落雹

幾星期前, 介紹一班年青人睇明日之後, 裡面有落雹場面...  我還說, 香港落雹並不多見, 言猶在耳, 昨天就轟一場冰雹..

本來相約朋友去行山, 因為天氣欠佳, 而改期, 本來, 想過改地方,  甚至把活動轉入室內, 但是, 原來, 室內也並非100%安全..  ^^!

今早, 我慎重地對妹仔說, 如果見到落雹, 記住不要四圍玩, 或者出去拾一塊... 非常危險, 連頭都打穿... 一定要走避, 仲要避到石屎樓內,  千萬不要站在玻璃簷蓬下...

唉! 真係見過就知驚... 恐怕, 將來建築師要建玻璃天幕, 都要再計算一下, 超碼要承受到一個西瓜咁大的冰雹衝擊, 先至OK... ^^!

六舊腹肌拯救隊

星期六12點, 在J2或高清台, 有一個紀錄片集, 叫BONDI RESCUE, 幾好睇, 是澳洲BONDI BEACH的救生員的真人版...

除左救生員個個都有六舊腹肌, 睇見佢地出海救人, 都真係唔容易... 而且好多時, 都有D笑料.

今日一集, 救生員鐵人比賽,  跑步, 游水, 仲要在滑浪板上, 用手扒2.5KM... 用手扒, 唔係用槳... 真係少D體能都唔掂.  個海D浪仲鬼咁大, (有時, 有幾米高)... 睇見都驚!

佢地有句名言, 就係叫D泳客, 尊重個海洋... (即係中國人話, 欺山莫欺水!)

睇完套片, 覺得香港其實冇浪, 不過, 玩水上活動, 都真係要比陸上小心好多!

韓流

最近, 韓劇爆紅, 紅到連老媽子都知邊個叫金秀賢...

老媽子皺眉頭, 說: 車! 一個細路仔咁樣喎, 都唔係幾靚仔啫..

妹仔臉色一沉, 嚴重警告, 說:  你地唔好亂講野, 好易俾人打! 依家週圍都係FANS...

我慎重地說: 知道!

今日, 某皮喼股票(新秀X)爆升... 因為佢隻背囊在韓劇中亮相, 迅速爆紅, 全球賣斷貨!

妹仔叫道: 你睇下幾厲害呀!! 好心你就睇下韓劇, 來買股票啦!

我慎重地說: 哦! 下一次, 你幫我留意下, 睇下有咩名衫名鞋名袋... 名化粧品.... 就通知一聲!

ACTL 考試選曲: Horowitz plays Rachmaninoff Prelude in G, Op.32 No.5 Moderato

另一首..

ATCL 考試歌 : Rachmaninoff Prelude op. 32 n° 12 in G sharp minor

妹仔的ATCL考試選曲之一Rachmaninoff Op.32 No. 12, 以下由大師Horowitz演譯.. 神級的演譯... 希望妹仔可以掌握到這一首曲.

獨立生活

我對妹仔說: 無論你將來是否出國留學, 你都一定要住宿舍, 學下獨立生活!

妹仔答:  我有屋企, 為什麼要住宿舍?

我說:  你要學下煮飯洗衫.

妹仔對我的建議, 似乎完全沒有興趣...  她說:  在香港, 四年大學, 都只有一年住宿.. (她知道, 中大有四年一宿的安排.. )


我說:  那麼, 你大學一年級就去住宿舍...

妹仔說:  當然是第四年才去住啦!  香港交通咁方便, 根本唔駛住宿舍.

唉!  想當年, 我們讀大學, 大學生就算屈蛇(無正式宿位), 當要住在大學裡... 現在, 屋企有食有住, 有人洗衫, 有人執屋, 真係趕都唔走...  唉!  難怪, 有新聞話, 最近屈蛇的是菲傭, 因為要幫小主人打掃宿舍, 云云...

撲克遊戲

妹仔回來對我說:  我的同學很差勁,  玩鋤大D一點Strategy(策略)都沒有, 一早就出盡手中所有2仔.

我說:  她們玩得少, 你玩得多嘛!

妹仔不以為意.

我又說:  平日, 你跟我玩, 輸得多, 就學得叻左...  

以前, 妹仔玩牌唔輸得.... 後來, 大個女, 輸得起... 我就不再禮讓,  當然,  有一些出牌的方法和策略, 也是會教她的...  玩十三張也一樣,  一副牌怎樣去排列, 也是會教的...

這是遊戲, 也是訓練思考的良機.

學生?老師?

我打趣地對妹仔說:  有個老鬼朋友想學琴, 不如你去教佢.

妹仔問: 幾多錢學費?  (真市儈!)

我說: 一百蚊一堂得唔得?

妹仔想了一會...

我說:  還是不好了!  我怕你會忍受不了,  以你的過往學琴的速度, 怎能忍受老鬼們的學習能力! 罷了! 罷了!

妹仔的脾氣極差, 到時只會鬧人:  "點解教極你都唔識!?"
   

感冒季節

上星期, 妹仔感冒, 在家睡了一天...  這星期初, 我有點不妥當...  昨天睡了一個下午, 今天回復狀態, 因為堅持去做義工教書...  病了, 無人頂替, 唔掂!

今年的天氣真是攞命,  天氣從12月中開始冷, 持續冷了三個月, 當中只有幾天比較和暖... 然後就是濕涷的日子, 又潮濕又大霧...  真係無心機!

其實, 我一向不太喜歡熱天, 尤其是夏天... 但是, 冷了這段長日子, 真想見一見燦爛的陽光, 還有懷念那開心吃涷品的日子.... 

PS: 最近不敢親近雪糕汽水,  真怕病...

不再孤單

琴老師給我發了一個MSG, 說這一次ATCL考試, 另有兩位同學仔決定報名... (她們也是八級一同考試的同學)... 

真高興!  終於又有一隊人一同學習... 不用單打獨鬥! 

自從上次八級考試後, 我真覺得一隊人一起準備,  於我來說, 真是省了很多督促的功夫.. 妹仔在團隊壓力下, 會努力得多...

我又可以懶一下了...

科技之光

久未用八折的士,  因為某些原因, CALL了一部...  甫上車, 發現最大吸引之處, 乃是四部SS牌智能電話, 取代了以前六至七部普通手提(舊Nokia)..

我笑說:  師傅, 你們也用智能電話了!!

師傅說:  係呀!  依家上網架... 又可以落ORDER, 又可以睇股市, 又可以睇戲!! 冇佢唔得架!

我說:  你竟然用網絡!

師傅:  係呀!  方便好多, 快好多, 一次過出曬俾行家, 人家就可以馬上回覆... 方便一些, 更可以把客戶的電話都打上, 人家一按直通!

我:  你唔怕俾人偷電話咩?

師傅:  偷都只偷部NOTE 2咋... 其他都唔值錢, 俾人都冇人要呀!! (不過, 其他都係SS牌舊型號喎!)

我:  咁你用咩計劃呀?  無限上網?

師傅:  無限上網太貴喇, 要幾百元一個月呀!

我:  唔係呀!  T記幾十元一個月咋!

師傅:  哦! 你用3G就得!  我個係4G呀!  4G無限上網要幾百元架!!

我:  啊呀!  你係我認識的第一個用4G的人呀!  4G有什麼好處? 3G不可以嗎?

師傅:  你地得閒傾下計就得...  我地搵食, 3G太慢了, 用到發火, 4G快好多, 4G先得架!!

我簡直覺得此的士司機真是偉大的科技使用者... 到今日, 我才知道自己何其落伍, 他們把最新科枝用得淋漓盡致... 佩服!  走在時代尖端的, 是一群的士大佬!

師傅仲識得朱克伯格(FB創辦人)...  服曬!! 

花季(二)

花季

十幾年前住市區,  覺得香港冇花睇..  睇花一定要出外旅行..

後來, 搬入新界,  有一年,  坐架巴士去機場... 沿路上, 嚇然發覺, 香港D花都幾靚喎!!  原來, 三月份, 除了杜鵑花,  洋紫荊的花也很燦爛... 不過長在高高的樹上, 以前看不到... 另外, 亦有很多長在樹上的白花 (唔知咩花), 又有大紅花,  又有四季春, 又有棘杜鵑....   總之, 一路上, 都是花...

今年天氣冷,  到了三月, 杜鵑花才開....  加上其他不同的花...  在巴士上,  沿路又再次看見... 真係好多靚花...

香港...其實, 真係幾靚都有!!

老人痴呆 (2)

我問妹仔:  明天有體育堂嗎?

妹仔: 有!

走了一圈, 我又問:  明天是體育堂?

妹仔: 係呀!

臨睡前...  明天是體育堂!

妹仔:  我已經答了三次!!! 你不要再問!!!

^^!

老人痴呆

每日都要給妹仔準備早餐... 但很多時候都忘記了妹仔點了A餐, B餐定C餐...

妹仔說:  明天要吃通心粉!

我說:  腸仔通心粉?

妹仔說:  你講一次, 要腸仔嗎?

我答:  冇!

妹仔說:  要蛋嗎?

我答:  冇!

妹仔說:  要麵包嗎?

我答:  冇!

妹仔說:  你再講一次我要吃什麼?

我答:  通心粉.

但是, 第二天,  我都會常常忘記...  總之,  經常都被人鬧..  永遠係A餐變B餐, B餐變C餐... ^^!

睬你都傻!

一向對妹仔的要求, 大部份都會答應...  不過, 論到學校的午膳, 我就從沒有為她準備過.

妹仔問:  "人家都吃Home Lunch (從家裡帶飯), 不如你做飯給我帶回學校!"

我望一下婆婆,  說: "要帶飯喎!"

然後, 大家異口同聲, 一句: "睬你都傻!"