通脹與通縮

四圍都喊通縮.. 惟獨香港年年都通脹, 都年年都有5%.. 貴得最多, 除左樓價, 就係食物...

今日又見奇境...  奇華一年一度大特價, 附近商場人龍排到落街... 真係勁!

不過, 事實上, 百物騰貴... 趁減價, 入定貨, 都係師奶們精打細算的美德... 不過, 我冇去排..事關, 兩條蛋卷一碗飯, 都係少食為妙..

尖沙咀熊仔曲奇, 排隊攞籌, 仲只限每人一日兩盒.. (我真係睬你都傻... 慘過饑荒輪米.. )

另外, 港姐曲奇在沙田分店, 有人告誡我, 出去之前, 最好打電話問有冇貨, 無謂白行一趟!!

某日, 在商場, 某師奶洋洋得意, 說 : 金莎... 我買左一箱!!

唉!! SUPPLY DEMAND.. 供求關係..  難怪食物價格飛漲... (唔可以怪責自由行... 有DEMAND好過冇DEMAND.. 到樣樣都冇人吼之時, 就真係苦過DEE DEE.. )

花園街

同老媽子行花園街... 原來, 已經很久沒有去過..  老媽子都幾高興, 又買糖, 又買開心果, 一路行一路食..

走去亞婆檔攤, 買條運動褲做睡褲... 兩條160元.. 老媽子想講價, (無他, 佢去到連鎖店, 都一樣講.. 興趣也!)..  我話 : 你唔好搞住亞婆啦... 10蚊8蚊.. 俾人賺下錢!  (於是, 老媽子就冇再出聲..)

走去買毛巾, 25元五條, 好抵買.. 老媽子問 : 你點解冇HELLO KITTY款呀?  老板話 : 賺幾毫子, 唔好搞呢D!!  我話 : 老板怕版權問題呀!  老媽子又話 : 你呢D係大陸貨..  老板話 : HELLO KITTY都係大陸貨咋!

又走入一間朱義盛, 買條手鍊俾妹仔... 

又行去一家車仔麵檔食午飯..   我坐落, 點解冇餐牌!  猶豫一陣, 見同枱女人攞住碗麵..  咦! 係喎!  要自己去買麵同揀餸架喎! 於是就行出去, 叫兩碗河粉... 我望住前面亞嬋, 睇下佢叫乜... 終於, 我記得點叫喇!!

一碗魚旦, 豬紅, 蘿蔔, 西洋菜..一碗菜餃, 西洋菜. 兩大碗, 盛惠62大元.. 我都食唔曬..

我發覺我似咩... 似遊客... 

以前九龍城獅子石道女人街, 我幾乎日日逛... 以前的生活, 今日, 竟然似遊客..

 

老人與海

今早, 到海邊晨運時, 碰見當年校草... (大學同學, 三十年前為校草.. 只記得當他走過宿舍樓下, 自有一群女生尖叫..  )

大家閒聊一會...

男士嘆說 :  早一陣, 無端端, 膝蓋附近移位, 搞左一個多月, 終於見醫生才搞掂..

我說 : 唉.. 咁慘! 年紀大, 運動要小心!

他又說 : 最近, 胃部又有問題, 總是有點消化不良的感覺.

我說 : 唔係胃酸倒流呀?!

他說 : 唔係.. 不過遲早都要去見醫生... 唉!!

我說 : 冇辦法, 到某年紀, 有D食物都消化不了... 以前吃得, 而家唔掂..

他又說 :  我下午仲要見牙醫!!  總之, 如果, 第日你要出書, 寫本"老人與海", 我企響度, 影張相, 就十足十喇! 

我說 : 唔怕! 你個殼都保養得幾好!!

他說 : 有鬼用咩!!

又係消費時候

歐元大跌... 澳元貶值... 除左美元, 各國貨幣都下滑... 依家做乜好?

當然係趁機消費...  所以, 要買進口貨 (除左美國同中國).. 吃呀.. 用呀...

日本餅乾...  澳洲車厘子... 真係應該買D歐洲貨... (除左瑞士錶.. )... 應該諗下自己想買D乜..

要認真D想一想..

至於投資...  唔知買乜.. 股市接近二萬五... 人民幣又似要貶值...  都係一動不如一靜.. 

結論都係, 投資不如消費... 開心下先... 

減肥

一班太太坐在一起, 一定講減肥...

有人節食, 跟餐單, 食肉唔食澱粉, 挨左兩個月, 就頂唔住..

有人晚上唔食飯..

個個都係咁!

不過, 有趣的是... 佢地見到人家homemade cookies, 忍唔住, 就一人食兩塊..

都幾有趣噃... 仲有, 佢地通常都唔做運動...  (不過, 老實講, 佢地叫減肥, 其實一D都唔肥... 最起碼都冇我咁肥, 磅數仲一定輕過我... 冇辦法! 師奶就係咁!)

最近, 我上網睇一個專欄, 係一位營養師寫的, 都幾好睇呀! 因為筆者係香港人, 所以, 題材比較貼身, 亦比較有用..  上網睇, 可以一次過睇埋佢以前D文章... 唔錯架...

有興趣控制體重, 可以去睇下... am730.. <黃凱詩>..

其實, 睇完左, 又有心減肥, 就知道, 冇乜特別唔食得... 但又冇乜野食得!

治咳方 (2)

一晚, 妹仔無端端半夜不斷咳嗽...  我估佢係寒咳..  用萬金油刷喉嚨都冇用... 忍無可忍, 起身沖杯薑茶俾佢飲..

佢飲完一陣, 冇再咳, 就再瞓番..  第二天起身, 冇再翻發..  唔需要睇醫生..

可能日間食左寒涼食物, 引致夜咳...  我諗, 飲薑茶冇大礙, 就試下, 好彩有效.

我沖的薑茶, 不是用生薑, 而係在超市買的薑茶沖劑, 我覺得都幾有薑味... 有時天氣太冷, 沖一杯自己飲, 都幾暖身... (又方便!)

不過, 市面上有不同的牌子, 有一些比較甜, 怕會惹痰... 我飲的一種, 是泰國牌子的蜜糖薑茶, 味道比較清, 不過, 就暫時只在佐敦裕華見到.

聆聽技巧

老媽話 : 支韓式燒汁就快用完... 不過, 都唔係幾好用!!

我答 : 哦! 咁即係買唔買??

老媽話 : 都唔係幾好用啫!

我答 :  OK.. 我去買!

過兩日, 老媽問 : 支韓式燒汁呢?

PS :某男士說 : 老婆話唔駛買禮物, 唔好洗錢...  佢咁講, 就一定要買!   老婆話唔得閒, 唔好搞咁多野,  佢咁講, 即係, 你送份禮物要名貴D!!

我立即俾個LIKE佢! 真醒目!!

PS:  有時候, 說話要有技巧...  聽野要更加有技巧!!

漸見雛型

妹仔練LTCL考試歌, 練左2個多月... 終於逐漸見型... 由最初完全唔知佢彈乜, 到開始有一部份彈得幾動聽.. 希望佢繼續努力, 今次可以考得好DD... 希望有70分啦...

老實講, 以佢這個年紀, 這個學琴的年月, 都算不錯... 我見佢都算快上手... 總之, 我不求什麼, 只求及格, 就OK兼VERY GOOD...

有時候, 自己都幾掙扎,  又想佢做好D, 又唔想俾任何壓力.. (不單是學琴, 連學業成績也一樣.).. 故此, 就要常常警惕自己, 不要期望過高... (冇期望就假!!)..  更不要吟吟沉沉... 始終, 都係佢自己要選擇, 要努力... 

昨日跟退休老友閒聊... 佢亞仔好叻!! 三年前入英國劍橋大學讀SCIENCE.. (係堅CAMBRIDGE).. 今年畢業,  考慮出路... 我老友(亞爸)叫佢返香港講醫科.. 其實, 未去劍橋, HKU 都收左佢講醫科... 不過, 亞仔想去劍橋見識見識... 今年畢業, 又要想去路..

亞爸勸亞仔... 就算翻轉頭讀醫, 都千祈唔好以為去劍橋係浪費.. 一世人幾十年, 兩三年不外如是... 而且, 在劍橋學習一定有得著... 亞爸非常樂觀... 亦好支持.. 不過, 亞仔就未決定..唔知係唔係想做 Research..

真係幾羨慕... 不過佢嗰句... 一世人幾十年, 兩三年不外如是.. 亦係好真實... 好多人白白浪費的.. 又何止三兩年!

別太緊張

今天跟兩位家長午膳... 大家走在一起, 都問 : 學校成績出左未??  原來, 大家都唔太清楚... 而我, 因為決定不再看妹仔的成績, 所以, 沒有再看ONLINE成績..

我對妹仔說 : 如果有問題, 就要通知我..

我不問, 反而妹仔自己來跟我報成績, 她粗略計一下, 都是中上的成績, 那就OK啦... 她說 : 因為兩科語文只得B, 所以, 成績跌了..

OK... 自己知道就好... 

我們幾位家長, 性格比較接近, 對成績看得沒有太重... 所以, 才可以閒來坐低聊天...

早一陣子, 有其他家長已經開始為小朋友報SAT班, 即美國公開考試的補習班... 我們大家同聲一嘆, 都覺得, 其實, 不用那麼早就準備... 不如學習其他東西, 又或者先學好自己的本科, 甚至同朋友仔去玩下, 都好過!!

接納意見

妹仔講起老友N.. N的壞習慣是震腳, 坐下來, 一會兒就震腳.. 我都知道她有這個習慣, 曾經叫妹仔勸佢... 我不知道妹仔有沒有做...

這一回, 妹仔說 : N投訴說, 一位AUNTIE說她不應震腳... 她覺得AUNTIE只憑她一個動作就JUDGE(判斷)佢, 不應該!

妹仔說 : 其實, 學校的中文老師都告誡過N.

我說 : 我覺得, 那一位AUNTIE只是JUDGE她的行為, 沒有JUDGE她的本人.

我又說 : N應該聽別人的勸告, 因為事實上, 其他人都會因為某些外表的原因, 而去判斷人... 對或錯, 不必探究, 只是, 這是一個事實... 將來出來社會, 沒有人會給你機會, 去了解你, 所以, 個人形象很重要.. 這純粹是為個人的利益的著想, 不存對錯..  亦不在乎平與貴, 最重要是乾淨整齊.. 捨棄個人形象, 損失的是自己.

事實是, 這個世界, 俊男美女會著數一點..

PS : 到了這個年紀,  我的教導要現實一些,  當然, 應該教 "不要以貌取人".. 不過, 這是自己對別人的態度...  而不是自己對自己的要求.. 

PS : 此外, 我對妹仔的勸告是.. 要接納別人的意見, 因為受惠的是自己, 人家不會有著數... 將來出來社會, 大把說話要聽, 亦有大把東西要學.

Concept of Momentum

妹仔學物理力學 (Mechanics).. 學Momentum..

妹仔當然學到唔清唔楚, 一般初初學物理, 都會較難理解, 因為純概念.. 不過, 一搞清楚, 其實, 這一科最容易, 完全唔駛讀都得..

妹仔求問於我, 我就教佢... 教conservation of momentum.. 教完一餐, 講原理, 講概念, 講實際用途.. (譬如: 火箭發射,  熱氣球上升.. ) 講左一大餐, 佢都淨係依起棚牙, 對住我笑... 激死.. 即係唔明白... 講極都唔明.. 點算?!

我仲做一條EXAMPLE俾佢睇...  都係一舊雲..  連Scalar, Vector都唔識, 激死我.. 

冇符...  惟有收工... 否則, 我就快返去讀中學...

學校鋼琴班 (2)

昨日, 妹仔返來, 提及她的學校鋼琴班, 全中學大概有十多人參加..  (其實人數不多.. ).. 而妹仔的一組一共有四人, 以妹仔的程度最高, 其他朋友仔大部是剛考完或準備考八級..

妹仔說 : 其實, 我諗你去到, 會聽唔明..  我去到, 都只係識一半.. 連亞J都唔知佢講個Augmented Chord點解!  (亞J已經八級琴)..

我說 : 咁其實教乜?

妹仔說 : 其實叫我地自己亂彈...

我說 : 我估你都識少少..

PS : 我估佢都真係會識少少... 佢以前都做過司琴, 不過, 彈CHORD就超簡單... 希望今次, 佢學到少少啦... 

學校鋼琴班

學校有一位鋼琴老師 (從美國回港的音樂系PHD, 訪問學校... ), 她會在學校教一堂鋼琴班, 內容是教CHURCH HYMN的伴奏技巧...

妹仔說, 幾位老友叫佢一起去參加, 所以, 明天放學後會留校..

我當然OK, 難得佢肯去... 其實, 我諗, 如果冇一班老友叫佢去, 佢真係唔會主動參加..

我說 : 你去彈下, 俾人地聽...

妹仔說 : NO!

我都明知係咁...

不過, 我都好想佢去聽下, 知道做伴奏的方法... 因為, 彈伴奏, 基本上應該只需一條主音, CHORD(伴奏)就由司琴自己操控... 所以, 一首歌, 可以有無數的彈法, 好好玩!

PS: 我在某教堂聽一位司琴彈, 非常精彩... 其後, 其他人問她拿琴譜, 她卻只有一張簡譜 (只得主音 1-2-3的.. )... 她說, 我是用耳來彈琴... 這就是另一種玩音樂的方法..

又吃蒸橙

這一次, 輪到妹仔咳...  於是, 她要吃蒸橙..

她覺得很難吃... 其實, 只要是甜橙, 那麼, 基本上不會太難吃... 而且, 我沒有跟坊間要求, 加鹽, 所以, 味道還算不錯, 只是, 那些橙水比較苦而已..

老媽子覺得, 妹仔吃了蒸橙, 喉嚨的咳聲舒服了... 我就沒有感覺, 總之, 藥石亂投, 因為咳嗽沒有良方..

食物種類

最近翻看一本講各種食物營養的書籍,  細閱之下, 發現每一樣食物都有不同的營養價值, 並不能完全被替代... 故此, 應該要盡量食用不同的食物.. 種類愈多愈好, 正如老人家所說, 不要偏食..

我真幸運, 這麼多年, 都有老媽子照顧飲食... 老媽子乃師奶老手, 經常思想不同菜式, 基本上, 盡量每天都食不同的東西... (當然, 也本著不時不食的原則.. )

數一數, 老媽子會做的菜 : 菜心, 芥蘭, 生菜, 菠菜, 莧菜, 西洋菜, 芹菜, 枸杞, 蕃茄, 南瓜, 節瓜, 佛手瓜, 茄子, 冬瓜, 黃瓜, 蘿蔔, 粟米, 栗子, 豆角, 菰類...  肉類 (豬牛雞魚蛋), 豆類, 配料(薑葱蒜), 海味..    真是非常多, 恐怕我都有數漏..

連同不同的水果... 還有外出進膳的, 如: 日菜(魚生), 泰菜, 韓菜...

還好, 我都尚能做到, 豐富的食物種類.. 

但是, 以我的煮食能力, 就遠不及老媽子... 恐怕只得ABCDE餐...  至此, 真要向老一輩的主婦致敬...  佢地真係勁!

坐監..

我嘆口氣, 說 : 你幾時先肯唔再黐住我?

妹仔說 : 到你死嗰日啦!

我長嘆一聲 : 好慘呀!

妹仔說 : 你依家係咪想自殺?

PS : 長假期等於坐監... 

多災多難

2014年真似一個凶咒... 除夕時還說希望不再有大型意外... 還未到半天, 上海發生人踩人意外..

人似乎並不懂得從歷史學習... 又或者, 年輕太年輕, 沒有見過這種人禍, 所以, 一點戒心都沒有.

22年前, 香港出過同樣的意外, 在蘭桂坊... 那一年, 我也常到蘭桂坊, 只是在除夕倒數那一晚, 我們一伙人到了別處慶祝..  第二天, 一覺醒來, 方知道意外發生..

一刻天堂, 一刻地獄..

有時候, 我這個老鬼, 日哦夜哦.. 都只想提醒一下...  因為年紀大, 見過了... 

戒得太清

妹仔今日又發燒... 病況不太嚴重, 只是因為是元旦, 很多醫生放假, 所以, 就在附近找到一家開門的診所, 就要去睇病...

妹仔喉嚨痛... 我覺得是因為昨天吃了幾件炸物... 另外, 早兩日亦吃了POPCORN..

近年, 妹仔因為護膚, 所以, 甚少吃熱氣食物...  家中亦絕少煎炸...

有時候, 戒口戒得太清, 反而會容易敏感... 故此, 食一下就喉嚨痛..

今日, 電視上, 亦報導很多包裝食品有添加劑...

其實, 亦不需要太驚小怪... 除非是極端環保份子, 否則, 必然會吃到這些添加劑, 只要不要食太多, 對人體影響還是有限...

想一想, 哪種食物沒有添加劑... 每日食用的東西, 簡單如一枝醬油, 都有..  包裝的奶類, 也有.. 老媽子話新鮮蔬菜... SORRY.. 都有, 有農藥...  無謂搞到自己神經緊張, 真係食左都冇益.. 


故此, 糖果餅乾... 還是照吃...