對話

某早上, 妹仔遺忘了八達通在我的手袋裡, 我發現時, 已經8點多.. 但就沒有收到妹仔的來電求救... 

放學時, 我問妹仔 : 你忘記帶八達通, 點解冇CALL我？

妹仔答: 錢解決到的問題, 就唔係問題啦!!  我有銀包嘛!

近幾日, 我被妹仔傳染, 患感冒, 不到兩日, 妹仔痊癒, 我卻要見醫生, 我對妹仔講: 最衰都係你, 傳染我!

妹仔白我一眼, 說: 最衰都係你自己, 抵抗力咁差!!

唉!  我覺得自己對住丁蟹講野...

World's Best Diet

昨晚睇明珠台一個資訊節目, 叫做 World's Best Diet.. 幾好睇, mytv 現在有重播.. 裡面選左世界頭20名的健康飲食的地方 (國家 或 地方 或 團體).. 以當地人的壽命和健康狀況為排名標準.

中國竟然排18, 唔太差.. 佢地話, 雖然中國食白米其實不太健康, 但係因為飲食中加入了大量蔬菜, 所以都排得幾高..

韓國排13, 韓國食物的特色, 是大量蔬菜水果, 魚, 但是, 韓國人的飲食, 基本上是無乳製品... 日本亦排第6..

另外, 排得高, 仲有東南亞幾個國家, 印度.. (因為食物有大量天然香料. )

還有法國, 西班牙, 地中海國家如:意大利.. 佢地特色係, 多芝士 (乳製品), 紅酒, 檻欖油...

又有一個國家, 多吃椰子... 另一國多吃朱古力 (可可)..

第一名是冰島... 多魚, 多乳製品, 多粗糧 (替代水果)..少菜蔬..

你會發現, 這些國家, 並無統一的吃法, 都是 " 靠山吃山, 靠水吃水 ".. 但有一個共通點, 就係少吃預製食品和快餐類食物... (processed food and fast food)..

所以, 頭20名裡, 全無北美國家, 甚或一些發達的歐洲國家 (如英國, 德國).

裡面一位冰島男人.. 年紀50歲, 但身形FIT爆, 肌肉線條超正, 以為佢只得30歲... 佢對飲食的心得是 : 盡量以食物的本質來進食..譬如食魚.. 生食就是100%營養.. 蒸煮有80%..  煎只剩60%... 炸就只得40%.. 如果做到不似本形, 那麼根本就再不是魚!!  (這也一個很好的理念.. )

再諗翻轉頭, 其實香港都應該上榜, 因為平均年歲亦高據榜首... 但是, 香港人的飲食習慣奇差喎, 豈不是他的驗證有誤... 非也... 香港人現在的平均年歲, 是以我地老爸老媽的年歲為準.. 香港上一輩的飲食習慣其實非常好... 一般人亦都是清茶淡飲, 最多上茶樓一盅兩件.. 而且飲大量中國茶.. 老人家甚少吃零食, 好多都係新馬仔, 鄧寄塵的身型... 但係... 香港的長壽紀錄, 可能到下一代就會改寫, 因為滲雜了太多西方快餐零食文化... 現在, 香港愈來愈多肥仔肥女.. 真係好唔掂... 

最好游蝶式

根據一些報導, 減肥最好游蝶式, 因為卡路里消耗最多..

我對妹仔說 : 游蝶式啦.. 游蝶式減肥最好... 條腰仲會好幼細架.

妹仔答 :  唉.. 不過個膊頭會好橫哩...  兼且會斷氣架..

我話 : 但係最好喎!!

妹仔想一想, 話 : 不如蝶式腳, 自由式手, 咁就GOOD FIT..

我諗, 唉.. 唔知仲有冇得游, 依家繼續努力搵泳會...

其實, 妹仔D蝶式都唔錯, 姿勢好靚... 不過, 佢從來唔肯比賽蝶式, 因為佢覺得搏命游50米會斷氣... 到時可能去唔到對岸, 要浮過去.

身體轉變

妹仔高興的對我說 : 今年去韓國, 終於可以減少買暗瘡用品, 只需專注搜購保濕護膚用品喇..

確實, 妹仔的皮膚大有改善..

我對妹仔說 : 我忽然記起, 你連晚上磨牙的情況都改善了..  (以前, 妹仔在入睡之後, 經常有磨牙的情況, 磨到好大聲... 近年已甚少聽見.. )

妹仔答: 真的嗎? 我不知道... 亦沒辦法改這個習慣..

我說: 真呀.. 是否因為精神壓力或緊張?  近期是否沒有以前那麼緊張??

妹仔答 : 唔係... 一向都唔緊張!!

我再細想一下, 其實, 近年, 妹仔的身體狀況有明顯的轉變,  除了皮膚好轉, 磨牙減少, 連鼻敏感和氣管問題都減少了很多..  深究下去, 可能因為妹仔的飲食習慣改了很多...

(1) 不再飲用牛奶, 改飲杏仁奶.. (因為乳製品容易引起炎症, 所以我改用了杏仁奶, 杏仁有豐富OMEGA-3.)

(2) 大量減少了吃肉, 尤其牛肉.. (以前妹仔無肉不歡, 現在根本不會主動要求吃牛肉. )

(3) 多吃了許多不同種類的水果和蔬菜.. (妹仔開始嘗試不同的水果, 接受能力亦高了很多. 於是, 我買了很多季節性的水果.. )

(4) 下午茶時段, 放棄了很多高熱量食物, 改而吃粥品, 通心粉..

(5) 減少了零食和高糖食物.. 薯片, 雪糕, 朱古力奶, 蛋糕等.. (以前去茶餐廳, 總要飲好立克或華田, 近期, 跟我飲無糖熱檸水.. )

再想深一層, 真要多謝妹仔臉上的暗瘡, 其實, 妹仔一向都抗拒杏仁奶, 熱檸水, 甚至某些水果.. 因為暗瘡問題, 妹仔才願意聽我的勸諭..  但我只要說, 這食物對治療暗瘡有幫助, 她就會接受.

另外, 我亦告訴她, 某些食物不宜食用, 因為對皮膚不好, 包括: 吸煙, 咖啡, 汽水, 煎炸... (我打定底, 希望佢將來會食得健康. )

真的要退役?

剛收到泳會的通知, 這暑期的訓練班再沒有專車來接送學生... 因為我區的學生只剩五名, 不划算..

唉!!  終於要離隊了... 妹仔在這個泳會操練足有9個年頭... 多次想退役, 都沒有退下來.. 當然, 近年每週只練一天, 已算不上是什麼泳隊隊員了.. 不過, 每當我叫妹仔退隊, 妹仔都不願意, 她覺得依然學得很高興..

這一回, 真的要退了...  但是, 妹仔卻說, 想再繼續練下去.. 唉... 現在, 惟有到附近的泳會詢問一下, 希望有類近程度的班別, 讓妹仔繼續游下去..

想一想, 真奇怪... 以前要千方百計, 都要逼佢游, 現在冇得游 (我都想佢停), 佢就話要繼續..  有時候, 做人真煩..

泰林

巴士經過泰林電器行... 鋪面依然緊閉..

妹仔問 : 呢間泰林係乜東東?

我答 : 係以前的電器鋪, 以前冇咁多電器... 一間屋企就係得電視, 洗衣機, 雪櫃, 再加個電飯煲.. 以前D人買電器係大件事, 好多時都要來旺角去買, 唔似依家, 區區都有電器鋪, 仲有, 最貴的電器都係D細部野... 都以前好唔同架..

妹仔都未必明白... 佢完全想像唔到香港人的舊歷史... 不過, 佢都算係咁, 都有興趣知道下..

妹仔又話, 同學仔亞N係本土派!!

我話 :本土派?? 連中文字都唔識多個, 點做本土派?? 對香港歷史和文化都唔識, 點係本土派? 不如叫做極端派會好D!

或者, 應該叫大台重播D粵語片, 等D番書仔學下..  

腸敏感

這是一位朋友的經驗, 有點參考價值..  朋友的兒子 (18歲)長年都有腸道敏感, 當壓力大或精神緊張的時候, 就會嚴重肚瀉, 影響到不能上課..

朋友嘗試一個食療方法, 大大改善了兒子的問題.

她給兒子吃高純度的Manuka蜜糖 (UMF 20+)..

如果有同樣問題, 可以考慮試一下.   不過, 這種東西在香港比較難買..

再次SOLO

妹仔剛剛說 : 今年學校樂團, 又有份Flute Solo..

我問 : 又有份? 你今年一隊有幾個都勁過你喎... (妹仔今年升去最高級的一隊, 其他人去年已經在隊.. )

妹仔答 : 係呀.. 除了E吹picolo solo.. 我就係flute Solo, 點解揀我?? 我點知啫!! 我都以為係F或者J...

我話 : OK.. 咁我去睇你學校個concert啦... (其實, 我懶到唔想去... )

我覺得以妹仔練長笛的勤力程度 (每星期只練15分鐘), 佢冇理由可以SOLO, 不過, 可能其他人連15分鐘都冇... 又或者, 妹仔真係有D天份... 又或者, 因為亞SIR識我, 所以俾面... 嘻!!   

大時代

這兩日聽得最多... 就係 : 大時代!!  冇辦法!! 股市嚇死人, 彈升1600點+..  股票動輒升20%+, 如果升低過10%, 就係好差的投資... 陰功!

今日去茶樓, 師奶圍坐, C奶呻道 :銀行個電話打唔通呀, 想放貨都做唔到!!

猶記得多年前, Internet Banking未算好流行, 我都係打唔通電話, 所以, 後來一怒之下, online做買賣, 連銀行電話和自己個PHONE BANKING密碼都忘記左... 到現在, 其實, 都應該考慮下用Smartphone Apps來處理.. 因為, 我並不是常常坐在電腦邊.. 不過, 基於電話非常容易遺失又容易被heck, 所以, 都未下定決心...

但係, 好似昨日的大時代, 根本分分鐘在變, 而且變幅極大... 如果以前係坐過山車, 今日係音速飛行...  所以, 唔得閒, 行開左, 都幾頭痛... (好似C奶, 昨日去拜山, 就打唔通電話... )

Anyway... 大時代又來臨... 真係要扣好安全帶.. 我都勸老媽子.. 千祈唔好忍到最後, 先去接火棒.. 

現在, 街頭巷尾, 師奶阿伯都講股票, 真係開始唔掂.. 不過, 仲會滾一輪.. 不久之後, D打工仔辭工炒股, 個市就差不多癲夠.. 老實講, 天下實在冇不勞而獲..

我都在檢視自己的存貨, 開始覺得現價股息率再不理想之時, 就放貨..  (即是, 股價已經過高了.)

千祈咪搞..

妹仔昨日入營, 因為天氣驟然變冷, 跌左10度, 佢冇帶夠保暖衣物.. 而營地其實在屋企附近..

我飲完早茶, 見佢地一班同學帶住篋, 行去營地, 就特地在路口等佢.. 當時我身上披住一條頸巾, 諗住問下佢, 要唔要攞去保暖... 

其實, 唔問都知, 妹仔一定唔要...  我見佢一大班同學, 個個短衫短褲, 我已經好吟沉, 逼佢著長褲, 亦帶長褲... 所以, 明知係自討無趣..

妹仔行過, 見到我.. 我問佢要唔要頸巾, 佢答話 : 你快D返屋企!!  (無辦法啦.. 我都估到架啦. )

到晚上, 天氣更涼, 只得十五度左右 (新界區)... 老媽子話 : 你快D攞件厚衫去營地俾佢啦!!

我冇咁好氣, 答: 千祈咪搞, 想死就易D... 佢見到我, 瘀爆啦!!

老媽子仲話 : 冷病左就麻煩啦..

我心諗 : 佢冷病都唔肯著架...

有時候, 唔係我唔肯做.... 而係... 無謂搞住佢...

PS : 我最醒目, 就係臨出門口, 塞左一盒紙巾俾佢... 怕佢睡覺會鼻感敏... 算係咁喇..

咩性格?

妹仔問我 : 你覺得我係咩性格?

我諗左一陣, 話 : 蠢囉! 惡囉!!

妹仔再問 : 仲有呢? 仲有呢? 講真D..

我鬼知咩!  自己仔女永遠都係幼稚雞喇...  我真係諗左好耐, 話 : 其實哩.. 你係個開創能力好強, 又好有毅力的人..

妹仔搖搖頭, 話 : 你有咩EXAMPLE?

我話 : 你學琴個GROUP, 你係唯一生存下來的人..  你仲死頂住... 仲唔係夠毅力!!

妹仔話 : 唔算... 你再諗下其他..  我覺得我冇開創, 亦冇毅力...

我諗左好耐, 都係諗唔到... 真煩!  唔好叫我諗啦... 唔該..

PS: 年輕人好鍾意做埋D性格分析... 我地D老鬼, 都費事做埋呢D野...  一來好瞭解自己, 二來, 睇得通透, 咩性格都冇所謂啦, 求其有一日過一日就算啦..

美容大王奇招..

唉.. 又被美容大王搵笨喇...

美容大王話 : 如果想去斑, 就用香蕉皮省面...  (係香蕉皮, 唔係西瓜皮.. )

美容大王指點, 我就試下.. 吃完一條蕉, 就用塊皮來省面... 省下省下... 省完去照鏡.. 嘩.. 烏卒卒架..  又烏糟..  如無意外, 就係被搵笨喇...

不過, 美容大王介紹左隻HAND MASK, 都幾好喎... 用完真係滑左..

假日做遊客

這個假期, 抽左兩日, 同妹仔去做遊客, 在香港觀光, 支持本港經濟...

一日走去赤柱... 妹仔話, 都唔似香港, 好似外國... 四處都係鬼佬..  去赤柱大街.. 妹仔買左兩件小飾物... 

我話 : 可能同韓國價錢差不多... 睇來, 可能仲會平DD..

去赤柱, 妹仔最大興趣, 並非海灘美景, 而是一路上的豪門大宅..  妹仔豪言壯語 : 我將來要住入去先得..

我話 : 一係你就搵定個有錢師兄... 一係就等下世投胎, 記往個門牌...

第二日, 我地去離島..  妹仔又話, 都係唔似香港.. 冇辦法.. 大鄉里出城..  不過, 是日, 妹仔的最高享受, 係食左不同的地道美食... 豆腐花, 海帶綠豆沙, 茶果, 雞屎藤茶果, 檸檬薏米水..  真係睇風景係次要, 最緊要有好野食..  (妹仔都唔係好肯行, 佢話冇興趣睇風景云云..所以, 我地都經常離隊, 走左去食野.. )

但係... 都難得妹仔肯出門... 事關依家D細路, 淨係鍾意上網打機, 完全足不出戶... 所以, 難得妹仔有興趣跟我四圍去..  都非常GOOD FIT喇...