新沙士

新沙士又來了... 唉.. 點解香港次次都有份?? 希望今次控制得好, 千萬唔好傳播出去..

不過, 我6月中去韓國... 都有點頭痛... 惟有帶一堆口罩出門..  回想香港03年, 基本上, 避開醫院之類的設施, 都會OK... (最緊要酒店冇事... )

我對妹仔講, 最緊要戴口罩, 洗手, 避開高危地方...

當年, 我都走去銅鑼灣行街..  (銅鑼灣仲清靜過西貢!!)

今次, 我唔係咁擔心自己的旅程... 反而希望香港冇事多D...

LTCL exam piece - Chopin Barcarolle Op. 60

練琴進度

練下練下... 只剩大概5個月時間, 就要考LTCL... (10~11月.. 上次考試是10月中... ).. 不過, 還未收到考試確認, 交左錢兩個月, 未有任何消息.. (我忘記了上次幾時收確認信... 不過, 上次到9月中先收到考試時間, 都有點趕... )

妹仔練得如何... 似乎比一個月前嫻熟... 嫻熟的意思, 是彈得暢順, 沒有太多錯漏.. 不過到某些關鍵位, 都未夠信心... 未得... 尤其是CHOPIN的船歌 (BARCAROLLE), 超多八度音... 妹仔可能手掌比較細, 彈八度都係辛苦...

但是, 應該未達合格的水準... 依然要苦練... 要練非常多... 不過又沒有太多時間..

妹仔嘆說 : 同學仔原來每週都有活動, 不過, 我推掉了本週末的活動...怕俾人鬧...

我問 : 邊個鬧?

妹仔答 : 當然唔係你啦.. 

記掛...

中學男老師, 只在我們中四那年, 教了我們一個月... 然後, 漫漫歲月, 他轉工, 又移民, 轉眼三十幾年, 機緣巧合, 有機會跟我們一班同學重遇..  原來, 當年這位年輕老師把我們送給他的每一件物件, 都珍而重之地收藏... (連我們都忘記了, 那些是什麼東西!!)..  他拿出來, 我們才"嘩", 原來有這東西!!

他說 : 我常常記掛你們, 以為今生今世沒有機會再見..

我們沒良心... 其實都忘記了很多事情... 忘記了為什麼他會如此惦記我們..  我們有什麼值得人家記掛三十幾年?? 實在摸不著頭腦..

不過, 我現在才發現... 原來, 在地球某一角落, 有某個人, 會偶然想起我們, 會非常珍惜我們給他的每一個回憶...

太浪漫了!!  這不是我的個人風格!!

老媽子的樂與怒

最近股市持續攀升, 很多股份上升超過50%, 個別細價股更以倍數上升...

老媽子為多年股民, 從73年開始經歷股災, 對當前市況, 都只敢賣, 而不敢買... 所以, 賣下賣下, 所剩無幾... 到現在, 手上持貨, 不肯再賣...

老媽子嘆謂:  賣曬D貨, 就連喜怒哀樂都冇喇!!

事實是, 老媽子最憎週末, 更討厭長假期... 因為股市休息, 又冇劇好睇... 真係冇曬樂趣!!

惡人谷

最近, 星島送東莞, 順德等地的旅遊飲食指南...

早茶時間, 我對老媽子話 : 喂! 攞本順德書仔睇下, 等我計劃下次去順德美食團都好喎..

妹仔馬上黑面, 罵說 : 你地一日到黑淨係識得食!!!  (佢最近荷爾蒙失調, 多左幾粒暗瘡, 心情又差... )

我同老媽子對望一眼, 哈哈大笑, 說 : 駛唔駛咁惡呀?? 惡人谷出世乎?? 思飲思食都唔得...

老媽子嘆說 : 唉! 出埋錢, 計劃埋行程, 求佢去, 仲要俾人鬧, 駛唔駛咁淒涼??

我話 :係架! 去茶樓, 搵埋位, 俾埋錢, 仲要低聲下氣求佢來架... 冇符... 肯出來, 真係俾足面喇.

好彩! 妹仔俾我地唱雙簧, 潤左幾句, 都冇反面...  PHEWWWW..

PARTY

妹仔星期五帶7位同學仔回家開PARTY... 慶祝其中一位的生日... 阿四煮完咖喱魚旦同燒賣, 就出門, 讓出主場...

7位同學仔, 我認識6位... (第7位是今年入學的新同學, 亦叫佢自我介紹一下.. ) OK喎... 原來, 妹仔大部份老友仔, 我都認得喎... PHEWWW....

我出去, 行街行左2個鐘... 回家收拾殘局... 大家離去時, 仲要講一句... 下次再上來呀!!

梗係啦... 咁樣先知道, 妹仔D朋友係乜水...

總之, 平平安安, 不誤交損友, 就大步走過反叛期... pheww...

又失敗..

今日X田開始大減價, 睇見超市有烏冬減至半價.. (因為妹仔甚鍾意).. 所以, 預算今日去搶購..

唉.. 其實, 一直都沒有參與過... 沒有想像過有幾震撼... 不過, 上村巴, 見鄰居X師奶, 佢都係去買野, 不過, 佢去買枕頭... 佢知我去超市, 就驚道: 你竟然敢去!!

我不以為意... 去到超市, 真太墟冚!! 人龍完全不知道是頭是尾... 總之, 全場都係蛇餅... 我都算找到我要的烏冬... 不過行唔夠兩步, 找不到龍尾, 回心一想, 都係放棄... 於是, 放下.. 找路離開.. 單單要離開, 都過五關, 斬六將..

唉... 一場出去... 都冇理由空手而回.. 於是, 走去CITI, 買同一樣的東西... 不過, 兩件就貴左50大元...  (冇半價嘛!!)...  (因為那個牌子的烏冬, 在我屋企附近冇得賣... 所以, 一定要出去買.. )

買左, 總算有交待...

妹仔回來, 我對佢講:  我又失敗左... 真係冇辦法成為一位成功的師奶...

開始趕工

妹仔今年10-11月要考LTCL(琴試), 這個月開始趕工..  雖然每日都不是練習很多.. (其實跟平日差不多.. ).. 不過, 她的態度認真了..

目前情況, 應該是三首歌... BACH TOCCATA, MOZART, CHOPIN... 首首都有份量, 都極不容易..

實在, 今次考試, 是我最冇信心的一次... 我並不覺得她有這樣的實力, 去演繹這些歌... 始終, 音樂是藝術, 到這種級數的考試, 表達力是非常重要... 暫時, 我聽不到妹仔音樂裡的藝術性.. (她的音樂沒有感情... ).. 這也很難... 事實上, 年紀太輕.. 個人自己都未有感情, 又何來有感情表達...

所以, 今次都真係隨緣吧...

補充劑

我一向都沒有吃營養補充劑的習慣, 因為覺得飲食均衡就可以.. 不過, 最近身痕, 網購了兩種營養補充劑回家...

第一盒是藍莓丸... 因為年紀問題, 眼力日差, 兼且早一陣, 覺得非常眼乾眼澀, 心思思下, 買了一盒藍莓丸.. (實在冇辦法吃下大量新鮮藍莓.. )... 不過, 回來一看, 原來是膠囊, 生平不愛capsules, 因為最似吃藥... 當然, 記性又差, 吃了幾日, 就忘記左..

另一款是SKIN, HAIR and NAILS... with Blood Orange and Beetroot powders, 是一樽液體, 每天飲用10ml.. 味道怪怪地... 還可以... 我發覺自己寧願飲, 好過吃藥丸... (真係純粹習慣及個人喜好... )... 吃了十天左右... 並沒有發覺有什麼特別..  其實當初購買, 都係玩玩下... 覺得養下顏... (成份又冇特別... 照計唔會吃壞人..  )

不過, 我估計, 吃完這兩味, 我都不會再買... 因為, 我冇心機日日吃...

有冇計傾??

一位不太熟悉我的朋友知道我常常同妹仔去旅行, 佢問: 你同囡囡有冇計傾架?? (言下之意, 妹仔14歲, 反叛期, 應該同亞媽冇計傾.. 事關佢自己反叛期的時候, 幾乎離家出走.. )

我答: 當然有.. 好多野講... (其實, 每次我見完我班朋友, 妹仔就一定會嚴刑逼供, 要知道我同朋友講D乜... 做亞媽都冇乜自由.. )

我亦認識佢班同學仔.. 基本上, 佢D老友我都識, 見到面會打招呼.. 有時, 亦要做D亞四工作..

妹仔話, 月尾幫老友搞個SURPRISE PARTY, 要我煮燒賣魚蛋, 仲要送去會場... 亞四要出馬, 送外賣, 不過, 送完外賣, 就要BYE BYE, 貼士都冇架..

另外, 做PROJECT, 又要出錢出力.. 買料, 動手, 動腦, 提意見.. 總之, 佢一開口問, 就最好準備好答案...  (講開, 上次SCIENCE PROJECT, 妹仔攞奬... 老師一叫佢個隊, 我就幾乎想行出去.. 我想講, 其實, 我做得最多, 個獎應該俾我!!)

亞四若此, 都一定會有計傾卦..  事關, 凡事冇托手爭, 又唔敢依哦, 算係咁..

不過, 朋友依然提醒我: 有計傾, 就傾多D喇...

母親節禮物

今年母親節, 妹仔請我吃一隻蛋..

妹仔問: 喂! 我煎隻太陽蛋俾你, 賀你母親節, 你食唔食??

我答: 梗係食.. 有得吃梗係吃!!

妹仔話: 不過, 你要洗鑊!

我話: 洗咪洗囉..

妹仔真係去煎蛋... 不過, 第一隻.. 浪費左.. 佢打左唔知去邊...  第二隻, 我叫佢係碗邊打, 終於成功... 有得吃.. 都煎得唔錯, 真係太陽蛋..

當然, 煎一隻蛋, 洗左幾件野...

不過, 千祈唔好嫌棄... 否則, 明年, 蛋都冇得吃!!

工多藝熟

自問廚藝一般.. 不過根據妹仔的評價, 我煲粥比婆婆好吃.. (好難得.. ) 無他, 工多藝熟..

事因, 晚餐不由我煮... 但是, 妹仔的午餐則多由我侍候... (因為老媽子打麻雀去了.. ).. 而妹仔極喜歡吃粥... 於是, 做得多, 自然醒少少..  兼且, 我底子差, 所以, 聽教聽話... 見電視上YAN CAN COOK, 甄文達教煲粥, 就學下, 真係幾好喎...

YAN教,  煲粥要全程開蓋... 沸水後才下料..  早段30至40分鐘用大火.. (令粥料不斷滾動.. 就不怕黐底.. ) .. 後段, 用細火.. (後段, 我不時要用湯匙攪下, 怕黏底.. )

大概一小時左右, 一煲水變半煲粥... 就OK..

真係幾簡單.. 尤其前半段, 基本可以放下不理.. 甚少黐底..

材料.. 瘦肉, 牛肉, 皮蛋... 都用過.. 都OK..

煲粥... 是唯一妹仔覺得我做得比老媽子好的料理...

50...

今日是堂姐50歲生日... 我都幾乎忘記... 好彩有FB... 急忙SEND MSG去恭喜下..

老老實實, 老朋友一個二個入伍, 真係歲月不饒人.. 不過, 因為自己身邊的人同自己差不多背境, 所以, 大家的50歲都差不多...

其他人, 50歲... 可以係點??

認識H師奶, 大家同歲, 佢朝朝去湊孫返幼稚園... 日常最努力就係打CANDY CRUSH.

認識M姐, 大家同歲, 佢今年BOOK左大家, 年尾幫佢慶祝銀婚.. 今年又送左個女出國讀大學..

又有男同學, 囝囝早兩年前出生, 今年剛入幼兒班...

50歲.. 卜卜脆..

做PROJECT

妹仔最近忙於做Science Project.. 要衝到本星期五才能完工..  論到佢做Science Project, 我就頭痕..  因為佢一天到黑嗌救命, 要我去幫手.. (最慘係佢個拍檔, 過完暑假就去加拿大, 所以, 都冇乜參與...  )

由買料開始, 就要幫佢張羅...  然後寫procedures, 又要慢慢教...  做完左, 又要教佢寫report. 仲要寫reflection (反省).

幾十年冇做呢D野... 做返轉頭, 都仲有D功力.. 

妹仔做實驗, 要把沙加水泥, 成為混凝土(CONCRETE), 要決定最佳比例.. 

我提議佢寫reflection, 其中一點, 就係實驗在香港天氣下進行, (某一溫度和濕度), 所以, 無法推算在其他環境下, 結果會否一致... 亦有提及無法(沒有儀器)量化完成品所能承受的衝力, 以準確知道成品的堅硬度..

我所描述的, 都是非常客觀和科學化, 但係, 我估佢唔係好明白, 我講緊D乜...

不過, 以一個中學生來說, 佢個project都算OK... 我其實唔明, 做乜依家讀書, 咁多野做架??

醒目仔

最近, 認識一位小朋友入男拔.. 小男孩, 真醒目仔! 因為我做義工, 教幼稚園生, 所以, 觀察所得, 這一位小男孩有幾個特別出色的地方, 可以供各仰慕名校的家長參考..

(1) 專注力極強, 理解能力亦高..  我們講故事, 佢非常專心... 10分鐘故事時間完結, 基本上可以解答老師所有提問, 包括一些較深奧的問題.. (答案並不明顯, 需要理解和思考的.. ).. 當然, 守秩序之餘, 亦主動性強, 自己舉手回答..

(2) 喜歡不同的知識, 中文好, 英語能力強.. (主要為對話能力...).. 有時候, 我地唔識D動物英文名, 都問下醒目仔, 佢都真係好掂..  仲教我地.. King Penguin, Macaroni Penguin.. 我地笑佢, 不過, 其實, 真係有呢D動物喎.. 真瘀爆.. (我估佢睇好多National Geographic.)

(3) 獨立並有自理能力, 活潑好動... 雖然佢識好多, 但係一D都唔呆.. 全日都蹦蹦跳, 不過, 一經勸諭, 就可收歛..

(4) 創作力高.. 佢最鍾意玩泥膠..  做好多好有創意的動物..  (佢細細個就好鍾意動物.. 我地觀察左佢兩年.. )

(5) 冇特殊技能... 雖然佢學拉小提琴, 但就不屬於超班一種.. 但基本音樂知識, 都朗朗上口.. 譬如: 拍子, 音符, 大細聲...  (所以, 都不一定要過早催谷..)

所以, 我諗, 其實, 小朋友天資故然重要, 另外, 讓他們接觸多一些古靈精怪知識, 多與人相處, 多訓練獨立和自理能力, 可能比硬吞一些補習班為好... (尤其面試班.. 因為面試班教不到專注和理解力, 還有其他小朋友真正有興趣的東西. ) 

不過, 話說回來... 其他小朋友都有很多優點, 雖然不是個個都入名校.. 有一些特別開朗, 有一些會禮讓, 有一些鍾意做大佬, 有一些好LADY... 當然, 仲有一些好得意, 一天到晚都傻笑.. 

其實, 每一位小朋友都係一份禮物!!