龜苓膏, 還有AWFULLY CHOCOLATE的蛋糕...

 星期日去西貢... 西式午餐+WAFFLE下午茶... 晚飯又再吃..

星期一日本菜晚餐, +飯後CREPE...

星期二正日, 生日蛋糕...

妹仔破戒, 盡情地吃... BIRTHDAY WEEK喎...

真係吃都吃窮... 我問佢: 明年可唔可以只做BIRTHDAY, 唔做BIRTHDAY WEEK? 或者趣趣地收禮物同利事就算??

佢話, 冇得傾!!

朱sir??

妹仔說: 果個朱SIR乜都整唔到, 淨係可以整豬...

?? 邊個朱SIR?? 唔通係新泳隊有個朱SIR? 

我問: 邊個朱SIR呀??

妹仔發脾氣, 說: 唔係朱SIR呀? 係Juicer!! Juicer只可以整Juice, 唔可以整其他Food.. 我地要買個Food Processor呀!!

呀!!! 明白曬!!

昨晚, 睇肥媽煮餸... 我話: 哩!! 果個唔係朱SIR嚟架!!

妹仔問: 邊個朱SIR呀??

我話: 哩!! (肥媽用緊)果個係Food Processor!! 唔係朱SIR呀!!

冬天來了(2)

香港的罕見寒流, 59年最涷, 難怪我老媽年紀咁大, 都未見過, 更何況係本人..

新界落小冰粒... 打落件外衣, 彈得開既, 不是雨, 是冰... 我向妹仔解釋... 妹仔睇多眼, 係喎, 係冰喎...

其實, 出埠旅行, 都見過白雪紛飛, 只係這裡是香港, 城市基本沒有任何防冰防寒的設施... 很多人連暖爐都冇一部... 故此, 我都贊成小學停課, 因為, 學校基本沒有暖爐和任何保暖設備, 小朋友年紀小, 並不太清楚自己狀況... 這是以防萬一之舉..

昨天最涷之時, 我都四圍走... 一睹香港嚴寒奇景... 不過, 我不是上大帽山... 我只是逛商場街市.. 奇景一, 所有賣熱食的酒樓食店, 都排長龍, 包括賣雞蛋仔, 車仔麵, 包點... 總之, 排長龍..

奇景二, 街市所有賣打邊爐食物的檔攤, 亦排長龍... 牛肉檔, 涷肉鋪, 連賣水餃雲吞的亞姐, 都包都手軟... 超市裡, 所有打邊爐用得的菜都賣光, 只剩下: 番薯, 薯仔, 番茄等硬野... 街市佬叫賣炸魚皮... 15蚊.. 15蚊... 只剩三包... (老實講, 未見過, 叫賣炸魚皮... )

奇景三,  時裝店,百貨公司搶禦寒衣物... 本來, 星期四就開始大減價, 但那些羽絨羊毛底衫乏人問津, 一轉眼, 不到三日, 蜂湧搶購... 基本上, 很多SIZE都賣斷... 暖爐賣曬, 要訂就兩個星期攞貨.. 於是, 一大堆人圍住買電氈...

香港人都幾趣緻...

至於HK100, 都有跑步班朋友在山上... 佢地都安全... 今次都幾危險... 不過, 政府下次會做得好D.. 應該會提早封路... (香港政府雖然吾會先知先覺, 但都好在會吸取經驗教訓.. ).. 香港今次冇大意外, 都真係非常感恩了...

總之, 地球先生病了... 愈來愈似 Day After Tomorrow (電影)..     

冬天來了...

今年以為沒有冬天, 11月/12月都穿件薄外套就夠, 有時甚至著短袖..

忽然間, 這個星期, 又涷又落雨... 天文台話現在15度, 我在室內, 完全不覺得有15度... 以為只有10度左右... 天文台又話, 未來幾日, 會跌至5度... 記憶所及, 可能只在童年時候, 遇過5度天氣, 前幾年, 很冷的日子都係市區8度, 已經涷到喊救命...

這次非要嚴陣以待不可... 如果市區5度, 新界只有2-3度... 香港的冬天, 慘在又濕又冷, 又唔夠暖氣... 想一想都從心裡打個冷震..

幸好渣馬已經跑完, 否則,  又會見運動員在商場內練跑的奇境...

嗯... 還是好好籌謀, 這幾日冬天怎樣過... 家中如雪櫃, 還是四圍行下, 吃下西北風吧... 

輸錢..

老媽子今日去銀行, 因為9個月前的人民幣定存到期... 佢滿心歡喜, 以為有得賺... (3.9厘利息).. 結果拿出當日的匯兌單, 計一計, 原來十萬人民幣要輸幾千元...

結果, 老媽子換一半港元, 再存另一半 (4.1厘利息)..

2016年一月, 其實跟股災都差不多... 連續跌了半個月, 陰乾式下跌... 最恐怖是油價, 28美元快將失守... (可以跌到什麼價錢呢? 連開採成本都要蝕喎!)

我當然亦好不到那裡... 總之, 留得青山在...  還是, 積極計劃旅行大計, 開心快活一下...

世界各地貨幣都鬥貶值, 美元獨大... 正是出埠最佳時機...

上學期成績..

好少跟妹仔談論她的成績, 昨晚, 佢特意叫我睇佢張online成績表, 當然因為考得不錯.. 而最難得, 是佢個PEER GROUP, 8人中有4人的成績屬Top Rank (GPA>3.7), 包括妹仔自己..

不過, 妹仔都話, 這個學期給分很鬆手, 所以, 高分不太難... 佢都有自知之明..

至於佢個PEER GROUP, 以往一直都係下游成績, 妹仔是最好的一個... 今年這個GROUP, 有兩人新加入, 都屬高分一族... (一個聰明, 一個勤力.. )... 而另一個, 則是今年發憤, 由3.1爬至3.7, 真是十分厲害!

另外4人, 當中亦有中上游的成績, 而妹仔認為最不值, 是某同學J, 妹仔話, 因為佢太心散, 分分鐘都係顧住打機, CHATTING, 所以, 成績差, 佢應該係聰明叻女..我都識佢, 佢的確係聰明女, 游水彈琴都練得比妹仔少, 卻並不比妹仔差, 甚至比妹仔好..  (這是最唔抵既!! 明明做得到, 卻偏偏唔做... 冇辦法!!)

我都幾開心... 因為妹仔今年都常常跟幾位同學一起做PROJECT, 又一起溫習... 佢個PEER GROUP有上進心, 咁妹仔就冇大問題了. 

無地位

妹仔話: 連我D同學, 都覺得你冇地位!!

咁慘!!

妹仔答: 係呀! 全部亞媽當中, 你最冇地位... 亞J上次成績跌左, 馬上被訓話!! 亞V個亞媽更勁, 一望就知, 連佢亞爸都怕左佢...

真慘喎!! 我都真係幾慘架!!  妹仔班同學上來, 我就負責斟茶遞水, 之後, 就返房, 唔准出房門... 我以前個賓賓都冇咁好服侍... 真冇人道!

最近, 妹仔愛上去日本, 佢話: D分析員話YEN會升到7算, 你快D買YEN去旅行!!

知道!! 於是就過數... (聽講D錢係我既!!)... 不過, 當日, YEN兌美金係120.. 今日升到117啦.. 妹仔睇果個分析員都有D料到...

最慘係幫妹仔買左D盈富, 跌左1元... 妹仔訓斥: 乜你咁差架!!

人民弊

不要以為我寫錯... 人民幣變人民弊... 真係幾弊!!

最近人民幣不斷貶, 其中影響最大的, 除了一些生意人, 就是有人民幣儲蓄的人... 人民幣儲蓄的最大問題, 不在它貶值, 而是在於它難於兌滙.. 另外, 就是過去十年, 很多香港人因為港幣零息, 而要轉投人民幣, 才釀成今日這個境況..

其實, 其他外幣一樣貶到七彩.. 澳幣由$8到$5.5 (跌了30%)... 加幣, 紐幣都一樣... 其實, 人民幣都跌得算少... (唉!! 不過就大堆... )..

貨幣的循環, 要十年八載, 所以, 數量不太多, 沒有兌換的, 不急於變現的, 也可放著, 總有一天, 會歸來的...  當然, 不相信中央的, 亦可斬之後快..

現在, 希望人民幣下跌, 香港的物價可以便宜一點, (尤其食物), 那麼, 社會仍可受惠...

PS:  最近看中國的財金官員, 覺得他們想嬰孩學步, 跌跌碰碰, 被大資本主義洗禮, 洗到三魂七魄都散曬...不過, 跌跌碰碰沒問題, 焦頭爛額也沒問題...  活著就是勝利嘛...

久未出勤

很久很久沒有幫妹仔買游泳用具... 因為妹仔對游泳荒廢已久..

這星期, 妹仔重投操水行列, 才發現家中沒有泳鏡了... (上一枚在11月最後一次學界爛掉.. )

於是, 這個天氣, 要四圍找泳鏡... 一般公司都把泳具收了, 大型體育連鎖店也沒有, 同區有一家體育鋪有賣, 會太貴... (妹仔要求的款式要200元+)... 真頭痛... 惟有出勤去九龍灣某工廠大廈的專門店...

真是很久沒有上去, 也沒有太大分別...還幸那裡掛滿不同款式, 價錢也可接受 ($115).. 於是, 買了兩對..

以前隔幾個月, 就會上去買泳具, 今次應該相隔幾年了... 這個地方似曾相識, 亦很陌生, 時光飛逝也..

或者再過幾年, 去琴行或者都有同樣感覺了.