幼稚大王

雖然妹仔讀國際學校, 但她的興趣極本地化... 對於韓流, 日流, 她都有相當認識... 她的其中一個興趣, 就是亂跳一些舞步, (扮明星)... 有時, 阻住我睇電視, 就叫佢停下, 佢都唔聽... 冇符!! 惟有佢扮人跳, 我就扮佢跳, 核核突突, 連佢都頂唔順, 才會停下...

最近, 佢猛唱: SHABU SHABU SHABU... (日文是火鍋.. 呷哺呷哺... ).. 冇辦法... 我都唱埋一份..

妹仔發火, 話 : 唔係SHABU SHABU呀!!

我話: 明明你唱SHABU SHABU!!

佢話: 唔係呀!! 我唱緊普通話歌呀!!

呀!!!! 我聽唔出係普通話噃!!

佢話 : 普通話呀!!  "算不! 算不!" 唔係SHABU SHABU!!

GEEEEEE...

佢又話: 我唱乜, 你都聽唔到, 差到死!!

然後, 佢終於好聲好氣解釋, 話: 呢一隊叫TF BOYS, 在大陸好紅.. (GEE.. 原來大陸都有當紅男團.. 我點知JACK!!)

佢仲話: 你上UTUBE睇下, 佢地好後生, 十幾(12~14左右)歲, 仲未變聲... D 超級FANS好多係大媽.. 你睇下就知佢地幾幼稚!!

我答: 我睇你, 就知有幾幼稚!!

妹仔的選擇

這個暑假, 妹仔很忙, 日間去老師那邊練琴, 晚上或有任何空閒時間, 就會被兩位表弟妹纏住, 要陪佢地玩...

有時候, 我會以為, 妹仔希望出去玩耍... 不過, 她也非常克制, 自動推掉很多節目, 寧願去老師那邊..

其實, 我也對她說, 如果你想同佢地去迪士尼, 我就幫你向老師請假.. 不過, 佢擰頭, 還親自推卻舅父的邀請... 都算係咁..

現在距離考試, 仲有三個月... 挨埋佢...就輕鬆曬!!

咳

早一陣咳到冇朋友... 半條命.. 睇西醫吃完藥, 都冇大好轉.. 連老媽子都怕左我.. 叫我不如去余X生買D川貝吃下..

無可奈何, 去余X生.. 諗住淨係買蛇胆川貝粉.. 不過, 店面亞嬋話, 你可能感冒未清, 唔可以淨吃蛇胆川貝, 要加埋銀翹散..

一聽銀翹, 知道係感冒藥, 但比較寒涼, 因為係風熱感冒藥... (不過, 其實, 我都唔知自己係寒咳定熱咳... 但我有頭痛... )

講左一陣, 好啦... 銀翹+川貝...

吃左三日, 痰少左, 身體好左D.. 不過, 都未完全爽曬... 依家再買多三日, 希望清下個底啦..

好煩!!  真係連自己都覺得自己煩!!

練琴進度

暑假, 妹仔經常到老師家中練琴, 偶然會在家裡練習.. 有時候, 她會彈一些舊歌, 大概是一年彈前的歌.. Schubert Three Piano Pieces.. 呀! 我覺得她彈得進步了, 而且進步了很多..那音色是聽得出來的..

舒伯特這一首歌有很八度音.

妹仔說: 我都唔知道自己以前點彈... 好多八度音..

我說: 進步左好多..

妹仔說: 冇辦法.. 最近彈LTCL的蕭邦船歌, 一樣超多八度.. 練得多, 依家覺得這一首容易彈了.

其實, 苦練..一定會進步..

妹仔以前一起考八級的同學仔, 停學了一段時間, 今年回巢, 準備年底考ATCL.. 這個暑假, 都有參與練琴, 不過, 妹仔回來對我說: A同學只彈了兩首, 第三首都未開始練..

 我說 : 點趕得切呀?!

妹仔說: 係呀... 老師仲叫我幫佢練..

我說: 唔係呀.. 你都係剛剛合格咋喎..

妹仔答: 係囉.. 叫一個剛剛合格, 教一個唔會合格的喎!!

我問: 咁你教咩呀?

妹仔答:  我幫佢睇下, 有冇彈錯音咋!!

我真係滴汗!!  (去年妹仔考試前的暑假, 歌曲已經練得七七八八, 主要是執大細聲, 表達和技巧.. 如果, 連歌都未練好, 就真係幾危險.. )

忙亂的日子

暑假是特別忙亂的日子.. 因為大家都放假了,  自己的慣常日程完全被打亂.. 細佬一家人回港三星期, 妹仔的兩位表弟妹常常過來玩.. 所以很忙.

妹仔算是有自制能力, 並沒有陪他們太多, 因為她每天都要練琴, 只是偶然有空, 才會玩一下..

也算妹仔厲害, 對著兩名嘩鬼, 依然神態自若.. 帶他們去公園, 去游泳, 大細路帶兩個細細路, 我都服左.. (我冇跟出去, 因為要留家, 有很多事情要做.. )

老媽子一樣忙到頭暈, 幾乎日日搞五餸一湯, 真係難度高..  (她盡量不想重複.. 真是超級煮婦..) 今日, 我終於笑佢, 要出動 "梅菜蒸肉餅", 可算是江郎才盡..

舅父問妹仔 :一齊去海洋公園, 迪士尼啦!

妹仔搖搖頭, 不去了... 回頭對我講, 佢都要休息一下!

咳

最近咳左兩個幾禮拜.. 由日本回港就開始, 可能因為香港太熱, 開得太多冷氣又對氣管唔好.. 總之, 煩..

吃完燉橙都冇用.. 食完會舒服D, 不過, 不久又咳過..  似乎, 有D野係會食到純.. 食到冇功用.. 因為前幾次都有用, 今次就唔再靈.. 於是, 去睇醫生, 食完三日藥, 除左覺得食到頭暈暈, 其實都冇大作用... (食到眼瞓, 就唔咳.. 藥氣過左, 又咳過.. ).. 總之, 冇符!!

豈有此理... 惟有唔理佢..  睇下佢咳幾耐..

有個朋友話, 食奇異果都食到純.. 又係真... 初初吃完奇異果(一日一至兩個), 眼瞓到傻... 依家冇感覺..

點算呢??  食到樣樣野都冇效.. 連食藥都會冇效... 所以, 都係唔好吃太多藥喇..

不過, 話說回來... 好既唔見有效.. 衰野就立即見功....  飲兩啖涷水, 包咳到嘔!!

交流生

妹仔的泳隊師姐, 在俄羅斯某城市做了一年交流生.. 昨天在路上碰見她.. 若非她開口叫我, 我地唔認得佢.. 因為佢肥左好多..

這一位泳隊師姐, 在小學和初中時期, 游泳成績驗人.. 我都幾鐘意佢, 因為佢都好有毅力, 常常都見佢在泳池溫習, 而佢亦很有禮貌, 跟我這樣年紀的師奶也聊得兩句.. 當時, 佢個樣都幾COOL, 幾嚴肅.. 一上泳線比賽, 簡直係PROFESSIONAL一樣, 全程專注..

昨日見佢.. 我讚佢: 你可愛左!! (其實, 我真心讚佢, 並不因為佢肥左.. 而係因為她的神情輕鬆了很多, 容光煥發, 完全是開心少女一名.. 以前那股游泳猛將的殺氣蕩然無存. )

佢好開心同我講 : 在俄羅斯, 最重要的任務是文化交流... (而在她的學校, 只得她一個香港人.. 她說, 亦曾有四個中國大學生到訪.. )... 佢整個學年都留在俄羅斯, 沒有像其他留學生, 一年回港幾次.. 直至這個暑假交流完結, 才回來..

而令我最佩服的, 除了因為佢用了一年時間 (本來讀中五), 回港要REPEAT一年中五.. 她還覺得自己中四的功課可能已忘記得七七八八.. 她主動要求重讀中四.. 即是說, 這一年的出國經驗, 她是用了兩年的時間換來... 而佢一點也不介意.. (因為回港之後, 會同自己的妹妹同一班. )

當我地都好緊張, 要趕快讓小朋友上大學的時候, 佢卻輕輕鬆鬆的用了兩年去換一年寶貴的交流生經驗..  其實, 我想, 讀書學習都可以有好多選擇.. 佢一個人在一個語言不通的地方, 能夠開開心心地生活, 對她個人的獨立生活的能力, 是一個很好的鍛鍊, 也是很難得的機會. (亦難得家長讓她自由選擇..她媽媽是一位很開明的家長.. )

我一向都很喜歡這一位師姐.. 她讀書成績並不是最好的.. (是平均的一類.. ).. 但是, 我相信, 她將來一定可以生活得很好.. 因為佢主動, 獨立, 適應力強, 又有毅力.. 正!!

PS : 當年升中, 這一位師姐有機會入名校, (其實, 某名女校已經取錄了..) . 不過, 她父親反對, 要佢留在同區的BAND 1中學.. 當年, 很多人都不明白, (連她媽媽都不太明白.. ).. 到了這一年, 我大概明白了... 實在, 如果入名校, 她的中學生涯大概只有游泳和補習..  但是, 現在, 她的中學生涯實在多姿多采得多...

慰勞

妹仔昨日大發慈悲, 說要慰勞我, 幫我做全身MASSAGE.. 唉! 真係多謝夾承惠.. 心領啦!!

當然, 避不開.. 最慘係我D淋巴都幾塞, 俾佢按到我叫救命.. 仲幾乎想嘔.. 佢一路虐待我, 都不知幾高興..

做完之後, 佢話: 你知唔知有最低工資, 要50蚊喎.. 我話: 做得半個鐘, 只有25蚊..

另外, 我又問佢 : 我有D事情要請教!! 朋友激嬲左個女, 亞女唔睬佢, 有咩好辦法!

妹仔答: 都冇計.. 低低地慣一鋪囉..

我話: 咁咪好冇面.

妹仔話 : 只係低低地慣一鋪, 唔關面子喎!

哦!! 原來如此! (原來在佢地眼中, 其實並非因為要落你面喎.. )

股災

之前, 都未用"股災"這個題目, 不過, 今日都要用囉..

下跌2100點, 然後回順至下跌1500點..  上一次的壯烈場面應該是雷曼兄弟爆煲.. 2008-09年..

這一次的亮點, 在中國股民... 剛剛弟婦從上海回來, 就真有點埋身感覺.. 她自己輸了幾萬元.. (不過, 有兩隻股票在停牌, 所以, 都未知境況如何..)

我說, 交學費吧, 這個市況輸幾萬都是很保守的了..

她說: 也是的.. 朋友都輸幾十萬, 上百萬...

(但是, 內地股票仍未跌定喎... 根據熊市的經驗, 大跌之後, 還有一段時間尋底.. 有排挨!!)

香港股市更重創... 心想.. 關香港鬼事咩!! 連D公用股和一眾避險都大跌... 不過, 話說回來, 跌市到後期, 都要連實力股都跌.... 可能終極一跌仲未到.. 當然, 之後, 又再尋底..

今早起來, 心諗.. 冇理由阿爺托市, 俾機會我走人, 我都唔走架!! 阿爺都唔知撐得幾耐.. 於是, 心血來潮, 又沽出一部份A股相關股.. 現在, A股相關股票只剩下一點點..

唉... 算是避了一點點... 不過, 現在回想, 應該把心一橫, 一併沽清..

經歷過幾次股災 (由87年開始).. 都算學精左.. 首先, 今次, 基本上沒有怎樣參與.. 手頭上都是一舊貨.. 沽走了, 股票再升再升, 都冇再去追貨.. 現在很多東西都打回原形.. 甚至跌突.. 我就仍有微利... (因為沽得早, 所以, 冇大賺... 賺左一次東京旅行啦.. )

第二, 不沾手概念股.. 賺也冇我分, 輸也冇我分.. 執身彩...

第三, 忍手不買.. 雖然這個浪中都有買一點.. 也虧了一點, 不過, 都是實力形, 相信很快可以回來... 也可放著收利息..

這次股災, 我也很多做得不好的地方... 走貨太慢... 老是想等反彈出貨.. 豈料, 是彈也不彈..

明天醒來, 又一天.. 又是一條好漢..

這次人為托市, 該跌的未跌盡, A股仍有下跌空間... 再等等(等反彈) , 再沽... 然後, 慢慢計數, 再選優質股.

冒名順豐速遞欺詐

大家又要小心..

今日接到一個電話, 說是順豐快遞 (以電話錄音形式), 說我一個郵遞包裹有問題, 叫我按0字接通去查詢, 我沒有提防, 便接去聽..

那邊廂說, 我有一個包裹, 被北京海關扣查, 是違禁物品, 因為這個原因, 所以通知我..

我說: 我沒有任何包裹寄出..

對方說 : 是從珠海網站寄站.. 我說我沒有出境到中國..

他說幫我查一查, 問我的全名, 那可能是被冒名寄了.. 我沒有提防, 告訴了對方我的名字..

然後, 他講了一大堆關於那包裹的資料, 叫我寫下...  然後替我轉駁北京公安.. 那邊的"公安"又問了一堆問題, 然後說會幫我查一查.. 下午回來, 再幫我錄口供云云..  (約了下午某時間, 再打到家裡.. )

放下電話, 我回心一想... 這可能極不妥當.. 便打算打去香港順豐問一問... 打開香港順豐的網頁, 就看見一個叫客戶提防被騙的告示.. 

唔... 又是騙案.. 這一次來得更曲折, 更精密..

可是, 我還是洩漏了我的個人資料.. 包括名字和電話.. 可惡!!

我還在等這個騙徒的電話... 要鬧佢..

(這一次差點上當的原因, 是因為我最近用過順豐速遞... 所以, 以為真的被HECK了.. )

大型波動市

今日都幾精彩.. 恆指開市微跌, 中午跌過1300點, 收市只跌800點..

歐洲同大陸兩大問題, 致使市況波動.. 照市況看來.. 熊市形勢已成.. 雖然說牛慢熊快, 但今次都快得厲害.. 一下插穿二百五十天線.. 大概再一輪波動後, 就復歸平靜, 又再由頭挨過..

話說今次希臘公投, 又一次反映民主的黑暗... 一堆債仔不願勒緊肚皮, 去還債, 還想繼續做其攤手黨..於是, 用公投形式, 用"民主"這個美名... 來賴債!! 唉!! 否則, 來一個玉石俱焚!! (有民主, 冇公理... )

今日最好玩, 莫過於老媽子.. 早上, 我勸佢減磅.. 佢就餸都唔買, 減左一隻.. 搞到買餸都買漏野.. 不過, 就好高興, 因為避過下午1300點一劫..

妹仔一見到大跌市, 就高興到哇哇叫.. 事關, 佢見到婆婆同我都紮紮跳..

我話 : 再跌下, 就冇錢去旅行架!

佢都係睬我都傻...

不過, 最過癮都係睇D大陸股民的訪問.. 有一個話: 以為股市係煎魚, 煎燶左就翻下, 翻下這邊, 翻下那邊.. (仲未駛燶曬...) 點知, 原來係油炸股市... 慘情!!

而家, 點睇?? 計下數.. 睇下邊D實力股價殘抵買, 放小注做下中長線囉...始終, 放銀行冇利息, 長遠都唔係辦法..

UC Berkeley

一位朋友在FB分享左UC BERKELEY(加州大學柏克萊分校)今年的入學新聞.. 柏克來是美國頂尖的公辦大學 (State U).. 裡面第一段, 是BERKELEY的收生中, 有很多學生在體育, 音樂和其他領域, 都曾經參與國內或國際比賽.. (competing nationally and internationally)..

另外, 學術成績亦很優秀, 平均的GPA=3.91 (滿分為4分).. 平均SAT成績為2093 (滿分為2400)..  即是, 基本上在中學校內成績都名列前茅..  收生率約為17%.. (7萬人收1萬3千人左右).

故此, 可以想像... 所收的學生, 不單成績優異, 而且亦要另有一項特長.. 這是一般美國名牌大學的要求... 當然, 亦有其他考慮, 包括天價的捐款 (聽說是以億元計, 才被考慮)..

不過, 如果是國家隊, 入選的機會會大很多..

以前, 有很多香港游泳代表隊的隊員, 都入讀柏克萊, 縱然學業成績比較低.. 美國大學很重視學生的課外活動, 所以, 如果, 沒有特長, 都要多參與義工活動... 總之, 就算SAT=2400, 如果其他方面一無是處, 大學是未必會考慮的.

妹仔問 : 你估計我的一班同學當中, 哪一位可以入IVY LEAGUE (美國最TOP的私立大學, 包括: 哈佛, 耶魯, 普林斯頓, 康奈爾, UPenn, 哥倫比亞, BROWN等.. )??

妹仔講了一堆名字... 都是她的班上成績最好的幾個..

我說: 他們都未必可以... 我看最有機會的是J同學.. J同學是香港溜泳代表, 經常出外比賽.. 所以, 她是最有機會的..

妹仔點頭稱是.. 又說: 不過, 其他人都想入Ivy League喎!

我問: 咁你考好SAT, 都報下啦!

妹仔話: 我考好SAT, 入香港大學..

我答: 你以為入香港大學好容易, 分數隨時同入IVY LEAGUE差不多!!

妹仔又話: 唔係!! 我係要入香港D大學!!

痴呆症

上次坐飛機, 睇左一套STILL ALICE (永遠的愛麗絲), 裡面講50歲的女教授患上老人痴呆症..

我發覺... 我都有好多相同的問題... 慘!!

女主角第一個病徵, 就係冇曬D VOCABULARY (詞語, 生字).. 佢本身係語言學家, 但係就唔識得用詞..

唉.. 我一樣... 望住想講D野, 永遠都腦袋空白.. 唔知用咩詞句... 譬如: 退稅, 火鍋... 整日就講: 呢!! 呢個.. 呢個.. 即係呢個呢... 講極都講唔出..

然後, 想講一間一向都認識的名校.. 德望.. 講左15分鐘, 先講得出..

望住片集個三眼仔二郎神... 想講佢個名... 講左10分鐘都講唔出, 最後, 老媽子話: 錢家樂呀!!

死得... 言語遲鈍...

至於認路, 一向都差... 還好, 未至於唔識番屋企..  (死得... 剛剛打個 "屋"字, 打極打唔出... 原來, 將"屋"同"企"合埋打.... 唔怪得打極打唔出.. )

我諗.. 我D腦力都用得七七八八.. 經過五十年的折磨, 都用得幾盡喎..