2014..

2014即將過去... 值得感恩, 全因無穿無爛, 人口平安...

2014..  災難多多... 三宗民航機意外, 全部乘客罹難... 又有南韓海難.. 還有其他地方的大小飛機意外...  古人講... 驛馬星大凶...  希望2015會好轉...

2014最後一日, 以為終於平安渡過, 點知又有禽流感...  15000隻雞過唔到年.. 雞販們又有損失.. 總之,  禍福難料...

2014最後一晚, 希望大家平安,  唔希望再見到麻煩事, 更加不想再見大型意外.... 請各方讓大眾市民過一個平安的除夕....

祝 新年快樂!!

聯合世界書院

我問妹仔 : 你去考聯合書院啦! (United College Li Po Chun 李寶椿) 好難入架! 入到就等於半隻腳入名牌大學.

我說 : 仲有呀! 你可以去寄宿架.. 週末返來.. 去讀兩年, 都唔錯呀!

妹仔立即搖頭, 說 : NO.

我諗 : NO就NO啦! 我都係講下, 明知你唔會去..

PS : 聯合書院是香港最優秀的高中學校 (兩年制), IB課程, 基本上全球收生..  所以, 學生是精英中的精英... 真正是半隻腳入全球TOP U.  不過, 入讀就必須寄宿.  以前, 我都有諗過一定叫妹仔去考... 不過, 近兩年又改左想法, 覺得冇所謂..

中學生活, 並非只為入大學, 有一個美好的中學生活, 和一班好朋友, 乃人生一個極為重要的階段,  將來亦裨益良多... 故此, 不需要把高中生活太功利化... 

PS: 但係, 如果小朋友有極高的上進心和競爭力, 不妨考慮下.. 因為是成績非常好的一所學校, 而且, 學校跟外學高級學府的聯繫很好, 比較容易獲得大學獎學金..  幾年前, 聯合書院的學費為每年20萬港元 (連宿費), 亦有向低收入人士提供獎學金.. 另外, 亦可以考慮聯會書院其他地區的學校.. (我記得有朋友的小朋友去了歐洲區的學校, 基本上獲得全數獎學金. )

PS : 應該在中四那一年投考, 學制等於香港的中五和中六.

我其實唔識

今日同中學中文老師和舊同學吃飯...話題離不開DSE... 我發現原來我真係唔識...

以前考會考選科, 簡單得多... 依家太多學科, 反而難選擇...

不過, 我的想法係...  現在收生不太著重學科 (除非是專業如醫生, 工程師... ), 否則, 分數比學科重要... 所以, 應該選擇容易得分 (或自己較強)的科目...

老實說,  我相信只要一科英文5**, 基本上入大部份學系都無往不利.. 所以, 強攻英文, 比較上算.. (當然中文一定要3以上). 還有一點, 最好選擇一些有較多PAST PAPER的學科 (AL或CERT PAPER也有用), 起碼有得操練... 太新的學科, 較難掌握...

事實上, 現在熱門讀Business,  這一科, 任何人只要成績好, 就可以入...  文, 理, 半文理, 一樣得...  設身處地為一班大學教授想想, 他們只需要一個語文能力強的學生... 其他, 只是nice to have.  

 

實在太黐線...

如果心血水少, 真係會俾個家長WA搞到神經質... 

妹仔話 : 咁你好退GROUP啦..

我話 : 我又八卦, 想知佢地講乜...

最近, 某家長SEND左一張圖出來,  講世界名牌大學的收生標準, TOP10要SAT考2300分以上(滿分為2400), 仲要GPA= 3.95 (滿分為4)..

其實, 睇完仲安樂啦.. 根本唔駛諗... 大覺瞓好過...

家長話, 對考大學已經覺得緊張... 唔係卦... GRADE 8 (中二) 咋喎.. 幾時緊張到畢業... 慘情..

今日見到另一位家長, 囝囝讀本地學校 (也是中二, 跟妹仔同年), 佢話 : 學校都開始谷成績, 因為, 學校乃地區直資中學, BAND1中, 要收學費, 如果冇成績交, 就會被淘汰... 所以, 囝囝都感到壓力大... 學校有學生被留級, 甚至被勸喻退學... 又有人經常要見家長..

我話 : 唔係卦.. 駛唔駛?! 中二咋喎!!

唉!! 係我遲鈍, 抑或真係大家太緊張?? 中二咋喎!!  我中二的時候, 一舊飯咁! 仲同D同學仔爭乒乓球枱, 放學後, 在校攪攪震... 我記得, 中二最偉大的成就, 就係追日本劇集.. 扮下日本妹, 打排球... 我真係完全冇建樹喎...

奇異果

話說自己咳左兩個星期,  蒸橙吃了幾日, 基本上醫好... 

蒸橙真幾好...  (我冇加鹽, 只係整個吃完, 兼飲左D苦水... ).. 一來止咳, 二來腸胃暢通...  某日, 妹仔有幾聲咳, 我都逼佢吃左半個, 馬上止左, 冇惡化...  (妹仔食到嘴扁扁!)

今日, 見生果佬有金奇異果, 想起自已要試這個食療, 就買左幾個...  吃左一個, 都係覺得酸, 不過, 未至於不能接受...  我最驚, 吃完會再咳, 不過, 又冇事喎...

老友話, 對皮膚好... 好啦... 試下啦...  (想去斑呀!)

奇異果的另一功效, 是幫助睡眠, 某日在電視的健康節目看到的, 又有老友試過, 真係有效的..

我吃左個奇異果,  就午睡左幾粒鐘... 哈哈... 我諗我係本來就想瞓... 我已經瞓好多, 再瞓多d, 就變睡寶喇...

吃奇異果, 應該係每日兩個...  不過, 我都係吃住一個先!!

爆煲

昨日, 妹仔情緒爆煲..  哭了一個小時, 又唔肯去學琴... 佢好少咁樣..都嚇左一跳.. 問左問右, 先問出真正原因..

原來, 早兩日, 本來想約朋友仔去玩... 但忽然接報, 要去學琴, 所以, 推掉朋友仔的約會... 我完全不知道有其事... 其實, 我一直都問妹仔, 幾時同朋友去玩, 佢一直冇講, 就靜雞雞推左..

終於, 佢自己覺得好委屈, 大哭一場, 我問左好耐, 佢先肯講原因...

我對佢講 : 其實, 冇所謂, 一個假期, 去玩幾日, 好正常... 只要開聲要求, 我會同老師安排... 開開心心去玩, 然後, 再開開心心去學琴... 兩全其美... 比屈在心裡, 要好得多...

我再教佢一課 : 如果有問題, 有困難, 可以講出來, 請別人幫忙... 需要的時候, 要提出, 沒有問題... 因為, 每個人都有需要別人幫忙的時候.... 我仲同佢講, 我一日存在, 我都會幫佢...

妹仔的性格太硬, 是優點, 亦是最大的缺點...  很多時候, 自己死頂, 不懂得提出要求..  而且, 佢對自己的要求, 有時候, 亦太高..  但是, 佢又不知道, 好多時候,  一個問題, 有很多解決方法, 而且, 可以解決得很好...

細路女, 雖然高頭大馬, 不過, 都仲要慢慢教, 慢慢開導... 

終於, 出動埋老媽子去勸下佢, 佢就肯去練琴...  仲幾認真...

我仲對佢講 : 你唔可以嬲老師, 佢都咁知道你想做乜.. 

我發覺, 我老了,  老得連脾氣都磨掉...  若是以前, 我可能不理好歹, 趕佢去學琴... 現在, 不會了, 也不爭一時...

始終一句, 路是要她自己走出來的... 逼不出來...

治咳方

吃了兩個蒸橙, 才發現網上有治咳良方 : 燉橙... 其實, 方法一樣, 只不過加半匙鹽, 然後連流在碟上的水都要喝掉... 難怪這兩天, 咳是好了一點..

今早, 跟師奶們閒聊, 又有另一治咳方... 就是燉洋葱...  亦很簡單, 原隻洋葱, 隔水燉二十分鐘, 然後, 全隻吃掉...  師奶說, 老公咳了兩個月, 吃西藥, 吃時就止, 吃完又咳, 已經睇左三次醫生... 不過, 吃左一隻燉洋葱, 就馬上收聲..

我回心一想, 此方亦有道理, 因為洋葱有殺菌作用... 

如果吃橙無法完全止咳, 將會試吃洋葱... 哈哈...

咳到怕..

上兩星期感冒, 後遺症是咳... 咳就最難醫... 真係咳到係人都怕左你..

於是, 西藥又食D... 枇杷膏又食D... 總之, 九唔搭八, 乜都食D..

因為以前睇中醫, 佢話咳一定要戒口, 戒所有生果蔬菜, 所以, 好慘情... 一食錯少少, 就咳到反肚.. 最衰自己唔忍得, 睇見D蛋糕, 雪糕好好味, 吃兩啖都咳死!

又因為戒口, D腸胃終於忍唔住, 唯有, 蒸個橙來吃... 真係切開個橙, 蒸十分鐘, 然後用义匙, 吃左佢...  昨天吃完, 腸胃通左, 舒服好多... 今日又蒸一個, 似乎喉嚨都冇投訴, 唔會即吃即咳, 於是, 又吃一個...  吃下吃下, 都覺得幾好味喎...

然後, 臨睡前, 焗一杯紅棗桂圓茶...  前兩晚, 飲左一杯, 加左杞子... 飲完一小時, 馬上鼻塞, 可能因為太燥熱,  不過, 睡眠質素就好左好多... (應該因為有桂圓, 寧神安睡.. ) 今晚, 又試一次, 今次, 唔落杞子, 睇下會唔會再好D...

哈哈... 依家當個身體好似實驗室, 又好似神農氏嚐百草... 試下試下,  搵D適合自己的食療... 本來, 老友介紹奇異果, 都想試下吃, 不過, 要醫好左D咳先... 否則, 一食落去, 一定咳到亞媽都唔認得..

SAT補習班

學校有一個同級家長的WA群組, 最近最熱鬧的話題是SAT補習班, 一班家長在合組, 在復活節假期, 開SAT和PSAT考試班... SAT是美制的公開考試, 通常在第11班下學期開始報考, (即香港學制F5的下學期)... 今年, 妹仔讀第8班..

這幾天, 收了近百個CHAT...  妹仔的同學都參加了... 我想, 駛唔駛咁早呀? 會唔會浪費金錢呀? 幾千元一個CLASS...  不過, 當然, 一班家長討論得不亦樂乎...  我沒有參加討論..

我給妹仔看看那個群組的資訊... 我說 : 我回校問問同學, 是否真的覺得有用... 如果你認為有需要, 我就幫你報名...

我又說 : 其實, 你應該上網, 多找一些資料... 我估計, 網上和坊間有好多past papers and mock exams, 你可以自己操卷.

妹仔說 : 我依家連底子都未有, 操來做乜??

我說 : 好! 你自己評估一下...

回想當年, 我考會考和高考, 我老爸老媽連我讀邊科都未知... 更遑論要幫我搵補習... 我們考公開試, 所做的, 就是到坊間買20年的past papers, 狂操一番, 做到冇得做, 就去考試局 (當年在新浦崗), 手抄英國OL和AL的試卷來操練... (當年影印冇咁方便, 而且好貴... )... 我們那一代, 就是這樣去準備公開試... 至於補習班, 我好似沒有去參加那些專門為考試的... (因為冇錢!)

有人說, 上一代把我們教養得很好, 所以, 我們成就了香港八十年代的飛躍... 不過, 我們這一代卻沒有把下一代教養好.... 所以, 香港在走下坡...

所以, 我決定了, 不能再SPOON FEED妹仔...  成績好壞, 只是一時的長短... 最重要的, 是她自己懂得開創自己的道路... 是時候了... 把她的責任, 交還於她..

道行高

道行高! 今早, 老媽子和一眾師奶大讚仁妻!

原本以為, 唐太已經道行非常高... 不過, 原來一山還有一山高...

當年, 唐太見傳媒, 隱約還有點苦澀味...可憐兮兮..

昨日, 仁妻見傳媒, 從容不逼, 嘴角帶笑, 還勸喻各位姐妹, 要分開財政, 有私己傍身...  觀其神情, 對仁兄之事, 已是不痛不癢... 事不關己..

仁兄豪花8百萬於小三, 每餐十幾萬, 恐怕都冇益仁妻...  正所謂: 有咁耐風流矣..

老媽子慨嘆說 : 仁妻老矣, 同小三冇得鬥架!

當然無得鬥, 鬥唔過, 只有自保...  忍到這一刻, 雖不是勝出, 但亦心涼...

仁兄破產, 只能食170元一碗湯... 慘情乎?! 好多人慘過佢好多啦... 佢好命, 仲有仁妻養...

聖誕節目

妹仔開始放假, 聖誕節多數都不會出門, 因為機票酒店比較貴, 所以, 留港消費..

這兩年的聖誕節目, 都包括去工展會... 今日又寒又涷, 兼雨紛紛, 諗住會少人, 怎料下午開始, 人數亦不少...

今年醒目了, (比去年), 自己帶車仔, 兼有心目中的SHOPPING LIST, 減少胡亂購買.. (上年因為貪架車仔, 買左一樽冇用的醬料... )... 於是, 一入場, 先去目標攤位...

老媽子吩咐落...
- XO醬,  蠔油... (仲要平過某價錢先買... )

妹仔吩咐兼自行選購..
- 雙妹止汗劑 (一買買一年用量, 因為平30%..), JOSER 沐浴露 (反正屋企附近冇SHOP), 蛋卷..

我自己都買左..
- 1 SET 護膚品, 牙刷, 雞仔餅 (俾老媽子食).. 醬料..

一大堆塞滿架車仔... 再加兩個環保袋...

點知返到屋企, 攤開戰利品, 先發覺原來都唔算買左好多... 哎呀! 我同妹仔同聲一嘆...  失敗左, 得咁少!!

Science and Arts

本常話今年不再睇妹仔的成績...  總之, 問一句, 有冇不合格? 冇就得!

但是, 依然忍唔住, 上去望下... (上學期成績.. )

SCIENCE和MATHS的成績甚佳...  Language Arts, Human Studies就沒有那麼好...

早幾日, 妹仔滿神氣地對我說 : 我科SCIENCE攞A+.. 勁!

我話 :你咁樣都得?!

妹仔話 :係呀！我有溫書呀，所以掂左！

我心想：我就睇你掂得幾耐。下學期繼續學Mechanics, 睇下你幾時頭痕!

成績

今日終於收到ATCL的成績, 足足兩個月...

成績一般, 只得64分... (及格為60分).. 

拿成績給老師看, 大家都有點失望...  老師覺得應該有70分或以上...

老師認為, 原因有以下幾個..

(1) 彈錯音... 應該彈錯了很多... 妹仔出來, 也說彈錯了很多..

(2) 指力不足, 沒法控制大細聲... 因為今年練SCALES練得太少, 所以, 指力比去年還要差..

(3) 練得少.. 今年比去年練得少..  因為同考的人少了,  GROUP細左，大家沒有在一起練習。

四首歌曲當中, 以蕭邦的評分最好, 我亦覺得蕭邦彈得最好.. 其次是BACH.. MOZART反而欠佳..  RACHMANINOFF亦不太讓人滿意..

我問妹仔 : 明年要不要推遲考LTCL的時間?

妹仔說 : 長痛不如短痛... 死就一次過!

循環

曾幾何時, 有些人說石油價格每桶不會低於100美元... 這一陣子, 卻連60美元也不保..  價格這東西, 真是十年河東, 十年河西...  我自己沒有駕車, 反而想機票的燃油附加費可以下降...

政府不斷加碼賣地, 我覺得樓價亦不可能長期處於高位...

反而食品價格, 卻有點難以回落... 不上升, 已經是好事... 今年買臘腸(某大牌子一年一度買二送一),  喜見今年沒有加價... 真高興...

跟妹仔去超市, 看見一款ORGANIC牛奶, 四年前大概15元一盒, 現在在超市是23元... (250CC), 真是加幅驚人...  還好! 現在妹仔改飲ALMOND DRINK (杏仁奶), 價錢平得多... (32元1公升)..

人際關係..

講起妹仔的老友N..  妹仔說 : N非常有自己的主見, 而非常堅持, 所以, 同其他人很難相處.

妹仔又說 : 其實, 這種堅持亦不算不好, 不過, 有點難融入..其實, 都要適應下環境..

我說 : 你將來會知道, Inter-personal skill其實很重要... 就算是最孤獨的研究工作, 都需要inter-personal skill.. 而這技能可以令一個人成功... 就像你大舅父, 他讀書欠佳, 好似沒有什麼特別技能, 但勝在人緣極佳, 所以, 在行業中也有成就.... 至於你細舅父, Interpersonal skill沒有你大舅父那樣優秀, 所以, 主要都靠自己努力..

妹仔似乎明白我的意思..

 PS : 妹仔跟新的琴老師上了一課, 我問她, 感覺如何... 她說沒有問題... 她說老師的教授和技巧都可以... 妹仔補充說 : 其實, 我基本上都能適應不同的老師.

其實, 我很感恩... 從小開始, 游泳, 鋼琴, 甚至在學校, 妹仔遇上的, 都是要求極高的老師.. (亦被鬧慣了.. )... 這幾年, 妹仔反而再遇不上嚴格的老師...  (在校, 通常都編去跟那些輕鬆的...).. 所以, 她也變得很容易滿足了..

加碼

老師家中增添了兩部琴... 一部小型三角琴, 另一台中國製UPRIGHT (琴鍵較重)..  所以, 老師家中共有四座琴...  老師說 : 以後, 學生就有四種手感的鋼琴練習.. 

厲害!! 妹仔都驚!

還有, 今日, 老師請了另一位老師教妹仔... 不知道學習情況如何..  待妹仔回來, 也要詢問一下.

妹仔的LTCL歌曲還未見影...  我見佢彈一陣, 就在曲譜上寫NOTES, 大概是要記錄指法和表達...   其中一首, BEEBU BEEBU, 彈到傻... 但係中間一段, 就開始彈得好聽左..

妹仔說 : 這一PART是全首最容易的部份, 所以, 先彈得出..

唉!!  有排練呀!!

考ATCL到今日已經8星期, 都未見成績...  等到瞓覺...  老師話: 有時, 六星期就有, 有時要超過兩個月...  每期都有D唔同..

黑白灰

妹仔說 : 同學仔N想讀Politics, Economics (政治, 經濟) 這些科目...

我說 : 也好... 有興趣就好...

妹仔說 : 都是那些非黑即白的科目..

我說 : 什麼?? 這些科目也不是只得黑與白... (沒有那麼極端..)

妹仔說 : OK... 就是黑白灰的科目... 都是騙人的科目..

我說 : 也不是... 那些專門搵錢的科目, 也是一樣騙人..  玩股票也一樣騙人..

妹仔說 : 咁你又玩!!

我說 : 總之, 人騙你, 你騙人啦..

妹仔又說 : P又話想讀Macroeconomics and Business..

我問 : Macro 同 Micro 有什麼分別??

妹仔說 : Macro係具體社會,  Micro係睇個別公司的影響, 仔細D..

我答 : 哦! 其實, 到時, 你睇邊個老師教得好, 就TAKE邊科... 就係咁..  仲有, 如果你要讀Economics, 一定要讀好科MATH, MATH最重要, 一定讀埋Calculas (微積分).. 總之, 全部科目, 最重要係科數!

妹仔說 : 咁! 讀Business呢?

我答 : 你讀Business, 就讀科專業D, Finance, Accounting... 千祈唔好讀Marketing, 最冇用... 你媽咪我九唔搭八, 都做Marketing, 就知道讀左都係浪費時間.... 總之, 乜都假, HIGH SCHOOL都係要讀好科數... 

PS : 其實, 我講黎講去, 都係叫佢要讀數, 讀CALCULAS... 理得佢係黑白灰!

身體

今年的身體明顯比去年差...  大概因為去年經常運動, 雖然天寒地涷, 死頂而做, 不過, 反而, 身體狀態較今年好得多.

記得, 去年天氣比今年冷得多... 12月中只得11/12度, 但我卻穿得比今年單薄, 還走出海, 依然冇事冇幹.... 早幾日, 妹仔感冒,  一不留神, 就被傳染...  至今睡了兩三天, 大致是好轉了...  (因為五月大感冒過一次, 連吃了兩劑ANTIBIOTICS, 所以, 今次怕怕, 急忙避世休息... )

也真的要認真再計劃一下, 應該適時增加運動量, 以保持身體健康...

點解你彈極都係嗰幾隻

我玩琴, 妹仔行過, 問 : 點解你彈黎彈去, 都係嗰幾隻?

我話 :冇計！彈得好聽嗰個又唔彈！

妹仔話：你真係彈得好難聽。

我話：唔可以怨我。

妹仔又話：我地Quintet彈琴果位同學, 一樣彈得唔好, 仲彈得難聽過你!

我話: 吓! 咁點算? 你唔係話首歌好易彈咩?

妹仔話: 我覺得容易, 人地覺得難... 冇辦法! 唯有叫佢淨彈左手CHORD...

我話: 早知你彈琴啦!

妹仔嘆口氣, 說: 人多都係難辦事!

你的音樂, 我的數學..

我跟妹仔說 : 你的音樂, 我的數學...

妹仔說 : 唔知你講乜?

我說 : 你學音樂, 等於我當年讀數學...  你的音樂三級跳, 我當年讀數亦無往不利..

妹仔說 : 那又如何? 我從來不覺得自己有天份... 我一定不會學得像J師兄那麼好!

我想... 其實, 這短短幾年, 她真的算是學得不錯..  當然, 算不上是什麼天才兒童, 不過, 也能算是ABOVE AVERAGE吧.

強國

今時今日, 大家對強國一詞, 貶多於褒... 不過, 曾幾何時, 中國人多麼希望自己是強國... 這歷史不太遠, 只在六十幾年前, 兩代人之間...

今日, 在火車上, 聽到一位老人家說 : "我在深圳坐地鐵, 大陸的年青人看見我, 都會讓座... 在香港, 難了.. 還要用手袋霸多一個位... "  (這位香港老婦是真情感慨... 我亦有同感, 因為曾在番禺 的公共巴士上, 多次看見年輕人讓座.. )

跟朋友談起, 中國農村這幾年起了變化, 增加了很新屋子... 財富似乎已到農民手中... (這我也有同感,  上一次回鄉, 確實看見多了很多建設... 本來老祖居附近沒有房屋, 上次郤多了很多鄰舍.)

與弟媳閒聊, (弟媳老家是湖北農民)..她說 : 現在, 國內的生育政策寬鬆多了, 一般去申請, 都可以生第二名小孩, 甚至以前違規超生的, 現在都可以納入戶口..

我樂見中國在進步中... 雖然緩慢, 但一步一步地走向前.. 

有很多香港人害怕共產黨...  上一代人經過解放文革這些悲劇, 我尚且能明白.. 但郤不能明白新一代人為何如此恐共, 仇共... 老實講, 我們沒有真正被中共逼害過.. (我真想不出..)

而實際上, 能為中國脫貧的, 正是共產黨. (香港人別自誇! 連五穀都不分, 你會懂得管理農民嗎? 也大概不知道煤礦油田在那裡吧..) .. 中華民國(四九年以前的國民黨)是不濟的, 腐敗不堪, 而最致命的, 是瘋狂印鈔, 弄得物價飛漲, 民不聊生... 資本主義的國民黨沒有人懂得搞經濟... 反而是共產黨, 從多年的失敗經驗中,  一步一步的, 把中國推向前... (現在, 我依然搞不清人民銀行的那些經濟手段, 不過, 起碼我知道, 他們在努力穩住這一艘十三億人的大船...而暫時, 這大船仍在穩定航行中... )

我不仇共... 我樂於看見習總藐視安倍的表情... 只有強國才可以做得到... (不要忘記, 只在六十多年前, 我們曾是日本軍人手下的畜牲... 在三十多年前, 我們也在被日本經濟侵略... )

如果中國要發展民主, 我希望是一步一步, 穩住陣腳地向前行, 讓中共和中國從改革中蛻變, 而不是推倒重來... 我們上一代曾經經歷過推倒重來的痛苦, 是漫長的內戰, 不安和衝突..

或者, 幾十年後, 我們會慶幸自己是這一代的中國人... 正如我們叫自己做漢人, 唐人... 而不是秦人, 隋人...  因為, 秦漢兩代, 漢是鞏固強大的... 隋唐之世, 唐才是盛世..

SICK n TIRED

SICK n TIRED...

慶幸自己身處一個寧靜的社區...  我對滋事者極度憤慨..  幾千人強逼幾百萬人就範...

我想問,  那些本來倡導和支持這違法活動的人,  良心何在??  完全妄顧大部份港人的生活..

這樣的民主, 價值何在??  不喜歡香港的人, 大可請便... 去美國, 去台灣, 找你們的理想國吧!

忍耐與成就

電視上一個紀錄片, 追踨一班兒童, 他們在三歲時, 做過一個棉花糖測驗, 要他們在無人看管的情況下, 忍耐不吃下臉前的的棉花糖, 結果, 有部份兒童成功,  有部份忍耐不住, 把棉花糖吃了...

這個實驗在70年代進行, 後來, 一路追踨這一群兒童, 發現沒有吃下棉花糖的, 以後在人生的路上, 多半比較成功, 學業成績會好一些,  學歷會高一些, 工作收入亦比較高..

這個實驗, 似乎證明能成功控制自己天生欲望的人, 會較容易成功...  

也許, 年青人最需要學習的, 就是控制自己的欲望, 學習忍耐, 不要任憑血氣行事..

雖然, 我覺得這棉花糖實驗, 與個人成就, 在邏輯上, 並無關連..  不過, 在教導小朋友的時候, 延遲滿足他們的要求, 也有一定的作用... 

在學習的功課上,  往往沒有一促而蹴的... 

在朋友中, 認識兩個與妹仔同歲的男孩子,  小時候, 一個聰明狡猾, 另一個平實但不算聰明.... 初小的時候, 聰明仔在各方面都領先, 但到升中的時候, 平實人入了BAND 1, 聰明仔的成績郤強差人意, 只能升入BAND 2..

我對妹仔說 : 聰明人只能學快, 並不一定學得好.... 初小時候, 可能一學就會.. 但到高小或者中學, 課程複雜了, 就只有努力學習, 才能學得好.. 

妹仔說 : 平實人的父母嚴格, 管教得較好... 聰明仔的父母郤沒有時間管教.

我說 : 這也是原因之一.

或者,  平實人的性格較堅忍, 才是較成功的秘決..   有時候, 真像是龜兔賽跑.

仍在努力中

妹仔的長笛CANON IN D仍在努力中, 佢彈得快過吹好多... 妹仔說 : 實在是難吹..

妹仔的其中一位老友B, 明年決定返加拿大升學... (B是加籍華人.. )

我問妹仔 : 少一位老友, 點算?

妹仔說 : 我OK..  加入J和P的組合囉..

年少時, 找朋友真容易...

妹仔選科, 最後決定選兩科MATH和HONS. BIO... 但要學校APPROVE, 因為兩科MATH的功課量較大...  本來妹仔打算只選一科MATH, 但老友N選了兩科, 我又推波助瀾, 就決定了..

磅數的迷思

近年, 流行瘦... 瘦就是美, 這思想實在影響了許多人, 尤其是年輕女孩..

朋友的女兒太瘦, 令她非常擔心... 最近看見在FACEBOOK的照片, 實在是太瘦, 但是, 無法勸導... 女兒聽不進去..

我對妹仔說 : 如果你的體重低於110磅, 我就會強逼你吃東西..  你千萬不能讓自己過瘦.. (還幸妹仔喜歡吃, 所以, 暫時未有這問題... 不過, 她亦有節食, 所以, 都要多加留意.. )

到了我這個年紀,  眼見身邊的朋友患病, 反而不想瘦,  因為要留番讓自己病時有個底, 不致體重過低... 始終, 身體有點肥肉, 底子會好一點...

現在, 我覺得自己目標已達, 雖然不是所謂的 "標準體重", 我亦算是過重一族... 不過, 身手尚可, 那便得過且過算了..

Quintet五重奏

12月初, 妹仔班上有個小表演, 五位同學組織五重奏, 演CANON IN D.. 兩支小提琴, 兩支長笛, 一位鋼琴... 妹仔負責吹長笛...

佢上網攞個譜, 然後, 在家中練習...  好似唔容易吹... 不過, 鋼琴部份郤很容易..

我說 : 原來吹難過彈喎..

妹仔說 : 係架.. 好多歌係吹難過彈..

我說 : 唔係睇一行譜容易D咩...

妹仔說 : 吹得快難好多... 彈得快容易好多...

今次, 係我見佢練笛練得最長時間的一次, 足足一小時... 吹到佢話 : 要休息下個嘴..

WISE

污歪老友N對妹仔的評價是 : 很WISE...

我問 : 什麼? 你好WISE... 有冇搞錯! 好惡就真!

妹仔說 : 佢覺得我認識很多事情, 另外, 佢最近考五級樂理, 不過, 唔識做... 我教左佢幾招..

我說 : 哦... 樂理... 你還可以...

估唔到妹仔整日鬧N, N反而對佢有咁高評價...

妹仔開始選科

妹仔開始選科...  國際學校的選科實在很複雜... 一大堆資料... 因為用學分制, 故此, 要計夠分才可以畢業...

明年.. 妹仔的必修科包括, 最奇怪的 EUROPEAN HISTORY...慘情...

本來, 妹仔可以揀兩科MATH, 不過, 佢話太辛苦, 唔想咁讀...

然後, 我要求佢讀HONS. BIO, 而不選BIO... 我唔知有乜分別... 因為佢話要讀SCIENCE, 咁就要讀深D啦...  (不過, 佢又話怕辛苦... )... 激死..

我講明, 如果要讀SCIENCE, 則將來必須讀較高級 (HONS或AP)的PHY, CHEM, BIO... 另外, 讀MATH一定要讀CALCULAS...否則, 不要讀SCIENCE... 

妹仔聽完我講,  想死了一半... 不過, 佢又唔肯讀ARTS... 否則, 有大量甚佳的LANGUAGE ARTS堂可選...

今早, 我對老媽子講... 妹仔讀書係差D, 都唔肯挑戰難度...  老媽答話: 唔好當佢好似你當年, 求求其其合格畢業就得, 你慌佢搵唔到食...

妥善管教... 明日棟樑..

看見昨晚的新聞, 見一班年青人(有男有女), 衝擊立法會... 真係叫人心寒... 香港人到底教出了一班什麼樣的年青人?

我要引以為鑑...  自己家裡的年青人, 真要妥善管教...  起碼要做到一位正常良好的公民...

千萬不要製造多一個廢青...  老實說, 我想說...  香港真的風光不再..  不是因為其他, 是因為自己不爭氣... 不要怨人... 如果我們的年青人, 是這般模樣, 不出十年, 香港頂多是另一個日本.. 甚至連台灣也不如...

獅子山下精神,  完全與政府政策沾不上邊... 更與佔中者沾不上邊... 因為, 獅子山下精神, 體現在自強不息的生活態度上... 與強逼別人信奉自己的理念, 完全無關... 與福利主義更加無關... 與自己話事的民主也無關...

獅子出下精神, 正是無論政府做什麼, 都會做好自己份工, 力爭上游... 不要再污辱獅子山下精神了...   因為, 最頂唔順的人, 正是真真正正在獅子山下, 為香港捱出一片天的人... 年青人! 你們是得益者. 

原來...

翻閱一些儲起的舊BLOG, 我才記起...

原來, 妹仔初初學琴的時候, 我只想, 佢能在中學階段學到八級, 已經很好..

原來, 最初三年, 我用盡不同方法, 強迫佢練琴... (只差未動手打佢... )

原來, 第一年, 佢學得很快...  原來, 老師要求過, 佢每一課都要有進步.. 

原來, 佢經常被我和老師修理到流眼淚...

原來, 我答應過, 考完八級, 就由佢自行決定, 會否再考上去...

原來, 走過了很多路...不知不覺間,  她的音樂造詣提高了很多... 

原來, 日子就是這樣, 一日一日地挨過去... 有恆心地挨過去..

望翻轉頭, 都唔敢想, 自己能否再做一次... 或者, 依家俾我再揀, 我真係再做唔到..

投訴同房

妹仔去完SERVICE TRIP, 回來, 覺得興致勃勃, 不過, 另外, 講得最多的, 就是投訴同房.

今次, 三人同房, 都是老朋友... 我以為應該極高興... 不過, 妹仔對老友N極不滿意, 無他, N甚污歪..

投訴事項, 包括:

N沒有把廁所認真沖乾淨... 妹仔說 : 其實, 只要按住水製長一點時間, 就可以沖乾淨..

N沒有洗澡, 就睡在其他人的床上... 因為她們每天要勞動, 大汗淋漓, 全身皆臭..

N出門口, 總不會預備好... 總要她們兩個打開了房門, 才慢慢穿鞋...

N某次吃飯, 狀甚噁心..

N的東西, 總不執拾好...

我說 : 唔! 好似, 你平日在家都是如此喎! (以上幾項, 曾幾何時, 我都吟吟沉沈過... )

妹仔說 : 因為明知有你做阿四... 不過, 我在外邊時, 非常守規矩!

我說 :  OK... 不過, 你地始終係老友喎... 你都知道, 媽咪D老友都唔係個個乾淨整齊, 唔可以要求咁多架...  如果咁樣, 你將來唔會再同N去旅行??

妹仔說 : 去旅行可以, 不過, 唔可以同房!!

又一 "相見好, 同住難" 的鐵證... 

考DSE中文, 建議讀韓非

古文當中, 我個人最喜歡看韓非子的著作... 韓非子, 戰國時期, 法家的代表人物... 重要著作, 包括 : <說難>, <難勢> (法, 術, 勢), <五蠹>...

這些文章都不容易看, 但是, 郤是寫得非常好的議論文, 而且, 思想精僻獨到.. 放在今天, 也沒有覺得它守舊..  故此, 在課餘時候, 能讀一篇, 就裨益不淺..

我記得 : <說難> 和 <難勢> 以前在中五的中文課程中..  但, <五蠹>郤沒有涵蓋... 但是, 其實, <五蠹> 是極精采的..

<五蠹> 是 五種蛀蟲的意思..  這五種人是:儒（讀書人／知識分子），俠（仗義行私刑者），縱橫家（言談者），患御者（逃避兵役的人），商人。

這篇文章雖然是古文，但是當中一些思想很現代...

<人民少而財有餘，故民不爭。是以厚賞不行，重罰不用而民自治> 即是說, 因為以前資源多, 人民少, 所以, 基本不太需要管理.. (現在的一些理想國（如紐西蘭）,並不一定是因為它行了什麼最佳的制度。。。想一想, 該國正是這種民少財有餘的國家.. 地大民少，天然資源豐富.. )

<夫古之讓天子者，是去監門之養而離臣虜之勞也> 即是說, 古人因為做皇帝太辛苦, 才會禪讓,  與該人的品德無關..  (今日有能之士冇興趣做官, 亦因如此.. )

 <儒以文亂法，俠以武犯禁，而人主兼禮之，此所以亂也。> (大家所歌頌的知識分子和游俠, 其實都是犯法之人, 而大家都歌頌他們, 所以, 社會大亂...真是諷刺時弊。 )

在網上有整篇文章，還有很多關於這文章的講義，所以，可以不假外求地學習，極好！

註：韓非是法家的代表人物，思想主要源自：第一，老子（道家）的無為而治的思想，（也是很前衞的思想，因為不要人的有為（人治），故此要法治。）第二，荀子（儒家）的＜性惡論＞，因為性惡，故此要以法治人。

註 : 寫完這一篇, 才發現, 原來DSE真係考過這一篇文章... 真巧合..

妹仔出埠

這個星期, 妹仔出埠, 去SERVICE TRIP...

於是, 屋企靜英英...  星期一, 送佢出機場... 佢話 : 我走開左, 你就自由自由啦..

我話 : 我會好掛住你架..

妹仔走左幾日, 因為我日日都要外出, 所以, 都唔覺得好悶... 不過, 就可以瞓多D, 勞動少D, 又可以約人吃晚飯, 唔駛趕頭趕命.. 於是, 我覺得自己肥左...

老媽子都話 : 屋企冇個細路走來走去, 靜左好多...

不過, 大家慣左俾佢煩住... 再過多一陣, 就會覺得屋企太寂寞.. 

這兩天, 再盡情吃玩瞓...  兩天之後, 回復正常...

千祈唔好發神經...

我個人認為.... 最慘的疾病...是情緒病和精神病...  其他病症, 人家都能體諒, 都大概能忍受... 但對於精神病,  對病人本身, 和身邊的親友, 都會做成極大的困擾...  故此, 精神健康比較身體健康, 更加重要... (有時候, 身體健康欠佳, 就更加要注意自己的情緒... 因為心境欠佳, 對身體況狀更百害而無一利... )

有人埋怨... 點解當日唔阻止我? 阻止我做這事... 阻止我做那事??

唉... 因為, 我怕你真係會發神經囉...  因為, 你話, 如果情況唔改變, 就會發神經, 就會黐線...講到呢句,  冇符!  因為黐線就大曬...  大到連法庭都冇得判..

到這個年紀, 就會明白... 每一個人對壓力的處理都不一樣... 有人極挨得... 有人比較脆弱.. (這也許是天生的...  怨不了誰... ) 所以, 只可以選擇適合自己的生活... 包括 : 工作, 居所, 學校, 生活方式..  不能勉強..

當然, 選擇了... 就不要再埋怨... 大家都只能為自己的選擇負責... 你想我負責, 我也沒資格..

慶祝200歲

上週末, 開始了慶祝200歲的活動... (活動為期7個月... 是4位踏入50歲的師奶, 四次慶祝生日的壯舉... )... 故此, 名為慶祝200歲的活動... (其實, 沒有什麼, 只是吃四餐飯... )

離開中學三十餘年,  我地4個人, 基本上, 每年都吃4次飯... (在每個人生日的月份)... 已經忘記了這個習慣從那一年開始... 總之, 是很久很久以前的事... 到今年11月至明年6月... 50X4= 200歲... 哈! 一個里程碑... )

如果人生只得75歲, 那麼已經行左2/3..  (如果100歲, 慘囉! 只行左一半!)

不過, 難得有人陪自己食左三十幾年飯...  都算係咁啦!

到了這個年歲, 最困擾的, 除了細路, 就係健康...  冇計! 要適應下, 身體狀況並不如十年前... 老媽子話 : 五十歲前, 身體係十年十年咁變差... 五十歲後, 身體係一年一年咁變差...  (應該冇咁差, 可能係三年三年咁變差... 六十歲後, 就真係一年一年咁變差... )

早一排,  想健康D, 學人吃燕麥飯...  發覺個胃挨唔住... 消化不了... (十年前, 曾經日日都食.. )... 仲有, 好耐冇食麥皮, 昨日食左大半碗, 個胃又隱隱作悶... (六年幾前, 幾乎朝朝返工前, 都去附近一間餐廳, 食一碟咸麥皮... ) 好囉!! 唔駛食D健康餐... 可以吃A餐通粉加雙蛋..或者大條道理去飲早茶...

今早, 發覺喉嚨痕, 咳兩聲... 細心一想, 又冇冷到, 又冇感冒... 再細心一想... 原來剛剛飲左杯LOYD的藍梅茶包... (這東西在759買得到... ) 因為未試過, 所以試下, 覺得幾好飲...不過, 飲左唔夠一個鐘, 就喉嚨痕...  即係話, 我個老細(身體)在投訴... 以後唔可以再飲.. 

同系列.. LOYD有一種orange and cinnamon warming tea..  超難飲!! 妹仔連用黎玩, 都嫌佢臭... 我初初都覺得好難飲.. 不過, 飲下飲下... 老細(身體)覺得好舒服, 所以, 就習慣左... 即係話, 雖然好難聞,  不過, 都係要飲佢...  (仲有一個好處, 就係呢款茶包極平, 只售8元一盒... 可能因為太難飲, 所以冇人買.. )

然後, 最近發現, 中午過後, 不能飲中國茶, 因為會影響晚上睡眠...  以後, 晚餐只能飲水... (以前, 我晚上都可以飲杯淡普洱茶... )  (不過, 飲orange and cinnamon tea就OK... 真係冇符.. 只能飲最難飲的東西... )

總之,  年屆五十... 唔係把口想食乜... 而且老細(身體)食得乜... 我冇權選擇... 老細話事!

滬港通..開喇!

其實, 滬港通開通, 跟我無大關係.... 因為手頭冇港交所...

不過, 滬港通開通, 都係近期值得飲杯既事... 事關社會沸沸揚揚左好耐... D新聞真係悶到死... 就係連雙方對罵都冇興趣睇.. 

反而,  鍾意睇D無聊或有趣既新聞... 好似, 上兩星期, 美酒節入場人數創新高..  蔣志光一曲回歸樂壇... 總之, 睇番D正常香港人做既事...  先覺得自己似番個無厘頭既香港人..

今日, 董伯有金句... 唔駛畫公仔畫出腸啩!   (依我記憶, 好似冇係呢D咁嚴肅既政治議題, 聽過呢句廣東俗語... 好似係粤語長片聽得多D... 好句!! ) 真係要D西方傳媒翻譯成英文, 等我學下野...

肥妹仔

自細都叫妹仔做 "肥妹仔"...  因為佢細細個都幾健碩...  加上操水, 身型有番咁上下...

不過, 自從步入青春期, 妹仔積極控制食量, 所以, 去年減左3KG, 又加上長高, 現在, 算不上是 "肥妹仔"..  但... 叫慣左, 好難改..

朋友囡囡跟妹仔同歲, 體重只得80磅... 佢媽咪好擔心, 覺得太瘦... 最近見佢D相片, 真係覺得佢好瘦... 不過, 這個年歲, 根本無法逼迫年青人去改變...  所以, 佢媽咪亦極無奈...

我跟妹仔講開... 妹仔話 : 都話我好肥啦!! (佢現在160CM, 116磅, 係標準身型, 有少少肉地...)

不過, 現今世代, 以瘦為美, 真係好難去改變這個心態... 還幸, 妹仔貪吃... 美食當前, 就幾歹都吃多兩件... 故此,  未有健康問題...

所以, 冇辦法!!  惟有繼續帶佢去食好野!!

SIGHT READ能力

剛剛妹仔拿出學校合唱團的歌曲來SIGHT READ... 彈了兩三次, 就有九成熟練... 妹仔SIGHT READ的功力明顯進步...

真是日子有功... 

我說 :  你真正可以替人司琴了... 

不過, 妹仔唔肯...

聖誕減價開始...

早一個星期, 我同妹仔講 : 今年聖誕減價會提早開始, 因為市道欠佳...

昨日, 已見CRABTREE排長龍...  果真是CHRISTMAS SALE開始... 妹仔興高采烈, 走去逛逛... 咦! 真係幾平喎!! (有些貨平到半價左右... )

唔想排長龍, 於是, 兩手空空, 走出來... 妹仔說 : 想試下D不同PRODUCT..

死喇!  聖誕SALE... 又要出血喇...  自從韓遊開始, 妹仔對護膚極具心得, 我真係望塵莫及... 

老媽子話 : 又食, 又著, 又買, 又旅行... 睇你挨得幾耐!!

話咁快

同親戚飲茶...  老媽子講起妹仔學琴,  已經考左演奏級 (其實演奏級不能演奏, 只是多一張CERT)... 大家都很驚訝..

中年親戚說 : 妹仔細時, 坐上琴椅, 只係亂彈, 又週身郁, 完全冇心機..   (我諗大概四歲, 學緊TL琴行的兒童音樂班...)

我說 : 係呀... 佢細時完全冇心機..

中年親戚說 : 佢依家高級過我老媽囉... (佢媽媽當年八級琴, 是一位琴老師, 曾經話可以教妹仔... 當年, 妹仔只得四,五歲,  攪唔掂... 而且, 自己親人, 亦教唔掂... 到妹仔大左, 佢媽媽身體欠佳, 亦無能力再教.. )

我說 : 係呀... 而家我都冇權過問, 係佢老師決定幾時考試..

親戚說 : 真係唔覺唔覺, 話咁快!

PS : 講開學琴, 我細佬本來叫佢囡囡學琴, 兩年前買左琴... 不過, 最近賣左出去, 因為囡囡(今年九歲)無心機學, 亦無謂浪費時間..  其實, 早年學琴, 係考驗亞媽, 多過考驗小朋友...  學得成功, 多數都係亞媽管住要練, 否則, 小朋友冇幾多個會自動自覺去練... 入左中學,  就連亞媽都管唔住...

飄忽的成績

妹仔的ALGEBRA成績異常飄忽...  十月尾的ASSESSMENT攞F... 我叫佢攞張PAPER俾我睇... 原來, 10條題目, 7條數學題OK, 3條文字題全錯... 我教佢做..教下教下, 佢發覺原來好簡單.. 我真係希望佢明白裡面的CONCEPT.

然後, 上星期TEST, 佢攞A+.. 98分..  都唔知佢係明白, 抑或唔明... 總之.. 一時一樣..  

無辦法,  等佢自己做... 做到唔明, 先可以幫佢...  只有等佢FAIL多兩次...

我忘記左自己學Algebra的過程.. 可能都不是一促而蹴...  老實講, 我讀PHYSICS, 都真係FAIL左一年, 然後先明白..

不同的態度

妹仔說 : N對沒有興趣的東西, 真會完全不做... 又或者在做的時候, 不斷地投訴...  不過, 我不喜歡這樣...  既然要做, 都應該用點心... 好似今次去SERVICE TRIP, N就不斷吟吟沉沉... 我唔鍾意.

我說 : 去SERVICE TRIP就要做喇..

妹仔說 : 係囉..

我說 : 每個人性格不同呀..   (不過, N是妹仔的死黨.. )

妹仔說 : N說, 佢將來會搵PARTNER做生意... 不過, 千祈唔好搵我... 我只想做打工仔!

我說 : 他的性格也是這一種.. 做生意亦無不可, 只係, 最好在行業裡做幾年, 熟習情況, 才開始... 否則, 會被人玩死... 另外, 就做一些從無人做過的..  成功例子如:  Facebook, Apple, Microsoft..  做生意, 好辛苦, 要勤力, 用心..

妹仔說 : 仲要有運氣...

我說 : 當然,  好似D網遊,  你根本唔知點樣成功..  但係, 亦有如: 神魔之塔, CANDY CRUSH, 一出就紅..

妹仔說 : 我都係寧願做打工仔..

我說 : 咩打工仔? 哪種打工仔?

妹仔說 : CEO都係打工仔!

第一次出糧

昨日, 妹仔由老師那邊回來, 身拿著二百大元...

妺仔說 : 老師給我的... 因為我幫小朋友練習G8 AURAL (8級聆聽).. 練了兩課..

我有點驚喜... 哦!! 那麼, 你請我飲茶啦!

妹仔說 : 你就想!!

佢打算用二百元, 幫部MAC BOOK配個蛋殼喎...

今日, 跟另一位家長閒談, 佢囡囡跟妹仔同齡, 也在讀國際學校...

家長說 : 不如叫你個女, 同我個女一齊去英國讀高中啦... 大家一齊去考下啦... 

家長覺得, 雖然在港讀國際學校, 始終不及外國的優良寄宿學校..佢囡囡的目標是入劍橋牛津.

我返來, 同妹仔講... 妹仔當然不肯...

我說 : 如果出國, 就一定不用考FTCL..

妹仔說 : 寧願留港... 就算留港, 也不定要考FTCL啫...

點算LTCL - Martha Argerich,Ravel Jeux d'eau

妹仔說 : 我要真正的選擇...


我說 : 我只係CY,  決定權在中央...


妹仔說 : 我要自己決定幾時考LTCL..



我說 : 根據中央的框架, 你只可以選擇明年8月或11月... 沒有其他選擇.



妹仔說 : 我要抗議.



妹仔說 : 又話可以彈D容易既歌...  D歌好難彈..



我說 : 係囉... 淨係聽你彈到BEE BUU... BEE BUU... 都唔知你彈乜!



(以下就係妹仔彈到BEE BUU... BEE BUU... 唔知彈乜既考試歌... Ravel Jeux d'eau

又一個月...

話咁快, 又一個月... 這個十月真係幾漫長...  社會動盪...  心情欠佳... 只能以冇眼睇的心態, 繼續努力...

下個月中, 亞女跟學校去SERVICE TRIP...  要出埠...  昨日, 佢逼我去聽家長簡介... 我唔想去, 不過, 終於被逼左出門... 唉!  去到學校, 出席家長, 寥寥無幾, 而且係低年級多...

其實, 我今年都好似無去過學校...  連一年一度見家長, 攞成績, 我都冇約... 我完全冇左件事, 到發完夢, 醒左, 先發覺自己冇約老師,  老師BOOKING亦已滿, 所以, 索性唔見...

明年, 妹仔入HIGH SCHOOL... 基本, 想見都冇得見... 因為不設家長日...

昨日, 見到家務助理, 關心下佢家人, 因為佢兩個仔女(年約二十幾歲), 在佔中初期, 瞓左兩日街...  兩老當然不高興...  (爸爸在大集團做茶樓廚工,  最怕集團生意失佳... )..  家務助理話 : 亞女準備下個月去泰國旅行... 亞仔忙返工...  (佢安樂曬... 一切回復正常... )

希望入冬前, 大家生活都可以回復正常啦...

   

做醫生

最近睇大台關於香港醫生的真實故事...  真係非常感動... 香港一個細地方, 郤有好多醫療上的突破, 出左好多出色的醫生... 這一方面, 真正讓我作為一個香港人, 覺得非常驕傲..

其中一位做鼻咽癌開面手術, 就為我的朋友做了手術... 朋友說 : 如果冇佢, 自己個病就冇得醫.

做醫生真係偉大的專業... 故此, 真要為他們一班有熱誠的醫生鼓掌...

我再次同妹仔講 : 如果你要做醫生, 就請你必須這樣的熱誠...   如果你只想賺錢, 就乾脆做財經商界好了..

PS : 最近伊波拉傳到美國...  讓我想起沙士... 當年的醫護人員真是非常專業, 緊守崗位..  至此, 希望香港可以避過伊波拉這一劫...

Science

妹仔今年的SCIENCE學科, 是Physical Science (Physics and Chemistry).. 原則上, 這兩科都是我強項...  (我的大學主修是Chem, 副修是Physics..)

妹仔攞住佢本SCIENCE TEXT BOOK, 走來問我 : 如何計算浮力 = W?  如果理解壓力P= F/A?

一開始, 我完全無記憶... 還幸, 攞住本書, 仔細睇下, 終於記得一些...  當然要努力解釋... 亦唔知佢明唔明... 

幾乎要講埋 "曹沖秤象" 這個成語故事, 來解釋浮力...  唉!!

我完全不明白自己以前怎樣學會PHY/CHEM...  今日再看, 亦覺得甚為攞命... 以前, 我真係做到會飛... 十分得心應手... 現在... 抱歉... 完全歸還給教授們... 不過, 那邏輯思維依然有... 所以, 都未至完全死亡....  (當今天去聽一些科學講座,  我都能掌握很多基本概念... )

至於妹仔, 還是要觀察她的理科的能力... 

我對其他人選擇理科(Science),  還是一句, 要小心謹慎, 量力而為...  (讀理科沒有什麼大不了, 亦不會特別高人一等, 除非是一定要做某些專業...  其實, 進入社會之後, 一般來說, 語文能力更為重要..  (我離開學校之後,  只用過小學的算術... 但是, 我的語文, 郤是嫌大學程度也不夠好.. )

失望的家長...

生活依然繼嬻... 雖然外面世界變得不太熟悉...

上週末, 跟一群家長碰面, 話題當然少不了佔中..  佔中對一班家長的最大影響, 是他們對仔女大學的選擇...

席上大部份人, 都對香港的大學教育非常失望..  大家都寧願把兒女送到外國讀大學..

我最難過的, 並不是學生在佔中的表現, 而是他們對異見者的態度...  大家有不同的政見, 本來是很平常的事, 但對異見者, 他們的反應簡直是令人憤怒... 嶺南大學學生對馬時亨的侮辱, 讓其他社會人士, 都極之反感...  實在, 當馬時亨貢獻社會, 出任公職的時候, 他們還在享受社會所資助的免費教育..   有時候, 也許不需要他們去感謝社會, 但起碼, 對異見者應有最基本的禮貌...

在佔中之前, 我一直都希望妹仔能出國, 進入更優良的學府... 老實說, 我對香港的大學教育早有不滿... 2008年, 我在中大讀歷史碩士時, 我發覺大學的環境變得很奇怪...  大學圖書館內, 嘈雜得像個街市, 一班學生在喧嘩... (1987年前, 大學圖書館是個安靜得讓人耳鳴的地方.. )... 然後, 大學教授說, 很高興班上有碩士生 (外來的成年人), 他們會協助維持秩序...  因為本科生 (undergraduate) 根本沒有興趣上課...

到最近, 聽沈祖堯校長一篇講道... 說現在的學生只喜歡選擇易過關的科目... 連醫科生都只揀ROAD to Success (即是 放射, 眼科, 麻醉, 皮膚) 這些不用捱苦的科目...

亦有資料說, 現在, 本科生中的一級榮譽 (First Honor) 大部份由內地學生和東南亞學生取得.

真是讓人覺得非常沮喪...  香港的大學學府裡面, 香港學生到底還剩下多少學習氣氛??  抑或, 只是有興趣搞O'CAMP 和BALL? 又或者搞政治?? (搞政治亦無不可, 只是, 成功的政客並不能單靠口號, 而是要真才實學, 對歷史, 法律, 社會, 經濟都有深入認識.. 而這每一門的知識都需要日子和努力去浸淫... )

或者, 香港因為從小苦讀, 12年努力, 只為入大學... 所以, 完成使命, 就完全鬆懈... 可是, 入大學並不是學習的終點...  大學的生活是應該好好珍惜的.. 

我不喜歡香港的教育制度, 所以, 把妹仔送入國際學校... 將來選大學, 我也希望妹仔能夠到一些學習氣氛濃厚的環境, 繼續升學.

當見到中共四中全會, 以"依法治國"為主題, 就知道, 中國大陸在努力向前行... 我們這個自命走在世界尖端的國際大都會,  我們的下一代又將會怎樣?

又開工了...

妹仔上週末考完琴,  星期三又到老師那邊, 為明年的琴試選曲...  因為時間逼切, 所以, 妹仔都要開始練習..

妹仔加了幾本琴書..

Czerny Op. 740 The Art of Finger Dexterity
 Debuzzy
 Schubert Fantasia

我問 : 你以前D書唔駛彈哪??

妹仔不回答..

我說 : 我知!  已經太淺易了...  (Czerny 299, Bach two and three part... )

似乎, 佢LTCL 會彈BACH, Mozart, 浪漫時期唔知彈乜...

不過, 老師話, LTCL會選D較容易既歌... 真好!

黑仔

有時候, 一些小事, 都會讓人覺得好黑仔...

早一陣身體有點問題... 要做檢查..  還幸無大礙...

上星期六, 出門遇大塞車.. (因為有交通意外... 大半小時都未有警察到... 本來30分鐘巴士車程, 變成一個半小時... 眼光光睇住兩架車在前面 (冇傷人, 只係等差人來影相), 全車人爆曬火.. ) .. 心想, 早五分鐘出門, 坐早一班車, 就冇事...

早兩日, 無端端被支票存款機食左張卡...  (真係無端端, 明明入卡時無事, 點知一入卡, 架機就REBOOT, 出左WINDOWS介面, 就食左卡... 入去銀行投訴... 出門口, 竟然見架機安然無事, 仲有人入緊票...  真係嬲爆...又要搞兩日, 先攞得番..  )

今日, 洗衣機又壞左... (去水喉塞... 唯有開機門, 任D水長流... )..

唉!!  真係好黑仔... 希望D麻煩小事, 早D過去... 

不過, 家務助理講得好... 呢D小事啫... 回心一想... 真係小事啫...

LTCL

我再仔細閱讀考LTCL的資格, 其實, 不需任何資格, 基本上, ATCL不及格, 也可以考上去...  (就似皇家1-8級一樣, 基本上, 可以, 一考就8級... )


所以, 無論, 今次妹仔的ATCL合格與否, 都可以考LTCL... (我當然希望妹仔合格..)

今日, 再跟老師討論... 老師想妹仔在明年4月, 先考DipABRSM.. (皇家文憑).. 因為, DipABRSM的歌跟ATCL差不多, 只係要再講多一些音樂史, 去考口試, 另外, 又要考SIGHT READ.

不過, 這個提議沒有被接納... (妹仔唔想考多一張.. ) 另外, 想早一些開始準備LTCL的歌曲, 然後, 明年8月考試, 考完試開學, 會輕鬆得多...

於是, 又有另一建議, 就是明年8月考LTCL, 然後, 2016年4月考LRSM (第二級皇家試).. 便可以跳過DipABRSM.. (LRSM需要有DipABRSM或LTCL合格, 才可以報考.. )

其實, 這個安排, 在2015/2016年的時間表上, 暫定為:

2015年8月考鋼琴LTCL
2015年11月考長笛8級
 2016年4月考鋼琴LRSM

(然後, 將來再作打算... )

註 : ATCL, LTCL, FTCL 是聖三一 (TRINITY HALL) 的文憑試.. ATCL 是第一級, LTCL是第二級, FTCL是第三級... 考完FTCL就冇野考..

註:  DipABRSM, LRSM, FRSM 是皇家 (ROYAL) 的文憑試, Dip是第一級, 也是如此類推..

(總之, 如果要考, 8級之後, 可以考多6張文憑... 唉! 原來可以好長..好長... )

努力栽培

妹仔說 : 老師最近對一位小朋友同佢家長講,  小朋友學得好好, 可以努力栽培, 將來彈到好似姐姐一樣.. (姐姐即妹仔)...

妹仔嘆說: 努力栽培...  最好唔好啦.. 好辛苦呀!

我都得啖笑...  我記得, 當妹仔初學的時候, (好似只係學左幾堂).. 老師同我講, 叫妹仔俾心機學, 將來可以彈到好高級...

我最初都不以為意... 總之, 一路以來, 都係叫妹仔交足功課..  學下學下... 就考完ATCL.. 真係一轉眼間..

老師的眼光也不會差... 可能, 這一位小朋友也有很好的潛質... 不過, 以後的日子, 也真要很用心, 很努力..

對我來說, 妹仔已經是超額完成... 彈到我想佢彈的歌曲...

考完

昨日下午, 妹仔終於考完琴試...  整個人都鬆曬...

佢一出來, 我就問佢, 能否順利完成整段演奏 (34分鐘), 佢話 : 都OK... 不過, 义錯好多音...

希望能合格啦... 還好!  沒有重大錯處, 已屬萬幸... 

跟老師簡略談過, 明年會繼續考LTCL.. 不過, 我想佢早D考 (8月考)... 放在10月實在太辛苦... 應該在開學前考完, 會比較好... 遲一陣跟老師再商量一下...

我發覺... 我開始不想再睇D佔中新聞... 實在太令人不快... 所以, 還是專注於自己的生活算了..  已經20多天, 要聽勸告, 都該聽了...

現在, 一班佔中策動者說, 佔領完後會去自首...  唉!! 實在太讓人嘔心... 以為很偉大... 實在, 現在這個環境... 佢地應該向受害地區的店鋪與市民, 逐一道歉... 佢地對香港所做成的傷害, 怎能以自首一句了之...

愛你變成害你...

昨日大台的新聞事件, 是"愛你變成害你"的最佳版本...  世事真奇妙...

只能希望事件早日和平完結...  或者我真係老左... 未來三十年是年輕人的世界...

 妹仔學校對事件的看法...

妹仔說 : N君是黃色,  D君是藍色... 佢地問我係咩色?  我話, 我係綠色..

我問 : 那麼, 其他人呢?

妹仔說 : 也不知道...

我說 : 或者是五顏六色.. 

那也不錯...  差一點想, 妹仔是騎牆派...  好一點想, 她都沒有能力去分析, 還是做騎牆好了.. 反正, 專注學業, 是目前最重要的.. 

我亦無法為佢選擇什麼教條, 理想.. 甚至, 道德.. 因為在這世上, 道德也是很含糊的... 我只能叫佢, 將來要多觀察, 多思考, 還有, 最重要, 要注意人身安全... 僅此而矣...

因為, 做太多, 說太多, 也許會像大台一樣... 愛你變成害你..

仇恨滿佈

佔中領導應該向全港市民道歉...  因為, 他們所呼籲的愛與和平, 從沒有出現過... 他們將仇恨帶給了香港...   真正犧牲了這個城市..

一場民主運動, 變成街頭爭奪戰, 以為好好橋...  這個理念一開始就極端危險...  還要用道德高地來包裝..

最可恨的, 就是把年輕學生推上戰場... 

執法者們, 做事要光明磊落..  否則, 因怒火而出事, 誰也不想見到!!

大家真是看得武俠小說太多... 霸佔山頭, 私仇私了, 仲成世界!? 

一場運動... 一面鏡子

在佔中之前,  我沒有贊成過...  但是, 有一句話, 曾經打動過我... 它說 : 如果犧牲0.5%的GDP, 換來多一些民主, 那也值得..  當時, 我想, 如果佔中, 只影響股票, 跌幾千點, 又或者某些大機構 (大銀行)的PROFIT, 那麼, 也是值得..  (因為輸左錢, 可以賺過... )

但是, 當佔中開始, 香港股市交易與金融系統, 絲毫無損... (簡直是紋風不動!!) 反之, 對一般小市民的生活, 郤做成了極大的阻礙..  或者這是佔中者, 完全無法預視的, 他們的如意算盤完全打錯..  至此, 我就連對佔中那一點的敬意, 都消失了.

一路走來, 這一場運動展露出來的, 是一張一張可怕的, 奸狡的面孔..  實在, 有幾多人真心為香港著想, 甚至為佔中者著想..  當他們滿懷熱血, 日以繼夜地守在街頭, 那些號召者, 策動者, 聲援者, 一個一個退縮到人群的背後, 偶然出來, 撈撈油水...  或者, 到現在, 大家仍然覺得自己沒有被矇騙... 實在, 沒有幾多人願意承認... (我相信, 運動結束後, 大撈油水者, 大有人在... 又或者, 見風駛舵者, 又再空群而出...  哀哉! 香港的政治人物... )

說實在的, 我真懷疑大部份泛民是"無間道"... 他們不可能用這些屎橋, 送一班熱血青年去死.. 

這幾天, 只看見港大學生會的梁女同學, 走遍各媒體, 努力申述學生的觀點..  先不論同學的觀點如何, 但是, 看來, 同學所執著的, 是書本上的思想和理論... 但是, 從高空落實到地面, 從書本回歸現實, 同學們還真要參詳一下...   (要理性地把書本的理論, 放入現實..)

西方傳媒, 把黃同學上了頭版... 是徹底破壞了這次運動.. 把本來已經非常驕傲的同學, 再送一腳..  而引起所謂, 要把行動升級這種言論..然而, 黃同學又住在哪個帳蓬中??  (驕兵... )

及至星期五晚,  泛民及佔中所呼籲的大會... 有過萬人參加... (這本是好事.. ) 可是, 到了第二早上, 留守的人寥寥可數... 這證明什麼? 大家支持學生行動, 不過, 只限於"OK..不過, 我只能做到這樣, 要我再犧牲, 那是不太可能.. "  (政府看得清楚了.. )

支援學生, 變成害苦了他們.. 本來, 他們可以光榮退場, 留給大家一個民主鬥士的形象, 但如今, 整個運動的形象和成效, 大為削減... 他們變成 "過街老鼠"... 這是天淵之別..

最美好的方法, 是領導者, 做一篇美好的演辭, 成功的演說.. 承擔責任, 並宣告光榮退場, 留有餘韻..  

最近, 政府的行動亦不是光明磊落.. 它的手法高明, 戰術高超.. 但是, 作為一個政府, 對於自己的人民, 應該行之以法, 而不應用這麼多的心術... 心術是用來對付政客, 郤不是對付人民.

到了這個地步, 政府既然已經得到大部份的民意, 我寧願見警察執行清場, 事前做充分的警告, 讓佔領者自願並自行離去, 然後, 依法執行, 而不是容讓民眾(佔中者和反佔中者)私自執法.. 如此下去, 社會只會無法無天.. . 甚至, 若果警力不足, 政府要求解放軍出動, 亦無可厚非, 因為, 中國乃主權國, 當然可以行駛主權... 甚至, 中國可以藉此機會, 表現新一代解放軍, 他們進場, 不需要坦克, 不需要荷槍實彈.. 只需要軍容整備地把佔領者抬走, 並交予政府即可... 這才是新一代中國人的施政手法...

一步一進步 (2)

妹仔說 : 真係會幫人補習英文... 每星期一堂, 要睇下日子安排...  

我說 : 你自己決定.. 自己搵時間...

佢唔肯講有冇人工,  怕我會扣零用... 

我問 : 你要教什麼? 教課文? 教補充練習? 還是教課外??  (小朋友三年級.. )

妹仔說 : 我都唔清楚... 唔知點教...

我說 :  你最好去問清楚, 了解一下家長的要求..  不過, 如果你教得唔好, 最多都係被炒魷魚..

妹仔笑一笑.. 

這也是一個學習機會..  雖然佢年紀細, 不過, 亦可以讓她了解一下...

我非常感激琴老師, 這份補習, 是佢穿針引線...  佢真係睇得起妹仔, 先會俾機會佢..  

我讀中學的時候, 暑假做過車衣..  亦有同學介紹, 去攞過小手作, 在家中做, 自己賺零用.. (好似冇話俾老媽子知.. )..  讀大學時, 全盛時期, 有三份補習 (深水埗, 大埔, 紅磡三個地區), 都幾忙.. 後來, 要準備畢業試, 去辭工, D家長都好唔捨得我...

最後衝線..

距離妹仔考琴試, 只有一星期... 最後衝線...

希望快快考完, 真正可以輕鬆一下...

妹仔說 : 我終於追過了E同學... (E同學比妹仔早學琴, 亦比妹仔早考獲8級, 在學校以音樂造詣聞名.. E比較願意參加各項音樂活動.. )

我說 : 你都未合格..

妹仔說 : 起碼我已經考左.. 

其實, 妹仔從來不"表演"琴技,  從來不做合唱團伴奏, 不參加任何才藝演出..  所以, 除了身邊幾位老朋友, 其他人不知道她會彈琴... 我常常叫佢去做下伴奏, 佢唔肯... (不過, 心裡依然暗暗做比較... 冇辦法... )

我問 : 考完試, 想做什麼?

妹仔答 : 瘋狂SHOPPING..

慘了!!!

充滿幽默感的香港人...

雖然心裡不舒服, 但是, 依然看得出香港人極幽默的一面... (無論任何立場... )

- 佔中用生日歌對抗罵聲..

- 反佔中用KINDER出奇蛋 (朱古力蛋) 襲擊佔中者..

- 女鬥士的護膚品堆滿衛生間..

- 許SIR有FANS網頁.. 佢冇出鏡一日, D人就好掛住佢..

- 佔中出街打麻雀... 老媽子話 : 今個星期冇腳打牌, 我都要出去打埋一份...

- 黑社會話 : 我都相當克制, 仲有, D學生仲惡過黑社會, 我都未敢搜亞SIR身... (其實, 我真係覺得佢地好克制, 雖然出黎拳打腳踢, 但係, 以最近的警力安排, 佢地其實可以趁火打刼, 乘機搶掠... )

- 阿爸阿媽陪仔女去佔中...仲要煲埋湯水去..

香港人... 你係得既... 其實, 周星馳真係好有先見之明, 呢D無厘頭既抗爭同反抗爭現象, 真係香港先有...  周星馳D片, 原來好寫實..

或者, 好似黃子華話齋 : 都係業餘鬥業餘啫!

香港人... 你係得既...  俾全世界既人睇下,  鬥爭可以用生日歌同KINDER出奇蛋... 唔駛下下動刀動槍架!!

一步一進步...

市面依然沸沸揚揚...

還好, 妹仔的世界平平靜靜...  學校對事件相對平和, 同學間的討論亦很理性... 而且, 似乎, 大家亦已回歸基本步... 就是,  上學, 做功課, 測驗, 做PROJECT..

妹仔這個年紀,  尚未能分辨, 分析...  故此, 在這個時候, 應該是學習的時候...  每讀一篇書, 每做一條數.. 都是一步, 一進步...  不能奢望一促而蹴... 所以, 回歸基本步,  是最佳選擇...

昨天, 妹仔高高興興地回來,  因為從同學拿到一支暗瘡膏... (托其他家長代買, 由小朋友交收... 貨銀兩訖... ) 然後, 又講下大家做PROJECT的難處, 因為要分工... 佢講下講下, 話, 我講你都係唔明...  實在, 我都冇辦法完全明白, 佢地要在這些工作上, 學習彼此相處..

昨晚, 妹仔去完琴老師家中, 今早, 對我講, 有個細路仔想叫佢幫忙補習英文...  我話 : 你D英水平都係好差啫..  妹仔笑下, 說 : 係囉...

妹仔又問 : 係咪做補習天王都唔容易??

我說 : 係呀... 要做好一件事, 一定要盡責..

妹仔說 : 係囉, 幫下手就容易, 真係收人錢, 就唔同..

我說 : 如果收得人錢, 就必須要負責任... 講好幾時上堂, 就唔可以去玩... 仲要認真做好佢..

妹仔明白, 知道這道理..  一步一進步... 佢慢慢成熟..

看古籍, 看今天...

腦海中的幾個片段, 略作分享...

(1) 出埃及記...  上帝要摩西留在曠野40年, 才呼召他出來領以色列人出埃及... 那40年不單是要磨練摩西,  也是要醞釀以色列人... 因為以色列人要挨到夠, 挨到呼天搶地, 那才是適當時機..

(2) 三國...  桃園三結義...  振臂一呼... 不過, 一出閘, 就唔見左關雲長, 剩下劉備和張飛, 又搵唔到諸葛亮...

(3) 西遊記... 孫悟空打唔過好孩兒... 走去觀音果度, 觀音話 : 死馬騮, 平時你好打得, 因為你一直在耍孩子脾氣.... 今日, 你真係遇到一個更孩子脾氣的紅孩兒,  你就打不過了..

(4) 三國...  孫權守在江東, 偏安一隅... 魯肅話 : 要緊記,  曹魏不是永遠的敵人,  蜀漢亦不是永遠的朋友.. 

(5) 三國... 江東陸遜,  頑抗劉備大軍... 一直死忍, 連敗多仗... 忍到時機成熟, 最後一舉殺敵... 忍, 未必是最弱的..

(6) 使徒行者... 邊個係 "終極 無間道"??

生活其實好簡單

好似已經習慣左...  習慣左D新聞, 同埋FB裡的留言... FB留言越來越少,  真係好現象... 大家回復正常, 等D死硬派繼續對罵... 其實, 佢地唔悶, 我都悶..

冇辦法... 都要佢地自己去受... 

過去十日, 如過十年... (朋友說的... ) ... 回頭一看, 妹仔的琴試逼在眉睫, 真係唔得閒再理世界大事...

努力呀....  (不過, 妹仔今年的身體好似差左... 可能因為功課多左... 如果佢挨過10點, 就好容易病... 面青唇白... )  似乎, 已經到左佢體能極限..

努力呀... 終點在望...

與妹仔談佔領事件...

妹仔十三歲, 雖然年幼無知... 但亦需要跟她談論一下...


上星期五, (當時, 尖沙咀仍未解封), 我帶妹仔出去, 不過, 只在尖東附近 (安全地帶)... 我地要吃午飯, 找餐廳... 在the one走了一圈, 妹仔說: "不如去支持一下D小商店!"  於是, 我地走去韓國街, 去小店食飯..
 
昨日, 妹仔的同學, 本來想叫佢去佔中... 妹仔沒有去.. 我問 : 你同學仔有冇去?

妹仔說 : 她去了, 應該只係企左一陣, 就走左.. 我勸佢不要再去.. 因為很危險.

昨晚, 我對她說 : 將來, 你要支持什麼理念, 都是你自己的選擇... 不過, 在決定支持之前, 必須問大量問題? 問得清清楚楚... 攪清楚自己支持什麼...世上有很多幌子, 有很多說來動聽的話.. 民主, 自由, 甚至愛, 和平, 法理... 看似放諸四海皆準, 看似道德高地..可是, 在不同的時空, 這一些"名字", "名詞", 在發揮不同的作用..

還有, 必須考慮對其他人的影響, 諒解別人的做法... 做人, 最重要是光明磊落, 因為, 我們每個人都要為自己的行為負責..

唔知佢明唔明? 唔知自己對不對? 希望將來, 當佢偶然想起, 會記得我說過這番話..

經此一役, 將來, 我會建議妹仔選讀以下課程 (大學裡應該可以選修, 是一些短課程 ), 希望可以幫忙佢思考..

(1) 思考方法及語言藝術 (以前, 我上過, 李天命教過, 不過, 當然, 佢應該已經退休, 希望現在有類似的COURSE.

(2) 歷史..  (很難解釋.. 中大的比較和公眾歷史的一類... )... 我從那裡學到了很多..

(3) 中國三大名著 : 三國, 水滸, 西遊...

PS : 改回原先版面, 因為, 我看見這事的光明的一面.. 無論結果如何, 我們都學會了一些. 希望事件和平解決, 大家生活可以更進步.. 

又係咁做人..

今日, 依照前幾星期的安排, 如常出尖沙咀做FACIAL..  基本上, 我到的地方, 是近尖東那邊, 所以, 一直沒有受到太大影響, 而且, 今日, 尖沙咀亦已回復正常..

中午, 到了某大學吃午飯... 事緣兩個多星期前, 已經約了兩位多年冇見的舊同學聚會, 而竟又遇上這大件事..  舊友乃大學教職員, 所以, 都問過佢, 會唔會好疲倦, 不過, 佢話, 認真想抖一抖, 所以, 午膳如常...

於是, 我帶著戰兢的心情, 進入大學... 我今早連選擇衣服都小心... 選左件七彩的...

到達大學, 裡面D宣傳單張, 好似旗海一樣... 令人覺得很沉重.. 不過, 話說回來, 認真穿黑衣的人又不算多... 而且氣氛亦算輕鬆... 除了那些鋪天蓋地的宣傳單, 其實, 也沒有什麼..

今早, 亦有點擔心... 因為怕舊友觀點不同, 大家都會不高興, (在FB裡, 大家的發言其實不太一致... 亦無法判定立場, 所以, 有點懊惱... )

去到大學教職員飯堂... 氣氛其實很輕鬆.. 並不太僵.. 同學老師都唔似好大件事, 當然亦有討論事件...

然後, 舊友來到... 大家見面... 哈哈哈... 齊聲說 : 你估心裡不知發生什麼事!! 照妖鏡一出, 個個現形!! 不過, 在FB上, 大家都相當克制, 因為不能太過火..

舊友說 : 我FB裡有很多學生..

我說 : 我都係, FB裡有中學生..

舊友說 : 我都知你相當克制... 

舊友說 : 有些事情, 勸又勸不了... 唯有講些聽得入耳的囉...  最慘D父母, 怕危險, 又阻止不了仔女上街, 於是, 就去陪坐... 陪了幾日... 佢地諗, 如果要吃楜椒, 唯有自己擋啦.. 

舊友說 : 不過, 都應該讓佢地上一課, 在外面一句鐘, 好過課室三句鐘..

我說 : 那也是對的... 只是希望大家的學習代價不要太高昂.. 

唉! 可憐天下父母心!  佔中的另一面...

最開心的事..

老實說, 以前有點怕被人家的飲食專欄洗版... 三餐去那裡, 都拍照話我知...

這兩天, 反而, 我一看見這些FB POSTING, 我就大力LIKE...  以前, 並唔覺得這些事情可愛, 今天, 才知道, 原來, 有時候, 要到處去食飯, 都有困難... 原來, 以前, 以為去旺角, 銅鑼灣是輕而易舉的事..  這次經驗, 提醒了我, 幸福真是並非必然... 一些很看似簡單的要求, 其實, 都不一定做得到... 

我地要為自己不是身處戰地而感恩...  為此, 不如與UNFRIEND了的朋友, 打一聲招呼..  (雖然我沒有因為這事UNFRIEND過任何人..  希望亦沒有人因此而UNFRIEND我... )

如果可以, 就當自己係球迷, 你捧巴西, 我捧德國... 互噓互插之後, 飲杯啤酒, 做個好朋友..

或者, 你話巴西輸得好慘喎... 唔怕, 山水有相逄, 可能, 下一次巴西大勝德國哩... 況且, 巴西以前都捧過好多次盃啦..

同一天空下... 你睇韓劇, 我睇使徒行者... 你睇爸爸去哪兒, 我睇真的漢子... 再唔係, 熄電視, 上網打機, 同FRIEND CHAT下... 

我地大部份人都係中間派...  這不是迂腐... 中間派的存在是至為重要的... 因為是緩衝... 沒有中間派, 我們真的變成戰場... 就像中東一樣... 只得不斷的派系鬥爭. 

人的生命就在一呼一吸之間... 亞婆的至理名言... 簡直係今次運動的金句!! 

老媽子話 :  星期五, 亞婆鬧左一句, 股市立即升百幾點... 亞婆, 你好野!!

PS: 繼續為香港禱告, 願平安歸於你!

盡快撤離!

我今天變成了一個白痴...  中大已經作出緊急呼籲, 叫學生撤離..

中央的容忍已經到達臨界..

我在FB呼籲大家撤離, 在WA叫朋友撤離, 甚至打電話叫人撤離... (一個傻婆一樣... ) 連朋友都打電話來, 叫我冷靜..

我說 : 我很冷靜, 很平安... 不過, 我認識的朋友, 有很多兒女在現場... 你可以鬧我白痴... 我寧願你鬧我白痴.. 都不想看見任何一位朋友受傷害..

真的... 我能做的, 都做了... 本來, 下午, 我想, 我什麼都不管, 那裡的人打鬥, 與我何干?? 不過, 我真的不想見到任何悲劇...

我們的孩子在刀口上... 死政客!!! 你們於心何忍!!!

顏色是用來美化人生的..

現在的情況, 變數太多... 因為漩渦中, 牽涉的人太多, 東西太多...  佔中, 反佔中, 普羅市民, 政府, 中央...

可是, 當中, 最重要的仍然是民意..  得民心者得天下...

如果這是一場較勁,  一場硬仗...

那麼, 政府先輸一仗..  錯在用過度武力 (催淚彈)..

佔中亦輸一仗, 因為策動 遍地開花...

中央亦輸一仗, 過早展示強硬立場..

目前, 希望各方面都明白...  民意才是真正要爭取的東西..  民意並不是強逼出來的... (對佔中者或中央或政府都一樣)..  民意是醞釀出來的.. 是吸引過來的..  而且飄忽不定..

聰明的佔中領導, 應該把影響範圍縮小, 退出民居附近的地方... 減少附近市民的反感.. 對商戶生計的影響..   (因為返工返學可以繞路走, 但是, 日日對住會爆火.. ).. 這樣對著幹, 只會失民意, 被市民唾棄.

聰明的政府, 應該持平, 爭取對話渠道, 安撫市民情緒..

聰明的政客, 不要忘記, 你們的背後還有選民... 選民的眼睛是雪亮的... 光撈油水是不夠的.. (真正聆聽市民的聲音是最重要的... ).. 現在有危亦有機... 憑良心做事的, 將會成為英雄.

中央, 請給我們多一點時間...  (反佔中的團體, 請告訴中央, 我們沒有敵意. )

我們這一班普羅市民, 以"獅子山下"的精神, 忍耐下來...  目前, 最重要的, 是保護自己和身邊的人...  老媽子都話 : 香港人, 我地頂得住!!

我感覺很悲哀, 因為香港輸掉, 不只是經濟 (錢輸左, 可以再挨過)... 而是, 輸掉彼此的信任... 讓仇恨籠罩了整個城市..

我最不願意看見, 是未來, 漫長的黑藍對決...  (就像台灣的藍綠,  泰國的紅黃.. )

顏色是用來美化人生的... 

回家...

回家吧... 馬上回家吧...

情況已經失控... 

沒有人能完全掌控局面...


理想是遙遠的... 你們終於會看見... 回家吧..

我也為香港警察致敬... SALUTE... 撐下去.. 

輸家? 贏家?

今次大型示威運動... 預視赢輸各方... (只係師奶意見..兼且苦中作樂, 搞下笑! )

輸家..

(1) 受阻地區的中小企 - 直接衝擊..  

(2) 泛民主派 : 兩面不是人...  被激進派騎劫..  又被中間派選民離棄.. (應該再動下腦筋, 有沒有新點子, 拯救下中產人士和普羅市民?)  李柱銘真係蠢... 華叔看得通透一些.

(3) 佔中三子:  是次運動, 完全表現了佢地差勁的領導能力... 完全控制不了場面.. 進退失據.. 下一次, 千萬不要叫佢地搞... 搞死香港...

(4) CY (這個當然!)  其實, CY可以咁樣推銷"袋住先"方案. : "中央撐我.. 不過, 如果你有票, 你起碼可以叮走我...  有票, 真係唔要??"  (本來, CY下台, 祭旗, 真係可以馬上暫時解決事件... 不過, 依家, 已經不再是香港的家事.. )

(5) 香港教育制度... 慘! D中英文水平差到咁!! I am save都寫得出.. 香"港"都寫錯...

(6) 香港... (還望平安渡過... 中央的用詞已經越來越嚴厲, 指佔中三子為非法人士... 如果一旦定性為反中亂港的動亂... 冇眼睇.. )

(7) 中央... 

贏家...

(1) 股票大鱷 (外資大行) - 不用多講...

(2) 中央 - 廿三條可以馬上上馬..

(3) 偏遠地區的商店...  唉!! 沙士時留港消費... 今日, 再縮窄範圍, 留地區消費..  (附近商場真係旺左好多.. )

(4) 香港... (會再民主D?? 抑或走上回頭路?  向左走? 向右走?)

仲有一方未講... 學生如何?  我老了, 看不到... 將來, 叫妹仔在我墳前報告, 是否真的贏了?

擁抱你的所愛

今天, 一整天, 心緒不寧... 如果前幾天是痛, 今天是焦慮不安... 昨天, 真的是睡得不好..

為什麼? 因為, 我完全感受到八九六四的血腥味, 在慢慢移近.. 今天在街上的年青人, 大概是四十歲以下, 六四發生時, 也許只有十歲... 我當年二十四歲... 參加過遊行, 也熱血過..

當年, 跟今天的情況很相似..  學生鬧得熱哄哄, 很精彩, 初期, 政府沒有太大的阻撓, 以為前途一片光明, 中國得救 (我也以為前途很光明)... (當時的學運, 比現在更有秩序, 學生領袖對民情掌握得更好.. )

然後, 中央開始發聲.. 重新主權立場... 最後, 血腥鎮壓..  悲劇發生... 遺下的只有天安們母親的哭聲. 

這也許不是最可悲的... 六四運動, 目的是喚醒人民的民主意識... 可是, 這二十五年後, 中國的民主推進了多少... 而中國人的民主意識, 又推進了多少... 當年的民運領袖, 又有幾多仍然執意追求民主?? (看看中國, 看看香港... ).. 那麼, 任由悲劇發生, 又有多少意義??

這不單單是中國共產黨厲害, 而是, 這是最終的人性...  我可能沒有能力, 看見九二八的二十五年後的結果... 但是, 年青人們, 在十年, 二十年之後, 回頭一看... 可能會明白我今天的感嘆..

也許, 有人會說, 中央不會血腥鎮壓...  可是, 北京是首府, 當年也是眾目睽睽... 領導人尚且不顧一切, 連自家門前的首都, 也派進坦克, 然後鎖國幾年... 香港是什麼? 不過一個美其名的國際都市...  香港人, 別太過自大!  我們是被寵壞了!  (我完全希望自己是杞人憂天... )

如果民眾運動都的目的, 是喚醒對民主的理想, 我相信, 現在已經做到了..  我們也給國際人士, 做出了一個美好的榜樣...  程翔說得好, 是時候退場了!!

只是, 我不明白, 為什麼李卓人沒有看清? 為什麼李柱銘沒有看清? (依然要推香港人往刀口上去.. ) 他們也同樣經歷過六四..  我心裡悲嘆.. 現在的希望, 也許是在曾鈓成身上了.. 

香港的命運, 要交托給誰人呢?

這兩天, 我都如常和家人外出... 依舊過我的生活..

下午, 我蓋被子睡了...  擁抱著我的妹仔... 希望我們有美好的明天...

心寒了...

剛才, 陳佐洱發表了一段講話... 用辭很嚴厲的一段講話... 我心寒了... 真的! 心寒了!

這一次運動, 已經觸動了中央的底線...  那是中央對香港的主權跟治權... 那是鄧小平(甚至整個中國)都不會作出任何妥協的... 

如果, CY放催淚彈, 觸動了香港人的底線... 那麼, 同學們又要把他們的刀鋒插到多深呢? 為什麼要把香港推到刀口上呢？

祈禱!! 真的要祈禱!!

妹仔問我 : 你為什麼這樣害怕??

因為, 你未見過六四事件...  (不單是害怕鎮壓... 而是要走過一段漫長黑暗的年月... 六四之後半年, 我到北京... 那裡, 仍是揮之不去的陰霾... )... 而且, 二十多年以後, 仍叫人傷痛... 那仇恨久久不散... 那時候，就像今日這樣亢奮，是同樣的亢奮。

六四民運，並沒有把中國帶到更民主。民運之後，學生領袖亦沒有幾多個選擇做民主戰士。

我極懷念司徒華... 至今, 我相信他是香港唯一的真正民主戰士...  當他在2009年力排眾議, 2010年支持政改方案, 讓香港人的民主一步一步向前走... 晚年時, 還要被人家罵成 " 癌症上腦"..

司徒華才是真正的笑罵由人... 寧願背負千秋罵名, 而真正為香港人謀求最大福利的戰士...  晚年, 他對個人榮辱完全看淡...  他才是真英雄.. 才是真正為香港..

可惜華叔已經不在了...  民主黨人.. 你們的良知到哪裡去了? 你們的膽量到哪裡去了??　如果只需要手刄CY, 何須用你?? 放下個人恩怨，做一道橋樑吧。。。這樣，你們才可以真正贏得港人的心和選票。。。在這個危機中，任何人都可以勝出，只要能化險為夷。民主黨人，你們在最佳的位置上。

再想深一層,  事到如今, 大家是否真正追求"民主自由"? 抑或只是追求"絕對自由"?? "絕對自由"是否健康呢??  如果每個人都要求"絕對自由" , 這個社會會健康嗎??

很多網頁讚揚學生自制, 守規矩... 可是, 霸佔巴士(巴士是私有產權, 郤不准巴士公司駛走)... 那是尊重產權嗎？那不是民主社會裡最基本的人權嗎？

民主不是＂民＂＋＂主＂兩個字，不是空談的口號。

Life Must Go On...

Life Must Go On..

繼續上茶樓,  沒法...  有冇理想, 都要吃飯... 沙士時, 我都照上茶樓...

香港的有趣景象... 也許真是香港才有... (佔中去佔中... 不佔中上茶樓... 去茶樓不要話自己佔中, 一講出口, 就都幾麻煩...  )

年輕人的口號聽得多了... FB也看得多了... 且聽茶樓論政...


某部長 :  個仔冇得管架喇.. 都二十幾歲人囉... 佢要佔中都冇辦法.. 佢唔去開工, 都冇辦法.

茶客 :  咁你困住佢, 打醒佢..

部長 :  呢個社會, 冇得你話事... 佢唔鍾意, 就投訴你, 叫警察拉你...

然後, 對面亞婆話 : 我都幾十歲, 個社會以後係你地既... (無奈!)

有激憤者話 :  去佔中, 搞死香港咋!!

有人話 : 年青人出去, 父母(老野)埋單... 

Life Must Go On... 我住在偏遠的地區, 沒有直接受到影響...  而事實是,  我本來要去中環做一點事情, 當然, 我沒有出去... 因為交通不便... 不想花時間在路上..  亦不想增加交通負荷...  我亦要去尖沙咀,  巴士恐怕不成了, 只有改用鐵路...  幸好, 老媽子這一陣子不用到旺角和跑馬地睇醫生, 否則, 恐怕亦不成行...

Life Must Go On... 我掛念我那些在中環有OFFICE的朋友, 尤其是經營中小企的朋友 (包括律師行, 診所, 治療室...) 希望佔中對你們的影響不大...  亦掛念那些要去那邊覆診, 處理必要事項的朋友...

Life Must Go On... 我掛念那些在附近地區經營小店的朋友... 希望你們的生計不會受太大影響.

數學 (3) - Life Must Go On...

Life Must Go On!

除了政治問題, 還有很多問題...  包括妹仔的數學問題...

前兩週, 妹仔的Algebra有極多問題...  今天, 她回來, 除了講了一番政治問題, 她忽然對我說 : 我今次MATH TEST有90幾分... 本來其他同學在功課上, 做得比我好, 比我高分, 但到測驗, 郤做得不好, 很多人要RE-TEST..

我很高興... 我對她說 : 你搞通了, 就可以做得到... 搞通CONCEPT之後, 就是SPEED TRAINING, 像練琴一樣...   (我記得以學PHYSICS, 第一年搞不通, FAIL了... 第二年, 搞通了, 就拿滿分... )

我真的很高興... 因為她自己解決了問題..  

Life Must Go On... 放下情緒, 還是要讀書工作的..  放下情緒, 還是應付考試測驗的..

另一則驚喜... 妹仔竟然說, 琴老師說, 將來請她幫忙教琴...  哈.. 無論有冇錢, 都不失為一個極佳的訓練...  當然, 最好有多少, 等佢開心下... 

讓歷史作見證

寫這篇BLOG文的時候, 心情特別沉重, 這幾天所發生的事情, 就像在家中發生一樣..  而最難過的, 是下一刻, 根本不知道會發生什麼事, 有什麼變數... 現在, 似乎沒有人能控制局面, 這是最危險的事情.

我們應該緊記, 每一位香港人都是持份者, 無論抗爭, 反對, 或者是沉默, 我們都為香港這城市做選擇... 所以, 必須以理性和謹慎的態度, 去對待這次事件... 我們不是在虛擬空間打仗, 或參加嘉年華... 我們都會為每一件事負上責任, 和付出代價..

追求民主是崇高的理想,  佔中是為這理想而展開的... 可悲又無奈的是, 現在變質了.

追求民主是崇高的理想, 不佔中的人也知道的, 只是, 他們覺得不必一步到位... 可悲又無奈的是, 他們也有情緒了...

如果沒有這崇高的理想, 請不要吶喊, 也不要謾罵, 更不要造謠..

我是個在家者, 也有政治意見和立場, 可是, 在"佔中"發展至現狀下... 我祈望沉默者和反對者, 作出最大的包容, 聆聽他們的訴求... 亦對目前的交通癱瘓狀態, 作出最大的容忍... 痛心的說一句, 把"中環"暫時讓出來.. 釋出最大的善意... 不為什麼, 只因為大家都是香港人, 而他們是我們的年青人.. (在受阻地方居住的, 上學的, 上班的, 我真是深感你們的不安和不便... 為此, 我真對你們的忍耐與包容, 深表敬意..) 

這是一個情緒爆發的時刻, 是一個會記在史冊的時刻... 我們並不知道爭取民主的運動, 會帶領香港走上什麼路途.. 向左走? 向右走? 就像歷史上每一個事件, 當時, 都沒有人清楚知道它的結果...  這樣的事情, 我們都見過, 像五四, 像文革, 像六四... 這一次又豈會例外!


不過, 當我們仍能選擇的時候, 我們應該堅信並堅持, 不要讓事件變成悲劇... 因為悲劇會演變成仇恨... 情緒可以消散... 仇恨郤不能磨滅.. 只會一代一代荼毒這個城市.

然而, 我亦想說, 爭取民主, 不單是個人或團體要付出代價... 整個城市亦會付出代價... 歷史在拐彎, 經濟也在拐彎... 在吶喊聲和口號聲下, 局面已悄然在轉變, 我們將會面對政治經濟民生的挑戰...  我們轉臉看一看身邊的地區和國家, 他們要堅持的, 也同時要放下一些...  這是無可避免的.... 

作為一位視香港為家的人, 我想香港往何去?

作為香港的有良知的政客, 請你們放下一己的堅持, 停下你們的指罵, 去幫忙收拾一下吧.. 你們的聲音, 我們聽到了.. 

PS : 我還有一個幼稚的信念, 就是, 香港政府這一次雖然錯漏百出, 但是, 它是個勇於改過的政府, 只要犯過一次, 下次一定會有長足的進步... 我亦對作為香港人的大家, 投以信心的一票.

慘痛的一課..

昨天, 香港上了慘痛的一課, 各方面都應該反思...

傍晚,  妹仔收到同學仔一幅轉發照片,  內容為有人拍攝到解軍軍車...  她給我看... 我沒有作出任何反應... 對未經證實的事情, 我不作反應... 妹仔亦沒有加上任何評論或轉發..

今早, 妹仔說 : 這照片是偽做的吧...

我說 : 可能是歷史照片, 97年的吧...

在情況混亂, 民情洶湧的時刻...  最可怕的, 就是漫天的謠言, 唯恐天下不亂的言論..  令各方面都無法冷靜, 甚至激化更多的情緒...

冷靜下來, 香港人還是要走下去的...  謹守崗位, 沉著氣... 我還是要做一位稱職的家庭主婦.. 我相信大部份香港人都是這個模樣的..  我們都冷靜地走過六四, 九七, 沙士... 這一回也會一樣..

走下去的路不容易...

(1)  請執法者克制..

(2) 請抗命者顧及並尊重其他市民的權利..

(3) 請勿再助長造謠者, 混水摸魚者.. 

ATCL Exam Piece - Bach Partita No.2

ATCL考試歌 - Chopin Fantasie Impromptu Op.66

這一首是我的最愛, 今次練習中有錯漏, 希望能迅速改善, 最差是MOZART, 我問老師, 老師說, MOZART練得最少, 因為技巧要求比較低, 所以, 這幾星期要努力練MOZART.. 另一首BACH有錄, 但係, RACHMANINOFF就不肯給我錄...

運動興趣

教練說 : 喜歡做運動的小朋友, 大部份都不會學壞... 而且, 我認識的一班同學仔, 大部份成績都不俗.

我說 : 他們喜歡做運動, 起碼就要放下手邊的電腦, 電話, 走出戶外... 能做到這一點, 也很不錯..

(而且, 能接受體能挑戰的, 大都有過人的毅力. )

我自己亦偏愛運動型的小朋友... 尤其是男孩子... 能在賽場上追趕跑跳游, 很陽光少年的那一種...

我以前不覺得.. 因為自己少做運動... 反而老了,  之前睇妹仔操水, 睇游泳比賽,  現在簡單的看看學生仔在球場上踢球...  都覺得很有活力..  自己都年輕一點..

年輕時候, 大部份時間都在搵錢, 不見天日...  到老了, 才走出戶外... 我也覺得自己很奇怪..

學琴材料

我的一位朋友, 年紀跟我差不多, 讀書時期考了演奏級鋼琴, 她說 : 以前學琴, 老師每年只教三首考試歌, 三首比賽歌, 而且是一級一級考試的... 因為歌曲彈得少, 所以, SIGHT READING很差...

我想 :  這樣學琴, 豈不是很沉悶! 

她說 : 不過, 現在的琴老師, 都不會這樣教... 會彈多一些歌, 還會跳級考試..

我想 : 其實, 五級以前的考試, 都不需要全考...

她說 : 其實, 我自己有極嚴重的上台恐懼症... 每次上台, 腦袋一片空白, 手汗直流, 完全不享受..

唉!! 這樣學音樂真是很慘呀..

回來, 我對妹仔陳述一二, 我說 : 你彈了很多本歌書呀.. 考ATCL的歌都轉了幾次... 不過, 你的SIGHT READ依然很慢..

妹仔說 : 是啊! 我都覺得自己很慢, 不過, 每個人都有限制的.. 除了SIGHT READ慢, 我基本上沒有PERFECT PITCH (絕對音準)..

我說 : 不過, 你在BAND裡面, 都聽得出人家是升了半音, 或是降了半音, 甚至聽得出音調喎.

妹仔說 : 那不是PERFECT PITCH... 同學J是能唱出來的... 你要A調, 她就唱出A, 要E就唱E, 那才是PERFECT PITCH.

似乎妹仔對於自己的音樂材料, 都認識甚深... 

數學 (2)

妹仔的數學(ALGEBRA)問題, 沒有完全搞定...

其中一份功課, 大概有一半的題目做錯...  (老師已改... )

當然, 我必須保持一貫冷靜, 因為,  緊張又怎樣... 只會讓情況更差... 而且, 保持對學科的興趣, 和保持信心, 比較重要... 數學問題, 只要搞通, 以後, 就會一帆風順...

我問妹仔 :  這數學以後會好一些嗎?

妹仔說 : 我知道自己錯在哪裡.

OK... 我馬上收口... 

PS :  老實講, 她的題目, 我也無法完全理解... 以前, 我們比較簡單... 只是Simplify the formula..現在, 她的問題太多花款, 我都不太清楚想做D乜... 

PS : 我忘記左以前點學ALGEBRA... 點解自己會識... 完全無印象... 所以, 都唔識教佢D竅門...  只知道佢做錯...  或者, 以前, 我學ALGEBRA果時, 都錯過好多次, 只是自己冇記憶... 只係做多左, 明白左, 覺得應該好容易... 所以, 應該俾時間佢消化下..

唉!  真係唔記得左自己點學ALGEBRA....

女人唔可以窮

行過戲院, 做緊一部 " 男人唔可以窮 "..

我同妹仔齊聲說 : 女人更加唔可以窮!! 

因為, 除了衣食住行, 女人仲要扮靚保養... 呢樣最貴!

朋友說 : 我可以話俾你知, 養女貴過養仔好多, 就算乜都唔買, 淨係衛生巾, 都要每月幾十蚊...  (佢有兩仔一女.)

朋友續說 : 亞女D頭髮, 做負離子要一千, 然後, 要做TREATMENT, 又要染... 我已經好叻, 盡量在屋企, 我幫佢做喇!  如果唔做, 個頭蓬蓬鬆鬆, 十分難看...

當然, 仲有護膚品一大堆... 衣衫又一堆... 

朋友介紹左"林三益"洗面刷同黑頭刷, 清潔效用甚佳, 一套就要HKD328...  唉! 你話, 點可以窮!

秋意濃

經過上週的悶熱和八號風球, 今天終於感受到濃濃的秋意... 今年的日子好像特別長...  可能因為妹仔的琴試安排在十月, 所以, 一直有件事在心上, 要等待完成...

今日, 老媽子說 : 妹仔很久沒有跟我們飲茶...

我說 : 是呀... 很久沒有跟我吃早餐, 很久沒有跟我外出吃午飯...

因為暑假以來, 都忙著準備考琴... 除了上學做功課, 和一些必去的活動, 基本都是在練琴... 以往兩次考琴, 都安排在八月, 所以, 暑假後, 生活立刻回復正常... 但是, 今年, 郤仍然在等待...

所以, 覺得今年的日子特別長....

秋天到了...  希望快點完成這次考試...  又可以周圍輕鬆一下... 

扮靚

妹仔說 : 我的同學們都有個會幫她們扮靚的媽咪, 所以, 她們著衫都很靚...  (佢數幾位同學, 都是十分女性化打扮, 鍾意著靚裙... )

我說 : 你也不是不靚, 只是比較中性化, 比較型格..

妹仔說 : 她們真係著得比我靚好多喎...

我記起了, 就反駁 : 其實, 我都有幫你扮靚... 你細細個, 我買左好多靚裙俾你... 都係CHICKEE牌... 好鬼貴, 三四百蚊一條, 全部SIZE 130/140... 不過, 你一條都唔肯著... 搞到送曬俾表妹咋.

諗起, 真係好冤枉... 因為佢8歲9歲時, 完全唔肯著裙, 所以浪費左一堆靚衫... 後來, 我當然不再買裙, 因為實在太浪費... 佢自己亦不會選擇著裙...

妹仔終於記起, 就唔敢再哦我... 

荳芽夢

今日, 妹仔回來, 對我說 : 原污歪N鍾意佢CHESS CLUB的一個男仔... 不過, 如果N要人家鍾意佢, 佢真要認真改變一下自己, 起碼要洗乾淨件衫...

我說 :  你先叫佢跟你亞婆, 改左D污歪惡習... 再跟陳師奶學下D溫柔舉止, 包OK!!

妹仔又說 : E都鍾意一個男仔, 都不是校內同學...  E就有希望得多, 起碼佢識打扮...

返到屋企, 我同妹仔講 :  隔籬座亞C仔以前同你一齊操水, 而家幾正, 身形好, 樣子又CUTE, 大個仔左幾似金秀賢....  另外, 仲有校隊師兄, 又斯文, 又有禮貌...  我唔會叫你搵個肥光頭仔架... 你去搵個男朋友仔,  翻黎俾我見下啦...

妹仔馬上叫婆婆 :  亞婆, 你個女黐左線喇!!

地溝油後

地溝油名單公佈後, 似乎香港人都沒有特別大反應...  沒有人去搗亂店鋪, 攞食物退貨等...

要排隊的酒樓, 照樣要排隊... 麵包店一樣有人買包... (今日, 我都去聖X娜買雞尾包.. )  

不過, 很多店鋪就張貼告示, 告知食客, 今後轉用丹麥油... 有一些亦會說明, 只是某類食物用過, 其他沒有被影響...

其實, 回心一想, 點解香港人咁鎮定?  或者, 我地都相信, 這一舖只係無心之失..  其實, 大家都唔想毒害自己友...  而且, 大部份食肆都係有良心...

記憶之中...

朋友是美X廚工,  佢自己同家人都經常幫襯美X.. 過時過節, 必定買一大堆月餅, 年糕...  佢地自己同家人都食...

中招街坊麵包店老板娘, 我經常見佢, 午餐就食自己D包... 佢點都唔會想毒自己... 

仲有, 中招酒樓D伙記, 放假都去自己酒樓飲茶... 我諗佢地對自己店鋪出品都係有信心...

話說回來... 果位香港地溝油出口商, 同佢D家人, 應該唔會聰明到, 完全唔食"中招"店鋪的食品卦...  害人害己,  最慘係攞我地陪死... 

地溝油笑話幾則

今日, 食安中心公佈左380家食店黑名單...

一早起身, 打開電視... 看見訪問其中一家我地常常幫襯的酒樓... 大笑一聲 : 中左!!

不過, 我地繼續去飲早茶, 以為酒樓應該水靜鵝飛, 點知仲係要排隊等位...

老媽子笑說 :  大家排隊吃地溝油!!

坐低, 慢慢嘆報紙, 睇下果張詳細名單..

老媽子說 : 點解隔籬X香, D野又CHEAP又難食, 佢地竟然冇份!!

陳師奶笑說 : 就係因為佢地冇用地溝油, 所以, D野唔好食!

老媽子又說 : 唔通佢地真係冇用??

我說 :  唔! 佢地放棄同台灣攞貨, 改由大陸直接入口...

以上, 係真人真事!

數下數下...

除左隔籬酒樓, 幾乎日日幫襯...  上星期, 去左王X沙.... 再上一個星期, 俾老媽子逼我, 食左個聖X娜菠蘿紅豆包...  仲有, 附近果間麵包鋪, 我地都日日買... 上星期, 亦買左菠蘿包同雞尾包...

總之, 計下計下... 一日食幾劑... 哈哈... 我諗仲有排揭發... 最好睇埋其他國家入口果D, 尤其祖國出品...  都唔知有冇用台港泡製的美味原材料!

數學

我一向自廢武功, 不參與妹仔的功課和溫習, 除非妹仔主動求助..

今日, 妹仔要求我幫忙做一條數學 (代數Algebra), 一看再看之下, 發現全份功課, 有幾條做錯, 錯得很徹底... 即是概念完全錯誤..  4xy = 4x + 4y.. 類似問題.. 

我的反應, 當然是講 : "錯! 全部錯!"  (事後, 覺得這個反應不太好... )

妹仔馬上眼濕濕... 不過, 冇辦法, 都要教落去...  教完, 唔知佢明不明白... 因為問左, 佢話明白, 都唔知真定假...

我盡快收聲收口...  唉! 數學這一門學問, 通就是通, 不通就是不通... 也罷...  (去年以前, 佢D數都可以自己搞掂... 不過, 事實上, 未有大難度, 所以, 容易過關. )

後來, 我對妹仔講 :  冇辦法! 你媽咪以前D數學好勁... (我其實唔明白佢唔明D乜... )

希望佢真係明啦...  我都要再觀察一下, 如果佢D數學只係一般...  往後的選科, 我都會勸佢放棄理科..  無謂辛苦... 事實上, 離開學校之後, 大部份人都只需要小一至小二程度的數學, 亦即是 "加減乘除"...  幾何代數... 實屬過眼雲煙.. 過關就算.. (完成中學, 夠分入大學就OK.. )

PS : 昨日, 睇一個電視節目 "真的漢子", 幾好笑... 六個大男人(二十幾至四十幾歲的韓國著名藝人)在韓國接受軍訓, 其中一幕, 佢地要學炮兵隊的數目字手勢... 一方要用手勢用乘數表出題, 另一方要用手勢作答... 

六個男人, 五個唔識答! 部份因為佢地唔識D手勢, 主因郤係因為佢地背唔出乘數表的答案... 例如: 7x7 = 49, 佢地竟然係唔知答案係49... 俾佢地笑死!

其中一個人話 : 我自小數學就好差, 如果我識得乘數表, 就一早去做稅務局, 或者做會計師, 仲駛乜係度做啫!!

數學! 就是這樣的一回事! 識就係識! 唔識就係唔識!!

什麼性格??

妹仔對我說 : 琴老師話, 我跟左佢咁多年 (五年多), 佢都不太了解我的性格...

我話 : 你的性格, 就是惡!

妹仔答 : 媽咪, 你都只認識我九成...

其實, 妹仔D性格, 我諗深一層, 係女版"西門吹雪", 女版"步驚雲"... 總之, 千祈唔好惹佢... 唔惹佢就好地地...  一惹佢, 就呯呯彭彭, 非常臭脾氣... 不過, 基本上, 都可以係 "河水不犯井水"..

呢種性格, 亦非常剛毅, 內斂, 自律性強... D棱角有待磨滑... 有排辛苦...

女仔呢種性格, 真辛苦..   

秘訣

朋友仔問妹仔 :  我就快要考八級鋼琴, 你有什麼秘訣??

妹仔說 :  只要你有一位老師, 像我那一位一樣... 不過, 我相信你不會希望擁有..

妹仔最近的生活...  早上返學... 放學後留校做功課..  盡快完成... 返家休息約半小時, 到老師家中... 7點返屋企吃飯... 吃完飯沖涼, 之後, 又到老師家中, 直至晚上10時回家... 回家洗臉刷牙, 上床瞓覺...

週末, 基本除了三餐一宿之外, 都留在老師那邊...

都真係非常刻苦... 慘過我當年返工... 

我問老師, 情況如何?  因為還有一個月, 就要考試..

老師說 :  妹仔跟另一位同學, 應該可以及格...

PHEWWW... 咁都安樂D..

與青少年共處

學校有一份甚佳的PPTX... 對作為青少年人的家長的一份提醒..

Quote From Teenage Kids..

"There is a lot more going on in our heads than we let on."
"Peer pressure has caused me to do things my parents wouldn't want me to do."
"Because I am concerned about what my friends might think, I am afraid to be myself."
"The worst part of being a teen is all the pressure to be skinny."
"I never used to wear makeup. I do now to cover up my flaws."
"At our age, we are really developing personalities. And although we may not be what you expect, we can only be ourselves."
"One day I am happy and the next day I am sad. Is this a normal part of growing up?"
"Loyalty is an important part of being a friend."
"We don't need to be told what to do all the time but sometimes we do."
"I love to learn, but I hate being taught."

Some Truths..
- We want kids who will be self-motivated and take responsibility for their own life even if it is difficult.
-  Adolescence is  a much different experience for our kids from what it was for us.

- Kids do not need empty praise, but they do need informed encouragement.
- Children who feel they belong at home won't be so desperate to belong to the wrong groups.
-  Teenagers want you to be involved in their lives, even if they don't seem as if they do.
- Create a sense of belonging in your home.
- Make sacrifices to spend more time with your children.
- We must model what we teach, or what we teach won't take hold.
- We don't parent teenagers by rules;  we parent teenagers by relationships.
- Get extraordinarily involved in your teenager's lives.
- Kids are watching us twice as much as they are listening to us.
-  Children and adolescents must be given plenty of opportunities to decide for themselves, especially while they are still open to early parental guidance.
- If you've never given your kids the freedom to fail, you haven't equipped them with the freedom to succeed.
- Parenting adolescents is about finding the right balance between holding our growing kids close and letting them go.
- Constant criticism is an extremely unsuccessful form of communication.
-  An over-protective parenting style is a prescription for disaster.
- You must allow adolescents to have some freedom.
- Career-driven parents miss what matters most - a rich and rewarding home life.
- Don't do everything for your kids.

Surviving your Kid's adolescence...
- Follow Through
- Watch your expectations.
- Accept them where they are
- Take time to listen
- Respect their choices
- Ask for forgiveness
- Respect their privacy
- Communicate clearly
- Talk about potential problems
- Don't show them off or embarrass them
- Don't pick at their flaws
- Don't make every instance in life a "Teachable Moment"
- Don't make Icebergs out of Icicles

選校風雲 (2)

昨晚, 聽朋友訴苦30分鐘, 冇辦法! 幾十年姐妹, 都要幫佢疏導下情緒, 聽下佢發牢騷...

話說亞仔入直資英中, 一個星期, 已經捱唔住...

佢話 : 好驚幫亞仔再揀錯學校, 害左佢...  將來俾佢同佢老豆怨..  話我唔識教仔...

我話 :  冇人有資格怨你!  日間工作, 放工買餸煮飯, 晚上陪仔做功課, 邊個有資格怨你? 邊個咁叻, 佢自己來做!  亞仔更冇資格怨你... 自己未用功, 怎可以怨人!

(姐妹開始壓力爆煲... 慘! 佢開始擔心將來亞仔學壞, 亞仔讀唔成書, 亞仔...好多未發生既慘事, 佢已經開始擔心... 慘!)

我同佢講 :  先唔好擔心其他事情... 現在問題係功課太多, 先想辦法解決, 用錢請補習啦!  (當然, 亞仔懶散, 有時請左都冇用.. 只係好過冇... )

最差打算, 一是留級... (中一留級... ).. 二是轉校... 

我對佢講 :  留級, 看似很嚴重.. 但事實上,  如果留級打穩基礎, 再讀上去, 未必是壞事... 將來畢業, 十八歲同十九歲, 又有幾大分別?!!...

第二, 轉校...  如果真係唔適合, 轉校亦不是壞選擇... 其他人一定講, BAND 1好過BAND 2, 不過, BAND 1學校一樣有考第尾的學生... BAND 2亦有入大學的學生... 與其, 晚晚捱到1點, 日間冇精神學習, 浪費整個中學階段, 不如, 讀一所得心應手的,  讓小朋友多一點自信... 冇人知將來會點...  好過搞到你同亞仔精神崩潰... 黐左線, 慘到無倫!!

佢都打左去好多學校, 但間間都滿左, 唔再收新生... 唯一一間有位 (BAND 2), 在佢工作地方附近, 不過, 佢擔心學校校風, 未知如何, 又唔知亞仔會唔會俾人欺凌...  (總之, 很多擔心... )

我同佢講 : 如果學校離家不遠, 你又可以遷就上下班時間, 多抽時間去陪佢, 教佢... 比較入一所BAND 1 學校, 會好好多! 

選校風雲

朋友仔真辛苦...  今年派中一... 首先, 放榜派左第六志願... 於是, 家長周圍撲學校,  撲到一間直資BAND 1英中...

上學剛剛一星期, 家長又發曬茅, 再周圍撲學校... 我接到CALL, 查詢不同學校的情況...

我問佢, 點解又要撲過...  剛上學一星期, 點解唔試下, 捱多一段時間??

佢亞媽話 : 第一個星期, 已經要晚晚做功課做到一點鐘, 真係人都癲... 亞仔唔癲, 我都癲...

我話 : 唔係嘛! 咁得人驚!

(不過, 其中主因, 因為唔適應全英語教學, 搞唔掂D功課...又做得慢!! 慘!! )

於是, 我將我有限的知識, 叫佢去試某D中學... (BAND 2, 較容易... 校風OK.. ).. 家長寧捨BAND 1, 去BAND 2...

另外, 又有另一女生, 今年上中二... 去年派往第一志願的BAND 1英中 (區內最佳)... 但是, 讀了下來, 發現數學追不上... (主因是英數, 英文底子欠佳)...  家長亦頭痛... 不過, 還幸女生比較有毅力... 死頂住..

有時,  派學校... 真是禍福難料!  適合自己才是最佳選擇...

問題食品 (2)

剛聽新聞, 今天一個最好的消息, 就是美心月餅測試及格...

PHEEWWW...  事關屋企仲有一盒美心月餅...  亦有兩個已經食左落肚...  如果出事, 真係全香港人都多謝佢...

今日, 我仲係樓下麵包鋪, 買左菠蘿包同雞尾包...  老媽子話, 你仲敢食??

妹仔答 : 都唔係美心...

我心諗 : 唉!!  其實中左招都唔出奇...  不過, 亦唔驚得咁多... 除非真係唔出去食野...

我估計... 未來幾日, 一定會愈查愈多問題食品...  呢D原材料出事, 真係牽連甚廣,  有排CHECK..

問題食品

問題食品又出問題... 今次係台製地溝油...  全台淪陷... 連香港亦不能倖免... 其實, 我諗我都應該食左唔少....

早年... 食孔雀石綠.. 食瘦肉精... 食賀爾蒙... 

兩年前, 食左膠粒 (塑化劑)... 

早一排, 勿當奴出事...  食左過期肉...

今次,  食左糞油... 

下次, 唔知仲有要食乜...  點解現今人類咁多怪病...  都係自作孽...

其實, 我常常都話... 你賺我D錢, 冇問題... 不過, 你唔好攞我命...  (不過, 似乎, 兩岸三地, 遠至英美, 都無一倖免囉... )

曾經打趣說...  驚到老冇錢過日子, 就早D食煙飲酒, 等自己短命D... 依家, 唔駛食煙飲酒咁貴... 食多D兩岸的美味食品, 都同樣收效... (不過,  可能死得辛苦D... )

不過, 話說回來, 寧願食化學品 (膠粒, 工業用料... ), 好過食地溝油... 起碼睇起上來, 冇咁嘔心.. 

佔中? 反佔中?

晨運路上, 聽見兩位亞嫫談話... 真係亞嫫 (該有六十歲... )...  難得亞嫫談政治...

一人說 :  你係佔中??  唔係... 唔係... 你係反佔中!!

真有趣!  在這個社會,  只有兩派... 一派佔中,  一派反佔中...  好似中間冇路行... 

又有人問某人 :  你究竟是反國教 (反國民教育)? 定係反反國教??

同出一轍...  都只有反... 與反反... 

唔通真係冇路行...  我真想有多D有自己意見的人,  譬如: 鮮魚行梁校長. (他在國教的立場)...  可以俾D其他路線我睇下...

最近老董出場...  妹仔見佢... 笑說 : 老懵董呀...   (其實, 妹仔都幾有時事觸覺...  對政經人物都好有興趣...  )  昨晚, 又齊齊睇訪問盛智文, 她覺得這一位蘭桂坊之父非常正...   我希望將來, 佢會有多一D見地, 多一D獨立思考的能力...

老媽子評

妹仔練琴...

我問老媽子 : 佢彈得怎樣??

老媽子說 :  呯呯嘭嘭... 唔知彈乜... 不過都幾好...  咁樣就叫演奏級嗱....

神童? 曳女?

同學J因為功課欠佳, 常常被罸留堂... (可憐.. 妹仔的學校, 初中生欠交三次功課, 就被留堂一個月... 唉!)

同學J對妹仔講,  某家長對佢媽咪話, 佢好曳, 成日被罸留堂...

妹仔對同學J講 :  不過, 我媽咪話你係神童喎... 神童J...

佢都真係幾叻... 一手小提琴拉得很好.. (下次考演奏級)... 然後, 十一月, 鋼琴亦將考八級...  然後,  與妹仔同是學校泳隊... 但佢從未在外邊的泳會操水, 每星期只游一課泳班...  但是, 她的蛙式快過妹仔好多 (十幾秒)... 今個暑假回來,  佢D自由泳37秒, 蝶泳43秒... 妹仔疏於練水之後, 自由泳已經退步至39秒, 蝶泳44秒...   (好多人操好多年, 都游不到這個成績架...  佢冇操過, 可想而知, 天份奇高!)

我說 :  果真是神童!  如果稍加操練, 一定可以代表香港, 去參加青年奧運會...

有時候, 真係觀點與角度... 

彈得唔好聽...

老師出遊, 妹仔多了時間在家練習, 我聽她彈的時間也多了...

妹仔今次考琴,  彈四組歌...  Bach Pattita,  Mozart, Chopin Fantasie Impromptu, Rachmaninoff Prelude..

佢練下練下...

我同佢講 :  你果首BACH彈得唔好... 唔好聽...  (尤其開頭果幾個BAR... )

佢輕鬆答說 :  你都話唔好聽哩...

冇符...  Mozart係一般...  Rachmaninoff練得最少, 都可以, 技巧未夠, 但有味道.... 蕭邦練得最耐, 亦最好聽... 

我估計... 因為從小開始, 佢聽chopin和Rachmaninoff聽得最多...  所以, 耳熟能詳,  對掌握表達都較佳...  Bach同Mozart聽得少, 所以, 掌握得唔好...  (每件事情, 都真係日子有功... )

PS :老師的學生在北京比賽，進入第三輪．．．真係可喜可賀。。。　

推銷妹仔護膚術

今日, 同親朋戚友飲茶... 席間, 有兩位初中女生, 其中一位臉上長了很痘痘...

我又馬上推介妹仔的護膚術...  去痘痘...  (Aloe Vera Gel).. 因為此方法甚便宜, 又沒有太多副作用... 可以讓人參考... (不過, 始終是藥品, 要先測試自己皮膚, 會否敏感... )

又介紹蛋白, 蛋黃護膚...

我回來, 告訴妹仔...

妹仔不屑地說 :  你覺得很自豪嗎?  覺得自己很厲害嗎?

我說 :  沒有... 我為你而自豪而已...

老師出遊

週末, 琴老師要去北京, 因為小學生贏了區際鋼琴比賽, 要去北京作第二輪比賽... (可能係家長邀請, 老師陪佢出賽..)

這一位小學生真幾厲害,  小學三年級已經完成八級琴試... 應該係老師最得意的門生...

老師出遊,  妹仔應可輕鬆一下, 不過, 老師已經吩咐了... 她的地方繼續開放, 要佢地幾個今年考琴的學生繼續去練... 所以, 這個週末, 都係冇假放...

講開比賽... 

妹仔可能係老師的學生中, 唯一沒有參加過任何音樂比賽的學生... (我從來不要求... 而且要求亦冇用,  妹仔話 : 我只係彈俾考官聽... )

老媽子都話, 佢點可以完全唔彈俾其他人聽???

我話 : 係咁都冇符架... 

治療暗瘡 (2)

昨天, 介紹了兩枝暗瘡水..

SANS SOUCIS anti-blemish stick..賣左返屋企試... 勁火酒味... 妹仔話, 仲勁過枝75% ALCOHOL, 所以, 必然是要嚴重暗瘡 (帶膿的), 和非常油性皮膚,  先好用, 否則, 會太刺激... 恐怕傷皮膚..  現在, 就用黎看門口... 應該適合男仔多D.

第二枝, Freederm treatment gel (Nicotinamide).. 我諗更勁, 因為朋友話, 仲勁過第一枝... 男孩子會比較適合.

妹仔又試用了Horika Horika的豬鼻貼... 用來對付鼻上黑頭... 成效一般...

妹仔又用自家制面膜... 一隻雞蛋, 分開蛋白, 蛋黃, (用blank mass sheet), 先敷蛋白, 再敷蛋黃... 佢話... 蛋白緊緻...蛋黃滋潤...喎!

我問 : 點解唔打左隻蛋, 一次過敷上面??

妹仔說 :  你做蛋糕, 都要分開蛋白蛋黃來打啦... 一齊打, 會發唔起架!!

係喎... 做海綿蛋糕, 真係要蛋白蛋黃分開打喎...

治療暗瘡

青春期的煩惱, 離不開青春痘...

妹仔新搞作... 她說自己的方法甚佳... 用勁多ALOE VERA GEL撻住D暗瘡, 可以有助水油平衡, 好WORK喎...

第二, 家長朋友介紹, SANS SOUCIS anti-blemish stick.. 在SASA有售... 不過幾貴.. HKD168.

第三, 又係朋友介紹, 不過要到英國購買... Freederm treatment gel (Nicotinamide)... 勁! 不過不能擦在毛髮上, 否則, 會脫髮...

我屋企有好多牌子既暗瘡膏...  妹仔應該係專家... 等我遲下問佢, 再UPDATE大家...

妹仔的投訴

妹仔投訴, 她的同學太鍾意傾計, 上課時候, 不斷在身邊講野... 因為中文課, 大家可以自由選座位, 所以, 佢同幾位老友坐在一枱... 不過, 煩惱開始, 這幾位女孩子不留心上課, 常常講野, 影響佢上堂...  更慘者, 是幾乎害佢俾老師鬧...

我同妹仔講, 冇辦法啦... 惟有自己唔出聲, 唔睬佢地... 只有自求多福... 

其實, 妹仔這一方面都幾似我, 比較喜歡上堂聽書, 因為聽完書,  回去溫習做功課, 可以事半功倍...  我以前, 在大學,  班同學太嘈, 我直情企起身,  轉頭鬧佢地... (不過, 當然, 鬧完都冇用, 佢地依然嘈嘈閉... 冇符!)..  雖然如此, 幾十年後, 大家依然是老朋友, 老同學... 冇芥蒂...

然後, 佢又投訴, 一位女同學係憤怒青年,  一旦不滿意, 就F地講粗口... 女孩子喎! 又係冇符!

我話, 這又是冇辦法, 因為這女同學家境比較複雜... 父母不在身邊, 難免激進...

然後, 佢又話... 某某上課, 只顧畫公仔... 某某上課, 靈魂出竅... 某某回校, 臉如死灰...

佢這個年紀, 真係多投訴... (好在佢D同學, 我幾乎全部都識, 所以, 都搭到嘴... 搭嘴都只係"哦! 哦! 係呀! 係咁!"... 唔敢多批評... 因為唔清唔楚, 無謂多講.. )

然後, 今日有機會同其他家長傾計... 佢地都話, 亞仔唔聽講, 脾氣差左好多... 本來去年好好的在樂團和劇社, 今年卻無緣無故不肯再去, 不知為啥?!

呢班青春期大哥大姐, 真係多勞騷!

考試

今早有機會跟長笛老師講兩句...  講到妹仔考試.. 

老師說 : 等佢十一月考完琴, 再看看情況, 才決定長笛八級考試的安排, 因為考長笛八級需要一年時間預備...

我覺得沒問題...  我希望考完八級就完成長笛... 

昨晚, 跟妹仔講開考琴試... 佢話... 考完ATCL, 就馬上開始準備LTCL... 考完了LTCL, 就馬上開始FTCL...  佢好似講得好輕鬆... 我心裡就疑惑, 得唔得架??

吸毒

最近兩位年青紅星的吸毒新聞沸揚揚...

有些人心痛, 有些人心涼...  

我卻想起另一個人, 那就是龍大哥的私生女... 小龍女... 可能, 有很多人已經忘記了她... 不過, 因為佢同妹仔同校 (比妹仔高一斑), 所以, 以前, 在學校, 偶然會見到她母親 (ELAINE WU)..

我沒有跟吳小姐傾過計... 不過, 佢非常低調, 非常平實, 冇化粧打扮, 靜靜雞等女放學... 學校的活動, 亦會見到她參與... 小龍女亦很平實... (妹仔學校是一所會困到人變鈍的學校... )... 看得出來, 她們母女關係很好...

忽發奇想... 究竟是過去八年, 是房少爺幸福一點? 還是小龍女幸福一點?

人生事

人生不如事十常八九... 以前我後生, 玩文字遊戲, 寫過: "人生如意之事仍十中有一, 已經值得高興.. "  寫的時候,  懶有道理... 現在活了近五十年,  就真正體味到... 李白果句: "人生得意須盡歡"!!  其實, 就算不盡歡, 也應該歡樂一下...

小事如揀股票... 揀十隻, 傷八隻 (只要輸唔死!)... 賺兩隻 (賺粒糖!)...都要吃下買下, 賀下佢!

更何況, 做人一世,  不足的地方很多.. (錢唔夠多, 屋唔夠大, 樣唔夠靚, 細路又唔夠人地叻, 旅行又唔夠遠, 食又唔夠豪... 總之, 一大堆... 數來數去... 不過, 最緊要呢D不足, 都唔死得人... 唔差到要坐牢乞食.. 唔差到要眾叛親離...).咁樣, 就總有D野可以讓自己歡樂過一天... 就應該去開心下, 鬆下, 賀下... 

點解有感而發?  因為看見一些長者, 晚年生活快樂與否, 並不在於她的人生如意不如意, 或是足與不足... 而是取決於自己的抉擇.. 選擇去將不如意事無限放大,  還是開開心心度日..

一位老人家早幾年賣樓套現, 因為樓宇已賺得多... 後來, 發覺樓價急升.. 就每天怨天怨地, 仲要幾乎得情緒病...  怨到兒女都怕左佢, 都唔想回家去同佢吃飯...  點搞?  (我叫老媽子勸佢... 香港人大部份, 都係有樓就冇錢, 有錢就冇樓... 要兩樣都有, 真唔容易噃!  況且, 一個老人家已經手持幾百萬, 還怨什麼?) 其實, 我想講, 搞到冇左親情, 值得咩? 佢睇唔到, 其實, 佢D仔女好孝順, 冇要佢D錢., 仲俾緊家用, 仲會帶佢去旅行.. 就係呢一點, 佢已經好過賭王何鴻X啦!

另一位老人家, 為了在半年內輸麻將, 每次輸三兩百元, 就幾乎跟幾十年的老朋友反臉.. 唉! 老人家的家境不差,  不愁衣食... 仲成日在其他人面前曬命, 話仔女搵好多錢... 卻偏偏為了幾千元麻將數 (半年呀!), 就不打了!  我想... 如果一星期花三兩百元, 有幾位老友齊齊開心, 真係娛樂費都抵... 更何況, 打左幾十年, 今年手氣差.. 明年手氣好... 長久以來, 都係和局... 

更何況... 有時候, 人生真的會苦.. 會很苦... 到時, 真真正正需要大智慧... 去品味箇中的樂...

港元利率

今天到銀行, 發現佢地介紹港元定期利息產品...  這是否意味美元利息開始抽升? 進度如何?

股市破25000點, 但昨天主要由公用股帶動, 這不是好兆頭...  這是資金市,  要注意資金撤走的速度, 可以快如閃電.. 

最近, 喜歡一些非常保守的港元投資...  因為生活散漫, 連投資都不再進取..

退出學校泳隊 (3)

我將妹仔要退出學校泳隊的事, 告訴了老媽子 (婆婆)... 老媽子第一個反應 : "游呀!! 為什麼不游呀??"

我就說, 因為妹仔怕教練囉唆, 所以, 不游了!

老媽子說 : 咁你就要話下佢, 怎可以因為唔鍾意教練, 就唔游?? 你地以前, 點可以唔聽人講!! 你一定要教下佢.. 

我說 : 講也講了... 而家冇得逼架...  (哈! 我諗起以前, 我逼佢去操水, 老媽子就鬧我, 話我好逼佢, 而家佢想唔游, 老媽子D反應, 仲大過我!!)

於是, 我又依依哦哦...  同妹仔講數... "不如, 游到十月, 學界賽之後, 先至停啦... 到時, 我同教練講, 你要考琴, 要出隊囉.. "

妹仔又冇反應...  我都唔敢講咁多...

不過, 話時話, 妹仔俾琴老師鬧, 鬧到死死下, 都唔敢出聲....  反而, 游水教練哦兩句, 就嬲爆爆, 真係人夾人!!  (其實, 我都識個教練, 佢都幾好人, 最多都係講兩句野啫!)

退出學校泳隊 (2)

妹仔說要退出學校泳隊...

昨晚, 我還是苦口婆心地勸她...  就是依依哦哦喇!

我說 : 其實, 你最討厭的, 應該是那教練來找你說話... 如果他不跟你說話, 可能你還是會游下去的, 是嗎?

妹仔說 : 那兩個教練總是要說一大堆廢話, 未落水一堆廢話, 上水又一堆廢話, 什麼"we have to be a winning team. we have to set a goal to win.."... 一天到黑依依哦哦.. 其實, WIN不WIN, 都心裡有數啦...  還要叫我做示範, 我最憎做示範... 佢地自己只識講, 又游不好!  我寧願在泳會, 起碼不用聽那麼多廢話..

妹仔發洩完一輪, 我說 : 教練當然只會講, 不會做啦!! 佢地都冇操練, 你自己少操幾個星期, 都走樣啦!  泳會亞SIR都游唔贏班隊員啦, 佢地D姿勢都往往好唔過D學生啦...

我又說 : 你嫌亞SIR悶蛋, 又多廢話... 不過, 我可以肯定, 你將來出來做事, 你個BOSS一定悶蛋過你教練10倍, 又多廢話過佢10倍!!

妹仔說 : 不過, 佢會出糧俾我噃!

我說 : 咁! 你就練習下, 學下聽廢話!

妹仔說 : 好似你咁煩丫嘛!!

我說 : 你不如留隊, 每星期只操一課, 我可以通知學校, 話你已經在外面操一課... 等你游少D.

妹仔沒有再說話...  我都唔知佢決定游唔游... 不過, 我可以肯定, 如果佢教練再吟沉多兩句, 佢一定唔游!!

佢D脾氣, 我真清楚...  你由得佢, 佢仲會努力去做... 講多兩句, 佢反而發脾氣, 唔肯做... 冇符!

退出學校泳隊

本來, 下個星期, 學校的泳隊正式開操... 妹仔有兩位朋友會一起操練, 不過, 她今天回來, 對我說 : 我不想加入了!

老實說, 我是有點失望...  我都幾希望她留隊, 因為, 代表學校出賽, 將來是值得回味的事... 而且, 團隊生活是很好的經驗.... 還有可以去學界賽玩一玩...

妹仔說 : 要考琴, 功課又開始多, 太忙! 而且, 我不喜歡那一隊, 太悶了! 寧願留在泳會操水算了.

我說 : 可是, 游泳可以幫你舒緩肩膊肌肉喎!!

妹仔說 : 以後, 每星期仍會在泳會操一天嘛!

老實說, 我也很無奈... 這個年紀, 是逼不來的.

妹仔說 : 今天, 學校教練來問我, 會不會入隊... 我答應了, 但回想起來, 還是不想進了.  我叫同學仔幫我向教練說...

我說 : 如果你要退出, 要親自向教練說. 你怎能倚賴其他人幫你去做這事!

妹仔很無奈地答應.

其實, 我估計, 如果教練今天沒有問她, 她可能是會留隊的...  因為上星期, 她還高高興興地說, 某某今年想入隊..   她就是這種脾氣,  別來搞她, 她就會好好地做... 如果你多囉唆, 她就不幹!

大豬

前幾日, 琴行打電話來, 問我妹仔有沒有興趣去上"長笛大師班"?

我的第一個想法 : 吓! 佢都有資格去上"大師班"?

跟著, 看看日子, 抱歉! 那一天已經有其他活動...  所以, 就拒絕了.

今早, 妹仔去上長笛課, 老師亦有提及大師班一事...

老師說 : 可以吹一段, 然後給大師評價... 亦可以坐在那裡, 觀察老師給其他人的評價, 從中學習..

當然, 妹仔知道那一天沒時間, 也都婉拒了.

老師說 : 那一位長笛手是一位很出色, 很有名的大師.. (是香港人!) .. 能跟她學習是很好的機會, 不過這老師很嚴格!

我對妹仔說 : 我只想你學完八級長笛, 就全部完畢... 沒想過你要再上什麼水平.. (其實, 如果妹仔要學到八級以上, 可能要換老師..$$$$...)

妹仔說 : 我這種水平能上大師班???

我說 : 是呀! 你這是 "大豬班"!!

妹仔又說 : 況且, 我跟一位大師已經夠了... (她指一指鋼琴老師的住所..) 要跟兩位大師, 一定會挨死!!!

我說 : 算了! 你就是 "大豬班"好了!!

討價還價

昨天, 妹仔回來, 說 : 今年學校的食物又貴了... 那份三文治又加了一蚊... 年年都加一蚊, 仲升得快過通漲!!!

我說 :  通漲每年5%, 所以, 加幅都差不多...  雖然學校餐單加價, 不過你的零用錢都冇得加..

妹仔啤住我..

然後, 大家又研究今年考琴的獎金...

合格就有HKD1000...

Destinction就有HKD2000...

妹仔不滿意,  如果有70分以上, 要有HKD1500...  (ATCL滿分是100, 合格=60, Distinction=80..)

我心諗, 你能合格都托賴了... 事關"光頭仔"都只係攞62.. (光頭仔也是老師的學生, 妹仔初學的時候, 佢已經考左五級, 仲彈得好好... 今年剛考ATCL..)

所以, 如果光頭仔攞62... 妹仔攞61... 另一位考60...  恐怕其中一位會不合格 (今年三個人去考, 當中, 妹仔算最勤力... 這個暑假, 最早開操.. )

HKD1500就HKD1500啦!

新學年, 新開始

今日天色放晴, 終於開學!!!

新學年.. 新開始... 第一個改變... 妹仔唔准我送佢去車站... 以往, 我都陪佢去到車站口, 然後佢上車, 我就繼續做晨運... 今日, 出左大門, 佢指下右手邊個紅綠燈, 就叫我馬上去晨運... 佢就繼續行...

我都係死lur, 佢先俾我同佢行出大門...  想行多幾步都唔得呀!!

冇辦法! 真係女大女世界... 

忽然間, 行行下, 我都哼起葉德嫻一首舊歌 : 赤子.. 嗚嗚...

 遠遠近近裡　城市高高低低間
  沿路斷斷折折那有終站
  跌跌碰碰裡　投進聲聲色色間
  誰伴你看長夜變藍

  笑笑喊喊裡　情緒仿彷彿彿間
  誰願永永遠遠變得短暫
  冷冷暖暖裡　情意親親疏疏間
  人大了要長聚更難

＊一生人只一個　血脈跳得那樣近
  而相處如同陌生　闊別卻又覺得親
  一生能有幾個　愛護你的也是人
  正是為了深愛變遺憾

  你我似醉了　無法清清楚楚講
  同屬你你我我愛的感受
  世界太冷了　誰會伸出一雙手
  圍住你再營造暖流
  重唱　＊

  說說笑笑裡　曾覺得歡歡喜喜
  誰料老了變了另有天地
  世界太闊了　由你出生當天起
  童稚已每年漸遠離

紅雨天

本來, 妹仔今日要返學, 第一日返學... 起來之後, 發現紅雨警告, 教署宣佈所有學校停課..

唉!  以為今日可以大解放, 終於又唔得...

妹仔都話 : 其實, 今日想返學, 因為第一日, 都係見下老友, 玩玩下又一DAY..

返唔到學, 惟有搵琴老師, 終於收留左佢... 嘻!

要化粧

老師吩咐妹仔 : 遲些日子, 要穿那考試長裙, 還要化上粧, 來練琴... 要習慣一下, 穿那種衣服和打扮, 當成預演一樣. 

考ATCL, 真是大陣象...  我想, 男孩子應該好一些,  換一條西褲, 打條領呔, 就搞定... 女孩子... 尤其像妹仔這樣不太不小的,  又要穿長裙, 又要穿高跟鞋, 又要化粧, 又要梳頭, 十足好似去BALL一樣... 

可知道, 考演奏級,  服式一項佔10分, 總分才不過100分.. 所以, 也是忽略不得... (而裙太短, 會是improper dressing... 印象分也會差了.)

現在, 長裙是準備了... 不過也有點偷雞... 到G2000買了一條深藍色連身裙 (減價...三百幾蚊... 平平地... 只穿一兩次..) 但是, 長度不夠, (只及膝), 於是, 加一條黑色半截裙打底 (我的舊裙, 改下裙頭), 幸好, 兩條裙的質地差不多, 夾一夾, 冒充長裙... 後來,又發現自己的舊裙可能長度不夠, 又走去買一條黑色半截長裙 (減價貨... 二百幾)... 今次一定夠長喇!

遲下試穿兩個配搭, 給老師看一看, 看看那一條比較適合..

當然, 亦準備了兩吋高跟鞋.. 我估, 一定要著鞋練幾次琴, 我真擔心佢唔識踩PEDAL..

最後是化粧... 我那些舊化粧品, 全部過了期, 還幸有枝BB霜, 可以做粉底... 還下都要配枝唇膏和乾粉...  眼影和胭脂就用舊的好了.

談"援交"

妹仔說 : 琴老師那邊有一同舊學生, 認識了一位"援交"的朋友, 現在都變壞了,  只喜歡名牌, 連樣子都變了... 那一位舊學生只是個初中生, 那"援交"朋友是高中生...

我問 : 你知道什麼是援交嗎?

妹仔說 : 我當然知道, 你不要當我真是豬頭...哎! 那樣子真會變的嗎?

我說 : 那也會的.. 打扮變了, 樣子就變了...  (談到這援交的問題, 我就要乘機講一點道理..)

我說 : 你知道嗎? 援交這工作實在是不持久的.. 而且, 一旦做了, 要退出就很難, 而且又容易染上愛滋病...  其他的工作, 只要努力地去做, 你是會一步一步爬上去的, 所以, 20歲, 30歲, 到了40歲, 就能爬上事業的高峰, 那怕只當做廳侍應, 到了40歲, 就可以是部長, 甚至是經理... 但是, 援交這種工作, 人生的頂峰就是20歲, 30歲的時候要到深水埗, 40歲還能做什麼... 所以, 是非常非常短視的.

妹仔好像是明白的..

我又說 :  我們需要名牌嗎? 我都沒有用, 有些東西, 我們根本就不需要... 你去買幾十塊錢的韓國護膚品, 不一樣是很高興嗎?

妹仔又問 : 那麼, 我們的週圍有沒有壞樣貌的學生?

我說 : 你那一家學校, 就是把人困到純, 困到鈍...  你看! 那些新生, 來了三幾年, 都變得鈍了.. 最壞也不過是欠交功課, 成績不好而已.... 你那一批泳隊朋友, 老實說, 能花時間去操練, 哪能壞得起!!  在琴老師那裡苦練的學生, 根本連壞的時間都沒有!!

管理網絡

學校的老師說 ： 你必須限制你兒女使用網絡, 譬如 : 使用的時間, 瀏覽的網站等...

我回來, 告訴妹仔, 妹仔反駁 : 你怎能管呀?  我不用電腦, 也可以用手機呀!

這個我太清楚了... 所以, 在學校的時候, 我跟家長們說了... 那家長也說, 他們同時有三部蘋果在身 ：MAC PRO, iPAD, iPhone... 怎樣管得了!

我也完全同意...

幸好, 我家的電腦放在婆婆的房間... 所以, 妹仔嘆說 : 你也不用set time control, 亞婆就是time control啦!!

正是!  每晚10點半, 婆婆看完大台第二輪劇集, 就全家熄燈睡覺.. 手機, 電腦, 全部離身.

七時半操練

妹仔終於要早上七點半去老師那邊練琴...  搞到我都好眼瞓, 因為六點幾就要起身... 不過, 妹仔下星期要開學, 所以, 能衝線的時日不多了...

屋企個鬧鐘, 大聲到好似火警鐘... 真係嚇都嚇醒... 但係, 妹仔始終都唔會聽鬧鐘起身, 都係要我鏟佢起身...

唉! 我都唔知佢依家彈成點..  總之, 趕佢去老師那邊, 我就冇眼睇啦.. 

我好想錄低佢D彈琴片段, 但係, 佢唔肯, 都冇符...

美容大王 (3)

一個暑假, 妹仔的美容知識大增... 我想, 如果佢讀書有咁勁, 咁有熱切研究的心, 就真係VERY GOOD...

前幾日,  行過尖沙咀龍城, 入去湊下熱鬧, 發現裡面都多左好多韓國牌子, 妹仔研究左一陣, 就話, 呢D係舊LINE...  然後, 又去左SASA在加連威老道果間旗艦店... 真係好大間... 妹仔又研究左一輪..

最近, 妹仔又有新搞作... 買左D空白面膜紙 (Blank Facial Mask Paper), 然後, 自己放蛋白.. (我都知仲有D乜)... 總之, 自製MASK...

又話要用起泡網... 之類... 之類...

總之, 我就係大嫏里... 佢話要乜, 如果唔太貴, 就買啦...

美容大王依家要研究點樣去黑頭喎...  真頭痛!!

不過, 睇左D"沒女"片段 (我冇睇內容)... 我諗, 都係寧願妹仔貪靚D... 好過咁污歪...

閨蜜

妹仔的一位游水FRIEND, 男孩子, 年紀比妹仔小一歲, 比妹仔矮一個頭... 他喜歡韓星, 又對韓國護膚品有興趣... (他覺得D HAND CREAM好靚... )

其實, 大家都認識左多年(起碼六年), 最近, 發現佢同妹仔都有計傾喎...

咦..  除了同學和老死,  妹仔都有閨蜜... 仲係一名小男孩.. 哈! 

都係你衰!

自從韓國回來，家裡有一大堆護膚品SAMPLE...

我對妹仔說 : 你快D用左D SAMPLE先啦!

妹仔說 : 留番去旅行先用丫嘛..

我說 : 你今年去旅行都用唔曬啦... 明年又話要再去韓國囉!

妹仔怒道 : 都係你衰!

我說 : 我衰乜呀?!

妹仔說 : 你衰冇錢!

???

妹仔說 : 你衰冇錢去旅行... 去多幾次旅行, 就用得曬啦!!

!!!!!!!

食物進化論

從聖經去看食物進化...

第一個時期 : 最早期的人類 - 全素食期

創世紀一章29節 神(當天地初開, 對亞當夏娃)說:"看哪, 我將地上一切結種子的菜蔬和一切樹上所結有核的果子全賜給你們作食物."   (當時, 只準吃生果和蔬菜!!)
 
第二個時期 : 洪水後的人類 - 肉素兼食期

創世紀九章3節 (大洪水後, 從方舟出來, 神對挪亞說) 凡活著的動物都可以作你們的食物. 這一切我都賜給你們, 如同菜蔬一樣.  (所以, 有個笑話... 基本上, 素食人類在洪水後已經死光了... )

第三個時期 : 神聖的人類 - 揀飲擇食期

利未記十一章  (神帶以色列人出埃及, 在曠野吩咐摩西) 以下的東西不能食... (太長, 未能盡錄) 豬, 駱駝, 兔子, 無鱗魚 (生魚, 水魚之類), 猛禽 (鷹, 烏鴉之類), 鼠類, 蟲類 (除了蝗蟲, 蚱蜢, 蟋蟀)... 這一篇太長, 有興趣的, 自己參閱... (基本上, 即是不能吃野味!!)

第四個時期:  文明的人類 - 垃圾食物期

使徒行傳十章12節 (在耶穌死後, 神啟示彼得) 裡面有地上各樣四足的走獸和昆蟲, 並天上飛鳥, 又有聲音(即神)向彼得說: "起來, 宰了喫!"   (即是說, 你有得食就食啦!!)

以上純粹個人意見...

排毒 (2)

排毒的另一重要事項, 是生活習慣..

(1) 飲食要定時定量, 不能餓一餐, 飽一餐..

(2) 不要有吃消夜的習慣,  晚上八時後就不應再進食...  讓身體可以消化食物..

昨天, 我檢視一下妹仔的飲食... (也有我的飲食.. ).. 看看能否做到多類形食物..

妹仔 :

早餐... 麵包 + 花生醬 (兩種)

午餐...  煙三文魚沙律 (三至四菜 + 煙三文魚), 甘荀蘋果汁 (六種)

下午茶... 龜苓膏.. (多種), 西瓜

晚餐... 鴨, 豬, 通菜, 米, 紅豆沙, 貝類海產..  (外出用膳)

計下, 計下, 都有二十多種..  OK..

排毒

昨日跟朋友講開排毒, 今早看電視, 一個節目也講排毒 (扁鵲會 - 大陸中醫節目 - 幾好睇.. )

有一些意見值得參考..  中醫說: 排毒並不單單指排便...

首先,  食物的種類應該要豐富,  不能太簡單 (或單一), 但郤只吃八成飽..  他說 : 最好是吃上二十多種食物 (每天)... 如果能吃上三十多種就能抗病..  所謂二十多種食物... 譬如 : 一份三文治裡內麵包, 蕃茄, 雞肉, 洋葱... 那就算是四種...  所以,  薑, 葱, 茜, 蒜...  這些配菜都算進去... 

二十多種也不容易呀...  (不過, 這也有道理... 實在, 各類食物都有其獨特的營養和微原素, 單一食物就算有多好, 也不能完全替代其他食物...)

我想, 如果沒法每天都吃多種食物, 那麼, 每星期, 也應該吃多種食物... 肉類: 豬牛雞魚... 菜蔬: 瓜, 果, 不同顏色的蔬菜, 椒, 菇, 蕃茄, 薯類...   五穀... 豆類 (紅綠黃白黑)... 蛋.. 乳品.. 水果...  加上不同的配料 (薑葱茜蒜), 難吃的都吃一口... 那麼, 二三十種, 應該是做得到的..

其二, 吃紫色的蔬果, 有助身體排毒 (排便)...  茄子, 紫椰菜, 葡萄, 藍莓... 等等..

其三,  晚飯後, 吃乳酪... 有助腸內菌類補充... 也是有助腸道暢通..

中醫極不贊成做灌腸 (即洗腸)... 那只是救急的方法 (即是必須時, 針對疾病而使用), 不能當習慣性去做... (聞說DoDo鄭每星期都要做, 因為自己無法排便.. 那是絕對不好的..)

全速

妹仔終於開始全速起動,  積極準備琴試... 因為一位同學仔旅行後回港, 可以一齊練琴..

同學仔八點到老師那邊,  妹仔則遲半個鐘... 下午回家吃午餐, 之後, 又再過去,  到七點半才回來吃晚飯..

一天超過八小時...

不過,  再過兩星期, 妹仔就開學, 所以, 亦沒有太多時間苦練了.

二萬五千點

股市牛氣十足, 前逼二萬五千點, 真係好耐未見過... 不過, 今次唔關我事, 因為狂升的股票冇我份, 只係曾經擁有, 不過並無天長地久.....

不過, 有些倉底貨都升了... 算是鬆綁...

今次又係資金市...  同美國開始量化寬鬆時差不多... 不過, 今次放水的是大陸...

今次更唔識睇, 因為美國佬有軌跡可循... 聯儲局開會又有會議紀錄... 大陸佬就不透明..  逆回購, 正回購, 隨時一個月做幾轉... 都唔知點搞.. 

所以, 我都係以不變應萬變... 繼續觀望...  只係若果有D舊貨價格理想, 就沽掉 (尤其果D息口低,  前景又不明朗的... )  然後, 再考慮下D收息股... (雖然話美國收水, 唔應該再買收息股, 不過, 長遠來說, 收息股息口是跑贏銀行的.. )

另外, 當然是抽下iBOND, 依家重要計下數, 睇下D二手iBOND值唔值得買.. 因為, 如果想揸港紙, 又嫌息低得離譜, 可能要睇下二手iBOND, 除掉溢價/手續費,  計落有1厘半左右(每年), 假設每年收4厘.. 點都好過0.1厘... 唉!

我超級非常眼瞓

妹仔吟吟沉沉, 說 : 你依家係唔係覺得我好煩?

唔係...  你一D都唔煩, 只係我眼瞓...

妹仔 : 你係唔係好討厭我?

你一D都唔討厭,  只係我好眼瞓...

妹仔 : 你係唔係好唔鍾意我??

我好鍾意你, 不過, 我真係非常眼瞓...

妹仔 : 既然你超級非常討厭我, 當初你就唔好生我!!

我超級非常鍾意你, 我只係超級非常眼瞓..... zzzzz....

你要買什麼?

妹仔問我 : 你明年(去韓國)要買些什麼?

我說 : 嗯! 買支防曬吧... 支防曬都幾好用, 冇咁油..  另外, 買幾支超平洗面膏..

妹仔問 : 冇其他了嗎? 

冇啦!

妹仔想了一會, 又問 : 咁你以前鍾意買咩?

我答 : 都係買俾你囉... 自己好少買..

妹仔再問 : 咁未有我之前呢?

我想了一會, 答 : 其實都冇咩... 每年要換兩次季, 因為要買衫返工... 護膚品都好少用, 因為後生唔覺得皮膚乾燥... 而家就差D, 夏天都搽潤膚, 如果唔搽, 會痕..  再其他, 就買茶葉, 茶具, 花樽,  沙煲瓦罉...之類.. 即是, 我而家要想辦法沽掉的東西...

妹仔聽完了, 對我似乎非常失望...  E條友真差勁!

妹仔說 : 呀! 你仲會做FACIAL..

我答 : 係呀!  做FACIAL可以瞓下丫嘛...

老媽子的政治取態 (2)

上星期, 老媽子已經話要去"反佔中"簽名... 不過, 我附近未有街站, 所以, 我話幫佢去網上簽...

今日,  附近出現左一個簽名站... 老媽子義不容遲,  馬上話去簽...  一齊飲早茶既師奶茶友, 都話已經簽左..

今次真係會幾多去簽... 起碼坐埋一枱三人, 已經有兩個肯定去喇... 仲有D知道會去既, 我識果D人,  真係多數都反佔中...

不過,  佢地又多數唔係選民喎... 如果真係普選特首, 都真係要叫佢地去登記, 否則, 點樣反映佢地既意願呢?

長隆 - 不再玩了

過往幾年, 每到暑假, 都會去長隆, 去了幾多年, 幾多次, 我都忘記了..

今年, 橫琴長隆開幕, 反而沒有想過要去玩... 無他, 因為妹仔不再玩樂園, 起碼不會主動說要去玩... 以前, 整天在太陽下, 都沒有問題...  由早上九時入場, 到下午五點才肯離開的..

現在, 出門都話要搽防曬...  室內都有紫外光喎!!

所以, 女大十八變!  一個階段真的過了..  要追是追不回來的...

ATCL裙 (考演奏級的禮服)

一早就知道考ATCL(演奏級)要買長裙, 在首爾見到一條, 都幾靚, 不太老成, 亦幾得體, 價錢六至七百元港幣左右... 叫妹仔試下, 佢唔肯, 話要等老師吩咐..

昨日, 老師WA左D裙款給我..  要開始留意了... 同我在首爾看見的, 差不多...

而家, 要在香港搵裙, 真有點頭痛!  通常不特意去找, 就容易碰見... 要特意去找, 就難成事..  (加上妹仔這尷尬年齡, 真有點難度.. )

有時, 真係想丙妹仔...  唯有去Zara, H&M, Giodano Ladies搵下..  

仲未見人?!

本地學校的暑假已經開始了兩個星期.. 妹仔則還有三個星期就要開學... (因為早放!)

但是,  鋼琴老師那裡,  其他同學則仍未見影...  本來, 今年十月, 應該有位學生一起考ATCL(連妹仔在內)... 妹仔已經開始暑期操練一段日子, 她基本上, 每天都會到老師那裡... 但係, 直到昨日, 妹仔說, 依然未見其他兩位同學仔開操...

我問妹仔:  仲未見人, 佢地點考呀??

妹仔答說:  就算現在見人, 都未必考到呀.. 現在才開始, 只係肥佬(FAIL)得幾多分而已...

唉! 妹仔都有點先見之明... 如果唔練, 照理都真係冇機會合格..  八級已經絕不容易, 更何況是ATCL, 每一首曲都真係要操一段時間, 先彈熟, 再練表達...

點解未見人呀?

妹仔答:  你問我, 我問邊個?

寒底熱底

中國人(尤其是廣東人), 都會說自己的身體體質, 是寒或熱... 外國人就沒有這方面的研究..

其實, 認真一問, 我都很難解釋..  這底子其實是身體對環境和食物的反應... 而每個人反應又會很不一樣..  而每個人的體質又會因年歲和環境改變... 真係好難搞..

老媽子以前是極寒底,, (女人一般都是這樣)... 不過, 年紀大了, 反而愈來愈熱... 年輕時, 不敢吃西瓜,  怕其寒涼... 今年郤天天吃.. (我去街市托回來架! 好鬼死重呀!)  以前喜歡吃荔枝, 現在郤不敢多吃.. 又怕吃煎炸..

近年, 我都吃得下寒涼食物...  涼粉, 西瓜... 吃下去覺得舒服, 就吃多了... (以前, 吃多了, 會咳, 所以, 不能吃多.. )... 不過, 如果晚飯後吃西瓜, 睡到半夜要起床去小解, 所以, 吃西瓜要下午時候吃...  後生時候, 經常會食一些補品(如紅棗水之類),  現在一點也沒有吃, 吃完了會覺得不過癮... 

妹仔就是極燥底...  試過, 飲蓮藕湯, 當晚就流鼻血...  所以, 不敢再讓她多飲燥熱湯水...  (本應應該開始飲紅棗水, 不過, 都未敢給她喝.. )

其實, 體質這東西, 還是要自己小心觀察... 每個人的反應都不太一樣, 甚至, 每段時間的反應都不太一樣... 這一個年歲, 最重要的, 就是Listen to Your Body.

偶然回首 - Czerny Op.823 No.72

偶然回看妹仔以前的錄音, 真幾有趣, 根據紀錄, 這一段片攝於2010年6月, 亦即是她開始學琴後的一年半左右..  (妹仔開始開琴是2009年2月.)



這一次看回來, 原來她真是學得很快, 尤其最初的一兩年... 跳了很多STEP..



妹仔行過, 聽見我在播這首歌, 問: "邊個彈得咁難聽?"



我說 : 你囉!!



當然啦!  音色好差... 同現在簡直是天同地..  淨係睇個樣, 細時一個BB, 同依家都差得遠啦!

老媽子的政治表態

反佔中簽名開始...

老媽子不斷問我, 邊度可以簽名??

我話: 我唔知呀!!  我幫你在網上簽啦!!  (7/28才開始..)

唉呀!  老媽子從不問政治,  這一次, 她都要表態, 可想而知, 反佔中簽名的人數並不誇張...

仲有! 連我舅父(六十幾歲), 都話要簽!

這一批老一輩的香港人, 真係"獅子山下"的一批... 似乎對於非理性(過激)的抗爭都不同意... 當然,  對於福利社會主義亦不喜見...

他們是真正沉黙的一群, (連二十三條立法都無動於衷),  能將他們逼出來,  真厲害! 無他, 他們最憎人攪住大家搵食, 影響人地生計, 擾亂社會秩序...  尤其, 攪亂中環, 中環是全香港人的地方, 又為什麼要逼所有香港人去贊成你的政見呢?

仲有, 去攪英國佬出面... 我都唔明白.. 英國佬統治香港百幾年, 幾時俾過民主俾香港人?? 醒下啦!!  去大學問下D香港歷史的專家... 又或者攞本90年代香港憲報睇下, 數下有幾多位民選議員..  唉!  仲唔清醒?! 仲攞住英國旗把鬼咩!  今時今時, 英國佬最想大陸俾佢做歐洲的人民幣離岸中心咋!

香港人應盡量從現有的法制框架下, 爭取最大程度民主...  香港由始至終都不是一個自主國家, 這是不能否認的.

談論暑期工

經過一家校服店, 門口張貼告示, 招請暑期倉務員, 時薪HKD32... 每天工作八小時...

馬上拉妹仔去看看... 喂! 喂! 過幾年做暑期工囉!

妹仔說: 暑期工除了學賺錢, 還有什麼可學??

我說:  就是去學曉賺錢辛苦囉!!

妹仔 >o<

我說:  最好找到教暑期音樂班的工作, 時薪應該會高一些... 有HKD50啩..

妹仔說:  會比做味X拉麵舒服嗎??  (有一位較年長的朋友仔在味X做, 另一位在一間獸醫診所做... )

我說: 做倉務應該會舒服過做味X!  不過, 味X會時薪高一些..

妹仔 >o<

PS: 曾經, 一位朋友的兒子一向懶懶散散,  一年暑假, 他捉他到工廠做暑期工... 兒子回來, 說: 我不想每天都做這樣的工作!

老爸就說: 那麼, 請你讀書用功一點..

後來, 這一位兒子(美籍華人)入了UPenn (賓夕凡利亞大學), 美國長春滕大學之一(著名學府), 後來, 當然沒有再做工廠工人了..  

知天命

二十幾歲, 大家的話題, 離不開婚嫁... 

三十幾歲,  談的是兒女經.. 考小學, 興趣班...

四十幾歲,  漸漸退下來... 師奶們是為退回家庭崗位籌謀...

五十歲,  談得最多, 恐怕是病患了...

身邊陸續有親戚朋友, 鄰舍患病...

早一陣子, 看見同屋苑的鄰舍(太太), 臉容憔悴, 戴著帽子, 心知她是病了...  (這位太太比我的年紀大一點吧, 她的兒子跟妹仔在細時, 常常在屋苑平台碰面, 所以, 都會招呼... )

最近, 又碰見她, 她已經恢復過來, 才敢去搭訕一下...  是患上卵巢癌, 第三期, 做完了療程... 她說, 她完全沒有徴狀, (我忘了她是怎樣發現, 好像是痛了, 去照, 才知道.. ) ... 她說, 她的生活極健康, 飲食節制, 又有運動, 又有定期做身體檢查, 只是不知道為了什麼, 就患病了...  她說, 自己是反面教材, 現在是與癌共存...

另外, 附近麵包店老闆娘也失蹤了, 她是極勤力的, 一年到晚都在店面工作, 除了歲晚收爐的日子, 每天都會見到她...  早一陣子忽然消瘦了, 後來見她神色凝重, 滿懷心事.. 不久, 她就沒有回店, 問她的伙計, 她們說, 老闆娘旅行去了... 可是, 已經有兩個月了...  我想... 她大概是病了...   

還有, 年紀輕輕的表妹,  和另一位老朋友..  都是毫無準備之下, 就患病了..

五十歲, 知天命.... 

平衡肌肉運動

彈琴是一種對上肢肌肉要求極高的運動, 所以, 過度練習又不得其法, 容易勞損... 如果不信, 試下不斷活動指頭(食指和中指), 不到一分鐘, 也真會累死了..

早一陣子, 妹仔常說肩膊疼痛, 要我幫忙按摩... 有時候, 真是小兒無假病... 想一想, 她練習那些蕭邦, Rachmaninov, 那一首不是速度極快的曲子... 一練就幾個小時,  肩膊庝痛也屬正常, 不過, 就不能長期如此...

這一星期, 泳隊暑期操練開始, (六月的時候, 因為種種原因, 整個月只操了一堂... )... 肩膊的情況就有所改善了.... 第一課練水回來, 膊痛的情況已經減輕了... 操完了第二課,  完全沒有再提及肩痛的問題, 反而是說腿痛了... 要求按摩腿部... (因為久休復出, 大腿肌肉不習練連串的踢水動作... )

我心裡都知道, 游泳對放鬆上肢, 是很好的... (只要不過度操練).. 所以, 恢復操水正好平衡了練琴的勞動,  放鬆了繃緊肌肉.. 尤其是近年操水, 也真的變成了純粹運動, 沒有競賽的壓力.

中國人常說 "中庸", "平和"... 那也是真的!

韓式泡菜大比拼

自從去完韓國, 妹仔愛上了GIMCHI (韓式泡菜), 返港後, 四處找尋美味泡菜...

以下是實驗結果...

(1) 某大超市之"散裝"泡菜, 妹仔唔肯食, 說: 完全不是韓式醬料所製, 永不再買!! (價格最平!!)

(2)  中加(譯名) - 某韓國牌子, 在一些大型超市(尤其高級版超市), 可以買到... 妹仔肯食, 覺得OK..

(3)  尖沙咀韓國街泡菜專門店, 新鮮製品.... 妹仔極力推介, 故此, 我每出尖沙咀, 都要買一大盒(HKD60 大盒), 保質期約三星期..  (不過, 當然, 價格最貴... )  另外, 那裡的紫菜包飯也極好, HKD25一條..

妹仔也老了

妹仔對我說:  游泳教練對她說, 她老了...  (說時, 輕輕鬆鬆, 一點也不傷心.)

哈!!  不是老了, 是操練少了, 退步了許多... 十歲游36秒, 現在能游40秒已經是萬幸...

我對妹仔說:  退伇吧.. 操完這個暑假, 就完全退下來吧..  (因為付十堂的錢, 最多只游到五堂, 實在有點浪費.. )

昨天, 妹仔竟對我說:  還是繼續吧!! 仍想繼續游下去!

哎呀!  以前操水, 要逼的...  現在, 要她退役, 她郤不願意...

她說, 她現在跟一些BB(細仔)一起游...  (她真的一點也不介意..  還很享受的模樣. )

我終於明白, 她細時, 有一批大哥哥大姐姐一起游, 他們也是滿享受的.. 

吹長笛

妹仔的長笛實在練習得太少... 每星期練一次(10分鐘), 已經是俾面...

我叫道:  你快D去練下枝笛啦!

妹仔說: 唔練!

我說:咁你會好唔掂喎!

妹仔答:  你唔係我, 又點知我唔掂!!  我話掂就掂啦!

我問:  咁! 你明天早上幾點去練鋼琴呀??

妹仔答:  明天早上唔駛去呀!

我問:  點解呀??

妹仔說:  明天早上學笛呀!!  你又唔記得左我幾時學笛, 又要催我去練笛!!

唉!!

只有懶女人

先一陣子, 陪妹仔去見她的老友, 妹仔未出門, 已經預告了我: "亞N好污歪!! 連我都忍不住!!"

去到一見, 果然幾污歪... 一頭蓬亂長髮, 梳一條辮, 不過好似剛在被窩出來... 身上的T恤都好縐... 

我同妹仔講:  如果我係佢媽咪, 就會忍唔住, 第一, 先剪左佢把頭髮, 第二, 一定要熨下件衫... (不過, 佢老友媽咪是在職母親, 沒有太多時間照顧佢... 冇辦法!)

又一日, 同另一位媽咪級朋友閒聊, 佢個乖女同妹仔同歲, 又係貪靚靚女一名, 護膚品一堆, 仲去SALON整個靚髮... 靚女有句至理名言 : "世上沒有醜女人, 只有懶女人!!"  把她媽媽氣得上頭...

我回來, 跟妹仔說: 你快去見下靚女, 同佢研究研究...

今日, 又同另一位朋友(FACIAL師)傾計.. 佢話: 這一個年歲的靚妹, 係會貪靚架喇... 如果唔貪靚, 又貪吃, 就多數變做肥妹仔... 以後就好難搞...   

老唔老

母校小學鑽禧(60年)晚宴,  圍坐的都是幾十年的老同學... 今年都要先後腳步入5字頭...

大家談起年歲, 都哇哇大叫... (其實, 我覺得大家都係扮野, 我覺得大家都唔介意人家知道我們的年歲... )

我真係一D都唔介意, 仲鍾意D人(好厚道)話: 你都唔似5張野呀!! 最多咪40到尾!!  (等於D街市佬叫我靚女, 我都不知幾開心!!)

呢個心態在我大肚生B嗰年, 已經有了... 體重增加了30幾磅, 生完B, 以為會瘦翻十幾磅, 點知大失所望, 妹仔6磅, 我就只輕6磅... (真想抽打個醫生, D羊水得咁少架咩!!)  不過, 妹仔出世, 就算大家唔讚我又瘦又靚, 都起碼會讚下個BB... (厚道厚道!!)

依家都一樣架!!  5張野既"阿豬媽", 你唔讚我, 都讚下我個妹仔卦... (姑娘十八無醜婦!)

到我6張野,  妹仔就更靚啦!! (更重要係脫身有望! 責任完結!!) 所以, 我坐5望6, 都唔知幾想快D老呀!!  (當然, 最緊要識行識走, 仲唔識收口... 咁就掂喇!)

安排行程

上次去首爾, 巧遇朋友, 她也帶著女兒(中學生)出遊... 

我對妹仔說:  我真羨慕她呀! 她的女兒安排所有行程, 仲有FINE DINING呀... 媽咪只負責俾錢, 女女就拿住個iPAD, 帶埋路呀!

妹仔說:  你真羨慕人家?!

我說: 係呀!

妹仔說:  下次出遊, 由我安排!

真的?!

妹仔說: 由我安排, 所有化粧品店的行程... 我已經研究了那些產品最正... 

然後, 她就講了一堆品牌... 先去Skin Food買XX... Nature Republic買XX, Etude House, Missha, Horika, Too cool for School, It's Skin, Beyond, Faceshop..... 明洞原來有一間Etude House旗艦店 (??)... 總之, 佢已經開始列出Shopping List...

哎呀! 冇命喇!

聽歌 - 巨聲幫

近二十年都甚少聽歌, 因為冇乜歌好聽... 所以, 都只識D梅豔芳, 張國榮..

不過, 最近有D改變, 開始發現, 原來大台有D新歌手都十分好喎... 起碼好過好多得個樣.. 偶像派...

大台搞左幾個歌唱比賽節目, 巨聲, 星夢..  最近, 這一斑人開始冒起.. 因為佢地由歌唱比賽出身, (多少似以前 梅豔芳, 張國友, 李克勤... ), 所以, 唱功都不會太弱.. 加上有些還會作曲, 創作..而填詞方面, 亦比較慎重, 所以, 這一幫出來了, 帶來了一些好歌...

林師傑 (木偶哥)... 幾首在愛回家中的插曲, 都由他作曲演繹... 是近年少有, 認真的劇集作品.. 愛回家, 這一部不甚了了的肥皂劇, 其中的插曲, 是最值得欣賞的.. 我其實唔多鍾意睇他地的三角戀戲... 尤其"思思"... 不過, D歌真係幾好!

木偶妹都唱得幾好喎... 好過TWINS好多!!

許廷鏗.. 我其實唔識佢, 只知道佢係牙醫...  他那一首"護航"... 很好!  那些反西遊的份子, 也喜歡這首歌, 算是異數...  這一首也是難得的一首好歌 (以近年的電視主題曲來看)..

大台終於有D貢獻喇!!  唔好成日鬧佢...  佢D節目係爛 (尤其D劇集), 不過, 佢都真係發掘左不少人才, 俾左好多機會D新人...

美容大王(2)

妹仔對我說:  你的問題不是皺紋,  皺紋不算太嚴重, 不過, 色斑就很多...

我問: 那麼, 怎麼辦呀?

妹仔說:  用點去斑的, 試試吧!

她感慨地說:  你這年紀用的, 都很貴!!  我用的, 最重要, 只是潔面和保濕, 那便宜多了.

我說: 不如, 你將來做個皮膚科醫生, 幫我做激光啦... 仲有可以打BOTOX呀!

她說 : 你八十歲才做呀!

我說: 六十五歲... 可以了嗎??

她想了想, 又說:  有BOTOX面膜呀!!

啊呀!!  BOTOX面膜!! 當真!!

升中放榜

昨日升中放榜, 有人歡喜, 有人愁...

暫只知道兩位要升中的小朋友... , 一位派第一志願, 一位派第六志願... 派第六志願的小朋友, 當然要去叩門, 聞說是考入一所較合意的直資中學..

看新聞, 派第二志願都不滿意... 奇怪!  第二志願不也是合意之選嗎?? 徒勞跑去叩門...  倒不如與小朋友高高興興的慶祝一下... 萬一叩不成, 也免得小朋友心中抱怨... 他還有六年要留在那一所中學...

老實說,  好的中學都不會差太遠... 好的中學有包尾學生... 較差的中學也有頂尖學生... 到了中學, 看的就是學生自己...  當然朋輩間的互動也很重要... 所以, 只要是好學校就該夠了.. (好學校不只單是那幾所名校!) 好好裝備自己才是最重要的!

近年的DSE成績已是一個好證明...  歷史悠久的中五會考落幕了, 新型式DSE上台, 歷史悠久的傳統名校反而有點失勢...  就因為大家都要用新遊戲規則, 各所學校的強弱重新洗牌... 不少好學校都能抬頭...

故此,  差一個名氣不是最重要的!!   

LTCL / FTCL

今日, 妹仔由老師那邊回來, 拿著三本琴書... 一本是CHOPIN, 一本是BACH, 另一本不知是什麼..

妹仔說:  老師話, 叫我睇定LT同FT的歌...

我說:  吓! 唔係啩! 有排都未得喎..  (其實, 考完AT之後, 如果合格的話,  打算給妹仔休息一個暑假, 等到第二個暑假後的八月再考...  那麼, 就有一個暑假樂得清閒一些, 可以給她玩多一些... )

妹仔說:  係呀! 你要同老師講下, 下一個暑假休息...

我說 : 我都冇辦法... 不過, 都只係叫你睇下啫... 未成事的!  你老師真係睇得起你囉...

你愈來愈似亞婆

早一陣子, 買了兩個枕頭袋, $79...

前幾日, 看見另一個牌子, $200+, 我說: 嘩! 咁貴呀!

妹仔氣道: 貴你又話貴!  平又話質地唔好!  你愈來愈似亞婆喇!

你唔好咁幼稚!

對美容品, 我認識極少...  總之, 求其有人介紹, 或者覺得個盒幾靚, 又或者心血來潮就買.. 這一次去首爾, 因見有金秀秀代言品牌, 所以, 都買左一盒... (仲有迷你金秀秀紙板人型送!)

不過, 同妹仔溝通, 我只識得講: 哩! 橙味嗰盒CREAM哩...  士多啤梨味嗰盒哩...

妹仔怒道:  唔該你唔好咁幼稚啦!!  橙色盒就話橙味!  綠色就話草味! 粉紅色就話士多啤梨味!!

唉!  我淨係記得咁多... 咁多個牌子... 咁多種產品... 咁多種生果... 咁多種草... 點記得咁多呀!

美容大王

妹仔最近的興趣, 是研究各種護膚品...

她說:  我腳面的皮膚很粗糙, 怎辦??

我說:  腳面?? (有冇搞錯!!) 搽點潤膚膏吧...

第二天, 她來對我說:  我用蘆薈膏塗腳面, 再用保鮮紙包著, 現在滑得多了!!

我說:  吓! 你浪費我的保鮮紙!!

她說: 我不用錫紙, 已經很俾面了!!

唉!!  原來妹仔的興趣, 是研究各種護膚方法和心得... 那麼, 她還是讀化學 (承傳我的學系), 然後, 去鑽研各類化粧品好了...  唉!!

期待明年暑假

妹仔還未過這一個暑假, 已經期待明年暑假, 無他, 想再做SHOPPING魔是也...  

她開始講 :  下一次, 要試用Innisfree的moisture, 又想試下Horika, 要轉下不同牌子... 

昨日走過SASA, 入去探一探, 原來一些韓國牌子亦有特價...

於是, 明年六月, 妹仔的任務, 是先要格價, 做多一些資料搜集... 先比較價錢..

我說: 不過, 如果韓圜再升值, 不如放棄好了...

妹仔說:  1000對8.5都去啦!!! (今年是1000對7.7左右... 去年是1000對7.. 已經升值不少)...

有志氣

陪妹仔和她的同學吃飯, 女孩子說:  我想出國讀書! 我想出去看一下!

妹仔說: 真有志氣!

我說:  你還不學一下!!

妹仔說:  最多去讀港大囉!  (她一向說要入中大, 因為家在附近... 對妹仔來說, 山長水遠, 去到香港島, 已經是很遠的了!!  唉!!)

妹仔這一位朋友, 自小就很獨立.. 小學四年級, 一個人背著書包, 從青衣返學, 一個多小時的路程, 每天來回就兩個多小時... 因為家裡環境不算富裕, 父母都要工作, 也沒有請工人姐姐, 所以, 很早就要自己照顧自己... 暑假亦是獨留在家...

妹仔對這一位朋友的評價是: 很醒目, 不過就很懶散... 不喜歡的功課, 就一點都不做... 所以, 成績一般... TEXTBOOK上面滿是塗鴉...

我說:  她是一位極有天份的設計師, 藝術家... 你看她, 隨心所欲... 比較起其他拘謹, 乖巧又聽話的同學, 她這樣的人, 才會成功... (這是真心話...  設計師多是那種有很多古怪念頭, 不拘小節, 更不會喜歡跟規矩做事的人... )

妹仔似信非信...

幾十歲人, 我的眼光也不會太差的..

進步了

暑假操了幾日, 今日聽妹仔練琴, 那一首CHOPIN IMPROMPTU OP.66 進步了, 開始成形... 真是可喜可賀了.

不同年齡, 不同思想...

有幸同個大學一年級學生閒聊... 這位大學生真乖仔... 識得服務其他人, 又有禮貌, 肯同AUNTIE傾計, 已經極難得...此子仲係品學兼優, 去年DSE攞40分 (6科).. 勁卦!!

講開前途.. 大學生似乎於畢業後, 希望進入私人市場, 搏他一搏, 多於進入公務員團隊, 享受平穩之高薪厚職... 

我說, 入政府, 未來20年都無憂, 供樓養仔, 了無牽掛也.. 

他郤說:  做到盡, 也不過如此, 到了60歲, 也未必能晉身最高的職級 (總工程師).. 因為嬰兒潮後, 高位已多被佔據, 機會甚少了..

我說: 出左私人市場, 風高浪急, 要挨得住低迷市道... 私人市場, 市況有高有低, 並非長做長有... 回顧過去十數年, 金融風暴, 海嘯, 沙士, 每一鑊都死好多人, 慘哉!  不過, 每一行業, 每一家公司, 都有倖存者(surivors), 雖死猶生, 亦不致於過份悲觀...

大家閒聊一番, 言語之間... 我隱約感覺到, 大學生志在出外一搏, 伸一伸抱負.. 誠然是後生可畏!

追西遊記

大台的西遊記其實幾好睇... 無奈被大台剪到肢離破碎, 所以, 惟有上網睇原裝版本... D細節好睇好多...

有D對白都幾精警..

唐僧對八戒講: 我一向維護你, 不因為你對, 只因為你笨!!  (最近我都開對亞女講呢句!!)

老孫對老沙講:  師父說是聽我的話, 可是, 做又是另一套!

老豬每逢遇難, 都叫: 猴哥 (師兄), 救我呀!!

又到師父遇難, 老豬就對老沙說:  我們把行李分了, 就拆夥吧!!

(我覺得這一套, 比以前大台自己製作的, 要好看得多! 起碼不會胡亂加插D愛情橋段!)

佢放假, 我坐監

妹仔放長假, 就變成我坐監的時候...  日日都要在屋企, 侍服在側...

不過,  今日終於有救, 8:30am, 妹仔被琴老師召去... 開始她的暑期MUSIC CAMP..

好了... 終於可以放半日假!!  希望明天也是... 後天也是... 大後天都是...

學韓文

以前, 喜歡日本文化, 聽日本歌, 所以, 自學日文, 都可以應付一下超普通日文...

近年, 常到韓國, 反而沒有特別努力去學韓文... 無他, 年紀大左, 記性差, 又無耐心... 而且, 在韓國(尤其在首爾), 普通話 (中文)滿街都是, 根本完全不需要其他語言, 再差一點, 講兩句日文搭夠...

不過, 去得韓國多, 還是學會了一兩句... 如下:

Gimbup Hana (一份紫菜包飯)

Gimchi Gimbup Hana (一份泡菜紫菜包飯)..

點解要學?  因為吃早餐的地方是平民化車站飯堂, 故此, 一定要講韓文... 去左兩次, 終於學識!

身體檢查

妹仔今日去學童保健做身體檢查... 一切正常... 最欣慰是視力正常, 仍不用戴眼鏡, 希望能保持下去...

不過, 背骨要小心一點, 暫時是5度, 仍屬正常, 但郤是MARGINAL了..

另外, 因為體重在一年內跌了3KG, 醫生垂詢, 問我是否需要她跟進... 我謝絕了... 因為去一次, 又要排隊, 又要輪籌... 甚煩! 醫生再三問我, 知道體重下降的原因嗎?  我說, 我知道, 妹仔減食之後的結果也...   下午茶改吃了低脂低熱量食物, 故而減了磅...

醫生嘮叼了好一陣, 還是給我謝絕了... 不過, 她再三囑咐我要注意她的體重.

其實, 她現在的體重是合適的, 以前是有點過重的...

不過, 也會看著... 醫生最怕女孩子過度減肥, 變成厭食症... 不過, 妹仔最愛吃, 所以, 我暫時不用擔心.

貪吃又貪靚

妹仔貪吃又貪靚...  唯一辦法, 是吃得精!  以前,  都會去味X拉麵, 老麥, 甚至板X壽司...

踏入2014, 竟然從不要求去這些地方...  (我手邊的會員卡, 也送了給別人... 無謂浪費... )

現在的下午茶時段, 是新鮮果汁, 乳酪, 連雪糕也少吃了, 間或吃一些夾餅或中式點心...  這一年下來, 身形真是輕盈了許多.

今天, 我對她說:  你現在完全不像一個操過水的人, 以前肩膊又橫又厚, 現在縮小了很多..  (還好!  曾經以為操水之後, 身形減不了, 現在看起來, 也還是很標準的.)

與妹仔同齡 (或更年輕)的隊友, 能留下來的, 都陸續入泳隊A隊 (即最高級的一隊), 妹仔當然是不進則退... 不過, 細想一下, 也沒有太大損失, 畢竟都要小朋友自己有決心, 才可以堅持下去.. 勉強無幸福... 而且, 一天只得24小時, 應付完功課, 彈完琴, 都要睡覺了.. 如何可以十八般武藝, 樣樣皆精... 所以, 還是要取捨的.

PS:  去完韓國, 妹仔對泡菜上了癮, 要我找尋好泡菜... 今天跑去尖沙咀的韓國街一家泡菜專門店買了一盒, 讓妹仔試試, 另外, 有人介紹阿信屋的泡菜..  如有好介紹, 請留言!!

留學生

碰見一位出外留學兩年的中學生和她的媽媽, 大家閒聊, 說到留學的事情...

中學生說:  我當初很想出外留學, 但是, 其實那是不好的... 是挺辛苦的!!

她媽媽說:  當然, 沒有亞媽在身邊, 萬事都艱難, 打電話回來說, 沒有洗髮水, 我怎樣幫你!!

我說: 出門了, 就知道亞媽好了!!

我們離開後, 妹仔對我說:  我聰明多了, 未出門, 已經知道出門難... 還不如身邊有個亞四好!!

唉!!

香港天氣

去完旅行, 就發覺香港天氣和污染真夠差...

在韓國, 尤其在釜山和光州, 妹仔的鼻敏感不藥而癒, 一個克啑都未打過... 我本來感冒初癒, 仲有咳同痰, 去了兩天, 也完全好轉了..

前日回港, 天氣非常悶熱, 不到一天, 妹仔的鼻敏感又發作, 不斷打克啑和流鼻水...

香港的水也很燥熱, (大概因為加了大量氯和氟...).. 每次出門在外, 腸胃都會較好... (可能亦因為多菜少肉的關係 (煮法亦較少油.. 海產亦吃得較多... )

不過, 其實, 可能因為放假在外, 不用做家務, 不用管束妹仔, 所以, 特別輕鬆, 故此, 身體特別好而已. 

Shopping魔

這次去韓國, 主要是SHOPPING... 每天都購物, 無論平貴多少, 景點只去了兩個, 釜山的海雲台(因為住在那邊), 另外是首爾的清溪川, 去清溪川, 因為商場開10點半, 連EMART都開10點, 9時出門, 無處可去, 惟有先去清溪川...

朋友介紹, 去南山看風景食自助餐, 就在酒店步行可達, 妹仔都不願去, 寧願去SHOPPING MALL.. 唉!

某日, 天氣預報會有驟雨, 我們的行程依然不受天氣影響, 無他, 上地鐵, 然後入商場, (仲要入地下商街), 簡直不見太陽, 不知時日...  我抬頭一看, 原來, 是全室內活動... 

酒店更細心, 在大門放一個"磅", 我以為讓大家磅重, 妹仔說, 不是給你磅重, 乃是給你的行李磅重, 那麼, 就可知, SHOPPING會否過磅 (每人只限20KG行李咋!!)

終於, 一大堆護膚品 (一年存貨), 又有一堆食物, 又一堆衣物, 我更差.. 連毛巾都買幾條, 牛油刀都買一把....

去年, 我們的行程, 還有半天活動 (去樂園), 今年, 妹仔對樂園一點興趣都沒有.. (其實, 我都幾想再去樂天世界, 那裡氣氛甚佳... ) 不過, 當然, 這節目也被BAN了!

學校2014畢業班

收到學校的通訊, 知悉今年畢業班的部份入大學成績, 今年果真不錯, 暫時知道17位學生的結果( 今屆畢業生只得66人),  取錄的學校包括: Cornell U (康奈爾大學), Princeton U (普林斯頓大學), UCLA (洛杉基大學), Berkeley (柏克萊), New York U (紐約大學), King's College (英國), HKU等等.. 

這一屆的成績應該是很不錯的一屆...

跟其他家長閒談, 她說 : 今屆的同學非常competitive... 是極厲害的一班...

我簡直羨慕不已...  不過, 話說回來, 妹仔的學校的功課極艱深... 除了中文和數學, 其他科目我已經完全無能為力,  尤其英文, 簡直唔知佢做乜... 今日執書桌, 看見她要學一個vocabulary, 叫做 onomatopoeia... 哈!  D英文字母我都識... 合埋一齊就唔識... (當然仲有其他一大堆.. )

妹仔常常話, 她的Vocabulary好差, 因為唔識都要問同學, 同學仔就反而OK喎!  無他, 人家一日一本書, 當然功多藝熟...

我同妹仔講,  SAT要考好多VOCAB, 你點算??

妹仔都話:  唔知點算!!

於是, 請教其他家長, 她說, 可以買SAT FLASH CARD來增強VOCAB能力...  唉! 恐怕遲下都要上AMAZON去訂書了...  

IQ=74

某日, 妹仔緊張地對我說: "媽咪, 我IQ只得74, 點算?"

我說:  咁! 你是否要我俾多幾千蚊去讀特殊班?  (學校有一班特殊班, 專收輕微智障學生, 不過學費要貴幾千蚊一個月..)

妹仔說:  但係, 我在網上做TEST, 真係得74咋!

我說 : 咁! 其他人有冇做? 佢地幾多分?

妹仔說: 冇呀! 我貪得意, 上網做! 不過, 做做下, 唔得閒, 停左, 之後, 返去繼續做...

唉!  其實, 佢都唔知有冇睇清楚D指引去做.. 唉! 如果得74, 都仲識得自己照顧自己, 那也罷了!!

我又說: 也難怪!  我一向都話你蠢架啦! 

河源龍川的涼粉

上次返鄉下, 住在河源市龍川縣的一家酒店... 因為大舅父認識該負責人... 於是, 就住在這陌生的縣城中...

我問負責人, 這酒店的客人是來旅行或出差?

負責人不諱言, 說: 主要是來出差..

這龍川縣當然沒有什麼景點...  當地人介紹了一處叫 " 水坑" 的地方... 目的是吃豆付花!!

水坑像個市民休閒的地方, 內裡有很多小吃店, 門口都放了石磨, 老闆說:  這裡的黃豆都用石磨來磨碎... 所以, 豆付花特別滑... 吃過了, 也還不錯..

不過, 好的豆付花在香港也找得到... 像九龍城的公和老鋪... 還有我家附近的小店, 都是新鮮製成...

水坑小店最讓人驚喜, 不是豆付花, 反而是它的涼粉... 哇... 很香滑的涼粉, 很香的涼粉草味, 叫我們第二天再特別光顧...  好味道的涼粉真是很難找得到... 清甜香滑... 想起來也很想吃...

老闆說:  我們是用新鮮涼粉草煮成的!!

而且, 在水坑小店, 每款食物都只售二元人民幣...  所以, 週末的時候, 光顧的本地市民非常多.

如果你傻下傻下, 來到此無名小縣, 不妨去"水坑"走一回... 那最好味的小店 (本地人介紹), 在最高處, 叫做 "兩元"... 名符其實!!

選科

下學年, 很多朋友仔上中三, 開始要準備中四選科... 跟妹仔談起, 她也說: 我都要選科啦!

妹仔下學年入GRADE 8 (初中的最後一年), 也要準備GRADE 9高中選科, 美國學制九年級(即香港中三) 已經是高中, 所以也要選科..

跟妹仔談起, 其實她沒有特別喜歡的科目, 總之一句, 遞減法 (by elimination), 除掉不喜歡的, 剩下來就選讀...

現在, 她大概已經決定,  ART(美術) 和 DRAMA (戲劇) 都不選...  對ART, 她自知無興趣也無天份, 棄之不可惜... 對DRAMA, 要見人講野, 兼功課多, 也可棄選了...  所以, Performing ART只剩Choir(合唱團) 和 Band (樂團)..  前者無功課兼易過關,  後者自信應付自如... 照理就選定了. (非常勢利的選科..)

外語可選中文或法文,  照理會選中文...  因為中文較為有用... 而且讀了這麼多年, 原則上不會太差... 法文雖好, 但在外國公開試中, 與其他鬼仔鬥法文, 蝕也...  

其他科目, 要睇下那一位老師教得好喎!!  照妹仔的情況,  文科都係唔掂... 又唔睇書, 又唔鍾意寫文章... 死得!  (不過, SAT的英文水準要求極高, 所以, 冇得偷懶!)

講完一輪, 妹仔都係要好自為之!!

最好笑者, 妹仔問:  如果我考DSE中文, 能攞個2級, 如何??

我說:  我幫你去報名, 不過, DSE中文只得2級, 不能入大學也!!  但係, 以你的程度, 能有2級, 真乃奇蹟!!

戒掉

妹仔讀書的習慣上了軌道, 功課會自己做, 測驗會自己溫習..  成績中上...

老媽子常說:  不要給她任何壓力,  不要要求任何成績,  總之合格升班, 就可以了..

今年, 我也真的不太過問她的成績...  總之, 學校老師不找我麻煩, 就算了...

臨近學期尾, 妹仔說:  今年的成績退步了...

我說:  OK! 你知道就好... 你要做到什麼成績, 就做什麼成績... 你自己要努力到什麼地步, 就努力到什麼地步...

今年, 我也真不錯... 我戒掉了上網看她成績的習慣,  往年, 我都會時常上網去看, 看見成績差, 就哦... 今年, 只看過一兩次...  快將埋年, 也許不看也罷... 她心知肚明就好了.

斷線

家中的YAMAHA U1鋼琴壞了...  有幾個音彈不到, 找琴行師傅上門檢查..

原來, 其中一條琴弦斷了..  斷線影響了其他幾個鍵..

我問師傅, 為什麼會斷線? 是否天氣太炎熱?

師傅看了那條斷線, 說: 也不一定, 如果是天氣原因, 應該一組線出問題, 現在只有一條線斷了, 可能是被污染, (昆蟲之類), 或其他原因, 引致生銹, 而斷了...  問題不能避免.

(先前家中有嚴重的曱甴問題... 連鋼琴裡面也發現蟲蛋... 這一位調音師傅長年替我的鋼琴調音,  所以知道狀況.. )

沒辦法, 當然是要換線... 打個價, 一條線要HKD550... 都要換啊!

我心想, 如果大維修, 換幾條線, 幾個鎚, 豈非很昂貴!! (不如換琴罷了.. )

師傅臨走, 還叮囑說:  要小心那個壞音, 不要彈得太大力, 否則, 那個鎚仔會爛, (因打音不平均, 容易打爛個鎚.. )

我說:  也很難喎! 亞女彈的歌曲, D音又多又快, 照理控制不到一個音的力度...

不過, 都沒辦法, 現在要等師傅配條新線, 再擇日子, 來維修... 

手語

難得妹仔肯跟大舅父這個肥佬去吃早餐... (真難得!  13歲靚妹單獨陪肥舅父!! )

回來, 我問肥舅父 :  你地有咩傾??

舅父說:  冇野傾!!  全程做手語...  大家各自買餐 (大家樂), 然後, 我幫佢捧餐...  佢指下張枱... 叫我去果邊..

然後呢?

舅父又說: 然後,  冇野講! 夠鐘之時, 我指下個錶... 大家就起身走囉!  全程手語... 我都要學多兩下,  同你個女溝通!

我說:  你已經好有FACE,  亞女肯單獨對住你(這個死肥佬...), 陪你吃完份早餐!! 仲想點!

豬車與走地雞

今次返鄉下, 亞女最大得著, 就是豬車與走地雞...

在路上, 亞女忽然叫道:  媽咪! 豬車呀!  我終於見到豬車呀!

原來, 有一輛載著豬隻的貨車經過!!

亞女為何如此興奮??  因為我常常叫佢做 "豬車" (佢豬咁蠢也!) 由細細個被叫做 "豬車", 佢終於見到豬車為何物, 故此, 特別興奮!!

又去到鄉鎮的一間飯館... 此飯館在山上的小鎮, 除了過年過節, 每天不過一兩桌客人.. (飯館由夫婦兩人經營, 小朋友就在門前玩耍...)

到此飯館, 我們點菜, 叫地道菜式: 白切走地雞, 客家豆付... 等等...

老闆二話不說, 下去即捉走地雞, 即劏...  走地雞喔喔叫了幾聲, 就一命嗚呼...

妹仔說:  今次真正吃得名符其實的走地雞!!

白切雞上枱...  雖然肉較硬, 但是, 雞味甚好... 唔駛落雞汁, 都吃雞有雞味... 好雞!!

You know I won't

近日生病, 無暇管束妹仔練琴... 老實說, 妹仔大了, 要管亦管不來...

某日, 忽有感慨, 與老師有以下一段WA對話..

我 : She is very lazy these days..

老師:  I can tell from her playing.

我:  If she has to fail, just let her fail. There are lessons to learn in life..

老師:  You know I won't.

五月天..

整個五月都在病...  幸好今日已經是六月二日, 希望病完了...

五月一日(勞動節), 妹仔首先發病, 發燒至39C, 匆匆去仁安睇病...  吃抗生素...  兩日後, 到我病, 以為自己會OK, 死頂, 仲要日日出門, 因為有好多事情要辦, 一直發低熱(37.8C)...  終於, 挨左一個星期, 頂唔住, 睇西醫, 西醫話, 你發左燒咁耐, 如果吃藥不退, 就要照肺!!

吃左幾日藥, 好左! 過一星期, 又再發燒, 今次一發就39C... 得翻半條命... 又再吃抗生素...  一個月內吃了兩期抗生素..  (好在照肺冇事!)

當然, 剛剛吃完藥, 又要返鄉下...  還好!  安全回來... 未死得!

病了一個月, 瘦了七磅...  真係減肥都冇咁快...  D藥又勁又猛, 吃到WING下WING下!

老媽子見我, 哦道:  好心你自量下啦! 五十歲人, 仲以為自己好壯!!!

我說:  我以前飲水睡覺, 即可退燒!!

老媽子說:  你以前丫嘛!!!

回鄉記

這幾天返鄉下... 因為幾年前, 我回鄉走了一趟, 引起大家的興趣, 為了不再給人家日哦夜哦, 就帶同老媽子, 妹仔, 叔婆等人, 返鄉下, 拜祠堂, 睇祖居.

老鄉在梅州附近, 車程甚遠... 祖居還座落於一條遠在山上的小村莊中... 可說是長途跋涉!!

不過, 這一次回鄉, 比起五年前, 發現鄉下改變不少... 以前以為鄉郊發展應該甚慢... 但這一次回去, 發現祖居附近原本極荒僻的地方, 都建了新屋... 祖居再不是孤伶伶的, 而是多了很多鄰舍..  而在村中, 再不是清一色的老人, 女人和小朋友... 而是多了好些年青人... 有些人是回流了...

上一次, 祠堂有一位老太婆在打理... 這一次, 祠堂內雜草叢生, 似是荒廢得久了... 我想, 大概老人家走了, 年輕人再沒有興趣接手打理...  而祖居更是崩塌了, 全座倒塌的日子似乎並不遙遠.. 沒有人再記掛這些煙遠的歷史, 亦沒有人再喜歡緬懷舊事.. (昔日圍在祖居前的老人家, 也不知去向.)

論到那一窮二白的縣城, 更是多了很多商鋪, 珠寶店也多了好幾間... 我想, 大概祖國真的讓鄉村也富起來了...  現在的農民也真是可以分享一些發展的成果.

我以為中國的城市變化大, 原來, 鄉間的變化亦有不少...

這一次回鄉, 真的感到時光飛逝... 時不我與!

比較之下

妹仔說:  我的英文vocabulary真是很差! 識字很少!

我說:  你知道就好, 還不多看一些書!!

妹仔答:  不過, 我唔鍾意睇書喎...  但是, 我的中文很好!

我瞪大眼, 說: 你學校的中文大概是全港水平最低的一間, 你竟然認為自己中文好, 你好到那裡去了??

妹仔答:  我好過羽田san! (羽田是她的同學..)

我的眼更大一些, 說:  你竟然要跟一個日本人羽田san比中文!!!

妹仔再考慮了一下, 說:  我的中文比亞珍好!! (亞珍是中國人..)

我說:  好到那裡去了??

妹仔說:  有一次, 我對亞珍講: 大吉利是!!  亞珍問我:  Are you going to give me some red pockets??

無奈地笑!!

過了一會, 我對妹仔說:  你的中文幾時可以好過我?

妹仔不屑地看了我一眼.