玩下...

妹仔去街, 有新興趣, 就係去試化粧品SAMPLE..

同佢行過BODY SHOP, 見入面SALES招呼緊幾個人, 妹仔就話要入去, 然後就試SAMPLE, 又聞下新款BODY BUTTER的味道... 隻隻蓋都打開下...

然後, 有班菲傭, 我地當然跟住, 又支支去搞下.. 班菲傭走人, 我地就跟住走... 妹仔就真高興..

跟住, 去其他地方, 都係試下玩下...

其實, 妹仔的興趣, 可能真係美容化粧... 

進化

妹仔話 : 阿B同學終於進化到著HOODY (那一款連帽的衛衣)..

哈... 進化... 由什麼進化??

妹仔話 : 由童裝進化囉!!

哈... 童裝?! 阿B同學仲高過你喎!!

妹仔答 : 佢瘦嘛!!  都好!! 終於進化到脫離童裝!

你幾年前已經唔肯著童裝, 要著HOODY.. 依家唔買HOODY, 要著少女時裝..

妹仔笑語:  係囉..  睇下佢幾時再進化..

PS:  我諗... 我在退化中.. 因為我著翻轉頭, 著妹仔D衫... (佢著幾次就唔著, 唯有我啃左佢.. ).. 唉!!

How not to get old...

最近大台劇集又唔好睇, 於是, 轉去睇明珠台..

星期四晚, 有一套叫做 How Not to Get Old.. 都好過癮..  是真人騷, 每次都有一些人接受整容手術, 或美容療程.. 主持又去試坊間不同的醫學美容方法... 睇下D效果..

昨晚, 有一位中年女士 (大概40歲), 去接受LASER治療皮膚, 不過並非面部皮膚, 而係胸口的皮膚... 因為佢年輕時經常曬日光浴, 皮膚受嚴重傷害, 到中年後, 胸口皮膚好似燒雞皮一樣... 我對妹仔講 : 燒豬皮都靚過佢!!

幫佢的皮膚醫生講 : 日光係皮膚最大敵人, 再嚴重一點, 就會變成皮膚癌...

妹仔嘆謂 : 嗱! D鬼佬就蠢, 一味鍾意曬, 要TAN.. 亞洲人(尤其韓人)就聰明, 當個太陽係仇人!!

妹仔話 : 我都話啦! 防曬係日日都要做.. 無論天氣如何, 戶內戶外, 都要做架..

我答 : 哦!!

老媽子行過來, 對妹仔話 : 俾我睇你粒眼瘡...  (然後, 就想用手掂妹仔塊面..)

妹仔馬上彈開, 叫道 : 你唔好用手掂我塊面...

有冇搞錯!! 掂下都唔得!!

美容大王馬上話 : 你隻手污糟架..

PS : 可能, 將來, 呢個BLOG要改名, 叫做 "美容大王真人騷", 睇下妹仔到左30歲, D皮膚係唔係靚到識飛...

報左名喇..

今日去左柏斯,  報名交費... LTCL考試費真貴... HKD6000+...

依家就要督促住妹仔, 靈靈性性, 考個PASS, 唔好浪費..

不過, 週末, 妹仔上完課返來, 話又要轉曲目... 似乎, 依家只有BACH同MOZART敲定, 其他就未得..

最近, 妹仔練緊CHOPIN的離別曲(Etudes OP.10 No.3), 此曲乃我的飛佛... 所以, 妹仔練習時, 就話, 我都知你最鍾意呢首..  但係, 佢就彈到亂曬龍, 一D感情都冇... 唉呀..

朋友

妹仔話 : 我覺得亞B好煩, 佢SCIENCE好唔掂, 在堂上不斷問我, 搞到我好煩.. 佢仲話我, 唔好咁惡死鬧佢...  亞F就好D, 淨係抄我D功課, 唔會出聲煩住我..

我話 : 咁你又唔好鬧人... 佢可能真係唔掂哩!

妹仔又話 : 我真係教極佢都係唔明喎!

我話 : 都冇辦法啦... 有D野真係會教極都唔明架...  我讀大學時,  隔籬兩個男同學, 餐餐做LAB都唔預備, 次次開LAB, 第一件事, 就走來煩住我, 要我從頭教佢地做... 我都覺得好煩, 佢地堂堂都阻住我... 我入LAB, 快手快腳, 做完就放學, 但係就偏偏俾佢地阻住... 都冇辦法啦... 一做就4年, 年年企隔籬. (冇辦法, 排姓氏, 我一定夾在中間..慘!)..不過, 依家, 做左幾十年朋友囉..

我又話 : 仲有你班AUNTIE, 一樣係講極都唔明... 冇辦法啦... 不過, 一做就做左幾十年老友.. 所以, 你唔駛煩..

LTCL - Debussy L'Isle Joyeuse

我都唔知妹仔點彈... 冇眼睇..

報名考LTCL...

終於在柏X攞到LTCL報名表, 今年3月23日開始報名.. 

跟老師商量完, 終於決定10-11月考琴... 因為妹仔未準備好, 所以, 由8月推遲至10-11月.. 另外, 又要轉曲目... 原先兩首Romance, 20th century要轉, 轉另一首蕭邦, 還有德布西.. 唉呀!  其實見佢BEE-BU.. BEE-BU, 一直都係咁上下, 就知道佢唔係好掂... 希望新的兩首可以OK啦..

另外,  BACH同MOZART就開始似樣... 起碼彈得熟..

因為考琴改時間, 連帶長笛都要推遲到明年四月... 無謂逼到癲左, 浪費時間同金錢..

今日, 妹仔去學琴, 我聽到老師話, 叫佢四月份要彈熟德布西同蕭邦... 唉呀呀! 都唔知佢掂唔掂... 冇眼睇..

妹仔返家途中, 話... 佢變左一隻ZOMBIE (喪屍)..  受到音樂咒詛的ZOMBIE...

我即刻做隻ZOMBIE樣, 行兩步俾佢睇...

選科

妹仔今日回來, 對我講 : 我有一個壞消息... 我選科失敗左... 老師不准我TAKE兩科數學... 現在, 要退回, 只能修一科... 餘下學分可能隨便修一科...

點解??

妹仔答 : 可能要超勁先可以TAKE兩科MATH... 我不屬於超勁... 不過, 我會TAKE HONS GEOM.. 我仲可以TAKE HONS, 有一些人連HONS都不能TAKE..

我話 : OK.. 都不是一個太壞的消息.. TAKE少一科可以休息一下..

妹仔又話 : D同學問我, 大學想讀邊科?

咁你點答?

妹仔話 : 我現在不會考慮, 等多兩年至想... 無謂給自己太大壓力...

我話 : 都好... 不用想那麼多...

我又對妹仔講 : 你都不一定要讀SCIENCE..  又反過來講, SCIENCE可以當一個學科去讀, 跟其他學科沒有分別.. 亦可以用一個SCIENTIST的心態去讀... 所以, 都冇所謂... 不過, 我要提醒你, 做SCIENTIST係極沉悶的, 要有很大興趣..

亞四論

某天, 妹仔打開佢部MAC BOOK, 見到有部內置WEB CAM... 我話 : 你第日幫我部機裝部WEB CAM, 等我可以同你視像..

妹仔答 : 我可能在對面返學喎.. 唔駛用架喎!

我話 : 唉! 你唔想出去, 就因為有我這個亞四!

妹仔話 : 車!! E的父母都非常錫佢, 佢都想出國留學啦.. 唔關你事架..

我話 : E的父母兩個都返工, 只係大水喉..

妹仔話 : 係囉! E年年都去歐洲, 著衫又靚, 佢父母錫到燶, 咪一樣話出國, 所以, 唔關你事!

我話 : 大水喉去到邊, 都係大水喉.... 但亞四不一樣, 亞四要貼身, 先係亞四!!  所以, 你唔需要黐住大水喉, 但就要黐住亞四!!

要報名了...

三月份... 是報名考樂器的日子..

琴行已經有message, 去報名考8-11月的ABRSM試...  另上, 上網亦看見, 聖三一的報名時間亦開始...

這兩天, 要到琴行和柏斯... 報名去..

長笛8級, 今年11月..  鋼琴LTCL, 今年8-9月.. 大概如此.

朋友問 : 妳亞女的長笛要練幾耐??

我答 : 唉! 一星期只聽佢吹15分鐘... 然後就去上堂.. 都唔知佢點搞.. 不過, 老師話可以去考, 咁就去考啦... 我都冇眼睇!

至於鋼琴LTCL... 每日練一個多小時... 彈成點?! 我都唔知架... 我只知道, LTCL的要求比ATCL又要再高一截...  希望合格... 就真係謝蒼天, 謝祖先囉!!

剛剛知道,  老師那一邊, 同妹仔同齡, 但比妹仔學得早, 考得快的同學仔, 本來今年話考LTCL, 郤又剛剛話今年暫時唔考... (當年, 妹仔剛開始學琴, 二年級, 佢已經考左5級destinction, 去年年中考左ATCL... 現在臨到報名LTCL, 郤又不考了... 似乎, 真係剩下妹仔一個... )

我同妹仔講 : 光頭仔今年唔考LTCL...

妹仔答 : 我今年考...  無論如何, 今年都考!

PS : 又遇上戰友家長, 家長話, 其實, ATCL係好難... 識得好多人都冇辦法一次過合格, 所以, 亞女合格, 已經好開心...

PS: 所以, 我都好擔心今次考LTCL... 實在, 對妹仔來說, 真正係實力的考驗!

另一階段

身邊的朋友, 子女開始步入高中... 大家三兩年沒有見面, 見面的話題有點改變... 以前, 大概講學乜學物... 升中有咩問題... 現在, 開始講囝囝囡囡想做咩工作, 想升學讀邊科...

以前, 苦苦爭逐的事情, 一時間全部不一樣... 大家不再講... 游水, 校際賽, 彈琴, 小提琴... 總之, 忽然間, 大家都不再想這些事情... 大家抬起頭, 就是子女入大學.. 選科..

又有子女讀大學的家長, 他們的擔心又不一樣...  雖然子女已在著名大學讀書, 但是, 家長仍擔心他們的求職的出路...  因為, 某某個仔讀醫科, 出來真係一條龍, 以後就穩穩妥妥做醫生... 某某個女讀完名牌大學, 一出來就入iBANK, 年薪幾十萬了...  自己細路都未知點算...

每一個階段都有每一個階段的難處...     不過, 還不是一步一步地走過... 看看犬兒犬女, 總之, 冇行差踏錯,  托賴托賴, 就會上軌道...

早一輪, 某些人對香港有個"涼薄論"... 認為香港人挨生挨死, 都無法安居... 實在是一個涼薄社會..

我就好懷疑... 其實, 有哪個社會不涼薄?? 與其說"涼薄", 不如說"現實"... 香港由開埠開始, 就是如此現實!  不過, 一代人又一代人走下來, 走了三代, 四代, 還不是如履薄冰地渡過, 在這裡安居樂業的人, 亦不知凡幾... 

我對妹仔的看法, 亦差不多... 社會很現實, 很涼薄, 競爭很大... 但是, 只要佢小心奕奕, 一步一步地走, 我樂觀地看到, 她將來會在社會中站得穩腳...

戰友

昨日, 在邨巴上遇見妹仔戰友的媽咪... 妹仔的戰友, 由鋼琴8級至ATCL都一起努力考... 戰友比妹仔大半歲,  今年中三...

不過, 戰友今年不再學琴了... 考完ATCL合格, 就停了下來... 她是妹仔最後一位戰友, 她也退役, 所以, 今年, 妹仔孤身作戰...

家長話 : 亞女唔肯再練了, 佢話, 要過一個正常的暑假... 不再閉關練琴... 其實, 都勸佢, 慢慢學翻, 唔考試, 亦唔比賽... 不過, 佢都唔肯..

我話 : 都好難講, 到這個年紀, 我地好難逼佢地.. 

妹仔回來, 我向佢報告...

佢話 : 係呀... 要過正常的暑假...

我話 : 你挨完這個暑假, 俾心機, 考埋合格... 我都冇眼睇囉...

Boyhood

睇左BOYHOOD... 三小時的電影... 中途要去廁所...

不過, 我看見有兒子的家長, 都鼓勵他們去看...  其中一個原因, 是讓他們預見男孩子的成長, 到時候, 不會覺得太突然, 太束手無策...

電影基本上是講一位男孩子由小一至高中畢業的故事... 故事完結於他入大學的時候..

其實, 故事裡的男孩一點也不壞...  只是他經過了一段成長過程..

看完電影, 我把WECHAT妹仔的表哥, 同佢講 : 我覺得男主角好似佢..

佢只問一句 : 男主角帥嗎?

我話 :帥！！！

佢只回答：那就成！！

表哥１８歲，正是那個男主角的年紀。。我相信那位男主角對別人的comment, 也是同樣的回應...  表哥的最大特徵, 就是說話永遠超低音... 咦咦哦哦一番... 永遠聽不到佢講乜...  然後, 一把頭髮掩蓋雙眼, 遮閉大半臉... 這就是那一位男主角的模樣...

哈哈... 原來... 表哥就是那典型... 所以, 大家都唔駛太緊張啦...

終於食得入口..

妹仔從小都鍾意搞搞震...

小學以前, 就在廁所亂搞... 將煮飯仔攞入廁所, 搞一大餐, 搞到濕曬... 又有泡, 又滑, 當時, 我一支沖涼液一個星期就玩完... 唉! 當然講都係唔聽, 所以屋企用最平果種..

到早兩三年, 佢轉地盤, 走去廚房玩...  玩婆婆D豆粉, 俾人鬧到飛起... 為左息事寧人, 我買D最平的麵粉俾佢, 又將一些過期物資俾佢玩... 總之, 佢用D食物來整餅... 有時連葱, 薑, 蛋都加入去玩... 當然, 我都要勸佢, 叫佢唔好玩食物... 就算要玩, 都做D食得的... 因為實在太浪費...

兼且, 洗廚房洗到我喊咁口... 

終於早幾日, 我午睡之時... 妹仔又入廚房搞...

我以為又一鑊泡..  點知, 佢自己搞左樣野, 食得架喎... 仲自己食曬...

佢話... 佢在WEB上找到一個RECIPE, 用刨刨一個薯仔, 然後加蛋, 加葱, 煎來吃... 都煎得熟喎..

PHEWWW... 浪費左咁多年, 終於做成一樣食得的... 真感恩...

如果, 當日, 我無容忍佢亂搞一通, 可能冇今日的成績...

不過, 我發現另一個問題... 我個鑊剷開始溶溶爛爛... 唉!!

TALENT

妹仔這個學期要上ART (美術)... 妹仔話, 這個美術老師很嚴格, 不單要交功課, 還要交靚功課, 所以, 今期ART打定輸數, 照計係C或D, 一定拖低GPA..

GEE... OK.. No Big Deal.. 不可能要求科科都掂... (當然, 有人係科科A, 但不是妹仔.. )

不過, 妹仔都好努力做ART功課..  近日, 佢要畫一幅素描, 畫自己隻手... 佢都好醒目, 映張相, Print out左, 然後, 照住畫...

Gee. 我初初唔知佢畫乜... 以為係卡通... 抽象畫... 因為隻手好似一隻.. 黑猩猩手.. 全隻手又肥又黑..

我問... 亞女, 你畫乜??  點解係黑猩猩手??

妹仔答... 唔係呀... 係素描呀... 不過, MISS話之前份功課太淺色, 冇SHADES of GREY.. 所以, 今次要用盡D不同的GREY LEVEL...

但係... 你全隻手都係得黑色喎...

妹仔答... OK.. 媽咪, 你幫我改下佢...

於是, 佢行開左.. 我就擦左大部份黑色... 然後再填過, 亦略改左..

妹仔返來, 話: 唔夠黑喎!!

我再加多兩筆... OK!!

我對妹仔講:  我終於見到一個畫畫天份比我差的人!!

妹仔打左我一身!!

PS:  小學時期, 唔會覺得咁參差... 科科都差不多.. 勤力一些, 就好一些... 到了中學... 有些科目, 冇天份, 就真係冇天份..  放雙倍的努力, 都徒勞無功... 不過, 對我來說, 那也是easy choice.. 冇天份的, 就別想它... 但係... 如果... 科科都冇天份, 點算?? 那麼, 可能讀書不是強項... 我也可以說... 讀書與過活並不完全相同... 我也見過很多... 沒有讀很多書的人, 後來是成功的.....但是, 也要慨嘆一聲... 到了中學, 我們作為家長, 實在沒有太多東西可以做了..