4位小生

最近只睇4位小生... 無他, 自然流露... 真係覺得佢地好好玩, 尤其係四哥... 加入曾江, 認真有火花.. 睇完兩星期, 原來最有霸氣係修哥!

其實, 睇見4位小生, 最深感受, 就係見位4位幸福的男人... 幸福女人見得多, 幸福男人佢地都算典範.

修哥83, 仍然活力十足, 仲係四代同堂, 難怪連四哥都羨慕.

曾江一味話老婆係佢隻獅頭鷹, 幫佢管錢, 否則一早花光... 曾江次次提起老婆, 就冇聲出... 所謂怕老婆會發達, 老年有老伴, 都係非常幸福的.. 

JOE好似最窮, 不過, 佢人緣好, 又錫曬老婆, 亦係幸福一族.. 

仲有四哥, 直情係男人的超級偶像..後生時玩到夠, 女友老婆個個都係超級靚女明星,  老來雖然孤家寡人, 不過, 勝在有個孝順仔.. (佢都可能冇乜點教仔錫仔... 不過, 霆鋒係來還債的.. )... 所以, 佢話亞仔唔想佢駕車, 就請個司機俾佢... 簡直係曬命!!

仲有仲有, 4位小生.. 加埋300多歲, 身體健康, 仍然有自己的事業, 仲係可做可不做, 風流工, 簡直羨慕死人...

大台D劇集冇乜佳作, 反而10:30時段正好多... 下星期睇北韓, TIMING幾好, 又有得追下.

自由與責任

妹仔說: 有一些同學要求家長給予多一些自由(they want more freedom)..

唔.....

妹仔說接著說: 其實, 多一些自由等於多一些責任!!  不是免費午餐 (no free lunch)!!

唔... 似乎妹仔不想要更多自由... 

升學的選擇

每年參加一年一度的大學同學聚會, 當中可以知道一下大家的動向, 以及各家長和小朋友的選擇... 不知不覺間, 大部份小朋友都已經上高中, 有一些也上大學..

今年, 有幾位家長, 都送高中的子女出國留學... 當中不少是在BAND 1名校就讀.. (我心想, 為什麼都要出國呢?) 不過, 每一位朋友仔都有出國的理由.. 相信對DSE的顧慮是其中之一.

在座有兩位老友是中校長... 他們話: 其實, 大學入學率這幾年會上升, (因為這一批都是SARS前出生的, 出生率每年都降低).. 所以, 同學們應該會好一些..

另外, 根據他們的資料, PHY/CHEM/BIO 的5級以上成績, 比例最高, 有超過20%, 所以, 選這些科目都有著數... 而中英文科的比例就最低, 只有8%..

他們亦話, 其實, 選科根本不太重要, 因為大學只看分數.. (除非是醫科工科, 才會留意學生的選科.. ).. 這也是事實..  (所以, 課外活動一點也不重要, 除非是港隊, 可循運動員的QUOTA入學... 這一項與外國大學的收生大不相同.. )

校長們對老師的評價和重要性的看法... 他們認為, 對一些A級學生, 老師的重要性不高.. 對劣級學生, 亦不重要.. 反而是一些MARGINAL的學生.. (2至3級的學生).. 一位好的老師, 就可以提升他們的成績..  (這也是很好的觀察.. )

我對他們說 : 其實, 無論是那一所大學的學生 (外國名牌大學也好, 本地大學也好), 面對的問題都差不多, 始終香港景氣不好, 要找到一份合意的工作, 都不容易..

出路

兩個侄仔, 一個大學畢業, 一個中學畢業..  兩個跟著父母, 長駐在大陸..

大仔依然在量地, 佢老爸(即我大佬)話, 要將佢召回身邊, 逼佢出去做工, 三千(人民幣)也好, 五千也好, 一萬也好... 總之, 唔可以再HEA.. 已經HEA左半年喇.. 其實, 大侄仔性格開朗, 非常合群, 出去做工應該不成問題... 不過, 都係要催逼一下..

細仔跟父母住... 因為未找到合心意的大學, 所以, 今年可能休學重考... 不過, 這個暑假, 佢竟然有份工作...  真係估都估唔到..  雖然只得一兩千人民幣, 郤是佢喜歡的工作... 他的興趣, 與所有細路無異, 就係打機... 不過, 佢打到成為全省冠軍... 而佢依家份工, 就係教人打機!!  (有人工!!)

佢老爸話, 佢好似做主播咁, 在網上教人打機...  不過, 佢就俾人批評, 話佢唔夠好, 又唔夠靚仔.. 仲成日俾人鬧... 但係, 個衰仔都繼續做, 仲做得幾開心..  佢話: 俾人鬧冇所謂, 有錢收得..  (真係幾叻仔!!).. 佢仲潤佢老爸, 說: 我做工係興趣, 你做工卻係挨世界云云...

聽完侄仔的故事, 都幾稀奇... 大仔是陽光少年, 在隱世量地.. 細仔一向是宅男, 古古肅肅, 卻做一份過癮工, 仲要面對群眾... 

講真心話... 細仔未必可以一世做這類工作... 不過, 網絡遊戲是TREND, 如果能變成一份事業, 那是走在時代的尖端... 

稀奇... 有時候, 我們真不需要太刻意安排細路的出路, 太刻意都冇用...  Life will find its way out... 時代在轉變... 我地老鬼真係跟不上...

PS: 細仔這星期要代表上海隊出賽, 鬥蘇州隊...  勁!!

熊出沒

其實, 一早就係熊市... 7月8日大跌市就開始左... 今日D報章先話熊, 遲左個幾月...

通常股市賭仔的毛病, 最常見, 就是 "有糊唔食", 咁就罪大惡極... 三番唔食, 要等雙辣, 結果輸十三么...  另有, 就明知係一條死魚, 都話會咸魚翻生, 結果彈都唔彈, 終於, 愈溝愈杰, 終於彈盡糧絕...  最近睇電視 (財經台), 見班分析員, 個個臉如死灰, 都係最佳寫照...

我都唔係好得好多... 只係回歸基本步... 不過, 我都幾強橫, 同我學跑步差不多... 輸完又賭過, 保持身心健康.. 哈哈..  不過, 香港人都幾好賭品, 哭下股喪就算數..

今次個市, 非常不明朗... 最差係亞爺托市, 一時一樣, 忽然, 又話人民幣又貶值, 搞到無所適從, 都唔知佢點樣放水... 係放落股市, 定放落進出口... 到底想開放, 定想收歸國有... 唔識玩喇!

亞洲貨幣又燶味甚濃... 避得去邊?

我諗, 依家都係揸住港紙.. 或一些港元相關的公用股算了...

不過, 我又唔係咁悲觀喎... 我等緊恒指跌到兩萬點附近, 就幫亞女買盈富基金 (用佢D零用錢)..

另外, 目前的最佳投資, 就係外出旅遊... 橫掂都輸左, 不如趁平去食和牛, 買名牌啦...  

死頂!

在此, 先為在曼谷爆炸中喪生的兩位女生默哀, 為她們的父母難過... 亦慨嘆人生無常...

話說回來, 八月初開始去跑步班, 第一堂已經中暑, 發高燒, 足足病左三日... 跟住幾堂, 非常掙扎, 有一堂基本返去旁聽, 有一堂覺得狀態欠佳, 就藉詞請假...

昨日, 終於鼓起勇氣, 再去... 人家1600M熱身, 我就慢跑800M... 活動45分鐘, 就讓自己休息15分鐘... 最後人家跑20分鐘計時, 我就慢跑12分鐘 (1200M.. 12分鐘), 同烏龜爬行差不多.. 總之, 頂下挨下..

課中認識一位朋友, 佢年少時係校隊, 受傷後休息了一段長時間, 如今慢慢回復跑步.. (我自愧不如啦.. )

我同佢講, 我第一堂中暑, 所以, 半途就坐在一旁..

佢教我.. 其實, 不能等到口渴才喝水, 因為覺得口渴已經太遲, 必須不斷補充... 其實, 亦不是在運動時才喝水, 平日都要多喝... 尤其在運動前兩日, 已經要開始補充, 讓身體有足夠水份去應付..

哈.. 真係又上一課...  (昨日慶幸無驚無險地完成.. 今日亦monitor住自己的體溫, 驚死又再發燒.. 事關昨晚都好熱, 跑步時有30C..)

話說跑步班D同學仔.. (雖有D年紀都不輕, 但是, 個個都係健將.. ).. 佢地D目標, 一個話要跑山, 一個話要跑100K, 一個又話去毅行...  總之, 我就係差差差... (我個目標, 連教練都頂不順, 就只係跑15分鐘 (唔辛苦, 唔駛中途休息))..

我仲死頂緊.. 希望自己會進步啦...

朋友圈

妹仔的最老友的死黨今年返回加拿大, 所以, 妹仔今年的其中一個重要活動, 就是重組自己的朋友圈.. 

我對妹仔說: 到了高中, 就要有三幾位老友, 多約一起出來.. (妹仔比較少出街.. 這是相對的, 我中三時, 日日周圍飛, 週末亦唔見人... 連老媽子都話我, 日日出去做保長!!)

妹仔斜了我一眼, 說: 我知! 你想飛甩我丫嘛!

我答: 當然唔係! 因為我中學時代, 是這樣過生活, 所以, 你都應該建立自己的朋友圈... 依家, 我的死黨, 都係中學時代的同學... 你都識得架!!

(其實, 照理交朋友, 不需要我提醒... 不過, 都要提下佢... 老實講, 到我老左, 我都想佢陪我, 但是, 做人一定要有朋 友... )

高中生活

妹仔過了首兩天的高中生活... 今日返來, 第一句, 就話: 上MATH好悶...  (冇法啦.. 忍下... )

妹仔都話: 一年好快過... 下年又有新老師..

妹仔在校參加左一個GIN CLUB, (應該係Global Issues Network, 主要係做一些社會服務, 關懷一下社群.. ).. 佢話: 個CLUB最正的地方, 因為開會都在LUNCH TIME..

遲下可能要去做下義工, 大概如此...

今年應該會入番泳隊, 因為朋友仔都會一齊參加, 而且, 仲會有0.5學分.. 正!!

現在最大的希望, 就係快快趣趣考完琴, 就全心全意投入高中生活喇!!

音樂營結束

今日, 妹仔新學期開課, 代表暑假音樂營結束..

今年, 妹仔大部份都在老師家中, 所以, 我沒機會聽她的練習.. 不過, 今年, 妹仔在音樂營另有得著..

今年, 老師的家中多了很多學生... 老師的脾氣亦不太好 (根據妹仔), 所以, 很多時候, 老師都在鬧學生... (聲音都啞左..)..

妹仔回家時, 都有點震騰騰... 驚魂未定... 因為, 有時, 老師並不是鬧佢, 但佢話有漣漪效應, 搞到佢都眼濕濕..  (又有時候, 佢要幫班細路評分, 都唔知點算.. 佢話, 評佢彈得好, 自己俾老師鬧; 評佢唔好, 細路就俾老師鬧... 所以, 壓力好大!! )

我對佢講 : 唔怕喇!! 你挨得過, 將來, 對住任何BOSS, 都可以挨得到...

其實, 妹仔依家EQ都好高... 佢返到屋企, 打兩下機就回復正常, 唔會屈住.. 佢自己識得減壓, 都實屬難得..

我同佢講, 叫佢勸下老師, 唔好咁傷身... (佢話: 冇用架喎...)

將來想做乜

一班家長圍坐飲茶, 妹仔少不免被問到, 將來想做乜? 我亦被問到, 將來想佢做乜? 因為上高中, 開始要考慮上大學選學科云云...

一開始, 我答: 我冇諗呀! 佢自己決定啦.. 去邊度讀大學都冇諗呀!

妹仔都唔係好知點答... (事實上, 答乜?! 又唔係好熟... 冇一個得體答案.. )

然後, 我就話: 其實, 妹仔最想做 "杜如風"..  理想工作就係做杜如風!!

跟住, 妹仔個朋友仔就加把口, 話 :喂! 我都想呀!

回家之後, 妹仔對我說: 其實, 我冇話我想做杜如風, 我做唔到杜如風, 我講野口窒窒!!

我話: 冇所謂啦! 搞下爛GAG啫! 講D垃圾, 大家就唔會咁認真問你, 你想做乜.. (反正, 妹仔都仲係懵下懵下, 點知自己想做乜?!  就算問我, 我都唔知自己想做乜啦!)

PS: 因為一班家長的仔女剛上初中, 大家仲好似小學咁, 緊張到死.. 仲係想個個老師都FIT曬自己個細路, 而唔係叫D仔女去適應個老師... 我同佢地講, 老師肯教, 已經很好, 每個人風格不同, 不能強求.. 學生要自己去適應..而且, 學生成績都是normal distribution curve, 有人高分, 有人低分, 間間學校都一樣啦.  (又可能, 大家都想仔女入名牌大學, 以為老師可以教自己個細路入牛津, 劍橋, 哈佛... 其實, 這一類學生並不是教出來的, 而是自己闖出來的... )

PS: 不過講心個句, 做杜如風都真係幾好... 聽完佢係BIG BOYS CLUB做訪問, 佢都真係幾叻, 幾勤力... 自己做旅行節目, 自己帶CREW, 自己管數... 都真係唔容易. (所以, 妹仔話: 佢做唔到杜如風... 妹仔都好有自知之明.. )

PS: 妹仔的心願, 其實, 只係做打工仔!!
.

避暑

天氣熱到嚇死人.. 36度.. 我個區就37度..  剛剛退左燒, 唔想再發過, 於是, 昨日和今日的大計, 都只是避暑..

早上11點左右出去買午餐, 因為唔想入廚房煮... 我覺得自己似做偵探片, 想盡辦法去避開個太陽... 總之, 過馬路之前都唔會企在路口.. 在冷氣大堂見到個紅綠燈轉色, 先慢慢行出來.. 一見到有個蔭, 那怕只有飯碗咁大, 都企埋去...

在屋企, 始終難免要入廚房, 就搬把風扇, 吹D冷氣入去.. 入去唔夠三分鐘, 就跳出來, 過冷河.. 其實, 今日開左冷氣, 都唔係好涷.. 天氣實在太熱, 冷氣都只係僅僅夠..

身體差, 又唔敢食冰.. 否則, 一定開兩枝冰涷汽水..

我記得後生時, 自己都幾威, 走去絲綢之路.. 吐魯番40+度, 我都未怕.. 不過, 係三十年前囉, 依家再去, 都應該死得... (講真, 吐魯番夏天, 日日都40+, 都唔死得人, 其他地方的人就咁容易中暑死??  無他, 吐魯番人一到中午, 都唔會出去.. 佢地活動時間, 只得早上和黃昏, 所以, 都係智慧.. )

我今日都學吐魯番人, 早上出去之後, 就在家中避暑.. 不過, 我估, 黃昏之後, 我都係唔會出去架!!!

我諗下, 慘啦!! 我身體個THERMOSAT愈來愈差, 動不動就過熱中暑發燒,,  再過幾年, 可能真係要出埠避暑喎...

我都有個GOOD IDEA... 北海道D民宿好平.. 住一個月半個月都仲得喎!!

無奈

踏入一個新年齡層, 真係覺得改變很大..  就算個瞉保養得幾好, 身體機能都真係大不如前.

本來諗住做運動去保養下, 報左跑步班 (晚上班, 唔會太熱), 學下跑步.. 豈料上左45分鐘, 已經暈暈地.. 我都知道自己差 (冇諗過差成咁), 當然馬上坐低休息, 無謂累街坊, 等到最後跑圈, 跑左15分鐘, 做埋放鬆動作, 就返屋企.. 我都唔係好知自己點搞, 總之, 汗水不停流, 都不停飲水啦.. 不過, 知道自己流汗唔係幾過癮, 似流淡汗多D..

跟住仲大鑊, 第2日就發高燒.. 39.5C.. 死得.. 冇其他病徵, 只係發高燒.. 睇醫生, 醫生都頭痕, 終於都係俾退燒藥同感冒藥..  足足瞓左3日, 先好番少少..

我最唔LIKE, 就係無法控制自己的身體... 不過都冇得唔LIKE.. 到左年紀, 真係冇符!!

古時, 皇帝控制到千軍萬馬, 千萬臣民, 卻控制不到自己的身體, 也是徒然.. (所以, 要去找長生不老藥.. )... 到如今, 我都明白皇帝的想法囉..

身體愈來愈不聽話, 點算?!

我仲有幾堂跑步班要上... 唉... 好驚.. 唔知上唔上好??!!!

(我諗下自己過去50年, 都係讀書, 返工, 做家務... 最近兩年才做下運動, 點知一做就出事... 慘!)

順德行

趁細佬一家經廣州返上海, 安排一次兩日一夜順德行.. 以往幾年短線旅行都係去番禺 (祈福新村, 長隆), 今次轉下口味, 去順德大良 (除了去番禺途經, 好多年冇去順德..)

今次去順德, 主要因為睇左有線台的三個篋神去旅行, 仲有攞住本星島送的曾志華順德美食攻略... 美食攻略寫左12處地方, 我地去左5處, 都算跟得足... 住在順德新世界酒店, 因為在大良市心, 兼且中港巴士直達, 非常方便..

除了吃, 竟然都係SHOPPING... 唉... 順德都SHOP一餐, 仲要SHOP爆個旅行袋, 簡直天才..SHOP左乜??  兩對鞋 (北京老布鞋, 明抄款的白飯魚, 勝在夠平, 幾十蚊人仔一對), 幾件衫 (明抄VINTAGE款, 100+一件, 平過香港BAUHAUS好多), 10蚊店都買左兩隻膠碟... 離譜.. 不過, 好重要係幾枝驅蚊花露水(香港冇得賣)..

今次順德的印象很好.. 市容整潔, 各處的服務很好.. 酒店, 飯館, 的士佬, 都讓人舒服, 而且, 治安不錯, 我地晚上去SHOPPING, 都好OK.  老實講, 順德人都幾有錢... 我地去酒樓飯館, 都坐滿本地人.. 遊玩的地方, 亦見一家大小, 扶老携幼, 生活都幾寫意..

去睇下一般人生活, 招聘廣告寫: 售貨員月薪2500-3000, 經理5000-7000.. 買一個單位, 幾十萬至百多萬都有..  食店有平有貴.. 衣服平貨20+都有, 入口貴價貨亦有.. 我估生活環境都可以.

順德始終係魚米之鄉, 比較富裕, 但又非大城市, 所以, 又不失悠閒.. 好地方!

如果去順德, 記得睇下曾智華D介紹.. 幾好!!  至於SHOPPING, 就去清暉園後面的步行街, 容易買到平野, 仲可以吃下街邊小吃.. 不過記得去民信吃雙皮奶, 遊順德必吃..